Shivapurana 5.33: trayastriṃśattamo'dhyāyaḥ | kaśyapavaṃśavarṇanam 2
Śivapurāṇa (complete text) 5.33
- Language
- Sanskrit
Contents
trayastriṃśattamo'dhyāyaḥ | kaśyapavaṃśavarṇanam 2
5.33.1
sūta uvāca |
eṣa manvantare tāta sargaḥ svārociṣe smṛtaḥ |
vaivasvate tu mahati vāruṇe vita te kratau ||
5.33.2
juhvānasya brahmaṇo vai prajāsarga ihocyate |
pūrvaṃ yānatha brahmarṣīnutpannān sapta mānasān ||
5.33.3
putrānvai kalpayāmāsa svayameva pitāmahaḥ |
teṣāṃ virodho devānāṃ dānavānāṃ mahāṝṣe ||
5.33.4
ditirvinaṣṭaputrā tu kaśyapaṃ samupasthitā |
sa kaśyapaḥ prasannātmā samgayagārādhitastayā ||
5.33.5
vareṇacchandayāmāsa sā ca vavre varaṃ tadā |
putramindravadhārthāya samarthamamitaujasam ||
5.33.6
sa tasyai ca varaṃ prādātprārthitaṃ sumahātapāḥ |
brahmacaryyādiniyamaṃ prāha caiva śataṃ samāḥ ||
5.33.7
dhārayāmāsa garbhaṃ tu śuciḥ sā varavarṇinī |
brahmacaryyādiniyamaṃ ditirdadhre tathaiva vai ||
5.33.8
tatastvādhāya so dityāṃ garbhaṃ taṃ śaṃsitavrataḥ |
jagāma kaśyapastaptuṃ tapaḥ saṃhṛṣṭamānasaḥ ||
5.33.9
tasyāścaivāntaraṃ prepsuḥ so'bhavatpākaśāsanaḥ |
ūnavarṣe śate cāsyā dadarśāntarameva saḥ ||
5.33.5.33.10
akṛtvā pādayoḥ śaucaṃ ditirarvākṣirāstadā |
nidrāmāhārayāmāsa bhāvino'rthasya gauravāt ||
5.33.11
etasminnantare śakrastasyāḥ kukṣiṃ praviśya saḥ |
vajrapāṇistu taṃ garbhaṃ saptadhā hi nyakṛntata ||
5.33.12
sa pāṭyamāno garbho'tha vajreṇa praruroda ha |
rudantaṃ saptadhaikaikaṃ mā rodīriti tānpunaḥ |
cakarta vajrapāṇistānneva mamrustathāpi te ||
5.33.13
te tamūcuḥ pāṭyamānāḥ sarve prāñjalayo mune |
no jighāṃsasi kiṃ śakra bhrātaro marutastava ||
5.33.14
indreṇa svīkṛtāste hi bhrātṛtve sarva eva ca |
tatyajurddaityabhāvaṃ te viprarṣe śaṅkarecchayā ||
5.33.15
maruto nāma te devā babhūvuḥ sumahābalāḥ |
khagā ekonapañcāśatsahāyā vajrapāṇinaḥ ||
5.33.16
teṣāmeva pravṛddhānāṃ hariḥ prādātprajāpatiḥ |
kramaśastāni rājyāni pṛthupūrvaṃ śṛṇuṣva tat ||
5.33.17
ariṣṭaḥ puruṣo vīraḥ kṛṣṇo jiṣṇuḥ prajāpatiḥ |
parjanyastu dhanādhyakṣastasya sarvamidaṃ jagat ||
5.33.18
bhūtasargamimaṃ samyagavocaṃ te mahāmune |
vibhāgaṃ śṛṇu rājyānāṃ kramaśastaṃ bruve'dhunā ||
5.33.19
abhiṣicyādhirājye tu pṛthuṃ vainyaṃ pitāmahaḥ |
tataḥ krameṇa rājyāni vyādeṣṭumupacakrame ||
5.33.5.33.20
dvijānāṃ vīrudhāṃ caiva nakṣatragrahayostathā |
yajñānāṃ tapasāṃ caiva somaṃ rājye'bhyaṣecayat ||
5.33.21
apāṃ tu varuṇaṃ rājye rājñāṃ vaiśravaṇaṃ prabhum |
ādityānāṃ tathā viṣṇuṃ vasūnāmatha pāvakam ||
5.33.22
prajāpatīnāṃ dakṣaṃ tu marutāmatha vāsavam |
daityānāṃ dānavānāṃ ca prahlādamamitaujasam ||
5.33.23
vaivasvataṃ pitṝṇāṃ ca yamaṃ rājye'bhyaṣecayat |
mātṝṇāṃ ca vratānāṃ ca mantrāṇāṃ ca tathā gavām ||
5.33.24
yakṣāṇāṃ rākṣasānāṃ ca pārthivānāṃ tathaiva ca |
sarvabhūtapiśācānāṃ giriśaṃ śūlapāṇinam ||
5.33.25
śailānāṃ himavantaṃ ca nadīnāmatha sāgaram |
mṛgāṇāmatha śārdūlaṃ govṛṣaṃ tu gavāmapi ||
5.33.26
vanaspatīnāṃ vṛkṣāṇāṃ vaṭaṃ rājye'bhyaṣecayat |
iti dattaṃ prajeśena rājyaṃ sarvatra vai kramāt ||
5.33.27
pūrvasyāṃ diśi putraṃ tu vairājasya prajāpateḥ |
sthāpayāmāsa sarvātmā rājye viśvapatirvibhuḥ ||
5.33.28
tathaiva muniśārdūla kardamasya prajāpateḥ |
dakṣiṇasyāṃ tathā putraṃ sudhanvānamacīklṛpat ||
5.33.29
paścimāyāṃ diśi tathā rajasaḥ putramacyutam |
ketumantaṃ mahātmānaṃ rājānaṃ vyādiśatprabhuḥ ||
5.33.5.33.30
tathā hiraṇyaromāṇaṃ parjanyasya prajāpateḥ |
udīcyāṃ diśi rājānaṃ durdharṣaṃ so'bhyaṣecayat ||
5.33.31
tasya vistāramākhyātaṃ pṛthorvainyasya śaunaka |
mahardhyai tadadhiṣṭhānaṃ purāṇaṃ parikīrtitam ||
5.33.31.c1
iti śrīśivamahāpurāṇe pañcamyāmumāsaṃhitāyāṃ kaśyapavaṃśavarṇanaṃ nāma trayastriṃśattamo'dhyāyaḥ ||
5.33.31.p2
śrīgaṇeśāya namaḥ ||
5.33.31.p3
śrīgaurīśaṅkarābhyāṃ namaḥ ||
5.33.31.p4
śrīśivamahāpurāṇam ||
Linked texts (7)
- Critical edition (BORI) — Sanskrit
- Brahmapurāṇa — Vyāsa, Sanskrit
- Vāyupurāṇa — Vyāsa, Sanskrit
- Viṣṇupurāṇa (vulgate) — Sanskrit
- Brahmāṇḍapurāṇa — Vyāsa, Sanskrit
- Matsyapurāṇa — Vyāsa, Sanskrit
- Vāmanapurāṇa — Vyāsa, Sanskrit