Pramāṇa · Search · About · API

Shivapurana 4.35: pañcatriṃśo'dhyāyaḥ | śivasahasranāmavarṇanam

Śivapurāṇa (complete text) 4.35

Language
Sanskrit

Contents

pañcatriṃśo'dhyāyaḥ | śivasahasranāmavarṇanam

4.35.1

sūta uvāca |
śrūyatāṃ bho ṛṣiśreṣṭhā yena tuṣṭo maheśvaraḥ |
tadahaṃ kathayāmyadya śaivaṃ nāmasahasrakam ||

4.35.2

śrīviṣṇuruvāca |
śivo haro mṛḍo rudraḥ puṣkaraḥ puṣpalocanaḥ |
arthigamyaḥ sadācāraḥ śarvaḥ śambhurmaheśvaraḥ ||

4.35.3

candrāpīḍaścandramaulirviśvaṃ viśvambhareśvaraḥ |
vedāntasārasandohaḥ kapālī nīlalohitaḥ ||

4.35.4

dhyānādhāro'paricchedyo gaurībhartā gaṇeśvaraḥ |
aṣṭamūrtirviśvamūrtistrivargasvargasādhanaḥ ||

4.35.5

jñānagamyo dṛḍhaprajño devadevastrilocanaḥ |
vāmadevo mahādevaḥ paṭuḥ parivṛḍho dṛḍhaḥ ||

4.35.6

viśvarūpo virūpākṣo vāgīśaḥ śucisattamaḥ |
sarvapramāṇasaṃvādī vṛṣāṅko vṛṣavāhanaḥ ||

4.35.7

īśaḥ pinākī khaṭvāṅgī citraveṣaścirantanaḥ |
tamoharo mahāyogī goptā brahmā ca dhūrjaṭiḥ ||

4.35.8

kālakālaḥ kṛttivāsāḥ subhagaḥ praṇavātmakaḥ |
unnadhraḥ puruṣo juṣyo durvāsāḥ puraśāsanaḥ ||

4.35.9

divyāyudhaḥ skandaguruḥ parameṣṭhī parātparaḥ |
anādimadhyanidhano girīśo girijādhavaḥ ||

4.35.10

kuberabandhuḥ śrīkaṇṭho lokavarṇottamo mṛduḥ |
samādhivedyaḥ kodaṇḍī nīlakaṇṭhaḥ paraśvadhī ||

4.35.11

viśālākṣo mṛgavyādhaḥ sureśaḥ sūryatāpanaḥ |
dharmadhāma kṣamākṣetraṃ bhagavān bhaganetrabhit ||

4.35.12

ugraḥ paśupatistārkṣyaḥ priyabhaktaḥ parantapaḥ |
dātā dayākaro dakṣaḥ kapardī kāmaśāsanaḥ ||

4.35.13

śmaśānanilayaḥ sūkṣmaḥ śmaśānastho maheśvaraḥ |
lokakartā mṛgapatirmahākartā mahauṣadhiḥ ||

4.35.14

uttaro gopatirgoptā jñānagamyaḥ purātanaḥ |
nītiḥ sunītiḥ śuddhātmā somaḥ somarataḥ sukhī ||

4.35.15

somapo'mṛtapaḥ saumyo mahātejā mahādyutiḥ |
tejomayo'mṛtamayo'nnamayaśca sudhāpatiḥ ||

4.35.16

ajātaśatrurālokaḥ sambhāvyo havyavāhanaḥ |
lokakaro vedakaraḥ sūtrakāraḥ sanātanaḥ ||

4.35.17

maharṣikapilācāryo viśvadīptistrilocanaḥ |
pinākapāṇirbhūdevaḥ svastidaḥ svastikṛtsudhīḥ ||

4.35.18

dhātṛdhāmā dhāmakaraḥ sarvagaḥ sarvagocaraḥ |
brahmasṛgviśvasṛksargaḥ karṇikārapriyaḥ kaviḥ ||

4.35.19

śākho viśākho gośākhaḥ śivo bhiṣaganuttamaḥ |
gaṅgāplavodako bhavyaḥ puṣkalaḥ sthapatiḥ sthiraḥ ||

4.35.20

vijitātmā vidheyātmā bhūtavāhanasārathiḥ |
sagaṇo gaṇakāyaśca sukīrtiśichannasaṃśayaḥ ||

4.35.21

kāmadevaḥ kāmapālo bhasmoddhūlitavigrahaḥ |
bhasmapriyo bhasmaśāyī kāmī kāntaḥ kṛtāgamaḥ ||

4.35.22

samāvarto'nivṛttātmā dharmapuñjaḥ sadāśivaḥ |
akalmaṣaścaturbāhurdurāvāso durāsadaḥ ||

4.35.23

durlabho durgamo durgaḥ sarvāyudhaviśāradaḥ |
adhyātmayoganilayaḥ sutantustantuvardhanaḥ ||

4.35.24

śubhāṅgo lokasāraṅgo jagadīśo janārdanaḥ |
bhasmaśuddhikaro merurojasvī śuddhavigrahaḥ ||

4.35.25

asādhyaḥ sādhusādhyaśca bhṛtyamarkaṭarūpadhṛk |
hiraṇyaretāḥ paurāṇo ripujīvaharo balī ||

4.35.26

mahāhrado mahāgartaḥ siddhavṛndāravanditaḥ |
vyāghracarmāmbaro vyālī mahābhūto mahānidhiḥ ||

4.35.27

amṛtāśo'mṛtavapuḥ pāñcajanyaḥ prabhañjanaḥ |
pañcaviṃśatitattvasthaḥ pārijātaḥ parāvaraḥ ||

4.35.28

sulabhaḥ suvrataḥ śūro brahmavedanidhirnidhiḥ |
varṇāśramagururvarṇī śatrujicchatrutāpanaḥ ||

4.35.29

āśramaḥ kṣapaṇaḥ kṣāmo jñānavānacaleśvaraḥ |
pramāṇabhūto durjñeyaḥ suparṇo vāyuvāhanaḥ ||

4.35.30

dhanurdharo dhanurvedo guṇarāśirguṇākaraḥ |
satyaḥ satyaparo'dīno dharmāṅgo dharmasādhanaḥ ||

4.35.31

anantadṛṣṭirānando daṇḍo damayitā damaḥ |
abhivādyo mahāmāyo viśvakarmaviśāradaḥ ||

4.35.32

vītarāgo vinītātmā tapasvī bhūtabhāvanaḥ |
unmattaveṣaḥ pracchanno jitakāmo'jitapriyaḥ ||

4.35.33

kalyāṇaprakṛtiḥ kalpaḥ sarvalokaprajāpatiḥ |
tarasvī tārako dhīmān pradhānaḥ prabhuravyayaḥ ||

4.35.34

lokapālo'ntarhitātmā kalpādiḥ kamalekṣaṇaḥ |
vedaśāstrārthatattvajño'niyamo niyatāśrayaḥ ||

4.35.35

candraḥ sūryaḥ śaniḥ keturvarāṅgo vidrumacchaviḥ |
bhaktivaśyaḥ parabrahma mṛgabāṇārpaṇo'naghaḥ ||

4.35.36

adriradryālayaḥ kāntaḥ paramātmā jagadguruḥ |
sarvakarmālayastuṣṭo maṅgalyo maṅgalāvṛtaḥ ||

4.35.37

mahātapā dīrghatapāḥ sthaviṣṭhaḥ sthaviro dhruvaḥ |
ahaḥ saṃvatsaro vyāptiḥ pramāṇaṃ paramaṃ tapaḥ ||

4.35.38

saṃvatsarakaro mantrapratyayaḥ sarvadarśanaḥ |
ajaḥ sarveśvaraḥ siddho mahāretā mahābalaḥ ||

4.35.39

yogī yogyo mahātejāḥ siddhiḥ sarvādiragrahaḥ |
vasurvasumanāḥ satyaḥ sarvapāpaharo haraḥ ||

4.35.40

sukīrtiśobhanaḥ śrīmān vedāṅgo vedavinmuniḥ |
bhrājiṣṇurbhojanaṃ bhoktā lokanātho durādharaḥ ||

4.35.41

amṛtaḥ śāśvataḥ śānto bāṇahastaḥ pratāpavān |
kamaṇḍaludharo dhanvī avāṅmanasagocaraḥ ||

4.35.42

atīndriyo mahāmāyaḥ sarvāvāsaścatuṣpathaḥ |
kālayogī mahānādo mahotsāho mahābalaḥ ||

4.35.43

mahābuddhirmahāvīryo bhūtacārī purandaraḥ |
niśācaraḥ pretacārī mahāśaktirmahādyutiḥ ||

4.35.44

anirdeśyavapuḥ śrīmān sarvācāryo manogatiḥ |
bahuśruto'mahāmāyo niyatātmā dhruvo'dhruvaḥ ||

4.35.45

ojastejodyutidharo janakaḥ sarvaśāsanaḥ |
nṛtyapriyo nityanṛtyaḥ prakāśātmā prakāśakaḥ ||

4.35.46

spaṣṭākṣaro budho mantraḥ samānaḥ sārasamplavaḥ |
yugādikṛdyugāvarto gambhīro vṛṣavāhanaḥ ||

4.35.47

iṣṭo'viśiṣṭaḥ śiṣṭeṣṭaḥ sulabhaḥ sāraśodhanaḥ |
tīrtharūpastīrthanāmā tīrthadṛśyastu tīrthadaḥ ||

4.35.48

apānnidhiradhiṣṭhānaṃ durjayo jayakālavit |
pratiṣṭhitaḥ pramāṇajño hiraṇyakavaco hariḥ ||

4.35.49

vimocanaḥ suragaṇo vidyeśo bindusaṃśrayaḥ |
bālarūpo'balonmatto'vikartā gahano guhaḥ ||

4.35.50

karaṇaṃ kāraṇaṃ kartā sarvabandhavimocanaḥ |
vyavasāyo vyavasthānaḥ sthānado jagadādijaḥ ||

4.35.51

gurudo lalito'bhedo bhāvātmātmani saṃsthitaḥ |
vīreśvaro vīrabhadro vīrāsanavidhirvirāṭ ||

4.35.52

vīracūḍāmaṇirvettā cidānando nadīdharaḥ |
ājñādhārastriśūlī ca śipiviṣṭaḥ śivālayaḥ ||

4.35.53

bālakhilyo mahācāpastigmāṃśurbadhiraḥ khagaḥ |
abhirāmaḥ suśaraṇaḥ subrahmaṇyaḥ sudhāpatiḥ ||

4.35.54

maghavānkauśiko gomānvirāmaḥ sarvasādhanaḥ |
lalāṭākṣo viśvadehaḥ sāraḥ saṃsāracakrabhṛt ||

4.35.55

amoghadaṇḍo madhyastho hiraṇyo brahmavarcasī |
paramārthaḥ paro māyī śambaro vyāghralocanaḥ ||

4.35.56

rucirvirañciḥ svarbandhurvācaspatiraharpatiḥ |
ravirvirocanaḥ skandaḥ śāstā vaivasvato yamaḥ ||

4.35.57

yuktirunnatakīrtiśca sānurāgaḥ parañjayaḥ |
kailāsādhipatiḥ kāntaḥ savitā ravilocanaḥ ||

4.35.58

vidvattamo vītabhayo viśvabharttānivāritaḥ |
nityo niyatakalyāṇaḥ puṇyaśravaṇakīrtanaḥ ||

4.35.59

dūraśravā viśvasaho dhyeyo duḥsvapnanāśanaḥ |
uttāraṇo duṣkṛtihā vijñeyo duḥsaho'bhavaḥ ||

4.35.60

anādirbhūrbhuvo lakṣmīḥ kirīṭī tridaśādhipaḥ |
viśvagoptā viśvakartā suvīro rucirāṅgadaḥ ||

4.35.61

janano janajanmādiḥ prītimānnītimāndhavaḥ |
vasiṣṭhaḥ kaśyapo bhānurbhīmo bhīmaparākramaḥ ||

4.35.62

praṇavaḥ satpathācāro mahākośo mahādhanaḥ |
janmādhipo mahādevaḥ sakalāgamapāragaḥ ||

4.35.63

tattvaṃ tattvavidekātmā vibhurviśvavibhūṣaṇaḥ |
ṛṣirbrāhmaṇa aiśvaryajanmamṛtyujarātigaḥ ||

4.35.64

pañcayajñasamutpattirviśveśo vimalodayaḥ |
ātmayoniranādyanto vatsalo bhaktalokadhṛk ||

4.35.65

gāyatrīvallabhaḥ prāṃśurviśvāvāsaḥ prabhākaraḥ |
śiśurgirirataḥ samrāṭ suṣeṇaḥ suraśatruhā ||

4.35.66

amogho'riṣṭanemiśca kumudo vigatajvaraḥ |
svayañjyotistanujyotirātmajyotiracañcalaḥ ||

4.35.67

piṅgalaḥ kapilaśmaśrurbhālanetrastrayītanuḥ |
jñānaskando mahānītirviśvotpattirupaplavaḥ ||

4.35.68

bhago vivasvānādityo yogapāro divaspatiḥ |
kalyāṇaguṇanāmā ca pāpahā puṇyadarśanaḥ ||

4.35.69

udārakīrtirudyogī sadyogī sadasanmayaḥ |
nakṣatramālī nākeśaḥ svādhiṣṭhānapadāśrayaḥ ||

4.35.70

pavitraḥ pāpahārī ca maṇipūro nabhogatiḥ |
hṛtpuṇḍarīkamāsīnaḥ śakraḥ śānto vṛṣākapiḥ ||

4.35.71

uṣṇo gṛhapatiḥ kṛṣṇaḥ samartho'narthanāśanaḥ |
adharmaśatrurajñeyaḥ puruhūtaḥ puruśrutaḥ ||

4.35.72

brahmagarbho bṛhadgarbho dharmadhenurdhanāgamaḥ |
jagaddhitaiṣī sugataḥ kumāraḥ kuśalāgamaḥ ||

4.35.73

hiraṇyavarṇo jyotiṣmānnānābhūtarato dhvaniḥ |
arāgo nayanādhyakṣo viśvāmitro dhaneśvaraḥ ||

4.35.74

brahmajyotirvasudhāmā mahājyotiranuttamaḥ |
mātāmaho mātariśvā nabhasvānnāgahāradhṛk ||

4.35.75

pulastyaḥ pulaho'gastyo jātūkarṇyaḥ parāśaraḥ |
nirāvaraṇanirvāro vairañcyo viṣṭaraśravāḥ ||

4.35.76

ātmabhūraniruddho'trirjñānamūrtirmahāyaśāḥ |
lokavīrāgraṇīrvīraścaṇḍaḥ satyaparākramaḥ ||

4.35.77

vyālakalpo mahākalpaḥ kalpavṛkṣaḥ kalādharaḥ |
alaṅkariṣṇuracalo rociṣṇurvikramonnataḥ ||

4.35.78

āyuḥśabdapatirvegī plavanaḥ śikhisārathiḥ |
asaṃsṛṣṭo'tithiḥ śakrapramāthī pādapāsanaḥ ||

4.35.79

vasuśravā havyavāhaḥ pratapto viśvabhojanaḥ |
japyo jarādiśamano lohitātmā tanūnapāt ||

4.35.80

bṛhadaśvo nabhoyoniḥ supratīkastamisrahā |
nidāghastapano meghaḥ svakṣaḥ parapurañjayaḥ ||

4.35.81

sukhānilaḥ suniṣpannaḥ surabhiḥ śiśirātmakaḥ |
vasanto mādhavo grīṣmo nabhasyo bījavāhanaḥ ||

4.35.82

aṅgirā gururātreyo vimalo viśvavāhanaḥ |
pāvanaḥ sumatirvidvāṃstraividyo varavāhanaḥ ||

4.35.83

manobuddhirahaṅkāraḥ kṣetrajñaḥ kṣetrapālakaḥ |
jamadagnirbalanidhirvigālo viśvagālavaḥ ||

4.35.84

aghoro'nuttaro yajñaḥ śreṣṭho niḥśreyasapradaḥ |
śailo gaganakundābho dānavārirarindamaḥ ||

4.35.85

rajanījanakaścārurniḥśalyo lokaśalyadhṛk |
caturvedaścaturbhāvaścaturaścaturapriyaḥ ||

4.35.86

āmnāyo'tha samāmnāyastīrthadevaśivālayaḥ |
bahurūpo mahārūpaḥ sarvarūpaścarācaraḥ ||

4.35.87

nyāyanirmāyako nyāyī nyāyagamyo nirañjanaḥ |
sahasramūrdhā devendraḥ sarvaśastraprabhañjanaḥ ||

4.35.88

muṇḍo virūpo vikrānto daṇḍī dānto guṇottamaḥ |
piṅgalākṣo janādhyakṣo nīlagrīvo nirāmayaḥ ||

4.35.89

sahasrabāhuḥ sarveśaḥ śaraṇyaḥ sarvalokadhṛk |
padmāsanaḥ paraṃ jyotiḥ pāramparyaphalapradaḥ ||

4.35.90

padmagarbho mahāgarbho viśvagarbho vicakṣaṇaḥ |
parāvarajño varado vareṇyaśca mahāsvanaḥ ||

4.35.91

devāsuragururdevo devāsuranamaskṛtaḥ |
devāsuramahāmitro devāsuramaheśvaraḥ ||

4.35.92

devāsureśvaro divyo devāsuramahāśrayaḥ |
devadevamayo'cintyo devadevātmasambhavaḥ ||

4.35.93

sadyonirasuravyāghro devasiṃho divākaraḥ |
vibudhāgracaraśreṣṭhaḥ sarvadevottamottamaḥ ||

4.35.94

śivajñānarataḥ śrīmān śikhiśrīparvatapriyaḥ |
vajrahastaḥ siddhakhaṅgo narasiṃhanipātanaḥ ||

4.35.95

brahmacārī lokacārī dharmacārī dhanādhipaḥ |
nandī nandīśvaro'nanto nagnavratadharaḥ śuciḥ ||

4.35.96

liṅgādhyakṣaḥ surādhyakṣo yogādhyakṣo yugāvahaḥ |
svadharmā svargataḥ svargasvaraḥ svaramayasvanaḥ ||

4.35.97

bāṇādhyakṣo bījakartā dharmakṛddharmasambhavaḥ |
dambho lobho'rthavicchambhuḥ sarvabhūtamaheśvaraḥ ||

4.35.98

śmaśānanilayastryakṣaḥ seturapratimākṛtiḥ |
lokottarasphuṭālokastryambako nāgabhūṣaṇaḥ ||

4.35.99

andhakārirmakhadveṣī viṣṇukandharapātanaḥ |
hīnadoṣo'kṣayaguṇo dakṣāriḥ pūṣadantabhit ||

4.35.100

dhūrjaṭiḥ khaṇḍaparaśuḥ sakalo niṣkalo'naghaḥ |
akālaḥ sakalādhāraḥ pāṇḍurābho mṛḍo naṭaḥ ||

4.35.101

pūrṇaḥ pūrayitā puṇyaḥ sukumāraḥ sulocanaḥ |
sāmageyapriyo'krūraḥ puṇyakīrtiranāmayaḥ ||

4.35.102

manojavastīrthakaro jaṭilo jīviteśvaraḥ |
jīvitāntakaro nityo vasuretā vasupradaḥ ||

4.35.103

sadgatiḥ satkṛtiḥ siddhiḥ sajjātiḥ khalakaṇṭakaḥ |
kalādharo mahākālabhūtaḥ satyaparāyaṇaḥ ||

4.35.104

lokakalyāṇakartā ca lokottarasukhālayaḥ |
candrasañjīvanaḥ śāstā lokagūḍho mahādhipaḥ ||

4.35.105

lokabandhurlokanāthaḥ kṛtajñaḥ kīrtibhūṣaṇaḥ |
anapāyo'kṣaraḥ kāntaḥ sarvaśastrabhṛtāṃ varaḥ ||

4.35.106

tejomayo dyutidharo lokānāmagraṇīraṇuḥ |
śucismitaḥ prasannātmā durjeyo duratikramaḥ ||

4.35.107

jyotirmayo jagannātho nirākāro jaleśvaraḥ |
tumbavīṇo mahākopo viśokaḥ śokanāśanaḥ ||

4.35.108

trilokapastrilokeśaḥ sarvaśuddhiradhokṣajaḥ |
avyaktalakṣaṇo devo vyaktāvyakto viśāmpatiḥ ||

4.35.109

varaśīlo varaguṇaḥ sāro mānadhano mayaḥ |
brahmā viṣṇuḥ prajāpālo haṃso haṃsagatirvayaḥ ||

4.35.110

vedhā vidhātā dhātā ca sraṣṭā hartā caturmukhaḥ |
kailāsaśikharāvāsī sarvāvāsī sadāgatiḥ ||

4.35.111

hiraṇyagarbho druhiṇo bhūtapālo'tha bhūpatiḥ |
sadyogī yogavidyogī varado brāhmaṇapriyaḥ ||

4.35.112

devapriyo devanātho devajño devacintakaḥ |
viṣamākṣo viśālākṣo vṛṣado vṛṣavardhanaḥ ||

4.35.113

nirmamo nirahaṅkāro nirmoho nirupadravaḥ |
darpahā darpado dṛptaḥ sarvartuparivartakaḥ ||

4.35.114

sahasrajit sahasrārciḥ snigdhaprakṛtidakṣiṇaḥ |
bhūtabhavyabhavannāthaḥ prabhavo bhūtināśanaḥ ||

4.35.115

artho'nartho mahākośaḥ parakāryaikapaṇḍitaḥ |
niṣkaṇṭakaḥ kṛtānando nirvyājo vyājamardanaḥ ||

4.35.116

sattvavānsāttvikaḥ satyakīrtiḥ snehakṛtāgamaḥ |
akampito guṇagrāhī naikātmā naikakarmakṛt ||

4.35.117

suprītaḥ sumukhaḥ sūkṣmaḥ sukaro dakṣiṇānilaḥ |
nandiskandhadharo dhuryaḥ prakaṭaḥ prītivardhanaḥ ||

4.35.118

aparājitaḥ sarvasattvo govindaḥ sattvavāhanaḥ |
adhṛtaḥ svadhṛtaḥ siddhaḥ pūtamūrtiryaśodhanaḥ ||

4.35.119

vārāhaśṛṅgadhṛkchṛṅgī balavānekanāyakaḥ |
śrutiprakāśaḥ śrutimānekabandhuranekakṛt ||

4.35.120

śrīvatsalaśivārambhaḥ śāntabhadraḥ samo yaśaḥ |
bhūśayo bhūṣaṇo bhūtirbhūtakṛd bhūtabhāvanaḥ ||

4.35.121

akampo bhaktikāyastu kālahā nīlalohitaḥ |
satyavratamahātyāgī nityaśāntiparāyaṇaḥ ||

4.35.122

parārthavṛttirvarado viraktastu viśāradaḥ |
śubhadaḥ śubhakartā ca śubhanāmā śubhaḥ svayam ||

4.35.123

anarthito'guṇaḥ sākṣī hyakartā kanakaprabhaḥ |
svabhāvabhadro madhyasthaḥ śatrughno vighnanāśanaḥ ||

4.35.124

śikhaṇḍī kavacī śūlī jaṭī muṇḍī ca kuṇḍalī |
amṛtyuḥ sarvadṛksiṃhastejorāśirmahāmaṇiḥ ||

4.35.125

asaṅkhyeyo'prameyātmā vīryavān vīryakovidaḥ |
vedyaścaiva viyogātmā parāvaramunīśvaraḥ ||

4.35.126

anuttamo durādharṣo madhurapriyadarśanaḥ |
sureśaḥ śaraṇaṃ sarvaḥ śabdabrahma satāṃ gatiḥ ||

4.35.127

kālapakṣaḥ kālakālaḥ kaṅkaṇīkṛtavāsukiḥ |
maheṣvāso mahībhartā niṣkalaṅko viśṛṅkhalaḥ ||

4.35.128

dyumaṇistaraṇirdhanyaḥ siddhidaḥ siddhisādhanaḥ |
viśvataḥ saṃvṛtaḥ stutyo vyūḍhorasko mahābhujaḥ ||

4.35.129

sarvayonirnirātaṅko naranārāyaṇapriyaḥ |
nirlepo niṣprapañcātmā nirvyaṅgo vyaṅganāśanaḥ ||

4.35.130

stavyaḥ stavapriyaḥ stotā vyāsamūrtirniraṅkuśaḥ |
niravadyamayopāyo vidyārāśī rasapriyaḥ ||

4.35.131

praśāntabuddhirakṣuṇṇaḥ saṅgrahī nityasundaraḥ |
vaiyāghradhuryo dhātrīśaḥ śākalyaḥ śarvarīpatiḥ ||

4.35.132

paramārthagururdattaḥ sūrirāśritavatsalaḥ |
somo rasajño rasadaḥ sarvasattvāvalambanaḥ ||

4.35.133

evaṃ nāmnāṃ sahasreṇa tuṣṭāva hi haraṃ hariḥ |
prārthayāmāsa śambhuṃ vai pūjayāmāsa paṅkajaiḥ ||

4.35.134

tataḥ sa kautukī śambhuścakāra caritaṃ dvijāḥ |
mahadbhutaṃ sukhakaraṃ tadeva śṛṇutādarāt ||

4.35.134.c1

iti śrīśivamahāpurāṇe caturthyāṃ koṭirudrasaṃhitāyāṃ śivasahasranāmavarṇanaṃ nāma pañcatriṃśo'dhyāyaḥ ||

4.35.134.p2

śrīgaṇeśāya namaḥ ||

4.35.134.p3

śrīgaurīśaṅkarābhyāṃ namaḥ ||

4.35.134.p4

śrīśivamahāpurāṇam ||

4.35.134.p5

caturthī koṭirudrasaṃhitā

Linked texts (8)