Pramāṇa · Search · About · API

Shivapurana 5.31: ekatriṃśo'dhyāyaḥ | sargavarṇanam 2

Śivapurāṇa (complete text) 5.31

Language
Sanskrit

Contents

ekatriṃśo'dhyāyaḥ | sargavarṇanam 2

5.31.1

śaunaka uvāca |
devānāṃ dānavānāṃ ca gandharvoragarakṣasām |
sṛṣṭiṃ tu vistareṇemāṃ sūtaputra vadāśu me ||

5.31.2

sūta uvāca |
yadā na vavṛdhe sā tu vīraṇasya prajāpatiḥ |
sutāṃ sutapasā yuktāmāhvayatsargakāraṇāt ||

5.31.3

sa maithunena dharmeṇa sasarja vividhāḥ prajāḥ |
tāḥ śṛṇu tvaṃ mahāprājña kathayāmi samāsataḥ ||

5.31.4

tasyāṃ putrasahasrāṇi vīriṇyāṃ pañca vīryavān |
āśritya janayāmāsa dakṣa eva prajāpatiḥ ||

5.31.5

etān sṛṣṭāṃstu tāndṛṣṭvā nāradaḥ prāha vai muniḥ |
satre sa tu samutpanno nāradaḥ parameṣṭhinaḥ ||

5.31.6

śrutavānvā kaśyapādvai puṃsāṃ sṛṣṭirbhaviṣyati |
dakṣasyaiva duhitṛṣu tasmāttānabravīttu saḥ ||

5.31.7

ajānantaḥ kathaṃ sṛṣṭiṃ bāliśā vai kariṣyatha |
diśaṃ kāñcidajānantastasmādvijñāya tāṃ bhuvam ||

5.31.8

ityuktāḥ prayayuḥ sarve āśāṃ vijñātumojasā |
tadantaṃ na hi samprāpya na nivṛttāḥ piturgṛham ||

5.31.9

tajjñātvā janayāmāsa punaḥ pañcaśatān sutān |
tānuvāca punaḥ so'pi nāradaḥ sarvadarśanaḥ ||

5.31.5.31.10

nārada uvāca |
bhuvo mānamajānantaḥ kathaṃ sṛṣṭiṃ kariṣyatha |
sarve hi bāliśāḥ kiṃ hi sṛṣṭikartuṃ samudyatāḥ ||

5.31.11

sūta uvāca |
te'pi tadvacanaṃ śrutvā niryātāḥ sarvatodiśam |
subalāśvā dakṣasutā haryaśvā iva te purā ||

5.31.12

anantaṃ puṣkaraṃ prāpya gatāste'pi parābhavam |
adyāpi na nivartante samudrebhya ivāpagāḥ ||

5.31.13

tadāprabhṛti vai bhrātā bhrāturanveṣaṇe rataḥ |
prayāto naśyati mune tanna kāryaṃ vipaścitā ||

5.31.14

tāṃścāpi naṣṭān vijñāya putrāndakṣaḥ prajāpatiḥ |
sa ca krodhāddadau śāpaṃ nāradāya mahātmane ||

5.31.15

kutracinna labhasveti saṃsthitiṃ kalahapriya |
tava sānnidhyato loke bhavecca kalahaḥ sadā ||

5.31.16

sāntvito'tha vidhātrā hi sa dakṣastu prajāpatiḥ |
kanyāḥ ṣaṣṭyasṛjatpaścādvīriṇyāmiti naḥ śrutam ||

5.31.17

dadau sa daśa dharmāya kaśyapāya trayodaśa |
saptaviṃśati somāya catasro'riṣṭanemine ||

5.31.18

dve caivaṃ brahmaputrāya dve caivāṅgirase tadā |
dve kṛśāśvāya viduṣe tāsāṃ nāmāni me śṛṇu ||

5.31.19

arundhatī vasuryāmirlambā bhānurmarutvatī |
saṅkalpā ca muhūrtā ca sandhyā viśvā ca vai mune ||

5.31.5.31.20

dharmapatnyo mune tvetāstāsvapatyāni me śṛṇu |
viśvedevāstu viśvāyāḥ sādhyānsādhyā vyajāyata ||

5.31.21

marutvatyāṃ marutvanto vasostu vasavastathā |
bhānostu bhānavaḥ sarve muhūrtāyāṃ muhūrtajāḥ ||

5.31.22

lambāyāścaiva ghoṣo'tha nāgavīthī ca yāmijā |
pṛthivīviṣamastasyāmarundhatyāmajāyata ||

5.31.23

saṅkalpāyāstu satyātmā jajñe saṅkalpa eva hi |
ayādayo vasoḥ putrā aṣṭau tān śṛṇu śaunaka ||

5.31.24

ayo dhuvaśca somaśca dharaścaivānilo'nalaḥ |
pratyūṣaśca prabhāsaśca vasavā'ṣṭau ca nāmataḥ ||

5.31.25

ayasya putro vaitaṇḍaḥ śramaḥ śānto munistathā |
dhruvasya putro bhagavān kālo lokabhāvanaḥ ||

5.31.26

somasya bhagavān varcā varcasvī yena jāyate |
dharasya putro draviṇo hutahavyavahastathā ||

5.31.27

manoharāyāḥ śiśiraḥ prāṇo'tha ramaṇastathā |
anilasya śivā bhāryā yasyāḥ putrāḥ purojavaḥ ||

5.31.28

avijñātagatiścaiva dvau putrāvanilasya tu |
agniputraḥ kumārastu śarastambe śriyāvṛte ||

5.31.29

tasya śākho viśākhaśca naigameyaśca pṛṣṭhataḥ |
apatyaṃ kṛttikānāṃ tu kārtikeya iti smṛtaḥ ||

5.31.5.31.30

pratyūṣasya tvabhūtputra ṛṣirnāmnā tu devalaḥ |
dvau putrau devalasyāpi prajāvantau manīṣiṇau ||

5.31.31

bṛhaspatestu bhaginī varastrī brahmacāriṇī |
yogasiddhā jagatkṛtsnaṃ samantādvyacarattadā ||

5.31.32

prabhāsasya tu sā bhāryā vasūnāmaṣṭamasya ca |
viśvakarmā mahābhāga tasya jajñe prajāpatiḥ ||

5.31.33

kartā śilpasahasrāṇāṃ tridaśānāṃ ca vārdhakiḥ |
bhūṣaṇānāṃ ca sarveṣāṃ kartā śilpavatāṃ varaḥ ||

5.31.34

yaḥ sarvāsāṃ vimānāni devatānāṃ cakāra ha |
manuṣyāścopajīvanti yasya śilpaṃ mahātmanaḥ ||

5.31.35

raivato'jo bhavo bhīmo vāma ugro vṛṣākapiḥ |
ajaikapādahirbudhnyo bahurūpo mahāniti ||

5.31.36

sarūpāyāṃ prasūtasya striyāṃ rudraśca koṭiśaḥ |
tatraikādaśamukhyāstu tannāmāni mune śṛṇu ||

5.31.37

ajaikapādahirbudhnyastvaṣṭā rudraśca vīryavān |
haraśca bahurūpaśca tryambakaścāparājitaḥ ||

5.31.38

vṛṣākapiśca śambhuśca kapardī raivatastathā |
ekādaśaite kathitā rudrāstribhuvaneśvarāḥ ||

5.31.39

śataṃ tvevaṃ samākhyātaṃ rudrāṇāmamitaujasām |
śṛṇu kaśyapapatnīnāṃ nāmāni munisattama ||

5.31.39.c1

iti śrīśivamahāpurāṇe pañcamyāmumāsaṃhitāyāṃ sargavarṇanaṃ nāmaikatriṃśo'dhyāyaḥ ||

5.31.39.p2

śrīgaṇeśāya namaḥ ||

5.31.39.p3

śrīgaurīśaṅkarābhyāṃ namaḥ ||

5.31.39.p4

śrīśivamahāpurāṇam ||

Linked texts (8)