Pramāṇa · Search · About · API

Shivapurana 5.32: dvātriṃśo'dhyāyaḥ | kaśyapavaṃśavarṇanam 1

Śivapurāṇa (complete text) 5.32

Language
Sanskrit

Contents

dvātriṃśo'dhyāyaḥ | kaśyapavaṃśavarṇanam 1

5.32.1

sūta uvāca |
aditirditiśca surasāriṣṭelā danureva ca |
surabhirvinatā caiva tāmrā krodhavaśā khaśā ||

5.32.2

kadrūrmuniśca viprendra tāsvapatyāni me śṛṇu |
pūrvamanvantare śreṣṭhe dvādaśāsansurottamāḥ ||

5.32.3

tuṣitā nāma te'nyonyamūcurvaivasvate'ntare |
upasthite suyaśasaścākṣuṣasyāntare manoḥ ||

5.32.4

hitāya sarvalokānāṃ samāgamya parasparam |
āgacchata drutaṃ devā aditiṃ ca praviśya vai ||

5.32.5

manvantare prasūyāmaḥ satāṃ śreyo bhaviṣyati |
evamuktāstu te sarve cākṣuṣasyāntare manoḥ ||

5.32.6

mārīcātkaśyapājjātāste'dityāṃ dakṣakanyayā |
tatra viṣṇuśca śakraśca jajñāte punareva hi ||

5.32.7

aryamā caiva dhātā ca tvaṣṭā pūṣā tathaiva ca |
vivasvān savitā caiva mitrāvaruṇa eva ca ||

5.32.8

aṃśo bhagaścātitejā ādityā dvādaśa smṛtāḥ |
cākṣuṣasyāntare pūrvamāsanye tuṣitāḥ surāḥ ||

5.32.9

puraiva tasyāntare tu ādityā dvādaśa smṛtāḥ |
iti proktāni kramaśo'dityapatyāni śaunaka ||

5.32.5.32.10

saptaviṃśatiryāḥ proktāḥ somapatnyo'tha suvratāḥ |
tāsāmapatyānyabhavandīptayo'mitatejasaḥ ||

5.32.11

ariṣṭanemipatnīnāmapatyānīha ṣoḍaśa |
bahuputrasya viduṣaścatasro vidyutaḥ smṛtāḥ ||

5.32.12

kṛśāśvasya tu devarṣe devapraharaṇāḥ smṛtāḥ |
bhārmyāyāmarciṣi mune dhūmrakeśastathaiva ca ||

5.32.13

svadhā satī ca dve patnyau svadhā jyeṣṭhā satī parā |
svadhāsūta pitṝn vedamatharvāṅgirasaṃ satī ||

5.32.14

ete yugasahasrānte jāyante punareva hi |
sarvadevanikāyāśca trayastriṃśattu kāmajāḥ ||

5.32.15

yathā sūryasya nityaṃ hi udayāstamayāviha |
evaṃ devānikāste ca sambhavanti yuge yuge ||

5.32.16

dityāṃ babhūvatuḥ putrau kaśyapāditi naḥ śrutam |
hiraṇyakaśipuścaiva hiraṇyākṣaśca vīryavān ||

5.32.17

siṃhikā hyabhavatkanyā vipracitteḥ parigrahaḥ |
hiraṇyakaśipoḥ putrāścatvāraḥ prathitaujasaḥ ||

5.32.18

anuhrādaśca hrādaśca saṃhrādaścaiva vīryavān |
prahrādaścānujastatra viṣṇubhaktivicāradhīḥ ||

5.32.19

anuhrādasya sūryāyāṃ pulomā mahiṣastathā |
hrādasya dhamanirbhāryāsūta vātāpimilvalam ||

5.32.5.32.20

saṃhrādasya kṛtirbhāryāsūta pañcajanaṃ tataḥ |
virocanastu prāhrādirdevyāṃ tasyābhavad baliḥ ||

5.32.21

baleḥ putraśataṃ tvāsīdaśanāyāṃ munīśvara |
balirāsīnmahāśaivaḥ śivabhaktiparāyaṇaḥ ||

5.32.22

dānaśīla udāraśca puṇyakīrtitapāḥ smṛtaḥ |
tatputro bāṇanāmā yaḥ so'pi śaivavaraḥ sudhīḥ |
yaḥ santoṣya śivaṃ samyaggāṇapatyamavāpa ha ||

5.32.23

sā kathā śrutapūrvā te bāṇasya hi mahātmanaḥ |
kṛṣṇaṃ yaḥ samare vīraḥ suprasannaṃ cakāra ha ||

5.32.24

hiraṇyākṣasutāḥ pañca paṇḍitāḥ sumahābalāḥ |
kukuraḥ śakuniścaiva bhūtasantāpanastathā ||

5.32.25

mahānādaśca vikrāntaḥ kālanābhastathaiva ca |
ityuktā ditiputrāśca danoḥ putrān mune śṛṇu ||

5.32.26

abhavandanuputrāśca śataṃ tīvraparākramāḥ |
ayomukhaḥ śambaraśca kapolo vāmanastathā ||

5.32.27

vaiśvānaraḥ pulomā ca vidrāvaṇamahāśirau |
svarbhānurvṛṣaparvā ca vipracittiśca vīryavān ||

5.32.28

ete sarve danoḥ putrāḥ kaśyapādanujajñire |
eṣāṃ putrīḥ śṛṇu mune prasaṅgādvacmi te'nagha ||

5.32.29

svabhārnostu prabhā kanyā pulomnastu śacī sutā |
upadānavī hayaśirā śarmiṣṭhā vārṣaparvaṇī ||

5.32.5.32.30

pulomikā pulomā ca vaiśvānarasute ubhe |
bahvapatye mahāvīrye mārīcestu parigrahā t ||

5.32.31

tayoḥ putrasahasrāṇi ṣaṣṭirdānavanandanāḥ |
marīcirjanayāmāsa mahatā tapasānvitāḥ ||

5.32.32

paulomāḥ kālakhañjāśca dānavānāṃ mahābalāḥ |
avadhyā devatānāṃ ca hiraṇyapuravāsinaḥ ||

5.32.33

pitāmahaprasādena ye hatāḥ savyasācinā |
siṃhikāyāmathotpannā vipracitteḥ sutāstathā ||

5.32.34

daityadānavasaṃyogājjātāstīvraparākramāḥ |
saiṃhikeyā iti khyātāstrayodaśa mahābalāḥ ||

5.32.35

rāhuḥ śalyo subalino balaścaiva mahābalaḥ |
vātāpirnamuciścaivāthelvalaḥ svasṛpastathā ||

5.32.36

ajiko narakaścaiva kālanābhastathaiva ca |
śaramāṇaḥ śaraḥ kalpa ete vaṃśavivardhanāḥ ||

5.32.37

eṣāṃ putrāśca pautrāśca danuvaṃśavivarddhanāḥ |
bahavaśca samudbhūtā vistaratvānna varṇitāḥ ||

5.32.38

saṃhrādasya tu daiteyā nivātakavacāḥ kule |
utpannā marutastasmiṃstapasā bhāvitātmanaḥ ||

5.32.39

ṣaṇmukhādyā mahāsattvāstāmrāyāḥ parikīrtitāḥ |
kākī śyenī ca bhāsī ca sugrīvī ca śukī tathā ||

5.32.5.32.40

gṛdhrikāśvī hyulūkī ca tāmrākanyāḥ prakīrtitāḥ |
kākī kākānajanayadulūkī pratyulūkakān ||

5.32.41

śyenī śyenāṃstathā bhāsī bhāsāngṛddhī tu gṛdhrakān |
śukī śukānajanayatsugrīvī śubhapakṣiṇaḥ ||

5.32.42

aśvānuṣṭrān gardabhāṃśca tāmrā ca kaśyapapriyā |
janayāmāsa cetyevaṃ tāmrāvaṃśaḥ prakīrtitaḥ ||

5.32.43

vinatāyāśca putrau dvāvaruṇo garuḍastathā |
suparṇaḥ patatāṃ śreṣṭho dāruṇaḥ svena karmaṇā ||

5.32.44

surasāyāḥ sahasraṃ tu sarpāṇāmamitaujasām |
anekaśirasāṃ teṣāṃ khecarāṇāṃ mahātmanām ||

5.32.45

yeṣāṃ pradhānā rājānaḥ śeṣavāsukitakṣakāḥ |
airāvato mahāpadmaḥ kambalāśvatarāvubhau ||

5.32.46

ailāpatrastathā padmaḥ karkoṭakadhanañjayau |
mahānīlamahākarṇau dhṛtarāṣṭro balāhakaḥ ||

5.32.47

kuharaḥ puṣpadantaśca durmukhaḥ sumukhastathā |
bahuśaḥ khararomā ca pāṇirityevamādayaḥ ||

5.32.48

gaṇāḥ krodhavaśāyāśca tasyāḥ sarve ca daṃṣṭriṇaḥ |
aṇḍajāḥ pakṣiṇo'bjāśca varāhyāḥ paśavo matāḥ ||

5.32.49

anāyuṣāyāḥ putrāśca pañcāśacca mahābalāḥ |
abhavanbalavṛkṣau ca vikṣaro'tha bṛhaṃstathā ||

5.32.5.32.50

śaśāṃstu janayāmāsa surarabhirmahiṣāṃstathā |
ilā vṛkṣām̐llatā vallīstṛṇajātīstu sarvaśaḥ ||

5.32.51

khaśā tu yakṣarakṣāṃsi munirapsarasastathā |
ariṣṭāsūta sarpāṃśca prabhā vai mānavottamān ||

5.32.52

ete kaśyapadāyādāḥ kīrtitāste munīśvara |
yeṣāṃ putrāśca pautrāśca śataśo'tha sahasraśaḥ ||

5.32.52.c1

iti śrīśivamahāpurāṇe pañcamyāmumāsaṃhitāyāṃ kaśyapavaṃśavarṇanaṃ nāma dvātriṃśo'dhyāyaḥ ||

5.32.52.p2

śrīgaṇeśāya namaḥ ||

5.32.52.p3

śrīgaurīśaṅkarābhyāṃ namaḥ ||

5.32.52.p4

śrīśivamahāpurāṇam ||

Linked texts (7)