Pramāṇa · Search · About · API

Shivapurana 5.39: ekonacatvāriṃśo'dhyāyaḥ | vaivasvatavaṃśodbhavarājavarṇanam

Śivapurāṇa (complete text) 5.39

Language
Sanskrit

Contents

ekonacatvāriṃśo'dhyāyaḥ | vaivasvatavaṃśodbhavarājavarṇanam

5.39.1

śaunaka uvāca |
sagarasyātmajā vīrāḥ kathaṃ jātā mahābalāḥ |
vikrāntāḥ ṣaṣṭisāhasrā vidhanā kena vā vada ||

5.39.2

sūta uvāca |
dve patnyo sagarasyāstāṃ tapasā dagdhakilviṣe |
aurvastayorvaraṃ prādāttoṣito munisattamaḥ ||

5.39.3

ṣaṣṭiputrasahasrāṇi ekā vavre tarasvinām |
ekaṃ vaṃśakaraṃ tvekā yatheṣṭaṃ varaśālinī ||

5.39.4

tatraivāgatya tāṃllabdhvā putrān śūrānbahūṃstadā |
sā caiva suṣuve tumbaṃ bījapūrvaṃ pṛthak kṛtam ||

5.39.5

te sarve hi svadhātrībhirvavṛdhuśca yathākramam |
ghṛtapūrṇeṣu kumbheṣu kumārāḥ prītivarddhanāḥ ||

5.39.6

kapilāgnipradagdhānāṃ teṣāṃ tatra mahātmanām |
ekaḥ pañcajano nāma putro rājā babhūva ha ||

5.39.7

tataḥ pañcajanasyāsīdaṃśumānnāma vīryavān |
dilīpastanayastasya putro yasya bhagīrathaḥ ||

5.39.8

yastu gaṅgā saricchreṣṭhāmavātārayata prabhuḥ |
samudramānayaccemāṃ duhitṛtvamakalpayat ||

5.39.9

bhagīrathasuto rājā śrutasena iti śrutaḥ |
nābhāgastu sutastasya putraḥ paramadhārmikaḥ ||

5.39.10

ambarīṣastu nābhāgiḥ sindhudvīpastato'bhavat |
ayutājittu dāyādaḥ sindhudvīpasya vīryavān ||

5.39.11

āyutājitsutastvāsīd ṛtuparṇo mahāyaśāḥ |
divyākṣahṛdayajño'sau rājā nalasakho'bhavat ||

5.39.12

ṛtuparṇasutastvāsīdanuparṇo mahādyutiḥ |
tasya kalmāṣapādo vai nāmnā mitrasahastathā ||

5.39.13

kalmāṣapādasya sutaḥ sarvakarmeti viśrutaḥ |
anaraṇyastu putro'bhūdviśrutaḥ sarvaśarmaṇaḥ ||

5.39.14

anaraṇyasuto rājā vidvānmuṇḍidruho'bhavat |
niṣadhastasya tanayo ratiḥ khaṭvāṅga ityapi ||

5.39.15

yena svargādihāgatya muhūrtaṃ prāpya jīvitam |
trayo'pi sañcitā lokā buddhyā satyena cānagha ||

5.39.16

dīrghabāhuḥ sutastasya raghustasyābhavatsutaḥ |
ajastasya tu putro'bhūttasmāddaśaratho'bhavat ||

5.39.17

rāmo daśarathājjajñe dharmātmā yo mahāyaśāḥ |
sa viṣṇvaṃśo mahāśaivaḥ paulastyo yena ghātitaḥ ||

5.39.18

taccaritraṃ ca bahudhā purāṇeṣu pravarṇitam |
rāmāyaṇe prasiddhaṃ hi nātaḥ proktaṃ tu vistarāt ||

5.39.19

rāmasya tanayo jajñe kuśa ityapi viśrutaḥ |
atithistu kuśājjajñe niṣadhastasya cātmajaḥ ||

5.39.20

niṣadhasya nalaḥ putro nabhaḥ putro nalasya tu |
nabhasaḥ puṇḍarīkaśca kṣemadhanvā tataḥ smṛtaḥ ||

5.39.21

kṣemadhanvasutastvāsīddevānīkaḥ pratāpavān |
āsīdahīnagurnāma devānīkātmajaḥ prabhuḥ ||

5.39.22

ahīnagostu dāyādaḥ sahasvānnāma vīryavān |
vīrasenātmajastasya yaścekṣvākukulodbhavaḥ ||

5.39.23

vīrasenasya dāyādaḥ pāriyātro babhūva ha |
tato balākhyastanayaḥ sthalastasmādabhūtsutaḥ ||

5.39.24

arkāṃśasambhavastasmātputro yakṣaḥ pratāpavān |
tatsutastvaguṇastvāsīttasmādvidhṛtirātmajaḥ ||

5.39.25

hiraṇyanābhastatputro yogācāryo babhūva ha |
sa śiṣyo jaiminimunerhyātmavidyāviśāradaḥ ||

5.39.26

kauśalyo yājñavalkyo'tha yogamadhyātmasaṃjñakam |
yato'dhyagānnṛpavarād hṛdayagranthibhedanam ||

5.39.27

tatsuto puṣyanāmā hi dhruvasaṃjñastadātmajaḥ |
agnivarṇaḥ sutastasya śīghranāmā sutastataḥ ||

5.39.28

marunnāmā sutastasya yogasiddho babhūva ha |
asāvāste'dyāpi prabhuḥ kalāpagrāmasaṃjñake ||

5.39.29

tadvāsibhiśca munibhiḥ kalerante sa eva hi |
punarbhāvayitā naṣṭaṃ sūryavaṃśaṃ viśeṣataḥ ||

5.39.30

pṛthuśrutaśca tatputraḥ sandhistasya sutaḥ smṛtaḥ |
amarṣaṇaḥ sutastasya marutvāṃstatsuto'bhavat ||

5.39.31

viśvasāhvaḥ sutastasya tatsuto'bhūtprasenajit |
takṣakastasya tanayaḥ tatsuto hi bṛhadbalaḥ ||

5.39.32

eta ikṣvākuvaṃśīyā atītāḥ samprakīrtitāḥ |
śṛṇutānāgatānbhūpāṃstadvaṃśyāndharmavittamān ||

5.39.33

bṛhadbalasya tanayo bhavitā hi bṛhadraṇaḥ |
bṛhadraṇasutastasyorukriyo hi bhaviṣyati ||

5.39.34

vatsavṛddhaḥ sutastasya prativyomā sutastataḥ |
bhānustattanayo bhāvī divāko vāhinīpatiḥ ||

5.39.35

sahadevaḥ sutastasya mahāvīro bhaviṣyati |
tatsuto bṛhadaśvo hi bhānumāṃstatsuto balī ||

5.39.36

suto bhānumato bhāvī pratīkāśvaśca vīryavān |
supratīkaḥ sutastasya bhaviṣyati nṛpottamaḥ ||

5.39.37

marudevaḥ sutastasya sunakṣatro bhaviṣyati |
tatsutaḥ puṣkarastasyāntarikṣastatsuto dvijāḥ ||

5.39.38

sutapāstatsuto vīro mitracittasya cātmajaḥ |
bṛhadbhājaḥ sutastasya barhināmā tadātmajaḥ ||

5.39.39

kṛtañjayaḥ sutastasya tatsuto hi raṇañjayaḥ |
sañjayastu mayastasya tasya śākyo hi cātmajaḥ ||

5.39.40

śuddhodastanayastasya lāṅgalastu tadātmajaḥ |
tasya prasenajitputrastatsutaḥ śūdrakāhvayaḥ ||

5.39.41

ruṇako bhavitā tasya surathastatsutaḥ smṛtaḥ |
sumitrastatsuto bhāvī vaṃśaniṣṭhānta eva hi ||

5.39.42

sumitrānto'nvayo'yaṃ vai ikṣvākūṇāṃ bhaviṣyati |
rājñāṃ vaicitravīryāṇāṃ dharmiṣṭhānāṃ sukarmaṇām ||

5.39.43

sumitraṃ prāpya rājānaṃ sa tadvaṃśaḥ śubhaḥ kalau |
saṃsthāṃ prāpsyati tadbrāhme vardhiṣyati punaḥ kṛte ||

5.39.44

etadvaivasvate vaṃśe rājāno bhūridakṣiṇāḥ |
ikṣvākuvaṃśaprabhavāḥ prādhānyena prakīrtitāḥ ||

5.39.45

puṇyeyaṃ paramā sṛṣṭirādityasya vivasvataḥ |
śrāddhadevasya devasya prajānāṃ puṣṭidasya ca ||

5.39.46

paṭhan śṛṇvannimāṃ sṛṣṭimādityasya ca mānavaḥ |
prajāvāneti sāyujyamiha bhuktvā sukhaṃ param ||

5.39.46.c1

iti śrīśivamahāpurāṇe pañcamyāmumāsaṃhitāyāṃ vaivasvatavaṃśodbhavarājavarṇanaṃ nāmaikonacatvāriṃśo'dhyāyaḥ ||

5.39.46.p2

śrīgaṇeśāya namaḥ ||

5.39.46.p3

śrīgaurīśaṅkarābhyāṃ namaḥ ||

5.39.46.p4

śrīśivamahāpurāṇam ||

Linked texts (5)