Shivapurana 4.7: saptamo'dhyāyaḥ | nandikeśvaraśivaliṅgamāhātmyavarṇanam
Śivapurāṇa (complete text) 4.7
- Language
- Sanskrit
Contents
- 4.7.35 — 5 parts
saptamo'dhyāyaḥ | nandikeśvaraśivaliṅgamāhātmyavarṇanam
4.7.1
ṛṣaya ūcuḥ |
kathaṃ gaṅgā samāyātā vaiśākhe saptamīdine |
narmadāyāṃ viśeṣeṇa sūtaitadvarṇaya prabho ||
4.7.2
īśvaraśca kathaṃ jāto nandikeśo hi nāmataḥ |
vṛttaṃ tadapi suprītyā kathaya tvaṃ mahāmate ||
4.7.3
sūta uvāca |
sādhu pṛṣṭamṛṣiśreṣṭhā nandikeśāśritaṃ vacaḥ |
tadahaṃ kathayāmyadya śravaṇātpuṇyavardhanam ||
4.7.4
brāhmaṇī ṛṣikā nāmnī kasyacicca dvijanmanaḥ |
sutā vivāhitā kasmaicid dvijāya vidhānataḥ ||
4.7.5
pūrvakarmaprabhāveṇa patnī sā hi dvijanmanaḥ |
suvratāpi ca viprendrā bālavaidhavyamāgatā ||
4.7.6
atha sā dvijapatnī hi brahmacaryavratānvitā |
pārthivārcanapūrvaṃ hi tapastepe sudāruṇam ||
4.7.7
tasminnavasare duṣṭo mūḍhanāmāsuro balī |
yayau tatra mahāmāyī kāmabāṇena tāḍitaḥ ||
4.7.8
tapantīṃ tāṃ samālokya sundarīmatikāminīm |
tayā bhogaṃ yayāce sa nānālobhaṃ pradarśayan ||
4.7.9
atha sā suvratā nārī śivadhyānaparāyaṇā |
tasmindṛṣṭiṃ dadhau naiva kāmadṛṣṭyā munīśvarāḥ ||
4.7.10
na mānitavatī taṃ ca brāhmaṇī sā taporatā |
atīva hi taponiṣṭhāsīcchivadhyānamāśritā ||
4.7.11
atha mūḍhaḥ sa daityendraḥ tayā tanvyā tiraskṛtaḥ |
cukrodha vikaṭaṃ tasyai paścādrūpamadarśayat ||
4.7.12
atha provāca duṣṭātmā durvaco bhayakārakam |
trāsayāmāsa bahuśastāṃ ca patnīṃ dvijanmanaḥ ||
4.7.13
tadā sā bhayasantrastā bahuvāraṃ śiveti ca |
babhāṣe snehatastanvī dvijapatnī śivāśrayā ||
4.7.14
vihvalātīva sā nārī śivanāmaprabhāṣiṇī |
jagāma śaraṇaṃ śambhoḥ svadharmāvanahetave ||
4.7.15
śaraṇāgatarakṣārthaṃ kartuṃ sadvṛttamāhitam |
ānandārthaṃ hi tasyāstu śiva āvirbabhūva ha ||
4.7.16
atha taṃ mūḍhanāmānaṃ daityendraṃ kāmavihvalam |
cakāra bhasmasātsadyaḥ śaṅkaro bhaktavatsalaḥ ||
4.7.17
tataśca parameśāno kṛpādṛṣṭyā vilokya tām |
varaṃ brūhīti covāca bhaktarakṣaṇadakṣadhīḥ ||
4.7.18
śrutvā maheśavacanaṃ sā sādhvī dvijakāminī |
dadarśa śāṅkaraṃ rūpamānandajanakaṃ śubham ||
4.7.19
tataḥ praṇamya taṃ śambhuṃ parameśaṃ sukhāvaham |
tuṣṭāva sāñjaliḥ sādhvī nataskandhā śubhāśayā ||
4.7.20
ṛṣikovāca |
devadeva mahādeva śaraṇāgatavatsala |
dīnabandhustvamīśāno bhaktarakṣākaraḥ sadā ||
4.7.21
tvayā me rakṣito dharmo mūḍhanāmno'surādiha |
yadayaṃ nihato duṣṭo jagadrakṣā kṛtā tvayā ||
4.7.22
svapādayoḥ parāṃ bhaktiṃ dehi me hyanapāyinīm |
ayameva varo nātha kimanyadadhikaṃ hyataḥ ||
4.7.23
anyadākarṇaya vibho prārthanāṃ me maheśvara |
lokānāmupakārārthamiha tvaṃ saṃsthito bhava ||
4.7.24
sūta uvāca |
iti stutvā mahādevamṛṣikā sā śubhavratā |
tūṣṇīmāsātha giriśaḥ provāca karuṇākaraḥ ||
4.7.25
giriśa uvāca |
ṛṣike sucaritrā tvaṃ mama bhaktā viśeṣataḥ |
dattā varāśca te sarve tubhyaṃ ye ye hi yācitāḥ ||
4.7.26
etasminnantare tatra haribrahmādayaḥ surāḥ |
śivāvirbhāvamājñāya yayurharṣasamanvitāḥ ||
4.7.27
śivaṃ praṇamya suprītyā samānarcuśca te'khilāḥ |
tuṣṭuvurnatakā viprāḥ karau baddhvā sucetasaḥ ||
4.7.28
etasminsamaye gaṅgā sādhvīṃ tāṃ svardhunī jagau |
ṛṣikāṃ suprasannātmā praśaṃsantī ca tadvidhim ||
4.7.29
gaṅgovāca |
mamārthaṃ caiva vaiśākhe māsi deyaṃ tvayā vacaḥ |
sthityarthaṃ dinamekaṃ me sāmīpyaṃ kāryameva hi ||
4.7.30
sūta uvāca |
gaṅgāvacanamākarṇya sā sādhvī prāha suvratā |
tathāstviti vacaḥ prītyā lokānāṃ hitahetave ||
4.7.31
ānandārthaṃ śivastasyāḥ suprasannaśca pārthive |
tasmim̐lliṅge layaṃ yātaḥ pūrṇāṃśena tayā haraḥ ||
4.7.32
devāḥ sarve suprasannāḥ praśaṃsanti śivaṃ ca tām |
svaṃ svaṃ dhāma yayurviṣṇurbrahmādyā api svarṇadī ||
4.7.33
taddinātpāvanaṃ tīrthamāsīdīdṛśamuttamam |
nandikeśaḥ śivaḥ khyātaḥ sarvapāpavināśanaḥ ||
4.7.34
gaṅgāpi prativarṣaṃ taddine yāti śubhecchayā |
kṣālanārthaṃ svapāpasya yad gṛhītaṃ nṛṇāṃ dvijāḥ ||
4.7.35
tatra snāto naraḥ samyaṅ nandikeśaṃ samarcya ca |
brahmahatyādibhiḥ pāpairmucyate hyakhilairapi ||
4.7.35.c1
iti śrīśivamahāpurāṇe caturthyāṃ koṭirudrasaṃhitāyāṃ nandikeśvaraśivaliṅgamāhātmyavarṇanaṃ nāma saptamo'dhyāyaḥ ||
4.7.35.p2
śrīgaṇeśāya namaḥ ||
4.7.35.p3
śrīgaurīśaṅkarābhyāṃ namaḥ ||
4.7.35.p4
śrīśivamahāpurāṇam ||
4.7.35.p5
caturthī koṭirudrasaṃhitā
Other recensions (1)
- Śivapurāṇa (complete text) — Sanskrit
Linked texts (1)
- Koṭirudrasaṃhitā — Sanskrit