Shivapurana 5.28: aṣṭāviṃśo'dhyāyaḥ | chāyāpuruṣadarśanavarṇanam
Śivapurāṇa (complete text) 5.28
- Language
- Sanskrit
Contents
aṣṭāviṃśo'dhyāyaḥ | chāyāpuruṣadarśanavarṇanam
5.28.1
devyuvāca |
devadeva mahādeva kathitaṃ kālavañcanam |
śabdabrahmasvarūpaṃ ca yogalakṣaṇamuttamam ||
5.28.2
kathitaṃ te samāsena chāyikaṃ jñānamuttamam |
vistareṇa samākhyāhi yogināṃ hitakāmyayā ||
5.28.3
śaṅkara uvāca |
śṛṇu devi pravakṣyāmi chāyāpuruṣalakṣaṇam |
yajjñātvā puruṣaḥ samyaksarvapāpaiḥ pramucyate ||
5.28.4
sūryaṃ hi pṛṣṭhataḥ kṛtvā somaṃ vā varavarṇini |
śuklāmbaradharaḥ stragvī gandhadhūpādivāsitaḥ ||
5.28.5
saṃsmarenme mahāmantraṃ sarvakāmaphalapradam |
navātmakaṃ piṇḍabhūtaṃ svāṃ chāyāṃ sannirīkṣayet ||
5.28.6
dṛṣṭvā tāṃ punarākāśe śvetavarṇasvarūpiṇīm |
sa paśyatyekabhāvastu śivaṃ paramakāraṇam ||
5.28.7
brahmaprāptirbhavettasya kālavidbhiritīritam |
brahmahatyādikaiḥ pāpairmucyate nātra saṃśayaḥ ||
5.28.8
śirohīnaṃ yadā paśyetṣaḍbhirmāsairbhavetkṣayaḥ |
samastaṃ vāṅmayaṃ tasya yoginastu yathā tathā ||
5.28.9
śukle dharmaṃ vijānīyātkṛṣṇe pāpaṃ vinirdiśet |
rakte bandhaṃ vijānīyātpīte vidviṣamādiśet ||
5.28.5.28.10
vivāho bandhunāśaḥ syāddvituṇḍe caiva kṣudbhayam |
vikaṭau naśyate bhāryā vijaṅghe dhanameva hi ||
5.28.11
pādābhāve videśaḥ syādityetatkathitaṃ mayā |
tadvicāryaṃ prayattnena puruṣeṇa maheśvari ||
5.28.12
samyaktaṃ puruṣaṃ dṛṣṭvā sanniveśyātmanātmani |
japennavātmakaṃ mantraṃ hṛdayaṃ me maheśvari ||
5.28.13
vatsare vigate mantrī tannāsti yanna sādhayet |
aṇimādiguṇānaṣṭau khecaratvaṃ prapadyate ||
5.28.14
punaranyatpravakṣyāmi śaktiṃ jñātuṃ durāsadām |
pratyakṣaṃ dṛśyate loke jñānināmagrataḥ sthitam ||
5.28.15
ajñeyā likhyate loke yā sarpīkṛtakuṇḍalī |
sā mātrā yānasaṃsthāpi dṛśyate na ca paṭhyate ||
5.28.16
brahmāṇḍamūrdhnigā yā ca stutā vedaistu nityaśaḥ |
jananī sarvavidyānāṃ guptavidyeti gīyate ||
5.28.17
khecarā sā vinirdiṣṭā sarvaprāṇiṣu saṃsthitā |
dṛśyādṛśyācalā nityā vyaktāvyaktā sanātanī ||
5.28.18
avarṇā varṇasaṃyuktā procyate bindumālinī |
tāṃ paśyansarvadā yogī kṛtakṛtyo'bhijāyate ||
5.28.19
sarvatīrthakṛtasnānādbhaveddānasya yatphalam |
sarvayajñaphalaṃ yacca mālinyā darśanāttadā ||
5.28.5.28.20
prāpnotyatra na sandehaḥ satyaṃ vai kathitaṃ mayā |
sarvatīrtheṣu yatsnātvā dattvā dānāni sarvaśaḥ ||
5.28.21
sarveṣāṃ devi yajñānāṃ yatphalaṃ tallabhetpumān |
kiṃ bahūktyā maheśāni sarvānkāmānsamaśnute ||
5.28.22
tasmājjñānaṃ yathāyogamabhyasetsatataṃ budhaḥ |
abhyāsājjāyate siddhiryogo'bhyāsātpravardhate ||
5.28.23
saṃvittirlabhyate'bhyāsādabhyāsānmokṣamaśnute |
abhyāsaḥ satataṃ kāryo dhīmatā mokṣakāraṇam ||
5.28.24
ityetatkathitaṃ devi bhuktimuktiphalapradam |
kimanyatpṛcchyate tattvaṃ vada satyaṃ bravīmi te ||
5.28.25
sūta uvāca |
iti śrutvā brahmaputravacanaṃ paramārthadam |
prasanno'bhūdati vyāsaḥ pārāśaryo munīśvarāḥ ||
5.28.26
sanatkumāraṃ sarvajñaṃ brahmaputraṃ kṛpānidhim |
vyāsaḥ paramasantuṣṭaḥ praṇanāma muhurmuhuḥ ||
5.28.27
tatastuṣṭāva taṃ vyāsaḥ kāleyaḥ sa munīśvaraḥ |
sanatkumāraṃ munayaḥ suravijñānasāgaram ||
5.28.28
vyāsa uvāca |
kṛtārtho'haṃ muniśreṣṭha brahmatvaṃ me tvayā kṛtam |
namaste'stu namaste'stu dhanyastvaṃ brahmavittamaḥ ||
5.28.29
sūta uvāca |
iti stutvā sa kāleyo brahmaputraṃ mahāmunim |
tūṣṇīṃ babhūva suprītaḥ paramānandanirbharaḥ ||
5.28.5.28.30
brahmaputrastamāmantrya pūjitastena śaunakaḥ |
yayau svadhāma suprīto vyāso'pi prītamānasaḥ ||
5.28.31
iti me varṇito viprāḥ sukhadaḥ paramārthayuk |
sanatkumārakāleyasaṃvādo jñānavardhanaḥ ||
5.28.31.c1
iti śrīśivamahāpurāṇe pañcamyāmumāsaṃhitāyāṃ chāyāpuruṣadarśanavarṇanaṃ nāmāṣṭāviṃśo'dhyāyaḥ ||
5.28.31.p2
śrīgaṇeśāya namaḥ ||
5.28.31.p3
śrīgaurīśaṅkarābhyāṃ namaḥ ||
5.28.31.p4
śrīśivamahāpurāṇam ||