Pramāṇa · Search · About · API

Shivapurana 5.11: ekādaśo'dhyāyaḥ | annadānamāhātmyavarṇanam

Śivapurāṇa (complete text) 5.11

Language
Sanskrit

Contents

ekādaśo'dhyāyaḥ | annadānamāhātmyavarṇanam

5.11.1

vyāsa uvāca |
kṛtapāpā narā yānti duḥkhena mahatānvitāḥ |
yamamārge sukhaṃ yaiśca tāndharmānvada me prabho ||

5.11.2

sanatkumāra uvāca |
avaśyaṃ hi kṛtaṃ karma bhoktavyamavicārataḥ |
śubhāśubhamatho vakṣye tāndharmān sukhadāyakān ||

5.11.3

atra ye śubhakarmāṇaḥ saumyacittā dayānvitāḥ |
sukhena te narā yānti yamamārgaṃ bhayāvaham ||

5.11.4

yaḥ pradadyād dvijendrāṇāmupānatkāṣṭhapāduke |
sa naro'śvena mahatā sukhaṃ yāti yamālayam ||

5.11.5

chatradānena gacchanti yathā chatreṇa dehinaḥ |
śibikāyāḥ pradānena tadrathena sukhaṃ vrajet ||

5.11.6

śayyāsanapradānena sukhaṃ yāti suviśramam |
ārāmacchāyākartāro mārge vā vṛkṣaropakāḥ |
vrajanti yamalokaṃ ca ātape'ti gataklamāḥ ||

5.11.7

yānti puṣpakayānena puṣpārāmakarā narāḥ |
devāyatanakartāraḥ krīḍanti ca gṛhodare ||

5.11.8

kartāraśca tathā ye ca yatīnāmāśramasya ca |
anāthamaṇḍapānāṃ tu krīḍanti ca gṛhodare ||

5.11.9

devāgniguruviprāṇāṃ mātāpitrośca pūjakāḥ |
pūjyamānā narā yānti kāmukena yathāsukham ||

5.11.10

dyotayanto diśaḥ sarvā yānti dīpapradāyinaḥ |
pratiśrayapradānena sukhaṃ yānti nirāmayāḥ ||

5.11.11

viśrāmyamāṇā gacchanti guruśuśrūṣakā narāḥ |
ātodyavipradātāraḥ sukhaṃ yānti svake gṛhe ||

5.11.12

sarvakāmasamṛddhena yathā gacchanti gopradāḥ |
atra dattānnapānāni tānyāpnoti naraḥ pathi ||

5.11.13

pādaśaucapradānena sajalena pathā vrajet |
pādābhyaṅgaṃ ca yaḥ kuryādaśvapṛṣṭhena gacchati ||

5.11.14

pādaśaucaṃ tathābhyaṅgaṃ dīpamannaṃ pratiśrayam |
yo dadāti sadā vyāsa nopasarpati taṃ yamaḥ ||

5.11.15

hemaratnapradānena yāti durgāṇi nistaran |
raupyānaḍutpradānena yamalokaṃ sukhena saḥ ||

5.11.16

ityevamādibhirdānaiḥ sukhaṃ yānti yamālayam |
svarge tu vividhānbhogān prāpnuvanti sadā narāḥ ||

5.11.17

sarveṣāmeva dānānāmannadānaṃ paraṃ smṛtam |
sadyaḥ prītikaraṃ hṛdyaṃ balabuddhivivardhanam ||

5.11.18

nānnadānasamaṃ dānaṃ vidyate munisattama |
annādbhavanti bhūtāni tadabhāve mriyanti ca ||

5.11.19

raktaṃ māṃsaṃ vasā śukraṃ kramādannātpravardhate |
śukrādbhavanti bhūtāni tasmādannamayaṃ jagat ||

5.11.20

hemaratnāśvanāgendrairnārīsrakcandanādibhiḥ |
samastairapi samprāptairna ramanti bubhukṣitāḥ ||

5.11.21

garbhasthā jāyamānāśca bālavṛddhāśca madhyamāḥ |
āhāramabhikāṅkṣanti devadānavarākṣasāḥ ||

5.11.22

kṣudhā niḥśeṣarogāṇāṃ vyādhiḥ śreṣṭhatamaḥ smṛtaḥ |
sa cānnauṣadhilepena naśyatīha na saṃśayaḥ ||

5.11.23

nāsti kṣudhāsamaṃ duḥkhaṃ nāsti rogaḥ kṣudhāsamaḥ |
nāstyarogasamaṃ saukhyaṃ nāsti krodhasamo ripuḥ ||

5.11.24

anta eva mahatpuṇyamannadāne prakīrtitam |
tathā kṣudhāgninā taptā mriyante sarvadehinaḥ ||

5.11.25

annadaḥ prāṇadaḥ proktaḥ prāṇadaścāpi sarvadaḥ |
tasmādannapradānena sarvadānaphalaṃ labhet ||

5.11.26

yasyānnapānapuṣṭāṅgaḥ kurute puṇyasañcayam |
annapradātustasyārdhaṃ kartuścārdhaṃ na saṃśayaḥ ||

5.11.27

trailokye yāni ratnāni bhogastrīvāhanāni ca |
annadānapradaḥ sarvamihāmutra ca tallabhet ||

5.11.28

dharmārthakāmamokṣāṇāṃ dehaḥ paramasādhanam |
tasmādannena pānena pālayeddehamātmanaḥ ||

5.11.29

annameva praśaṃsanti sarvamanne pratiṣṭhitam |
annena sadṛśaṃ dānaṃ na bhūtaṃ na bhaviṣyati ||

5.11.30

annena dhāryate sarvaṃ viśvaṃ jagadidaṃ mune |
annamūrjaskaraṃ loke prāṇā hyanne pratiṣṭhitāḥ ||

5.11.31

dātavyaṃ bhikṣave cānnaṃ brāhmaṇāya mahātmane |
kuṭumbaṃ pīḍayitvāpi hyātmano bhūtimicchatā ||

5.11.32

vidadāti nidhiśreṣṭhaṃ yo dadyādannamarthine |
brāhmaṇāyārtarūpāya pāralaukikamātmanaḥ ||

5.11.33

arcayedbhūtimanvicchankāle dvijamupasthitam |
śrāntamadhvani vṛttyarthaṃ gṛhastho gṛhamāgatam ||

5.11.34

annadaḥ pūjayed vyāsa suśīlastu vimatsaraḥ |
krodhamutpatitaṃ hitvā divi ceha mahatsukham ||

5.11.35

nābhinindedadhigataṃ na praṇudyātkathañcana |
api śvapāke śuni vā nānnadānaṃ praṇaśyati ||

5.11.36

śrāntāyādṛṣṭapūrvāya hyannamadhvani vartate |
yo dadyādaparikliṣṭaḥ sa samṛddhimavāpnuyāta ||

5.11.37

pitṝn devāṃstathā viprānatithīṃśca mahāmune |
yo naraḥ prīṇayatyannaiḥ tasya puṇyaphalaṃ mahat ||

5.11.38

annaṃ pānaṃ ca śūdre'pi brāhmaṇe ca viśiṣyate |
na pṛcchedgotracaraṇaṃ svādhyāyaṃ deśameva ca ||

5.11.39

bhikṣito brāhmaṇeneha dadyādannaṃ ca yaḥ pumān |
sa yāti paramaṃ svargaṃ yāvadābhūtasamplavam ||

5.11.40

annadasya ca vṛkṣāśca sarvakāmaphalānvitāḥ |
bhavantīha yathā viprā harṣayuktāstriviṣṭape ||

5.11.41

annadānena ye lokāḥ svarge viracitā mune |
annadāturmahādivyāstān śṛṇuṣva mahāmune ||

5.11.42

bhavanāni prakāśante divi teṣāṃ mahātmanām |
nānāsaṃsthānarūpāṇi nānākāmānvitāni ca ||

5.11.43

sarvakāmaphalāścāpi vṛkṣā bhavanasaṃsthitāḥ |
hemavāpyaḥ śubhāḥ kūpā dīrghikāścaiva sarvaśaḥ ||

5.11.44

ghoṣayanti ca pānāni śubhānyatha sahasraśaḥ |
bhakṣyabhojyamayāḥ śailā vāsāṃsyābharaṇāni ca ||

5.11.45

kṣīraṃ sravantyaḥ saritastathaivājyasya parvatāḥ |
prāsādāḥ pāṇḍurābhāsāḥ śayyāśca kanakojjvalāḥ ||

5.11.46

tānannadāśca gacchanti tasmādannaprado bhavet |
yadīcchedātmano bhavyamiha loke paratra ca ||

5.11.47

ete lokāḥ puṇyakṛtāmannadānāṃ mahāprabhāḥ |
tasmādannaṃ viśeṣeṇa dātavyaṃ mānavairdhruvam ||

5.11.48

annaṃ prajāpatiḥ sākṣādannaṃ viṣṇuḥ svayaṃ haraḥ |
tasmādannasamaṃ dānaṃ na bhūtaṃ na bhaviṣyati ||

5.11.49

kṛtvāpi sumahatpāpaṃ yaḥ paścādannado bhavet |
vimuktaḥ sarvapāpebhyaḥ svargalokaṃ sa gacchati ||

5.11.50

annapānāśvagovastraśayyācchatrāsanāni ca |
pretaloke praśastāni dānānyaṣṭau viśeṣataḥ ||

5.11.51

evaṃ dānaviśeṣeṇa dharmarājapuraṃ naraḥ |
yasmādyāti vimānena tasmāddānaṃ samācaret ||

5.11.52

etadākhyānamanaghamannadānaprabhāvataḥ |
yaḥ paṭhetpāṭhayedanyānsa samṛddhaḥ prajāyate ||

5.11.53

śṛṇuyācchrāvayecchrāddhe brāhmaṇānyo mahāmune |
akṣayyamannadānaṃ ca pitṝṇāmupatiṣṭhati ||

5.11.53.c1

iti śrīśivamahāpurāṇe pañcamyāmumāsaṃhitāyāṃ annadānamāhātmyavarṇanaṃ nāmaikādaśo'dhyāyaḥ ||

5.11.53.p2

śrīgaṇeśāya namaḥ ||

5.11.53.p3

śrīgaurīśaṅkarābhyāṃ namaḥ ||

5.11.53.p4

śrīśivamahāpurāṇam ||

Linked texts (3)