Shivapurana 4.18: aṣṭādaśo'dhyāyaḥ | oṅkāreśvarajyotirliṅgamāhātmyavarṇanam
Śivapurāṇa (complete text) 4.18
- Language
- Sanskrit
Contents
- 4.18.27 — 5 parts
aṣṭādaśo'dhyāyaḥ | oṅkāreśvarajyotirliṅgamāhātmyavarṇanam
4.18.1
ṛṣaya ūcuḥ |
sūta sūta mahābhāga śrāvitā hyadbhutā kathā |
mahākālākhyaliṅgasya nijabhaktasurakṣiṇaḥ ||
4.18.2
jyotirliṅgaṃ caturthaṃ ca kṛpayā vada vittama |
oṃṅkāre parameśasya sarvapātakahāriṇaḥ ||
4.18.3
sūta uvāca |
oṃṅkāre parameśākhyaṃ liṅgamāsīdyathā dvijāḥ |
tathā vakṣyāmi vaḥ prītyā śrūyatāṃ paramarṣayaḥ ||
4.18.4
kasmiṃścitsamaye cātra nārado bhagavānmuniḥ |
gokarṇākhyaṃ śivaṃ gatvā siṣeve parabhaktimān ||
4.18.5
tataḥ sa āgato vindhyaṃ nageśaṃ munisattamaḥ |
tatraiva pūjitastena bahumānapuraḥsaram ||
4.18.6
mayi sarvaṃ vidyate ca na nyūnaṃ hi kadācana |
iti bhāvaṃ samāsthāya saṃsthito nāradāgrataḥ ||
4.18.7
tanmānaṃ tattadā śrutvā nārado mānahā tataḥ |
niḥśvasya saṃsthitastatra śrutvā vindhyo'bravīdidam ||
4.18.8
vindhya uvāca |
kiṃ nyūnaṃ ca tvayā dṛṣṭaṃ mayi niḥ śvāsakāraṇam |
tacchrutvā nārado vākyamabravītsa mahāmuniḥ ||
4.18.9
nārada uvāca |
vidyate tvayi sarvaṃ hi meruruccataraḥ punaḥ |
deveṣvapi vibhāgo'sya na tavāsti kadācana ||
4.18.10
sūta uvāca |
ityuktvā nāradastasmājjagāma ca yathāgatam |
vindhyaśca paritapto vai dhigvai me jīvitādikam ||
4.18.11
viśveśvaraṃ tathā śambhumārādhya ca tapāmyaham |
iti niścitya manasā śaṅkaraṃ śaraṇaṃ gataḥ ||
4.18.12
jagāma tatra suprītyā hyoṅkāro yatra vai svayam |
cakāra ca punastatra śivamūrtiṃ ca pārthivīm ||
4.18.13
ārādhya ca tadā śambhuṃ ṣaṇmāsaṃ sa nirantaram |
na cacāla tapaḥsthānācchivadhyānaparāyaṇaḥ ||
4.18.14
evaṃ vindhyatapo dṛṣṭvā prasannaḥ pārvatīpatiḥ |
svarūpaṃ darśayāmāsa durlabhaṃ yogināmapi ||
4.18.15
prasannaḥ sa tadovāca brūhi tvaṃ manasepsitam |
tapasā te prasanno'smi bhaktānāmīpsitapradaḥ ||
4.18.16
vindhya uvāca |
yadi prasanno deveśa buddhiṃ dehi yathepsitām |
svakāryasādhinīṃ śambho tvaṃ sadā bhaktavatsalaḥ ||
4.18.17
sūta uvāca |
tacchrutvā bhagavān śambhuściceta hṛdaye ciram |
paropatāpadaṃ vindhyo varamicchati mūḍhadhīḥ ||
4.18.18
kiṃ karomi yadetasmai varadānaṃ bhavecchubham |
maddattaṃ paraduḥkhāya varadānaṃ yathā na hi ||
4.18.19
sūta uvāca |
tathāpi dattavān śambhustasmai tadvaramuttamam |
vindhya parvatarāja tvaṃ yathecchasi tathā kuru ||
4.18.20
evaṃ ca samaye devā ṛṣayaścāmalāśayāḥ |
sampūjya śaṅkaraṃ tatra sthātavyamiti cābruvan ||
4.18.21
tacchrutvā devavacanaṃ prasannaḥ parameśvaraḥ |
tathaiva kṛtavānprītyā lokānāṃ sukhahetave ||
4.18.22
oṅkāraṃ caiva yalliṅgamekaṃ tacca dvidhā gatam |
praṇave caiva oṅkāranāmāsītsa sadāśivaḥ ||
4.18.23
pārthive caiva yajjātaṃ tadāsītparameśvaraḥ |
bhaktābhīṣṭapradau cobhau bhuktimuktipradau dvijāḥ ||
4.18.24
tatpūjāṃ ca tadā cakrurdevāśca ṛṣayastathā |
prāpurvarānanekāṃśca santoṣya vṛṣabhadhvajam ||
4.18.25
svasvasthānaṃ yayurdevā vindhyo'pi mudito'dhikam |
kāryaṃ sādhitavānsvīyaṃ paritāpaṃ jahau dvijāḥ ||
4.18.26
ya evaṃ pūjayecchambhuṃ mātṛgarbhaṃ vasenna hi |
yadabhīṣṭaṃ phalaṃ tacca prāpnuyānnātra saṃśayaḥ ||
4.18.27
sūta uvāca |
etatte sarvamākhyātamoṅkāraprabhave phalam |
ataḥ paraṃ pravakṣyāmi kedāraṃ liṅgamuttamam ||
4.18.27.c1
iti śrīśivamahāpurāṇe caturthyāṃ koṭirudrasaṃhitāyāmoṅkāreśvarajyotirliṅgamāhātmyavarṇanaṃ nāmāṣṭādaśo'dhyāyaḥ ||
4.18.27.p2
śrīgaṇeśāya namaḥ ||
4.18.27.p3
śrīgaurīśaṅkarābhyāṃ namaḥ ||
4.18.27.p4
śrīśivamahāpurāṇam ||
4.18.27.p5
caturthī koṭirudrasaṃhitā
Other recensions (1)
- Śivapurāṇa (complete text) — Sanskrit
Linked texts (1)
- Koṭirudrasaṃhitā — Sanskrit