Pramāṇa · Search · About · API

Shivapurana 5.34: catustriṃśo'dhyāyaḥ | sarvamanvatarānurkārtanam

Śivapurāṇa (complete text) 5.34

Language
Sanskrit

Contents

catustriṃśo'dhyāyaḥ | sarvamanvatarānurkārtanam

5.34.1

śaunaka uvāca |
manvantarāṇi sarvāṇi vistareṇānukīrtaya |
yāvanto manavaścaiva śrotumicchāmi tānaham ||

5.34.2

sūta uvāca |
svāyambhuvo manuścaiva tataḥ svārociṣastathā |
uttamastāmasaścaiva raivataścākṣuṣastathā ||

5.34.3

ete ca manavaḥ ṣaṭ te samproktā munipuṅgava |
vaivasvato muniśreṣṭha sāmprataṃ manurucyate ||

5.34.4

sāvarṇiśca manuścaiva tato raucyastathā paraḥ |
tathaiva brahmasāvarṇiścatvāro manavastathā ||

5.34.5

tathaiva dharmasāvarṇī rudrasāvarṇireva ca |
devasāvarṇirākhyāta indrasāvarṇireva ca ||

5.34.6

atītā vartamānāśca tathaivānāgatāśca ye |
kīrtitā manavaścāpi mayaivaite yathā śrutāḥ ||

5.34.7

mune caturdaśaitāni trikālānugatāni te |
proktāni nirmitaḥ kalpo yugasāhasraparyayaḥ ||

5.34.8

ṛṣīṃsteṣāṃ pravakṣyāmi puttrān devagaṇāṃstathā |
śṛṇu śaunaka suprītyā kramaśastānyaśasvinaḥ ||

5.34.9

marīciratrirbhagavānaṅgirāḥ pulahaḥ kratuḥ |
pulastyaśca vasiṣṭhaśca saptaite brahmaṇaḥ sutāḥ ||

5.34.5.34.10

uttarasyāṃ diśi tathā mune saptarṣayastathā |
yāmā nāma tathā devā āsansvāyambhuve'ntare ||

5.34.11

āgnīdhraścāgnibāhuśca medhā medhātithirvasuḥ |
jyotiṣmāndhṛtimānhavyaḥ savanaḥ śubhra eva ca ||

5.34.12

svāyambhuvasya putrāste manordaśa mahātmanaḥ |
kīrtitā muniśārdūla tatrendro yajña ucyate ||

5.34.13

prathamaṃ kathitaṃ tāta divyaṃ manvataraṃ tathā |
dvitīyaṃ te pravakṣyāmi tannibodha yathātatham ||

5.34.14

ūrjastambhaḥ parastambha ṛṣabho vasumāṃstathā |
jyotiṣmān dyutimāṃścaiva rociṣmān saptamastathā ||

5.34.15

ete maharṣayo jñeyāstatrendro rocanastathā |
devāśca tuṣitā nāma smṛtāḥ svārociṣeṃ'tare ||

5.34.16

harighnaḥ sukṛtirjyotirayomūrtirayasmayaḥ |
prathitaśca manasyuśca nabhaḥ sūryastathaiva ca ||

5.34.17

svārociṣasya putrāste manordaśa mahātmanaḥ |
kīrtitā muniśārdūla mahāvīryaparākramāḥ ||

5.34.18

dvitīyametatkathitaṃ mune manvantaraṃ mayā |
tṛtīyaṃ tava vakṣyāmi tannibodha yathātatham ||

5.34.19

vasiṣṭhaputrāḥ saptāsanvāsiṣṭhā iti viśrutāḥ |
hiraṇyagarbhasya sutā ūrjā nāma mahaujasaḥ ||

5.34.5.34.20

ṛṣayo'tra samākhyātāḥ kīrtyamānānnibodha me |
auttameyā ṛṣiśreṣṭha daśa putrā manoḥ smṛtāḥ ||

5.34.21

iṣa ūrjita ūrjaśca madhurmādhava eva ca |
śuciḥ śukravahaścaiva nabhaso nabha eva ca ||

5.34.22

ṛṣabhastatra devāśca satyavedaśrutādayaḥ |
tatrendraḥ satyajinnāma trailokyādhipatirmune ||

5.34.23

tṛtīyametatparamaṃ manvataramudāhṛtam |
manvataraṃ caturthaṃ te kathayāmi mune śṛṇu ||

5.34.24

gārgyaḥ pṛthustathā vāgmī jayo dhātā kapīnakaḥ |
kapīvān sapta ṛṣayaḥ satyā devagaṇāstathā ||

5.34.25

tatrendrastriśikho jñeyo manuputrānmune śṛṇu |
dyūtipotaḥ sautapasyastapaḥ śūlaśca tāpanaḥ ||

5.34.26

taporatirakalmāṣo dhanvī khaḍgī mahānṛṣiḥ |
tāmasasya smṛtā ete daśa putrā mahāvratāḥ ||

5.34.27

tāmasasyāntaraṃ caiva manorme kathitaṃ tava |
caturthaṃ pañcamaṃ tāta śṛṇu manvantaraṃ param ||

5.34.28

devabāhurjayaścaiva munirvedaśirāstathā |
hiraṇyaromā parjanya ūrdhvabāhuśca somapāḥ ||

5.34.29

satyanetraratāścānye ete saptarṣayo'pare |
devāśca bhūtarajasastapaḥprakṛtayastathā ||

5.34.5.34.30

tatrendro vibhunāmā ca trailokyādhipatistathā |
raivatākhyo manustatra jñeyastāmasasodaraḥ ||

5.34.31

arjunaḥ paṅktivindhyo vā dayāyāstanayāmune |
mahatā tapasā yuktā merupṛṣṭhe vasanti hi ||

5.34.32

ruceḥ prajāpatiḥ putro raucyo nāma manuḥ smṛtaḥ |
bhūtyā cotpādito devyāṃ bhautyo nāmābhavatsutaḥ ||

5.34.33

anāgatāśca saptaite kalpe'smin manavaḥ smṛtāḥ |
anāgatāśca saptaiva smṛtā divi maharṣayaḥ ||

5.34.34

kaśyapo'trirvasiṣṭaśca viśvāmitro'tha gautamaḥ |
jamadagnībharadvājaḥ satraite ṝṣyaḥ smṛtāḥ ||

5.34.35

rāmo vyāsastathātreyo dīptimānsubahuśrutaḥ |
bharadvājastathā drauṇiraśvatthāmā mahādyutiḥ ||

5.34.36

gautamasyātmajaścaiva śaradvān gautamaḥ kṛpaḥ |
kauśiko gālavaścaiva ruruḥ kaśyapa eva ca ||

5.34.37

ete sapta mahātmāno bhaviṣyā munisattamāḥ |
devāścānāgatāstatra trayaḥ proktāḥ svayambhuvā ||

5.34.38

mārīceścaiva putrāste kaśyapasya mahātmanaḥ |
teṣāṃ virocanasuto balirindro bhaviṣyati ||

5.34.39

viṣāṃṅgaścāvanīvāṃśca sumanto dhṛtimānvasuḥ |
sūriḥ surākhyo viṣṇuśca rājā sumatireva ca ||

5.34.5.34.40

sāvarṇeśca manoḥ putrā bhaviṣyā daśa śaunaka |
ihāṣṭamaṃ hi kathitaṃ navamaṃ cāntaraṃ śṛṇu ||

5.34.41

prathamaṃ dakṣasāvarṇi pravakṣyāmi manuṃ śṛṇu |
medhātithiśca paulastyo vasuḥ kaśyapa eva ca ||

5.34.42

jyotiṣmān bhārgavaścaiva dhṛtimānaṅgirāstathā |
savanaścaiva vāsiṣṭha ātreyo havya eva ca ||

5.34.43

pulahaḥ sapta ityete ṛṣayo rauhite'ntare |
devatānāṃ gaṇāstatra traya eva mahāmune ||

5.34.44

dakṣaputrasya putrāste rohitasya prajāpateḥ |
dhṛṣṭaketurdīptaketuḥ pañcahasto nirākṛtiḥ ||

5.34.45

pṛthuśravā bhūridyumno ṛcīko bṛhato gayaḥ |
prathamasya tu sāvarṇernava putrā mahaujasaḥ ||

5.34.46

daśame tvatha paryāye dvitīyasyāntare manoḥ |
haviṣmān paulahaścaiva prakṛtiścaiva bhārgavaḥ ||

5.34.47

āpomuktistathātreyo vāsiṣṭhaścāvyayaḥ smṛtaḥ |
paulastyaḥ prayatiścaiva bhāmāraścaiva kāśyapaḥ ||

5.34.48

aṅgirānenasaḥ satyaḥ saptaite paramarṣayaḥ |
devatānāṃ gaṇāścāpi dviṣimantaśca ye smṛtāḥ ||

5.34.49

teṣāmindraḥ smṛtaḥ śambhustvayameva maheśvaraḥ |
akṣatvānuttamaujāśca bhūriṣeṇaśca vīryavān ||

5.34.5.34.50

śatānīko nirāmitro vṛṣaseno jayadrathaḥ |
bhūridyumnaḥ suvarcārcirdaśa tvete manoḥ sutāḥ ||

5.34.51

ekādaśe tu paryāye tṛtīyasyāntare manoḥ |
tasyāpi sapta ṛṣayaḥ kīrtyamānānnibodha me ||

5.34.52

haviṣmān kaśyapaścāpi vapuṣmāṃścaiva vāruṇaḥ |
ātreyo'tha vasiṣṭhaśca hyanayastvaṅgirāstathā ||

5.34.53

cārudhṛṣyaśca paulastyo niḥsvaro'gnistu taijasaḥ |
saptaite ṛṣayaḥ proktāstrayo devagaṇāḥ smṛtāḥ ||

5.34.54

brahmaṇastu sutāste hi ta ime vaidhṛtāḥ smṛtāḥ |
sarvagaśca suśarmā ca devānīkastu kṣemakaḥ ||

5.34.55

dṛḍheṣuḥ khaṇḍako darśaḥ kuhurbāhurmanoḥ smṛtāḥ |
sāvarṇasya tu putrā vai tṛtīyasya nava smṛtāḥ ||

5.34.56

caturthasya tu sāvarṇerṛṣīnsapta nibodha me |
dyutirvasiṣṭhaputraśca ātreyaḥ sutapāstathā ||

5.34.57

aṅgirāstapaso mūrtistapasvī kaśyapastathā |
tapodhanaśca paulastyaḥ pulahaśca taporatiḥ ||

5.34.58

bhārgavaḥ saptamasteṣāṃ vijñeyaḥ tapaso nidhiḥ |
pañca devagaṇāḥ proktā mānasā brahmaṇaḥ sutāḥ ||

5.34.59

ṛtadhāmā tadindro hi trilokī rājyakṛtsukhī |
dvādaśe caiva paryāye bhāvye raucyāntare mune ||

5.34.5.34.60

aṅgirāścaiva dhṛtimān paulastyo havyavāṃstu yaḥ |
paulahastattvadarśī ca bhārgavaśca nirutsavaḥ ||

5.34.61

niṣprapañcastathātreyo nirdehaḥ kaśyapastathā |
sutapāścaiva vāsiṣṭhaḥ saptaivaite maharṣayaḥ ||

5.34.62

traya eva gaṇāḥ proktā devatānāṃ svayambhuvā |
divaspatistamindro vai vicitraścitra eva ca ||

5.34.63

nayo dharmo dhṛtondhraśca sunetraḥ kṣatravṛddhakaḥ |
nirbhayaḥ sutapā droṇo mano raucyasya te sutāḥ ||

5.34.64

manustrayodaśo bhāvyo devasāvarṇirātmavān citrasenavicitrādyā devasāvarṇidehajāḥ ||

5.34.65

devāḥ sukarmasutrāmasaṃjñā indro divaspatiḥ nirmokatattvadarśādyā bhaviṣyantyuṣayastadā ||

5.34.66

caturdaśe tu paryāye bhautyasyaivāntare manoḥ |
āgnīdhraḥ kāśyapaścaiva paulastyo māgadhaśca yaḥ ||

5.34.67

bhārgavo'pyativāhyaśca śucirāṅgirasastathā |
yuktaścaiva tathātreyaḥ śukro vāśiṣṭha eva ca ||

5.34.68

ajitaḥ pulahaścaiva hyantyāḥ saptarṣayaśca te |
pavitrāścākṣuṣā devāḥ śucirindro bhaviṣyati ||

5.34.69

eteṣāṃ kalya utthāya kīrtanātsukhamedhate |
atītānāgatānāṃ vai maharṣīṇāṃ naraiḥ sadā ||

5.34.5.34.70

devatānāṃ gaṇāḥ proktāḥ śṛṇu pañca mahāmune |
turaṅgabhīrurbudhnaśca tanugro'nugra eva ca ||

5.34.71

atimānī pravīṇaśca viṣṇuḥ saṅkrandanastathā |
tejasvī sabalaścaiva bhautyastvete manoḥ sutā ||

5.34.72

bhaumasyaivādhikāre vai pūrṇe kalpastu pūryate |
ityete'nāgatātītā manavaḥ kīrtitā mayā ||

5.34.73

uktāḥ sanatkumāreṇa vyāsāyāmitatejasā |
pūrṇe yugasahasrānte paripālya svadharmataḥ ||

5.34.74

prajābhistapasā yuktā brahmalokaṃ vrajanti te |
yugāni sapratistvekaṃ sāgrāṇyantaramucyate ||

5.34.75

caturdaśaite manavaḥ kīrtitāḥ kīrtivardhanāḥ |
manvantareṣu sarveṣu saṃhārānte punarbhavaḥ ||

5.34.76

na śakyamantaraṃ teṣāṃ vaktuṃ varṣaśatairapi |
pūrṇe śatasahasre tu kalpo niḥśeṣa ucyate ||

5.34.77

tatra sarvāṇi bhūtāni dagdhānyādityaraśmibhiḥ |
brahmāṇamagrataḥ kṛtvā sadādityagaṇairmune ||

5.34.78

praviśanti suraśreṣṭha hariṃ nārāyaṇaṃ param |
sraṣṭāraṃ sarvabhūtānāṃ kalpānteṣu punaḥpunaḥ ||

5.34.71_2

bhūyo'pi bhagavān rudraḥ saṃhartā kāla eva hi |
kalpānte tatpravakṣyāmi manorvaivasvatasya vai ||

5.34.5.34.80

iti te kathitaṃ sarvaṃ manvantarasamudbhavam |
visargaṃ puṇyamākhyānaṃ dhanyaṃ kulavivarddhanam ||

5.34.5.34.80.c1

iti śrīśivamahāpurāṇe pañcamyāmumāsaṃhitāyāṃ sarvamanvatarānurkārtanaṃ nāma catustriṃśo'dhyāyaḥ ||

5.34.5.34.80.p2

śrīgaṇeśāya namaḥ ||

5.34.5.34.80.p3

śrīgaurīśaṅkarābhyāṃ namaḥ ||

5.34.5.34.80.p4

śrīśivamahāpurāṇam ||

Linked texts (5)