Pramāṇa · Search · About · API

Shivapurana 4.36: ṣaṭtriṃśo'dhyāyaḥ | śivasahasranāmastotraphalavarṇanam

Śivapurāṇa (complete text) 4.36

Language
Sanskrit

Contents

ṣaṭtriṃśo'dhyāyaḥ | śivasahasranāmastotraphalavarṇanam

4.36.1

sūta uvāca |
śrutvā viṣṇukṛtaṃ divyaṃ paranāmavibhūṣitam |
sahasranāma svastotraṃ prasanno'bhūnmaheśvaraḥ ||

4.36.2

parīkṣārthaṃ harerīśaḥ kamaleṣu maheśvaraḥ |
gopayāmāsa kamalaṃ tadaikaṃ bhuvaneśvaraḥ ||

4.36.3

paṅkajeṣu tadā teṣu sahasreṣu babhūva ca |
nyūnamekaṃ tadā viṣṇurvihvalaḥ śivapūjane ||

4.36.4

hṛdā vicāritaṃ tena kuto vai kamalaṃ gatam |
yātaṃ yātu sukhenaiva mannetraṃ kamalaṃ na kim ||

4.36.5

jñātveti netramuddhṛtya sarvasattvāvalambanāt |
pūjayāmāsa bhāvena stavayāmāsa tena ca ||

4.36.6

tatastutamatho dṛṣṭvā tathābhūtaṃ haro harim |
mā meti vyāharanneva prādurāsījjagadguruḥ ||

4.36.7

tasmādavatatārāśu maṇḍalātpārthivasya ca |
pratiṣṭhitasya hariṇā svaliṅgasya maheśvaraḥ ||

4.36.8

yathoktarūpiṇaṃ śambhuṃ tejorāśisamutthitam |
namaskṛtya puraḥ sthitvā sa tuṣṭāva viśeṣataḥ ||

4.36.9

tadā prāha mahādevaḥ prasannaḥ prahasanniva |
samprekṣya kṛpayā viṣṇuṃ kṛtāñjalipuṭaṃ sthitam ||

4.36.10

śaṅkara uvāca |
jñātaṃ mayedaṃ sakalaṃ tava cittepsitaṃ hare |
devakāryaṃ viśeṣeṇa devakāryaratātmanaḥ ||

4.36.11

devakāryasya siddhyarthaṃ daityanāśāya cāśramam |
sudarśanākhyaṃ cakraṃ ca dadāmi tava śobhanam ||

4.36.12

yadrūpaṃ bhavatā dṛṣṭaṃ sarvalokasukhāvaham |
hitāya tava deveśa dhṛtaṃ bhāvaya taddhruvam ||

4.36.13

raṇājire smṛtaṃ tadvai devānāṃ duḥkhanāśanam |
idaṃ cakramidaṃ rūpamidaṃ nāmasahasrakam ||

4.36.14

ye śṛṇvanti sadā bhaktyā siddhiḥ syādanapāyinī |
kāmānāṃ sakalānāṃ ca prasādānmama suvrata ||

4.36.15

sūta uvāca |
evamuktvā dadau cakraṃ sūryāyutasamaprabham |
sudarśanaṃ svapādotthaṃ sarvaśatruvināśanam ||

4.36.16

viṣṇuścāpi susaṃskṛtya jagrāhodaṅmukhastadā |
namaskṛtya mahādevaṃ viṣṇurvacanamabravīt ||

4.36.17

viṣṇuruvāca |
śṛṇu deva mayā dhyeyaṃ paṭhanīyaṃ ca kiṃ prabho |
duḥkhānāṃ nāśanārthaṃ hi vada tvaṃ lokaśaṅkara ||

4.36.18

sūta uvāca |
iti pṛṣṭastadā tena santuṣṭastu śivo'bravīt |
prasannamānaso bhūtvā viṣṇuṃ devasahāyakam ||

4.36.19

śiva uvāca |
rūpaṃ dhyeyaṃ hare me hi sarvānarthapraśāntaye |
anekaduḥkhanāśārthaṃ paṭha nāmasahasrakam ||

4.36.20

dhāryaṃ cakraṃ sadā me hi sarvābhīṣṭasya siddhaye |
tvayā viṣṇo prayatnena sarvacakravaraṃ tvidam ||

4.36.21

anye ca ye paṭhiṣyanti pāṭhayiṣyanti nityaśaḥ |
teṣāṃ duḥkhaṃ na svapne'pi jāyate nātra saṃśayaḥ ||

4.36.22

rājñāṃ ca saṅkaṭe prāpte śatāvṛttiṃ caredyadā |
sāṅgaṃ ca vidhisaṃyuktaṃ kalyāṇaṃ labhate naraḥ ||

4.36.23

roganāśakaraṃ hyetadvidyāvittadamuttamam |
sarvakāmapradaṃ puṇyaṃ śivabhaktipradaṃ sadā ||

4.36.24

yaduddiśya phalaṃ śreṣṭhaṃ paṭhiṣyanti narāstviha |
lapsyante nātra sandehaḥ phalaṃ tatsatyamuttamam ||

4.36.25

yaśca prātaḥ samutthāya pūjāṃ kṛtvā madīyikām |
paṭhate matsamakṣaṃ vai nityaṃ siddhirna dūrataḥ ||

4.36.26

aihikīṃ siddhimāpnoti nikhilāṃ sarvakāmikām |
ante sāyujyamuktiṃ vai prāpnotyatra na saṃśayaḥ ||

4.36.27

sūta uvāca |
evamuktvā tadā viṣṇuṃ śaṅkaraḥ prītamānasaḥ |
upaspṛśya karābhyāṃ tamuvāca giriśaḥ punaḥ ||

4.36.28

śiva uvāca |
varado'smi suraśreṣṭha varānvṛṇu yathepsitān |
bhaktyā vaśīkṛto nūnaṃ stavenānena suvrata ||

4.36.29

sūta uvāca |
ityukto devadevena devadevaṃ praṇamya tam |
suprasannataro viṣṇuḥ sāñjalirvākyamabravīt ||

4.36.30

viṣṇuruvāca |
yathedānīṃ kṛpā nātha kriyate cānyataḥ parā |
kāryā caiva viśeṣeṇa kṛpālutvāttvayā prabho ||

4.36.31

tvayi bhaktirmahādeva prasīda varamuttamam |
nānyamicchāmi bhaktānāmārttayo naiva yatprabho ||

4.36.32

sūta uvāca |
tacchrutvā vacanaṃ tasya dayāvānsutarāṃ bhavaḥ |
pasparśa ca tadaṅgaṃ vai prāha śītāṃśuśekharaḥ ||

4.36.33

śiva uvāca |
mayi bhaktiḥ sadā te tu hare syādanapāyinī |
sadā vandyaśca pūjyaśca loke bhava surairapi ||

4.36.34

viśvambhareti te nāma sarvapāpaharaṃ param |
bhaviṣyati na sandeho matprasādātsurottama ||

4.36.35

sūta uvāca |
ityuktvāntardadhe rudraḥ sarvadeveśvaraḥ prabhuḥ |
paśyatastasya viṣṇostu tatraiva ca munīśvarāḥ ||

4.36.36

janārdano'pi bhagavān vacanācchaṅkarasya ca |
prāpya cakraṃ śubhaṃ tadvai jaharṣāti svacetasi ||

4.36.37

kṛtvā dhyānaṃ ca tacchambhoḥ stotrametannirantaram |
papāṭhādhyāpayāmāsa bhaktebhyastadupādiśat ||

4.36.38

iti pṛṣṭaṃ mayākhyātaṃ śṛṇvatāṃ pāpahārakam |
ataḥ paraṃ ca kiṃ śreṣṭhāḥ praṣṭumicchatha vai punaḥ ||

4.36.38.c1

iti śrīśivamahāpurāṇe caturthyāṃ koṭirudrasaṃhitāyāṃ śivasahasranāmastotraphalavarṇanaṃ nāma ṣaṭtriṃśo'dhyāyaḥ ||

4.36.38.p2

śrīgaṇeśāya namaḥ ||

4.36.38.p3

śrīgaurīśaṅkarābhyāṃ namaḥ ||

4.36.38.p4

śrīśivamahāpurāṇam ||

4.36.38.p5

caturthī koṭirudrasaṃhitā

Linked texts (3)