Shivapurana 4.34: catustriṃśo'dhyāyaḥ | viṣṇusudarśanacakralābhavarṇanam
Śivapurāṇa (complete text) 4.34
- Language
- Sanskrit
Contents
catustriṃśo'dhyāyaḥ | viṣṇusudarśanacakralābhavarṇanam
4.34.1
vyāsa uvāca |
iti śrutvā vacastasya sūtasya ca munīśvarāḥ |
samūcustaṃ supraśasya lokānāṃ hitakāmyayā ||
4.34.2
ṛṣaya ūcuḥ |
sūta sarvaṃ vijānāsi tataḥ pṛcchāmahe vayam |
harīśvarasya liṅgasya mahimānaṃ vada prabho ||
4.34.3
cakraṃ sudarśanaṃ prāptaṃ viṣṇuneti śrutaṃ purā |
tadārādhanatastāta tatkathāṃ ca viśeṣataḥ ||
4.34.4
sūta uvāca |
śrūyatāṃ ca ṛṣiśreṣṭhā harīśvarakathā śubhā |
yataḥ sudarśanaṃ labdhaṃ viṣṇunā śaṅkarātpurā ||
4.34.5
kasmiṃścitsamaye daityāḥ sañjātā balavattarāḥ |
lokāṃste pīḍayāmāsurdharmalopaṃ ca cakrire ||
4.34.6
te devāḥ pīḍitā daityairmahābalaparākramaiḥ |
svaṃ duḥkhaṃ kathayāmāsurviṣṇuṃ nirjararakṣakam ||
4.34.7
devā ūcuḥ |
kṛpāṃ kuru prabho tvaṃ ca daityaiḥ sampīḍitā bhṛśam |
kutra yāmaśca kiṃ kurmaḥ śaraṇyaṃ tvāṃ samāśritāḥ ||
4.34.8
sūta uvāca |
ityevaṃ vacanaṃ śrutvā devānāṃ duḥkhitātmanām |
smṛtvā śivapadāmbhojaṃ viṣṇurvacanamabravīt ||
4.34.9
viṣṇuruvāca |
kariṣyāmi ca vaḥ kāryamārādhya giriśaṃ surāḥ |
baliṣṭhāḥ śatravo hyete vijetavyāḥ prayatnataḥ ||
4.34.10
sūta uvāca |
ityuktāste surāḥ sarve viṣṇunā prabhaviṣṇunā |
matvā daityānhatānduṣṭānyayurdhāma svakaṃ svakam ||
4.34.11
viṣṇurapyamarāṇāṃ tu jayārthamabhajacchivam |
sarvāmarāṇāmadhipaṃ sarvasākṣiṇamavyayam ||
4.34.12
gatvā kailāsanikaṭe tapastepe hariḥ svayam |
kṛtvā kuṇḍaṃ ca saṃsthāpya jātavedasamagrataḥ ||
4.34.13
pārthivena vidhānena mantrairnānāvidhairapi |
stotraiścaivāpyanekaiśca giriśaṃ cābhajanmudā ||
4.34.14
kamalaiḥ saraso jātairmānasākhyānmunīśvarāḥ |
baddhvā caivāsanaṃ tatra na cacāla hariḥ svayam ||
4.34.15
prasādāvadhi caivātra stheyaṃ vai sarvathā mayā |
ityevaṃ niścayaṃ kṛtvā samānarca śivaṃ hariḥ ||
4.34.16
yadā naiva harastuṣṭo babhūva haraye dvijāḥ |
tadā sa bhagavānviṣṇurvicāre tatparo'bhavat ||
4.34.17
vicāryaivaṃ svamanasi sevanaṃ bahudhā kṛtam |
tathāpi na harastuṣṭo babhūvotikaraḥ prabhuḥ ||
4.34.18
tataḥ suvismito viṣṇurbhaktyā paramayānvitaḥ |
sahasrairnāmabhiḥ prītyā tuṣṭāva parameśvaram ||
4.34.19
pratyekaṃ kamalaṃ tasmai nāmamantramudīrya ca |
pūjayāmāsa vai śambhuṃ śaraṇāgatavatsalam ||
4.34.20
parīkṣārthaṃ viṣṇubhaktestadā vai śaṅkareṇa ha |
kamalānāṃ sahasrāttu hṛtamekaṃ ca nīrajam ||
4.34.21
na jñātaṃ viṣṇunā tacca māyākāraṇamadbhutam |
nyūnaṃ taccāpi saṃjñāya tadanveṣaṇatatparaḥ ||
4.34.22
babhrāma sakalāṃ pṛthvīṃ tatprītyai sudṛḍhavrataḥ |
tadaprāpya viśuddhātmā netramekamudāharat ||
4.34.23
taṃ dṛṣṭvā sa prasanno'bhūcchaṅkaraḥ sarvaduḥkhahā |
āvirbabhūva tatraiva jagāda vacanaṃ harim ||
4.34.24
śiva uvāca |
prasanno'smi hare tubhyaṃ varaṃ brūhi yathepsitam |
mano'bhilaṣitaṃ dadmi nādeyaṃ vidyate tava ||
4.34.25
sūta uvāca |
tacchrutvā śambhuvacanaṃ keśavaḥ prītamānasaḥ |
mahāharṣasamāpanno hyabravītsāñjaliḥ śivam ||
4.34.26
viṣṇuruvāca |
vācyaṃ kiṃ me tvadagre vai hyantaryāmī tvamāsthitaḥ |
tathāpi kathyate nātha tava śāsanagauravāt ||
4.34.27
daityaiśca pīḍitaṃ viśvaṃ sukhaṃ no naḥ sadāśiva |
daityān hantuṃ mama svāminsvāyudhaṃ na pravartate ||
4.34.28
kiṃ karomi kva gacchāmi nānyo me rakṣakaḥ paraḥ |
ato'haṃ parameśāna śaraṇaṃ tvāṃ samāgataḥ ||
4.34.29
sūta uvāca |
ityuktvā ca namaskṛtya śivāya paramātmane |
sthitaścaivāgrataḥ śambhoḥ svayaṃ ca purupīḍitaḥ ||
4.34.30
sūta uvāca |
iti śrutvā vaco viṣṇordevadevo maheśvaraḥ |
dadau tasmai svakaṃ cakraṃ tejorāśiṃ sudarśanam ||
4.34.31
tatprāpya bhagavānviṣṇurdaityāṃstānbalavattarān |
jaghāna tena cakreṇa drutaṃ sarvānvinā śramam ||
4.34.32
jagatsvāsthyaṃ paraṃ lebhe babhūvuḥ sukhinaḥ surāḥ |
suprītaḥ svāyudhaṃ prāpya harirāsīnmahāsukhī ||
4.34.32.p1
ṛṣaya ūcuḥ ||
4.34.33
kiṃ tannāmasahasraṃ vai kathaya tvaṃ hi śāṅkaram |
yena tuṣṭo dadau cakraṃ haraye sa maheśvaraḥ ||
4.34.34
tanmāhātmyaṃ mama brūhi śivasaṃvādapūrvakam |
kṛpālutvaṃ ca śambhorhi viṣṇūpari yathātatham ||
4.34.35
vyāsa uvāca |
iti teṣāṃ vacaḥ śrutvā munīnāṃ bhāvitātmanām |
smṛtvā śivapadāmbhojaṃ sūto vacanamabravīt ||
4.34.35.c1
iti śrīśivamahāpurāṇe caturthyāṃ koṭirudrasaṃhitāyāṃ viṣṇusudarśanacakralābhavarṇanaṃ nāma catustriṃśo'dhyāyaḥ ||
4.34.35.p2
śrīgaṇeśāya namaḥ ||
4.34.35.p3
śrīgaurīśaṅkarābhyāṃ namaḥ ||
4.34.35.p4
śrīśivamahāpurāṇam ||
4.34.35.p5
caturthī koṭirudrasaṃhitā
Linked texts (1)
- Koṭirudrasaṃhitā — Sanskrit