Pramāṇa · Search · About · API

Shivapurana 5.3: tṛtīyo'dhyāyaḥ | kṛṣṇādiśivabhaktoddhāraṇa śivamāhātmyavarṇanam

Śivapurāṇa (complete text) 5.3

Language
Sanskrit

Contents

tṛtīyo'dhyāyaḥ | kṛṣṇādiśivabhaktoddhāraṇa śivamāhātmyavarṇanam

5.3.1

sanatkumāra uvāca |
etacchrutvā vacastasya so'bravīttaṃ mahāmunim |
vismayaṃ paramaṃ gatvopamanyuṃ śāntamānasam ||

5.3.2

vāsudeva uvāca |
dhanyastvamasi viprendra kastvāṃ stotumalaṃ kṛtī |
yasya devādidevaste sānnidhyaṃ kurute śrame ||

5.3.3

darśanaṃ muniśārdūla dadyātsa bhagavān śivaḥ |
api tāvanmamāpyevaṃ prasādaṃ vā karotvasau ||

5.3.4

upamanyuruvāca |
acireṇaiva kālena mahādevaṃ na saṃśayaḥ |
tasyaiva kṛpayā tvaṃ vai drakṣyase puruṣottama ||

5.3.5

ṣoḍaśe māsi suvarān prāpsyasi tvaṃ maheśvarāt |
sapatnīkātkathaṃ no dāsyate devo varānhare ||

5.3.6

pūjyo'si daivataiḥ sarvaiḥ ślāghanīyaḥ sadā guṇaiḥ |
jāpyaṃ te'haṃ pravakṣyāmi śraddadhānāya cācyuta ||

5.3.7

tena japaprabhāveṇa satyaṃ drakṣyasi śaṅkaram |
ātmatulyabalaṃ putraṃ labhiṣyasi maheśvarāt ||

5.3.8

japo namaḥ śivāyeti mantrarājamimaṃ hare |
sarvakāmapradaṃ divyaṃ bhuktimuktipradāyakam ||

5.3.9

sanatkumāra uvāca |
evaṃ kathayatastasya mahādevāśritāḥ kathāḥ |
dinānyaṣṭau prayātāni muhūrtamiva tāpasa ||

5.3.10

navame tu dine prāpte muninā sa ca dīkṣitaḥ |
mantramadhyāpitaṃ śārvamātharvaśirasaṃ mahat ||

5.3.11

daṇḍī muṇḍī ca sadyo'sau babhūva susamāhitaḥ |
pādāṅguṣṭhoddhṛtatanustepe cordhvabhujastathā ||

5.3.12

samprāpte ṣoḍaśe māsi santuṣṭaḥ parameśvaraḥ |
pārvatyā sahitaḥ śambhurdadau kṛṣṇāya darśanam ||

5.3.13

pārvatyā sahitaṃ devaṃ trinetraṃ candraśekharam |
brahmādyaiḥ stūyamānaṃ tu pūjitaṃ siddhakoṭibhiḥ ||

5.3.14

divyamālyāmbaradharaṃ bhaktinamraiḥ surāsuraiḥ |
praṇataṃ ca viśeṣeṇa nānābhūṣaṇabhūṣitam ||

5.3.15

sarvāścaryamayaṃ kāntaṃ maheśamajamavyayam |
nānāgaṇānvitaṃ tuṣṭaṃ putrābhyāṃ saṃyutaṃ prabhum ||

5.3.16

śrīkṛṣṇaḥ prāñjalirdṛṣṭvā vismayotphullalocanaḥ |
īdṛśaṃ śaṅkaraṃ prītaḥ praṇanāma mahotsavaḥ ||

5.3.17

nānāvidhaiḥ stutipadairvāṅmayenārcayattadā |
sahasranāmnā deveśaṃ tuṣṭāva natakandharaḥ ||

5.3.18

tato devāḥ sagandharvā vidyādharamahoragāḥ |
mumucuḥ puṣpavṛṣṭiṃ ca sādhuvādān manonugān ||

5.3.19

pārvatyāśca mukhaṃ dṛṣṭvā bhagavān bhaktavatsalaḥ |
uvāca keśavaṃ tuṣṭo rudraścātha maheśvaraḥ ||

5.3.20

śrīmahādeva uvāca |
kṛṣṇa jānāmi bhaktaṃ tvāṃ mayi nityaṃ dṛḍhavratam |
vṛṇīṣva tvaṃ varān mattaḥ puṇyāṃstrailokyadurlabhān ||

5.3.21

sanatkumāra uvāca |
tasya tadvacanaṃ śrutvā kṛṣṇaḥ prāñjalirādarāt |
prāha sarveśvaraṃ śambhuṃ supraṇamya punaḥ punaḥ ||

5.3.22

śrīkṛṣṇa uvāca |
devadeva mahādeva yāce'haṃ hyuttamān varān |
tvatto'ṣṭapramitānnātha tvayoddiṣṭān maheśvara ||

5.3.23

tava dharme matirnityaṃ yaśaścāpracalaṃ mahat |
tvatsāmīpyaṃ sthirā bhaktistvayi nityaṃ mamāstviti ||

5.3.24

strīṇāṃ mama daśādyānāṃ putrāḥ śambho bhavantu vai |
vadhyāśca ripavaḥ sarve saṅgrāme baladarpitāḥ ||

5.3.25

apamāno bhavennaiva kvacinme śatrutaḥ prabho |
yogināmapi sarveṣāṃ bhaveyamativallabhaḥ ||

5.3.26

ityaṣṭau suvarāndehi devadeva namo'stu te |
sarveśvarastvamevāsi matprabhuśca viśeṣataḥ ||

5.3.27

sanatkumāra uvāca |
tasya tadvacanaṃ śrutvā tamāha bhagavān bhavaḥ |
sarvaṃ bhaviṣyatītyevaṃ punaḥ taṃ prāha śūladhṛk ||

5.3.28

sāmbo nāma mahāvīryaḥ putraste bhavitā balī |
ghorasaṃvartakādityaḥ śapto munibhireva ca ||

5.3.29

mānuṣo bhavitāsīti sa te putro bhaviṣyati |
yadyacca prārthitaṃ kiñcittattatsarvaṃ labhasva vai ||

5.3.29.p1

sanatkumāra uvāca |
evaṃ labdhvā varān sarvān śrīkṛṣṇaḥ parameśvarāt ||

5.3.30

nānāvidhābhirbahvībhiḥ stutibhiḥ samatoṣayat ||

5.3.31

tamāhātha śivā tuṣṭā pārvatī bhaktavatsalā |
vāsudevaṃ mahātmānaṃ śambhubhaktaṃ tapasvinam ||

5.3.32

pārvatyuvāca |
vāsudeva mahābuddhe kṛṣṇa tuṣṭāsmi te'nagha |
gṛhāṇa mattaśca varān manojñān bhuvi durlabhān ||

5.3.33

sanatkumāra uvāca |
ityākarṇya vacastasyāḥ pārvatyāḥ sa yadūdvahaḥ |
uvāca suprasannātmā bhaktiyuktena cetasā ||

5.3.34

śrīkṛṣṇa uvāca |
devi tvaṃ parituṣṭāsi ceddadāsi varānhi me |
tapasānena satyena brāhmaṇān prati māsmabhūt ||

5.3.35

dveṣaḥ kadācidbhadraṃ tu pūjayeyaṃ dvijān sadā |
tuṣṭau ca mātāpitarau bhavetāṃ mama sarvadā ||

5.3.36

sarvabhūteṣvānukūlyaṃ bhajeyaṃ yatra tatragaḥ |
kule prabhṛtirucitā mamāstu tava darśanāt ||

5.3.37

tarpayeyaṃ surendrādīndevān yajñaśatena tu |
yatīnāmatithīnāṃ ca sahasrāṇyatha sarvadā ||

5.3.38

bhojayeyaṃ sadā gehe śraddhāpūtaṃ tu bhojanam |
bāndhavaiḥ saha prītistu nityamastu sunirvṛtiḥ ||

5.3.39

devi bhāryāsahasrāṇāṃ bhaveyaṃ prāṇavallabhaḥ |
akṣīṇā kāmyatā tāsu prasādāttava śāṅkari ||

5.3.40

āsāṃ ca pitaro loke bhaveyuḥ satyavādinaḥ |
ityādyāḥ suvarāḥ santu prasādāttava pārvati ||

5.3.41

sanatkumāra uvāca |
tasya tadvacanaṃ śrutvā devī taṃ cāha vismitā |
evamastviti bhadraṃ te śāśvatī sarvakāmadā ||

5.3.42

tasmiṃstāṃśca varān dattvā pārvatīparameśvarau |
tatraivāntaśca dadhatuḥ kṛtvā kṛṣṇasya satkṛpām ||

5.3.43

kṛṣṇaḥ kṛtārthamātmānamamanyata munīśvara |
upamanyormunerāśu prāpāśramamanuttamam ||

5.3.44

praṇamya śirasā tatra taṃ muniṃ keśihā tataḥ |
tathā vṛttaṃ ca tasmai tat samācaṣṭopamanyave ||

5.3.45

sa ca taṃ prāha ko'nyaḥ syāccharvāddevājjanārdana |
mahādānapatirloke krodhe vātīva duḥsahaḥ ||

5.3.46

jñāne tapasi vā śaurye sthairye vā pada eva ca |
śṛṇu śambhostu govinda devaiśvaryaṃ mahāyaśāḥ ||

5.3.47

tacchrutvā śraddhayā yukto'bhavacchambhostu bhaktimān |
papraccha śivamāhātmyaṃ sa taṃ prāha munīśvaraḥ ||

5.3.48

upamanyuruvāca |
bhagavān śaṅkaraḥ pūrvaṃ brahmaloke mahātmanā |
stuto nāmasahasreṇa taṇḍinā brahmayoginā ||

5.3.49

sāṅkhyāḥ paṭhanti tadgītaṃ vistīrṇaṃ ca nighaṇṭuvat |
durjñānaṃ mānuṣāṇāṃ tu stotraṃ tatsarvakāmadam ||

5.3.50

smarannityaṃ śaṅkaraṃ tvaṃ gaccha kṛṣṇa gṛhaṃ sukhī |
bhaviṣyasi sadā tāta śivabhaktagaṇāgraṇīḥ ||

5.3.51

ityuktastaṃ namaskṛtya vāsudevo munīśvaram |
manasā saṃsmaran śambhuṃ keśavo dvārakāṃ yayau ||

5.3.52

sanatkumāra uvāca |
evaṃ kṛṣṇaḥ samārādhya śaṅkaraṃ lokaśaṅkaram |
kṛtārtho'bhūnmuniśreṣṭha sarvājeyo'bhavattathā ||

5.3.53

tathā dāśarathī rāmaḥ śivamārādhya bhaktitaḥ |
kṛtārtho'bhūnmuniśreṣṭha vijayī sarvato'bhavat ||

5.3.54

tapastaptvātivipulaṃ purā rāmo girau mune |
śivāddhanuḥ śaraṃ cāpaṃ jñānaṃ vai paramuttamam ||

5.3.55

rāvaṇaṃ sagaṇaṃ hatvā setuṃ baddhvāmbhasāṃ nidhau |
sītāṃ prāpya gṛhaṃ yāto bubhuje nikhilāṃ mahīm ||

5.3.56

tathā ca bhārgavo rāmo hyārādhya tapasā vibhum |
nirīkṣya duḥkhitaḥ śarvātpitaraṃ kṣatriyairhatam ||

5.3.57

tīkṣṇaṃ sa paraśuṃ lebhe nirdadāha ca tena tān |
triḥsaptakṛtvaḥ kṣatrāṃśca prasannātparameśvarāt ||

5.3.58

ajeyaścāmaraścaiva so'dyāpi tapasāṃ nidhiḥ |
liṅgārcanarato nityaṃ dṛśyate siddhacāraṇaiḥ ||

5.3.59

mahendraparvate rāmaḥ sthitastapasi tiṣṭhati |
kalpānte punarevāsāvṛṣisthānamavāpsyati ||

5.3.60

asitasyānujaḥ pūrvaṃ pīḍayā kṛtavāṃstapaḥ |
mūlagrāheṇa viśvasya devalo nāma tāpasaḥ ||

5.3.61

purandareṇa śaptastu tapasvī yaśca susthiram |
adharmyaṃ dharmamalabhalliṅgamāradhya kāmadam ||

5.3.62

cākṣuṣasya manoḥ putro mṛgo'bhūttu marusthale |
vasiṣṭhaśāpād gṛtsamado daṇḍakāraṇya ekalaḥ ||

5.3.63

hṛdaye saṃsman bhaktyā praṇavena yutaṃ śivam |
tasmānmṛtyumukhākāro gaṇo mṛgamukho'bhavat ||

5.3.64

ajarāmaratāṃ nītastīrtvā śāpaṃ punaśca saḥ |
śaṅkareṇa kṛtaḥ prītyā nityaṃ lambodarānugaḥ ||

5.3.65

gārgyāya pradadau śarvo mokṣaṃ ca bhuvi durlabham |
kāmacārī mahākṣetraṃ kālajñānaṃ maharddhimat ||

5.3.66

catuṣpādaṃ sarasvatyāḥ pāragatvaṃ ca śāśvatam |
na tulyaṃ ca sahasraṃ tu putrāṇāṃ pradadau śivaḥ ||

5.3.67

vedavyāsaṃ tu yogīndraṃ putraṃ tuṣṭaḥ pināka dhṛk |
parāśarāya ca dadau jarāmṛtyuvivarjitam ||

5.3.68

māṇḍavyaḥ śaṅkareṇaiva jīvaṃ dattvā visarjitaḥ |
varṣāṇāṃ daśa lakṣāṇi śūlāgrādavaropitaḥ ||

5.3.69

daridro brāhmaṇaḥ kaścinnikṣipya guruveśmani |
putraṃ tu gālavaṃ yaśca pūrvamāsīd gṛhāśramī ||

5.3.70

gupto vā muniśālāyāṃ bhikṣurāyāti tadgṛham |
bhāryāmuvāca yaḥ kaścidavaśyaṃ nirdhano yataḥ ||

5.3.71

sa tu vācyo bhavatyā ca na dṛśyanta iti priyaḥ |
atitherāgatasyāpi kiṃ dāsyāmi gṛhe vasan ||

5.3.72

kadācidatithiḥ kaścitkṣuttṛṣākṣāmatarṣitaḥ |
tāmuvāca sa bhartā te kva gataśceti taṃ ca sā ||

5.3.73

prāha bhartā madīyastu sāmprataṃ na ca dṛśyate |
sa ṛṣistāmuvācedaṃ jñātvā divyena cakṣuṣā ||

5.3.74

gṛhasthitaḥ praticchannastatraiva sa mṛto dvijaḥ |
viśvāmittrābhyanujñātastatputro gālavastathā ||

5.3.75

gṛhamāgatya mātuḥ sa śrutvā śāpaṃ sudāruṇam |
ārādhya śaṅkaraṃ devaṃ pūjāṃ kṛtvā tu śāmbhavīm ||

5.3.76

gṛhādasau viniṣkrāntaḥ sasmaran śaṅkaraṃ hṛdā |
atha taṃ tanayaṃ dṛṣṭvā pitā taṃ prāha sāñjalim ||

5.3.77

mahādevaprasādācca kṛtakṛtyo'smi kṛtyataḥ |
dhanavān putravāṃścaiva mṛto'haṃ jīvitaḥ punaḥ ||

5.3.78

iti vaḥ kathitamaśeṣaṃ nāhaṃ śaktaḥ samāsato vyāsāt |
vaktuṃ śambhośca guṇān śeṣasyāpi na mukhāni syuḥ ||

5.3.78.c1

iti śrīśivamahāpurāṇe pañcamyāmumāsaṃhitāyāṃ kṛṣṇādiśivabhaktoddhāraṇa śivamāhātmyavarṇanaṃ nāma tṛtīyo'dhyāyaḥ ||

5.3.78.p2

śrīgaṇeśāya namaḥ ||

5.3.78.p3

śrīgaurīśaṅkarābhyāṃ namaḥ ||

5.3.78.p4

śrīśivamahāpurāṇam ||

Linked texts (1)