Shivapurana 4.11: ekādaśo'dhyāyaḥ | candrabhālapaśupatināthaliṅgamāhātmyavarṇanam
Śivapurāṇa (complete text) 4.11
- Language
- Sanskrit
Contents
- 4.11.21 — 5 parts
ekādaśo'dhyāyaḥ | candrabhālapaśupatināthaliṅgamāhātmyavarṇanam
4.11.1
ṛṣaya ūcuḥ |
sūta sūta mahābhāga dhanyastvaṃ śivasaktadhīḥ |
mahābalasya liṅgasya śrāviteyaṃ kathādbhutā ||
4.11.2
uttarasyāṃ diśāyāṃ ca śivaliṅgāni yāni ca |
teṣāṃ māhātmyamanaghaṃ vada tvaṃ pāpanāśakam ||
4.11.3
sūta uvāca |
śṛṇutādarato viprā auttarāṇāṃ viśeṣataḥ |
māhātmyaṃ śivaliṅgānāṃ pravadāmi samāsataḥ ||
4.11.4
gokarṇaṃ kṣetramaparaṃ mahāpātakanāśanam |
mahāvanaṃ ca tatrāsti pavitramativistaram ||
4.11.5
tatrāsti candrabhālākhyaṃ śivaliṅgamanuttamam |
rāvaṇena samānītaṃ sadbhaktyā sarvasiddhidam ||
4.11.6
tasya tatra sthitirvaidyanāthasyeva munīśvarāḥ |
sarvalokahitārthāya karuṇāsāgarasya ca ||
4.11.7
snānaṃ kṛtvā tu gokarṇe candrabhālaṃ samarcya ca |
śivalokamavāpnoti satyaṃ satyaṃ na saṃśayaḥ ||
4.11.8
candrabhālasya liṅgasya mahimā paramādbhutaḥ |
na śakyo varṇituṃ vyāsādbhaktisneharatasya hi ||
4.11.9
candrabhālamahādevaliṅgasya mahimā mahān |
yathākathañcitsamproktaḥ paraliṅgasya vai śṛṇu ||
4.11.10
dādhīcaṃ śivaliṅgaṃ tu miśrarṣivaratīrthake |
dadhīcinā munīśena suprītyā ca pratiṣṭhitam ||
4.11.11
tatra gatvā ca tattīrthe snātvā samyagvidhānataḥ |
śivaliṅgaṃ samarcedvai dādhīceśvaramādarāt ||
4.11.1_2
dadhīcamūrtistatraiva samarcyā vidhipūrvakam |
śivaprītyarthamevāśu tīrthayātrāphalārthibhiḥ ||
4.11.13
evaṃ kṛte muniśreṣṭhāḥ kṛtakṛtyo bhavennaraḥ |
iha sarvasukhaṃ bhuktvā paratra gatimāpnuyāt ||
4.11.14
naimiṣāraṇyatīrthe tu nikhilarṣipratiṣṭhitam |
ṛṣīśvaramiti khyātaṃ śivaliṅgaṃ sukhapradam ||
4.11.15
taddarśanātpūjanācca janānāṃ pāpināmapi |
bhuktirmuktiśca teṣāṃ tu paratreha munīśvarāḥ ||
4.11.16
hatyāharaṇatīrthe tu śivaliṅgamaghāpaham |
pūjanīyaṃ viśeṣeṇa hatyākoṭivināśanam ||
4.11.17
devaprayāgatīrthe tu laliteśvaranāmakam |
śivaliṅgaṃ sadā pūjyaṃ naraiḥ sarvāghanāśanam ||
4.11.18
nayapālākhyapuryāṃ tu prasiddhāyāṃ mahītale |
liṅgaṃ paśupatīśākhyaṃ sarvakāmaphalapradam ||
4.11.19
śirobhāgasvarūpeṇa śivaliṅgaṃ tadasti hi |
tatkathāṃ varṇayiṣyāmi kedāreśvaravarṇane ||
4.11.20
tadārānmuktināthākhyaṃ śivaliṅgaṃ mahādbhutam |
darśanādarcanāttasya bhuktirmuktiśca labhyate ||
4.11.21
iti vaśca samākhyātaṃ liṅgavarṇanamuttamam |
caturdikṣu muniśreṣṭhāḥ kimanyacchrotumicchatha ||
4.11.21.c1
iti śrīśivamahāpurāṇe caturthyāṃ koṭirudrasaṃhitāyāṃ candrabhālapaśupatināthaliṅgamāhātmyavarṇanaṃ nāmaikādaśo'dhyāyaḥ ||
4.11.21.p2
śrīgaṇeśāya namaḥ ||
4.11.21.p3
śrīgaurīśaṅkarābhyāṃ namaḥ ||
4.11.21.p4
śrīśivamahāpurāṇam ||
4.11.21.p5
caturthī koṭirudrasaṃhitā
Other recensions (1)
- Śivapurāṇa (complete text) — Sanskrit
Linked texts (1)
- Koṭirudrasaṃhitā — Sanskrit