Shivapurana 4.8: aṣṭamo'dhyāyaḥ | mahābalamāhātmyavarṇanam
Śivapurāṇa (complete text) 4.8
- Language
- Sanskrit
Contents
- 4.8.28 — 5 parts
aṣṭamo'dhyāyaḥ | mahābalamāhātmyavarṇanam
4.8.1
sūta uvāca |
dvijāḥ śṛṇuta sadbhaktyā śivaliṅgāni tāni ca |
paścimāyāṃ diśāyāṃ vai yāni khyātāni bhūtale ||
4.8.2
kapilāyāṃ nagaryāṃ tu kālarāmeśvarābhidhe |
śivaliṅge mahādivye darśanātpāpahārake ||
4.8.3
paścime sāgare caiva mahāsiddheśvaraḥ smṛtaḥ |
dharmārthakāmadaścaiva tathā mokṣaprado'pi hi ||
4.8.5
paścimāmbudhitīrasthaṃ gokarṇaṃ kṣetramuttamam |
brahmahatyādipāpaghnaṃ sarvakāmaphalapradam ||
4.8.5_2
gokarṇe śivaliṅgāni vidyante koṭikoṭiśaḥ |
asaṅkhyātāni tīrthāni tiṣṭhanti ca pade pade ||
4.8.6
bahunātra kimuktena gokarṇasthāni sarvaśaḥ |
śivapratyakṣaliṅgāni tīrthānyambhāṃsi sarvaśaḥ ||
4.8.7
gokarṇe śivaliṅgānāṃ tīrthānāmapi sarvaśaḥ |
varṇyate mahimā tāta purāṇeṣu maharṣibhiḥ ||
4.8.8
kṛte yuge sa hi śvetastretāyāṃ so'tilohitaḥ |
dvāpare pītavarṇaśca kalau śyāmo bhaviṣyati ||
4.8.9
ākrāntasaptapātālakuharo'pi mahābalaḥ |
prāpte kaliyuge ghore mṛdutāmupayāsyati ||
4.8.10
mahāpātakinaścātra samabhyarcya mahābalam |
śivaliṅgaṃ ca gokarṇe prayātāḥ śāṅkaraṃ padam ||
4.8.11
gokarṇe tatra munayo gatvā puṇyarkṣavāsare |
ye'rcayanti ca taṃ bhaktyā te rudrāḥ syurna saṃśayaḥ ||
4.8.12
yadā kadācidgokarṇe yo vā ko vāpi mānavaḥ |
pūjayecchivaliṅgaṃ tatsa gacched brahmaṇaḥ padam ||
4.8.13
brahmaviṣṇvādidevānāṃ śaṅkaro hitakāmyayā |
mahābalābhidhānena devaḥ sannihitaḥ sadā ||
4.8.14
ghoreṇa tapasā labdhaṃ rāvaṇākhyena rakṣasā |
talliṅgaṃ sthāpayāmāsa gokarṇe gaṇanāyakaḥ ||
4.8.15
viṣṇurbrahmā mahendraśca viśvedevā marudgaṇāḥ |
ādityā vasavo dasrau śaśāṅkaśca satārakaḥ ||
4.8.16
ete vimānagatayo devāśca saha pārṣadaiḥ |
pūrvadvāraṃ niṣevante tasya vai prītikāraṇāt ||
4.8.17
yamo mṛtyuḥ svayaṃ sākṣāccitraguptaśca pāvakaḥ |
pitṛbhiḥ saha rudraiśca dakṣiṇadvāramāśritaḥ ||
4.8.18
varuṇaḥ saritāṃ nātho gaṅgādisaritāṃ gaṇaiḥ |
mahābalaṃ ca sevante paścimadvāramāśritāḥ ||
4.8.19
tathā vāyuḥ kuberaśca deveśī bhadrakālikā |
mātṛbhiścaṇḍikādyābhiruttaradvāramāśritāḥ ||
4.8.20
sarve devāḥ sagandharvāḥ pitaraḥ siddhacāraṇāḥ |
vidyādharāḥ kimpuruṣāḥ kinnarā guhyakāḥ khagāḥ ||
4.8.21
nānāpiśācā vetālā daiteyāśca mahābalāḥ |
nāgāḥ śeṣādayaḥ sarve siddhāśca munayo'khilāḥ ||
4.8.22
praṇuvanti ca taṃ devaṃ praṇamanti mahābalam |
labhanta īpsitānkāmān ramante ca yathāsukham ||
4.8.23
bahubhistatra sutapastaptaṃ sampūjya taṃ vibhum |
labdhā hi paramā siddhirihāmutrāpi saukhyadā ||
4.8.24
gokarṇe śivaliṅgaṃ tu mokṣadvāra udāhṛtaḥ |
mahābalābhidhāno'sau pūjitaḥ saṃstuto dvijāḥ ||
4.8.25
māghāsitacaturdaśyāṃ mahābalasamarcanam |
vimuktidaṃ viśeṣeṇa sarveṣāṃ pāpināmapi ||
4.8.26
asyāṃ śivatithau sarve mahotsavadidṛkṣavaḥ |
āyānti sarvadeśebhyaścāturvarṇyamahājanāḥ ||
4.8.27
striyo vṛddhāśca bālāśca caturāśramavāsinaḥ |
dṛṣṭvā tatraitya deveśaṃ lebhire kṛtakṛtyatām ||
4.8.28
mahābalaprabhāvātte tacca liṅgaṃ śivasya tu |
sampūjyaikātha cāṇḍālī śivalokaṃ gatā drutam ||
4.8.28.c1
iti śrīśivamahāpurāṇe caturthyāṃ koṭirudrasaṃhitāyāṃ mahābalamāhātmyavarṇanaṃ nāmāṣṭamo'dhyāyaḥ ||
4.8.28.p2
śrīgaṇeśāya namaḥ ||
4.8.28.p3
śrīgaurīśaṅkarābhyāṃ namaḥ ||
4.8.28.p4
śrīśivamahāpurāṇam ||
4.8.28.p5
caturthī koṭirudrasaṃhitā
Other recensions (1)
- Śivapurāṇa (complete text) — Sanskrit
Linked texts (1)
- Koṭirudrasaṃhitā — Sanskrit