Pramāṇa · Search · About · API

Shivapurana 5.29: ekonatriṃśo'dhyāyaḥ | ādisargavarṇanam

Śivapurāṇa (complete text) 5.29

Language
Sanskrit

Contents

ekonatriṃśo'dhyāyaḥ | ādisargavarṇanam

5.29.1

śaunaka uvāca |
śrutaṃ me mahadākhyānaṃ yattvayā parikīrtitam |
sanatkumārakāleyasaṃvādaṃ paramārthadam ||

5.29.2

ato'haṃ śrotumicchāmi yathā sargastu brahmaṇaḥ |
samutpannaṃ tu me brūhi yathā vyāsācca te śrutam ||

5.29.3

sūta uvāca |
mune śṛṇu kathāṃ divyāṃ sarvapāpapraṇāśinīm |
kathyamānāṃ mayā citrāṃ bahvarthāṃ śrutavistarām ||

5.29.4

yaścaināṃ pāṭhayettāṃ ca śṛṇuyādvāpyabhīkṣṇaśaḥ |
svavaṃśadhāraṇaṃ kṛtvā svargaloke mahīyate ||

5.29.5

pradhānaṃ puruṣo yattannityaṃ sadasadātmakam |
pradhānapuruṣo bhūtvā nirmame lokabhāvanaḥ ||

5.29.6

sraṣṭāraṃ sarvabhūtānāṃ nārāyaṇaparāyaṇam |
taṃ vai viddhi muniśreṣṭha brahmāṇamamitaujasam ||

5.29.7

yasmādakalpayatkalpāḥ samagrāḥ śucayo yataḥ |
bhavanti muniśārdūla namastasmai svayambhuve ||

5.29.8

tasmai hiraṇyagarbhāya puruṣāyeśvarāya ca |
namaskṛtya pravakṣyāmi bhūyaḥ sargamanuttamam ||

5.29.9

brahmā sraṣṭā hariḥ pātā saṃhartā ca maheśvaraḥ |
tasya sargasya nānyo'sti kāle kāle tathā gate ||

5.29.5.29.10

so'pi svayambhūrbhagavān sisṛkṣurvividhāḥ prajāḥ |
apa eva sasarjādau tāsu vīryamavāsṛjat ||

5.29.11

āpo nārā iti proktā āpo vai narasūnavaḥ |
ayanaṃ tasya tāḥ pūrvaṃ tena nārāyaṇaḥ smṛtaḥ ||

5.29.12

hiraṇyavarṇamabhavattadaṇḍamudakeśayam |
tatra jajñe svayaṃ brahmā svayambhūriti viśrutaḥ ||

5.29.13

hiraṇyagarbho bhagavānuṣitvā parivatsaram |
tadaṇḍamakarod dvaidhaṃ divaṃ bhūmiṃ ca nirmame ||

5.29.14

adho'dhordhvaṃ prayuktāni bhuvanāni caturddaśa |
tayoḥ śakalayormadhya ākāśamamṛjatprabhuḥ ||

5.29.15

apsu pariplavāṃ pṛthvīṃ diśaśca daśadhā dadhe |
tatra kāle mano vācaṃ kāmakrodhāvatho ratim ||

5.29.16

marīcimatryaṅgirasau pulastyaṃ pulahaṃ kratum |
vasiṣṭhaṃ tu mahātejāḥ so'sṛjatsapta mānasān ||

5.29.17

sapta bahmāṇa ityete purāṇe niścayaṃ gatāḥ |
tato'sṛjatpunarbrahmā rudrān krodhasamudbhavān ||

5.29.18

sanatkumāraṃ ca ṛṣiṃ sarveṣāmapi pūrvajam |
sapta caite prajāyante paścādrudrāśca sarvataḥ ||

5.29.19

ataḥ sanatkumārastu tejaḥ saṅkṣipya tiṣṭhati |
teṣāṃ sapta mahāvaṃśā divyā devarṣipūjitāḥ ||

5.29.5.29.20

prajāyante kriyāvanto maharṣibhiralaṅkṛtāḥ |
vidyuto'śanimeghāṃśca rohitendradhanūṃṣi ca ||

5.29.21

payāṃsi ca sasarjādau parjanyaṃ ca sasarja ha |
ṛco yajūṃṣi sāmāni nirmame yajñasiddhaye ||

5.29.22

pūjyāṃstairayajandevānityevamanuśuśruma |
mukhāddevānajanayatpitṝṃścaivātha vakṣasaḥ |
prajanācca manuṣyānvai jaghanānnirmame'surān ||

5.29.23

uccāvacāni bhūtāni gātrebhyastasya jajñire |
āpavasya prajāsargaṃ sṛjato hi prajāpateḥ ||

5.29.24

sṛjyamānāḥ prajāścaiva nāvardhanta yadā tadā |
dvidhā kṛtvātmano dehaṃ strī caiva puruṣo'bhavat ||

5.29.25

sasṛje'tha prajāḥ sarvā mahimnā vyāpya viśvataḥ |
virājamasṛjadviṣṇuḥ sa sṛṣṭaḥ puruṣaṃ virāṭ ||

5.29.26

dvitīyaṃ taṃ manuṃ viddhi manorantarameva ca |
sa vairājaḥ prajāḥ sarvāḥ sasarja puruṣaḥ prabhuḥ ||

5.29.27

nārāyaṇavisargasya prajāstasyāpyayonijaḥ |
āyuṣmān kīrtimāndhanyaḥ prajāvāṃścābhavattataḥ ||

5.29.28

ityevamādisargaste varṇito munisattama |
ādisargaṃ viditvaivaṃ yatheṣṭāṃ prāpnuyādgatim ||

5.29.28.c1

iti śrīśivamahāpurāṇe pañcamyāmumāsaṃhitāyāṃ ādisargavarṇanaṃ nāma ekonatriṃśo'dhyāyaḥ ||

5.29.28.p2

śrīgaṇeśāya namaḥ ||

5.29.28.p3

śrīgaurīśaṅkarābhyāṃ namaḥ ||

5.29.28.p4

śrīśivamahāpurāṇam ||

Linked texts (4)