Shivapurana 4.39: ekonacatvāriṃśo'dhyāyaḥ | śivarātrivratodyāpanam
Śivapurāṇa (complete text) 4.39
- Language
- Sanskrit
Contents
ekonacatvāriṃśo'dhyāyaḥ | śivarātrivratodyāpanam
4.39.1
ṛṣaya ucuḥ |
udyāpanavidhiṃ brūhi śivarātrivratasya ca |
yatkṛtvā śaṅkaraḥ sākṣātprasanno bhavati dhruvam ||
4.39.2
sūta uvāca |
śrūyatāmṛṣayo bhaktyā tadudyāpanamādarāt |
yasyānuṣṭhānataḥ pūrṇaṃ vrataṃ bhavati tad dhruvam ||
4.39.3
caturdaśābdaṃ kartavyaṃ śivarātrivrataṃ śubham |
ekabhaktaṃ trayodaśyāṃ caturdaśyāmupoṣaṇam ||
4.39.4
śivarātridine prāpte nityaṃ sampādya vai vidhim |
śivālayaṃ tato gatvā pūjāṃ kṛtvā yathāvidhi ||
4.39.4.p1
tataśca kārayeddivyaṃ maṇḍalaṃ tatra yatnataḥ |
gaurītilakanāmnā vai prasiddhaṃ bhuvanatraye|5 ||
4.39.6
tanmadhye lekhayeddivyaṃ liṅgatobhadramaṇḍalam |
athavā sarvatobhadraṃ maṇḍapāntaḥ prakalpayet ||
4.39.7
kumbhāstatra prakartavyāḥ prājāpatyavisaṃjñayā |
savastrāḥ saphalāstatra dakṣiṇāsahitāḥ śubhāḥ ||
4.39.8
maṇḍalasya ca pārśve vai sthāpanīyāḥ prayatnataḥ |
madhye caikaśca saṃsthāpyaḥ sauvarṇo vāparo ghaṭaḥ ||
4.39.9
tatromāsahitāṃ śambhumūrtiṃ nirmāya hāṭakīm |
palena vā tadardhena yathāśaktyāthavā vratī ||
4.39.10
nidhāya vāmabhāge tu śivāmūrtimatandritaḥ |
madīyāṃ dakṣiṇe bhāge kṛtvā rātrau prapūjayet ||
4.39.11
ācāryaṃ varayettatra cartvigbhiḥ sahitaṃ śucim |
anujñātaśca tairbhaktyā śivapūjāṃ samācaret ||
4.39.12
rātrau jāgaraṇaṃ kuryātpūjāṃ yāmodbhavāṃ caran |
rātrimākramayetsarvāṃ gītanṛtyādinā vratī ||
4.39.13
evaṃ sampūjya vidhivatsantoṣya prātareva ca |
punaḥ pūjāṃ tataḥ kṛtvā homaṃ kuryādyathāvidhi ||
4.39.14
yathāśakti vidhānaṃ ca prājāpatyaṃ samācaret |
brāhmaṇānbhojayetprītyā dadyāddānāni bhaktitaḥ ||
4.39.15
ṛtvijaśca sapatnīkānvastrālaṅkārabhūṣaṇaiḥ |
alaṅkṛtya vidhānena dadyāddānaṃ pṛthakpṛthak ||
4.39.16
gāṃ savatsāṃ vidhānena yathopaskarasaṃyutām |
uktvācāryāya vai dadyācchivo me prīyatāmiti ||
4.39.17
tataḥ sakumbhāṃ tanmūrtiṃ savastrāṃ vṛṣabhe sthitām |
sarvālaṅkārasahitāmācāryāya nivedayet ||
4.39.18
tataḥ samprārthayeddevaṃ maheśānaṃ mahāprabhum |
kṛtāñjalirnataskandhaḥ suprītyā gadgadākṣaraḥ ||
4.39.19
devadeva mahādeva śaraṇāgatavatsala |
vratenānena deveśa kṛpāṃ kuru mamopari ||
4.39.20
mayā bhaktyanusāreṇa vratametatkṛtaṃ śiva |
nyūnaṃ sampūrṇatāṃ yātu prasādāttava śaṅkara ||
4.39.21
ajñānādyadi vā jñānājjapapūjādikaṃ mayā |
kṛtaṃ tadastu kṛpayā saphalaṃ tava śaṅkara ||
4.39.22
evaṃ puṣpāñjaliṃ dattvā śivāya paramātmane |
namaskāraṃ tataḥ kuryātprārthanāṃ punareva ca ||
4.39.23
evaṃ vrataṃ kṛtaṃ yena nyūnaṃ tasya na vidyate |
manobhīṣṭāṃ tataḥ siddhiṃ labhate nātra saṃśayaḥ ||
4.39.23.c1
iti śrīśivamahāpurāṇe caturthyāṃ koṭirudrasaṃhitāyāṃ śivarātrivratodyāpanaṃ nāmaikonacatvāriṃśo'dhyāyaḥ ||
4.39.23.p2
śrīgaṇeśāya namaḥ ||
4.39.23.p3
śrīgaurīśaṅkarābhyāṃ namaḥ ||
4.39.23.p4
śrīśivamahāpurāṇam ||
4.39.23.p5
caturthī koṭirudrasaṃhitā
Linked texts (5)
- Koṭirudrasaṃhitā — Sanskrit
- Vrataprakāśa — Viśvanātha 1711, Sanskrit
- Vrataprakasa (ed1884) — Sanskrit
- Smṛtikaustubha — Anantadeva 1638, Sanskrit
- Saṃvatsaradīdhiti — Anantadeva 1650, Sanskrit