Shivapurana 5.27: saptaviṃśo'dhyāyaḥ | kālavañcanaśivaprāptivarṇanam
Śivapurāṇa (complete text) 5.27
- Language
- Sanskrit
Contents
saptaviṃśo'dhyāyaḥ | kālavañcanaśivaprāptivarṇanam
5.27.1
devyuvāca |
vāyostu padamāpnoti yogākāśasamudbhavam |
tanme sarvaṃ samācakṣva prasannastvaṃ yadi prabho ||
5.27.2
śaṅkara uvāca |
purā me sarvamākhyātaṃ yogināṃ hitakāmyayā |
kālaṃ jigāya yaḥ samyagvāyorliṅgaṃ yathā bhavet ||
5.27.3
tena jñātvā dinaṃ yogī prāṇāyāmaparaḥ sthitaḥ |
sa jayatyāgataṃ kālaṃ māsārdhenaiva sundari ||
5.27.4
hṛtstho vāyuḥ sadā vahnerdīpakaḥ so'nupāvakaḥ |
sa bāhyābhyantaro vyāpī vāyuḥ sarvagato mahān ||
5.27.5
jñānavijñānamutsāhaḥ sarvaṃ vāyoḥ pravartate |
yeneha nirjito vāyustena sarvamidaṃ jagat ||
5.27.6
dhāraṇāyāṃ sadā tiṣṭhejjarāmṛtyujighāṃsayā |
yogī yogarataḥ samyagdhāraṇādhyānatatparaḥ ||
5.27.7
lohakāro yathā bhastrāmāpūryamukhato mune |
sādhayedvāyunā karma tadvadyogī samabhyaset ||
5.27.8
devaḥ sahasrako netrapādahastasahasrakaḥ |
pṛthavīṃ hi sarvamāvṛtya so'gre tiṣṭheddaśāṅgulam ||
5.27.9
gāyatrīṃ śirasā sārddhaṃ japed vyāhṛtipūrvikām |
trivāramāyataprāṇāḥ prāṇāyāmaḥ sa ucyate ||
5.27.5.27.10
gatāgatā nivartante candrasūryādayo grahāḥ |
adyāpi na nivartante yogadhyānaparāyaṇāḥ ||
5.27.11
śatamabdaṃ tapastaptvā kuśāgrāpaḥ pibed dvijaḥ |
tadāpnoti phalaṃ devi prāṇānāṃ dhāraṇaikayā ||
5.27.12
yo dvijaḥ kalyamutthāya prāṇāyāmaikamācaret |
sarvaṃ pāpaṃ nihantyāśu brahmalokaṃ sa gacchati ||
5.27.13
yo'tandritaḥ sadaikānte praṇāyāmaparo bhavet |
jarāṃ mṛtyuṃ vinirjitya vāyugaḥ khecarīti saḥ ||
5.27.14
siddhasya bhajate rūpaṃ kāntiṃ medhāṃ parākramam |
śauryaṃ vāyusamo gatyā saukhyaṃ ślāghyaṃ paraṃ sukham ||
5.27.15
etatkathitamaśeṣaṃ vāyoḥ siddhiṃ yadāpnute yogī |
yattejaso'pi labhate tatte vakṣyāmi deveśi ||
5.27.16
sthitvā sukhāsane sve śete janavacanahīne tu |
śaśiraviyutayā tejaḥ prakāśayanmadhyame deśe ||
5.27.17
vahnigataṃ bhrūmadhye prakāśate yastvatandrito yogī |
dīpairhīnadhvānte paśyennyūnamasaṃśayaṃ loke ||
5.27.18
netre karaśākhābhiḥ kiñcitsampīḍya yatnato yogī |
tāraṃ paśyandhyāyenmuhūrtamarddhaṃ tame9kabhāvo'pi ||
5.27.19
tatastu tamasi dhyāyanpaśyati jyotiraiśvaram |
śvetaṃ raktaṃ tathā pītaṃ kṛṣṇamindradhanuṣprabham ||
5.27.5.27.20
bhuvormadhye lalāṭasthaṃ bālārkasamatejasam |
taṃ viditvā tu kāmāṅgī krīḍate kāmarūpadhṛk ||
5.27.21
kāraṇapraśamāveśaṃ parakāyapraveśanam |
aṇimādiguṇāvāptirmanasā cāvalokanam ||
5.27.22
dūraśravaṇavijñānamadṛśyaṃ bahurūpadhṛk |
satatābhyāsayogena khecaratvaṃ prajāyate ||
5.27.23
śrutādhyayanasampannā nānāśāstraviśāradāḥ |
jñānino'pi vimuhyante pūrvakarmavaśānugāḥ ||
5.27.24
paśyanto'pi na paśyanti śṛṇvānā badhirā yathā |
yathāndhā mānuṣā loke mūḍhāḥ pāpavimohitāḥ ||
5.27.25
vedāhametaṃ puruṣaṃ mahānta-mādityavarṇaṃ tamasaḥ parastāt |
tameva viditvātimṛtyumeti nānyaḥ panthā vidyate prāyaṇāya ||
5.27.26
eṣa te kathitaḥ samyaktejaso vidhiruttamaḥ |
kālaṃ jitvā yathā yogī cāmaratvaṃ prapadyate ||
5.27.27
punaḥ parataraṃ vakṣye yathā mṛtyurna jāyate |
sāvadhānatayā devi śṛṇuṣvaikāgramānasā ||
5.27.28
turīyā devi bhūtānāṃ yogināṃ dhyānināṃ tathā |
sukhāsane yathāsthānaṃ yogī niyatamānasaḥ ||
5.27.29
samunnataśarīro'pi sa baddhvā karasampuṭam |
cañcvākāreṇa vaktreṇa pibanvāyuṃ śanaiḥ śanaiḥ ||
5.27.30
prasravanti kṣaṇādāpastālusthā jīvadāyikāḥ |
tā jighredvāyunādāyāmṛtaṃ tacchītalaṃ jalam ||
5.27.31
pibannanudinaṃ yogī na mṛtyuvaśago bhavet |
divyakāyo mahātejāḥ pipāsākṣudvivarjitaḥ ||
5.27.32
balena nāgasturago javena dṛṣṭyā suparṇaḥ suśrutistu dūrāt |
ākuñcitākuṇḍalikṛṣṇakeśo gandharvavidyādharatulyavarṇaḥ ||
5.27.33
jīvennaro varṣaśataṃ surāṇāṃ sumedhasā vākpatinā samatvam |
evaṃ caran khecaratāṃ prayāti yatheṣṭacārī sukhitaḥ sadaiva ||
5.27.34
punaranyatpravakṣyāmi vidhānaṃ yatsurairapi |
gopitaṃ tu prayatnena tacchṛṇuṣva varānane ||
5.27.35
samākuñcyābhyasedyogī rasanāṃ tālukaṃ prati |
kiñcitkālāntareṇaiva kramātprāpnoti lambikām ||
5.27.36
tataḥ prasravate sā tu saṃspṛṣṭā śītalāṃ sudhām |
pibanneva sadā yogī so'maratvaṃ hi gacchati ||
5.27.37
rephāgraṃ lambakāgraṃ karatalaghaṭanaṃ śubhrapadmasya bindo-stenākṛṣṭā sudheyaṃ patati parapade devatānandakārī |
sāraṃ saṃsāratāraṃ kṛtakaluṣataraṃ kālatāraṃ satāraṃ yenedaṃ plāvitāṅgaṃ sa bhavati na mṛtaḥ kṣutpipāsāvihīnaḥ ||
5.27.38
ebhiryuktā caturbhiḥ kṣitidharatanaye yogibhirvai dharaiṣā dhairyānnityaṃ kuto'ntaḥ sakalamapi jagadyatsukhaprāpaṇāya |
svapne dehī vidhatte sakalamapi sadā mānayanyacca duḥkhaṃ svarge hyevaṃ dharitryāḥ prabhavati ca tato vā sa kiñciccaturṇām ||
5.27.39
tasmānmantraistapobhirvrataniyamayutairauṣadhairyogayuktā dhātrī raktā manuṣyairnayavinayayutairdharmavidbhiḥ krameṇa |
bhūtānāmādi devo na hi bhavati calaḥ saṃyuto vai caturṇāṃ tasmādevaṃ pravakṣye vidhimanugaditaṃ chāyikaṃ yacchivākhyam ||
5.27.39.c1
iti śrīśivamahāpurāṇe pañcamyāmumāsaṃhitāyāṃ kālavañcanaśivaprāptivarṇanaṃ nāma saptaviṃśo'dhyāyaḥ ||
5.27.39.p2
śrīgaṇeśāya namaḥ ||
5.27.39.p3
śrīgaurīśaṅkarābhyāṃ namaḥ ||
5.27.39.p4
śrīśivamahāpurāṇam ||