Pramāṇa · Search · About · API

Shivapurana 5.13: trayodaśo'dhyāyaḥ | purāṇamāhātmyavarṇanam

Śivapurāṇa (complete text) 5.13

Language
Sanskrit

Contents

trayodaśo'dhyāyaḥ | purāṇamāhātmyavarṇanam

5.13.1

sanatkumāra uvāca |
tapastapati yo'raṇye vanyamūlaphalāśanaḥ |
yo'dhīte ṛcamekāṃ hi phalaṃ syāttatsamaṃ mune ||

5.13.2

śruteradhyayanātpuṇyaṃ yadāpnoti dvijottamaḥ |
tadadhyāpanataścāpi dviguṇaṃ phalamaśnute ||

5.13.3

jagadyathā nirālokaṃ jāyate'śaśibhāskaram |
vinā tathā purāṇaṃ hyadhyeyamasmānmune sadā ||

5.13.4

tapyamānaṃ sadājñānānniraye yo'pi śāstrataḥ |
sambodhayati lokaṃ taṃ tasmāt pūjyaḥ purāṇagaḥ ||

5.13.5

sarveṣāṃ caiva pātrāṇāṃ madhye śreṣṭhaḥ purāṇavit |
patanāt trāyate yasmāt tasmātpātramudāhṛtam ||

5.13.6

martyabuddhirna kartavyā purāṇajñe kadācana |
purāṇajñaḥ sarvavettā brahmā viṣṇurharo guruḥ ||

5.13.7

dhanaṃ dhānyaṃ hiraṇyaṃ ca vāsāṃsi vividhāni ca |
deyaṃ purāṇavijñāya paratreha ca śarmaṇe ||

5.13.8

yo dadāti mahāprītyā purāṇajñāya sajjanaḥ |
pātrāya śubhavastūni sa yāti paramāṃ gatim ||

5.13.9

mahīṃ gāṃ vā syandanāṃśca gajānaśvāṃśca śobhanān |
yaḥ prayacchati pātrāya tasya puṇyaphalaṃ śṛṇu ||

5.13.10

akṣayānsarvakāmāṃśca paratreha ca janmani |
aśvamedhamakhasyāpi sa phalaṃ labhate pumān ||

5.13.11

mahīṃ dadāti yastasmai kṛṣṭāṃ phalavatīṃ śubhām |
sa tārayati vai vaṃśyāndaśa pūrvān daśāparān ||

5.13.12

iha bhuktvākhilān kāmānante divyaśarīravān |
vimānena ca divyena śivalokaṃ sa gacchati ||

5.13.13

na yajñaistuṣṭimāyānti devāḥ prokṣaṇakairapi |
balibhiḥ puṣpapūjābhiryathā pustakavācanaiḥ ||

5.13.14

śambhorāyatane yastu kārayeddharmapustakam |
viṣṇorarkasya kasyāpi śṛṇu tasyāpi tatphalam ||

5.13.15

rājasūyāśvamedhānāṃ phalamāpnoti mānavaḥ |
sūryalokaṃ ca bhittvāśu brahmalokaṃ sa gacchati ||

5.13.16

sthitvā kalpaśatānyatra rājā bhavati bhūtale |
bhuṅkte niṣkaṇṭakaṃ bhogānnātra kāryā vicāraṇā ||

5.13.17

aśvamedhasahasrasya yatphalaṃ samudāhṛtam |
tatphalaṃ samāvāpnoti devāgre yo japaṃ caret ||

5.13.18

itihāsapurāṇābhyāṃ śambhorāyatane śubhe |
nānyatprītikaraṃ śambhostathānyeṣāṃ divaukasām ||

5.13.19

tasmātsarvaprayatnena kāryaṃ pustakavācanam |
tathāsya śravaṇaṃ premṇā sarvakāmaphalapradam ||

5.13.20

purāṇaśravaṇāt śambhorniṣpāpo jāyate naraḥ |
bhuktvā bhogān suvipulān śivalokamavāpnuyāt ||

5.13.21

rājasūyena yatpuṇyamagniṣṭomaśatena ca |
tatpuṇyaṃ labhate śambhoḥ kathāśravaṇamātrataḥ ||

5.13.22

sarvatīrthāvagāhena gavāṃ koṭipradānataḥ |
tat phalaṃ labhate śambhoḥ kathāśravaṇato mune ||

5.13.23

ye śṛṇvanti kathāṃ śambhoḥ sadā bhuvanapāvanīm |
te manuṣyā na mantavyā rudrā eva na saṃśayaḥ ||

5.13.24

śṛṇvatāṃ śivasatkīrtiṃ satāṃ kīrtayatāṃ ca tām |
pādāmbujarajāṃsyeva tīrthāni munayo viduḥ ||

5.13.25

gantuṃ niḥśreyasaṃ sthānaṃ ye'bhivāñchanti dehinaḥ |
kathāṃ paurāṇikīṃ śaivīṃ bhaktyā śṛṇvantu te sadā ||

5.13.26

kathāṃ paurāṇikīṃ śrotuṃ yadyaśaktaḥ sadā bhavet |
niyatātmā pratidinaṃ śṛṇuyādvā muhūrtakam ||

5.13.27

yadi pratidinaṃ śrotumaśakto mānavo bhavet |
puṇyamāsādiṣu mune śṛṇuyācchāṅkarīṃ kathām ||

5.13.28

śaivīṃ kathāṃ hi śṛṇvānaḥ puruṣo hi munīśvara |
sa nistarati saṃsāraṃ dagdhvā karmamahāṭavīm ||

5.13.29

kathāṃ śaivīṃ muhūrtaṃ vā tadardhaṃ vā kṣaṇaṃ ca vā |
ye śṛṇvanti narā bhaktyā na teṣāṃ durgatirbhavet ||

5.13.30

yatpuṇyaṃ sarvadāneṣu sarvayajñeṣu vā mune |
śambhoḥ purāṇaśravaṇāttatphalaṃ niścalaṃ bhavet ||

5.13.31

viśeṣataḥ kalau vyāsa purāṇaśravaṇādṛte |
paro dharmo na puṃsāṃ hi muktidhyānaparaḥ smṛtaḥ ||

5.13.32

purāṇaśravaṇaṃ śambhornāmasaṅkīrtanaṃ tathā |
kalpadrumaphalaṃ ramyaṃ manuṣyāṇāṃ na saṃśayaḥ ||

5.13.33

kalau durmedhasāṃ puṃsāṃ dharmācārojjhitātmanām |
hitāya vidadhe śambhuḥ purāṇākhyaṃ sudhārasam ||

5.13.34

eko'jarāmaraḥ syādvai pibannevāmṛtaṃ pumān |
śambhoḥ kathāmṛtāpānāt kulamevājarāmaram ||

5.13.35

yā gatiḥ puṇyaśīlānāṃ yajvināṃ ca tapasvinām |
sā gatiḥ sahasā tāta purāṇaśravaṇātkhalu ||

5.13.36

jñānāvāptiryadā na syādyogaśāstrāṇi yatnataḥ |
adhyetavyāni paurāṇaṃ śāstraṃ śrotavyameva ca ||

5.13.37

pāpaṃ saṅkṣīyate nityaṃ dharmaścaiva vivardhate |
purāṇaśravaṇājjñānī na saṃsāraṃ prapadyate ||

5.13.38

ataeva purāṇāni śrotavyāni prayatnataḥ |
dharmārthakāmalābhāya mokṣamārgāptaye tathā ||

5.13.39

yajñairdānaistapobhistu yatphalaṃ tīrthasevayā |
tatphalaṃ samavāpnoti purāṇaśravaṇānnaraḥ ||

5.13.40

na bhaveyuḥ purāṇāni dharmamārgekṣaṇāni tu |
yadyatra yad vratī sthātā ko'tra pāratrikīṃ kathām ||

5.13.41

ṣaḍviṃśati purāṇānāṃ madhye'pyekaṃ śṛṇoti yaḥ |
paṭhedvā bhaktiyuktastu sa mukto nātra saṃśayaḥ ||

5.13.42

anyo na dṛṣṭaḥ sukhado hi mārgaḥ purāṇamārgo hi sadā variṣṭhaḥ |
śāstraṃ vinā sarvamidaṃ na bhāti sūryeṇa hīnā iva jīvalokāḥ ||

5.13.42.c1

iti śrīśivamahāpurāṇe pañcamyāmumāsaṃhitāyāṃ purāṇamāhātmyavarṇanaṃ nāma trayodaśo'dhyāyaḥ ||

5.13.42.p2

śrīgaṇeśāya namaḥ ||

5.13.42.p3

śrīgaurīśaṅkarābhyāṃ namaḥ ||

5.13.42.p4

śrīśivamahāpurāṇam ||