Shivapurana 4.5: pañcamo'dhyāyaḥ | brāhmaṇīmaraṇavarṇanam
Śivapurāṇa (complete text) 4.5
- Language
- Sanskrit
Contents
- 4.5.39 — 5 parts
pañcamo'dhyāyaḥ | brāhmaṇīmaraṇavarṇanam
4.5.1
sūta uvāca |
kālañjare girau divye nīlakaṇṭho maheśvaraḥ |
liṅgarūpaḥ sadā caiva bhaktānandapradaḥ sadā ||
4.5.2
mahimā tasya divyo'sti śrutismṛtiprakīrtitaḥ |
tīrthaṃ tadākhyayā tatra snānātpātakanāśakṛt ||
4.5.3
revātīre yāni santi śivaliṅgāni suvratāḥ |
sarvasaukhyakarāṇīha teṣāṃ saṅkhyā na vidyate ||
4.5.4
sā ca rudrasvarūpā hi darśanātpāpahārikā |
tasyāṃ sthitāśca ye kecitpāṣāṇāḥ śivarūpiṇaḥ ||
4.5.5
tathāpi ca pravakṣyāmi yathānyāni munīśvarāḥ |
pradhānaśivaliṅgāni bhuktimuktipradāni ca ||
4.5.6
ārteśvarasunāmā hi vartate pāpahārakaḥ |
parameśvara iti khyātaḥ siṃheśvara iti smṛtaḥ ||
4.5.7
śarmeśaśca tathā cātra kumāreśvara eva ca |
puṇḍarīkeśvaraḥ khyāto maṇḍapeśvara eva ca ||
4.5.8
tīkṣṇeśanāmā tatrāsīddarśanātpāpahārakaḥ |
dhundhureśvaranāmāsītpāpahā narmadātaṭe ||
4.5.9
śūleśvara iti khyātastathā kumbheśvaraḥ smṛtaḥ |
kubereśvaranāmāpi tathā someśvaraḥ smṛtaḥ ||
4.5.10
nīlakaṇṭho maṅgaleśo maṅgalāyatano mahān |
mahākapīśvaro devaḥ sthāpito hi hanūmatā ||
4.5.11
tataśca nandiko devo hatyākoṭinivārakaḥ |
sarvakāmārthadaścaiva mokṣado hi prakīrtitaḥ ||
4.5.1_2
nandīkeśaṃ ca yaścaiva pūjayetparayā mudā |
nityaṃ tasyākhilā siddhirbhaviṣyati na saṃśayaḥ ||
4.5.13
tatra tīre ca yaḥ snāti revāyāṃ munisattamāḥ |
tasya kāmāśca sidhyanti sarvaṃ pāpaṃ vinaśyati ||
4.5.14
ṛṣaya ūcuḥ |
evaṃ tasya ca māhātmyaṃ kathaṃ tatra mahāmate |
nandikeśasya kṛpayā kathyatāṃ ca tvayādhunā ||
4.5.15
sūta uvāca |
samyak pṛṣṭaṃ bhavadbhiśca kathayāmi yathāśrutam |
śaunakādyāśca munayaḥ sarve hi śṛṇutādarāt ||
4.5.16
purā yudhiṣṭhireṇaivaṃ pṛṣṭaśca ṛṣisattamaḥ |
yathovāca tathā vacmi bhavatsnehānusārataḥ ||
4.5.17
revāyāḥ paścime tīre karṇikī nāma vai purī |
virājate suśobhāḍhyā caturvarṇasamākulā ||
4.5.18
tatra dvijavaraḥ kaścidutathyakulasambhavaḥ |
kāśyāṃ gataśca putrābhyāmarpayitvā svapatnikām ||
4.5.19
tatraiva sa mṛto vipraḥ putrābhyāṃ ca śrutaṃ tadā |
tadīyaṃ caiva tatkṛtyaṃ cakrāte putrakāvubhau ||
4.5.20
patnī ca pālayāmāsa putrau putrahitaiṣiṇī |
kiñcicca varjayitvā ca vibhaktaṃ vai dhanaṃ tayā ||
4.5.21
svīyaṃ ca rakṣitaṃ kiñciddhanaṃ maraṇahetave |
tataśca dvijapatnī hi kiyatkāle gate ca sā ||
4.5.22
kadācinmriyamāṇā sā vividhaṃ puṇyamācarat |
na mṛtā daivayogena dvijapatnī ca sā dvijāḥ ||
4.5.23
yadā prāṇānna mumuce mātā daivāttayośca sā |
tad druṣṭavā jananīkaṣṭaṃ putrakāvūcatustadā ||
4.5.24
putrāvūcatuḥ |
kiṃ nyūnaṃ vidyate mātaḥ kaṣṭaṃ yadvidyate mahat |
vriyatāṃ tad drutaṃ prītyā tadāvāṃ karavāvahe ||
4.5.5_2
sūta uvāca |
tacchrutvoktaṃ tayā tatra nyūnaṃ me vidyate bahu |
tadeva kriyate cedvai sukhena maraṇaṃ bhavet ||
4.5.6_2
jyeṣṭhaputraśca yastasyāstenoktaṃ kathyatāṃ tvayā |
kariṣyāmi tadetaddhi tayā ca kathitaṃ tadā ||
4.5.7_2
dvijapatnyuvāca |
śṛṇu putra vacaḥ prītyā purāsīnme manaḥspṛhā |
kāśyāṃ gantuṃ tathā nāsīdidānīṃ mriyate punaḥ ||
4.5.8_2
mamāsthīni tvayā putra kṣepaṇīyānyatandritam |
gaṅgājale śubhaṃ te'dya bhaviṣyati na saṃśayaḥ ||
4.5.29
sūta uvāca |
ityukte ca tayā mātrā sa jyeṣṭhatanayo'bravīt |
mātaraṃ mātṛbhakttastu suvratāṃ maraṇonmukhīm ||
4.5.30
putra uvāca |
mātastvayā sukhenaiva prāṇāstyājyā na saṃśayaḥ |
tava kāryaṃ purā kṛtvā paścātkāryaṃ madīyakam ||
4.5.31
iti haste jalaṃ dattvā yāvatputro gṛhaṃ gataḥ |
tāvatsā ca mṛtā tatra harasmaraṇatatparā ||
4.5.3_2
tasyāścaiva tu yatkṛtyaṃ tatsarvaṃ saṃvidhāya saḥ |
māsikaṃ karma kṛtvā tu gamanāya pracakrame ||
4.5.33
dvayoḥ śreṣṭhataro yo vai suvādo nāma viśrutaḥ |
tadasthīni samādāya niḥsṛtastīrthakāmyayā ||
4.5.34
saṅgṛhya sevakaṃ kañcittenaiva sahitastadā |
āśvāsya bhāryāṃ putrām̐śca mātuḥ priyacikīrṣayā ||
4.5.35
śrāddhadānādikaṃ bhojyaṃ kṛtvā vidhimanuttamam |
maṅgalasmaraṇaṃ kṛtvā nirjagāma gṛhād dvijaḥ ||
4.5.36
taddine yojanaṃ gatvā viṃśati grāmake śubhe |
uvāsāstaṃ gate bhānau gṛhe viprasya kasyacit ||
4.5.37
cakre sandhyādi satkarma sa dvijo vidhipūrvakam |
stavādi kṛtavāṃstatra śambhoradbhutakarmaṇaḥ ||
4.5.38
sevakena tadā yukto brāhmaṇaḥ saṃsthitastadā |
yāminī ca gatā tatra muhūrtadvayasammitā ||
4.5.39
etasminnantare tatraikamāścaryamabhūttadā |
śṛṇutādaratastacca munayo vo vadāmyaham ||
4.5.39.c1
iti śrīśivamahāpurāṇe caturthyāṃ koṭirudrasaṃhitāyāṃ nandikeśvaramāhātmye brāhmaṇīmaraṇavarṇanaṃ nāma pañcamo'dhyāyaḥ ||
4.5.39.p2
śrīgaṇeśāya namaḥ ||
4.5.39.p3
śrīgaurīśaṅkarābhyāṃ namaḥ ||
4.5.39.p4
śrīśivamahāpurāṇam ||
4.5.39.p5
caturthī koṭirudrasaṃhitā
Other recensions (1)
- Śivapurāṇa (complete text) — Sanskrit
Linked texts (1)
- Koṭirudrasaṃhitā — Sanskrit