Shivapurana 4.19: ekonaviṃśo'dhyāyaḥ | kedāreśvarajyotirliṅgamāhātmyavarṇanam
Śivapurāṇa (complete text) 4.19
- Language
- Sanskrit
Contents
- 4.19.26 — 5 parts
ekonaviṃśo'dhyāyaḥ | kedāreśvarajyotirliṅgamāhātmyavarṇanam
4.19.1
sūta uvāca |
naranārāyaṇākhyau yāvavatārau harerdvijāḥ |
tepāte bhārate khaṇḍe badaryāśrama eva hi ||
4.19.2
tābhyāṃ samprārthitaḥ śambhuḥ pārthive pūjanāya vai |
āyāti nityaṃ talliṅge bhaktādhīnatayā śivaḥ ||
4.19.3
evaṃ pūjayatoḥ śambhuṃ tayorviṣṇvavatārayoḥ |
cirakālo vyatīyāya śaivayordharmaputrayoḥ ||
4.19.4
ekasminsamaye tatra prasannaḥ parameśvaraḥ |
pratyuvāca prasanno'smi varo me vriyatāmiti ||
4.19.5
ityukte ca tadā tena naro nārāyaṇaḥ svayam |
ūcaturvacanaṃ tatra lokānāṃ hitakāmyayā ||
4.19.6
naranārāyaṇāvūcatuḥ |
yadi prasanno deveśa yadi deyo varastvayā |
sthīyatāṃ svena rūpeṇa pūjārthaṃ śaṅkara svayam ||
4.19.7
sūta uvāca |
ityuktastu tadā tābhyāṃ kedāre himasaṃśraye |
svayaṃ ca śaṅkarastasthau jyotīrūpo maheśvaraḥ ||
4.19.8
tābhyāṃ ca pūjitaścaiva sarvaduḥkhabhayāpahaḥ |
lokānāmupakārārthaṃ bhaktānāṃ darśanāya vai ||
4.19.9
svayaṃ sthitastadā śambhuḥ kedāreśvarasaṃjñakaḥ |
bhaktābhīṣṭaprado nityaṃ darśanādarcanādapi ||
4.19.10
devāśca pūjayantīha ṛṣayaśca purātanāḥ |
mano'bhīṣṭaphalaṃ te te suprasannānmaheśvarāt ||
4.19.11
bhavasya pūjanānnityaṃ badaryāśramavāsinaḥ |
prāpnuvanti yataḥ so hi bhaktābhīṣṭapradaḥ sadā ||
4.19.12
taddinaṃ hi samārabhya kedāreśvara eva ca |
pūjito yena bhaktyā vai duḥkhaṃ svapne'pi durlabham ||
4.19.13
yo vai hi pāṇḍavāndṛṣṭvā māhiṣaṃ rūpamāsthitaḥ |
māyāmāsthāya tatraiva palāyanaparo'bhavat ||
4.19.14
dhṛtaśca pāṇḍavaistatra hyavāṅmukhatayā sthitaḥ |
pucchaṃ caiva dhṛtaṃ taistu prārthitaśca punaḥpunaḥ ||
4.19.15
tadrūpeṇa sthitastatra bhaktavatsalanāmabhāk |
nayapāle śirobhāgo gatastadrūpataḥ sthitaḥ ||
4.19.16
tathaiva pūjanānnityamājñāṃ caivāpyadāttathā |
pūjitaśca svayaṃ śambhustatra tasthau varānadāt ||
4.19.17
pūjayitvā gatāste tu pāṇḍavā muditāstadā |
labdhvā cittepsitaṃ sarvaṃ vimuktāḥ sarvaduḥkhataḥ ||
4.19.18
tatra nityaṃ haraḥ sākṣātkṣetre kedārasaṃjñake |
bhāratībhiḥ prajābhiśca tathaiva paripūjyate ||
4.19.19
tatratyaṃ valayaṃ yo vai dadāti haravallabhaḥ |
hararūpāntikaṃ tacca hararūpasamanvitam ||
4.19.20
tathaiva rūpaṃ dṛṣṭvā ca sarvapāpaiḥ pramucyate |
jīvanmukto bhavetso'pi yo gato badarīvane ||
4.19.21
dṛṣṭvā rūpaṃ narasyaiva tathā nārāyaṇasya hi |
kedāreśvaraśambhośca muktibhāgī na saṃśayaḥ ||
4.19.22
kedāreśasya bhaktā ye mārgasthāstasya vai mṛtāḥ |
te'pi muktā bhavantyeva nātra kāryā vicāraṇā ||
4.19.23
gatvā tatra prītiyuktaḥ kedāreśaṃ prapūjya ca |
tatratyamudakaṃ pītvā punarjanma na vindati ||
4.19.24
khaṇḍe'smin bhārate viprā naranārāyaṇeśvaraḥ |
kedāreśaḥ prapūjyaśca sarvairjīvaiḥ subhaktitaḥ ||
4.19.25
asya khaṇḍasya sa svāmī sarveśo'pi viśeṣataḥ |
sarvakāmapradaḥ śambhuḥ kedārākhyo na saṃśayaḥ ||
4.19.26
etadvacaḥ samākhyātaṃ yatpṛṣṭamṛṣisattamāḥ |
śrutvā pāpaṃ haretsarvaṃ nātra kāryā vicāraṇā ||
4.19.26.c1
iti śrīśivamahāpurāṇe caturthyāṃ koṭirudrasaṃhitāyāṃ kedāreśvarajyotirliṅgamāhātmyavarṇanaṃ nāmaikonaviṃśo'dhyāyaḥ ||
4.19.26.p2
śrīgaṇeśāya namaḥ ||
4.19.26.p3
śrīgaurīśaṅkarābhyāṃ namaḥ ||
4.19.26.p4
śrīśivamahāpurāṇam ||
4.19.26.p5
caturthī koṭirudrasaṃhitā
Other recensions (1)
- Śivapurāṇa (complete text) — Sanskrit
Linked texts (1)
- Koṭirudrasaṃhitā — Sanskrit