Shivapurana 4.9: navamo'dhyāyaḥ | cāṇḍālīsadgativarṇanam
Śivapurāṇa (complete text) 4.9
- Language
- Sanskrit
Contents
- 4.9.39 — 5 parts
navamo'dhyāyaḥ | cāṇḍālīsadgativarṇanam
4.9.1
ṛṣaya ūcuḥ |
sūta sūta mahābhāga dhanyastvaṃ śaivasattamaḥ |
cāṇḍālī kā samākhyātā tatkathāṃ kathaya prabho ||
4.9.2
sūta uvāca |
dvijāḥ śṛṇuta sadbhaktyā tāṃ kathāṃ paramādbhutām |
śivaprabhāvasammiśrāṃ śṛṇvatāṃ bhaktivardhinīm ||
4.9.3
cāṇḍālī sā pūrvabhave'bhavad brāhmaṇakanyakā |
sauminī nāma candrāsyā sarvalakṣaṇasaṃyutā ||
4.9.4
atha sā samaye kanyā yuvatiḥ sauminī dvijāḥ |
pitrā dattā ca kasmaicidvidhinā dvijasūnave ||
4.9.5
sā bhartāramanuprāpya kiñcitkālaṃ śubhavratā |
reme tena dvijaśreṣṭhā navayauvanaśālinī ||
4.9.6
atha tasyāḥ patirviprastaruṇaḥ surujārditaḥ |
sauminyāḥ kālayogāttu pañcatvamagamad dvijāḥ ||
4.9.7
mṛte bhartari sā nārī duḥkhitātiviṣaṇṇadhīḥ |
kiñcitkālaṃ śubhācārā suśīlovāsa sadmani ||
4.9.8
tataḥ sā manmathāviṣṭahṛdayā vidhavāpi ca |
yuvāvasthāviśeṣeṇa babhūva vyabhicāriṇī ||
4.9.9
tajjñātvā gotriṇastasyā duṣkarma kuladūṣaṇam |
sametāstatyajurdūraṃ nītvā tāṃ sakacagrahām ||
4.9.10
kaścicchūdravarastāṃ vai vicarantīṃ nijecchayā |
dṛṣṭvā vane striyaṃ cakre nināya svagṛhaṃ tataḥ ||
4.9.11
atha sā piśitāhārā nityamāpītavāruṇī |
ajījanatsutāṃ tena śūdreṇa suratapriyā ||
4.9.12
kadācidbhartari kvāpi yāte pītasurātha sā |
iyeṣa piśitāhāraṃ sauminī vyabhicāriṇī ||
4.9.13
tato meṣeṣu baddheṣu gobhiḥ saha bahirvraje |
niśāmukhe tamo'ndhe hi khaḍgamādāya sā yayau ||
4.9.14
avimṛśya madāveśānmeṣabuddhyāmiṣapriyā |
ekaṃ jaghāna govatsaṃ krośantamatidurbhagā ||
4.9.15
hataṃ taṃ gṛhamānīya jñātvā govatsamaṅganā |
bhītā śiva śivetyāha kenacitpuṇyakarmaṇā ||
4.9.16
sā muhūrtaṃ śivaṃ dhyātvāmiṣabhojanalālasā |
chittvā tameva govatsaṃ cakārāhāramīpsitam ||
4.9.17
evaṃ bahutithe kāle gate sā sauminī dvijāḥ |
kālasya vaśamāpannā jagāma yamasaṅkṣayam ||
4.9.18
yamo'pi dharmamālokya tasyāḥ karma ca paurvikam |
nivartya nirayāvāsāccakre cāṇḍālajātikām ||
4.9.19
sātha bhraṣṭā yamapurāccāṇḍālīgarbhamāśritā |
tato babhūva janmāndhā praśāntāṅgāramecakā ||
4.9.20
janmāndhā sātha bālye'pi vidhvastapitṛmātṛkā |
ūḍhā na kenacidduṣṭā mahākuṣṭharujārditā ||
4.9.21
tataḥ kṣudhārditā dīnā yaṣṭipāṇirgatekṣaṇā |
cāṇḍālocchiṣṭapiṇḍena jaṭharāgnimatarpayat ||
4.9.22
evaṃ kṛcchreṇa mahatā nītvā svavipulaṃ vayaḥ |
jarayā grastasarvāṅgī duḥkhamāpa duratyayam ||
4.9.23
kadācitsātha cāṇḍālī gokarṇaṃ taṃ mahājanān |
āyāsyantyāṃ śivatithau gacchato bubudhe'dhvagān ||
4.9.24
athāsāvapi cāṇḍālī vasanāśanatṛṣṇayā |
mahājanān yācayituṃ sañcacāra śanaiḥ śanaiḥ ||
4.9.25
gatvā tatrātha cāṇḍālī prārthayantī mahājanān |
yatra tatra cacārāsau dīnavākprasṛtāñjaliḥ ||
4.9.26
evamabhyarthayantyāstu cāṇḍālyāḥ prasṛtāñjalau |
ekaḥ puṇyatamaḥ pānthaḥ prākṣipadvilvamañjarīm ||
4.9.27
tāmañjalau nipatitāṃ sā vimṛśya punaḥ punaḥ |
abhakṣyamiti matvātha dūre prākṣipadāturā ||
4.9.28
tasyāḥ karādvinirmuktā rātrau sā bilvamañjarī |
papāta kasyaciddiṣṭyā śivaliṅgasya mastake ||
4.9.29
saivaṃ śivacaturdaśyāṃ rātrau pānthajanān muhuḥ |
yācamānāpi yatkiñcinna lebhe daivayogataḥ ||
4.9.30
evaṃ śivacaturdaśyā vrataṃ jātaṃ ca nirmalam |
ajñānato jāgaraṇaṃ paramānandadāyakam ||
4.9.31
tataḥ prabhāte sā nārī śokena mahatāvṛtā |
śanairnivavṛte dīnā svadeśāyaiva kevalam ||
4.9.32
śrāntā ciropavāsena nipatantī pade pade |
atītya tāvatīṃ bhūmiṃ nipapāta vicetanā ||
4.9.33
atha sā śambhukṛpayā jagāma paramaṃ padam |
āruhya suvimānaṃ ca nītaṃ śivagaṇairdrutam ||
4.9.34
ādau yadeṣā śivanāma nārī pramādato vāpyasatī jagāda |
teneha bhūyaḥ sukṛtena viprā mahābalasthānamavāpa divyam ||
4.9.35
śrīgokarṇe śivatithāvupoṣya śivamastake |
kṛtvā jāgaraṇaṃ sā hi cakre bilvārcanaṃ niśi ||
4.9.36
akāmataḥ kṛtasyāsya puṇyasyaiva ca tatphalam |
bhunaktyadyāpi sā caiva mahābalaprasādataḥ ||
4.9.37
evaṃvidhaṃ mahāliṅgaṃ śaṅkarasya mahābalam |
sarvapāpaharaṃ sadyaḥ paramānandadāyakam ||
4.9.38
evaṃ vaḥ kathitaṃ viprā māhātmyaṃ paramaṃ mayā |
mahābalābhidhānasya śivaliṅgavarasya hi ||
4.9.39
athānyadapi vakṣyāmi māhātmyaṃ tasya cādbhutam |
śrutamātreṇa yenāśu śive bhaktiḥ prajāyate ||
4.9.39.c1
iti śrīśivamahāpurāṇe caturthyāṃ koṭirudrasaṃhitāyāṃ cāṇḍālīsadgativarṇanaṃ nāma navamo'dhyāyaḥ ||
4.9.39.p2
śrīgaṇeśāya namaḥ ||
4.9.39.p3
śrīgaurīśaṅkarābhyāṃ namaḥ ||
4.9.39.p4
śrīśivamahāpurāṇam ||
4.9.39.p5
caturthī koṭirudrasaṃhitā
Other recensions (1)
- Śivapurāṇa (complete text) — Sanskrit
Linked texts (1)
- Koṭirudrasaṃhitā — Sanskrit