Shivapurana 5.4: caturtho'dhyāyaḥ | śivamāyāprabhāvavarṇanam
Śivapurāṇa (complete text) 5.4
- Language
- Sanskrit
Contents
- 5.4.39 — 4 parts
caturtho'dhyāyaḥ | śivamāyāprabhāvavarṇanam
5.4.1
munaya ūcuḥ |
tāta tāta mahābhāga dhanyastvaṃ hi mahāmate |
adbhuteyaṃ kathā śambhoḥ śrāvitā parabhaktidā ||
5.4.2
punarbrūhi kathāṃ śambhorvyāsapraśnānusārataḥ |
sarvajñastvaṃ vyāsaśiṣyaḥ śivatattvavicakṣaṇaḥ ||
5.4.3
sūta uvāca |
evameva gururvyāsaḥ pṛṣṭavān me'jasambhavam |
sanatkumāraṃ sarvajñaṃ śivabhaktaṃ munīśvaram ||
5.4.4
vyāsa uvāca |
sanatkumāra sarvajña śrāviteyaṃ śubhā kathā |
śaṅkarasya maheśasya nānālīlāvihāriṇaḥ ||
5.4.5
punarbrūhi mahādevamahimānaṃ viśeṣataḥ |
śraddhā ca mahatī śrotuṃ mama tāta pravardhate ||
5.4.6
mahimnā yena śambhostu ye ye loke vimohitāḥ |
māyayā jñānamāhṛtya nānālīlāvihāriṇaḥ ||
5.4.7
sanatkumāra uvāca |
śṛṇu vyāsa mahābuddhe śāṅkarīṃ sukhadāṃ kathām |
yasyāḥ śravaṇamātreṇa śive bhaktiḥ prajāyate ||
5.4.8
śivaḥ sarveśvaro devaḥ sarvātmā sarvadarśanaḥ |
mahimnā tasya sarvaṃ hi vyāptaṃ ca sakalaṃ jagat ||
5.4.9
śivasyaiva parā mūrtirbrahmaviṣṇvīśvarātmikā |
sarvabhūtātmabhūtākhyā triliṅgāliṅgarūpiṇī ||
5.4.10
devānāṃ yonayaścāṣṭau mānuṣī navamī ca yā |
tiraścāṃ yonayaḥ pañca bhavantyevaṃ caturdaśa ||
5.4.11
bhūtā vā vartamānā vā bhaviṣyāścaiva sarvaśaḥ |
śivātsarve pravartante līyante vṛddhimāgatāḥ ||
5.4.12
brahmendropendracandrāṇāṃ devadānavabhoginām |
gandharvāṇāṃ manuṣyāṇāmanyeṣāṃ vāpi sarvaśaḥ ||
5.4.13
bandhurmitramathācāryo rakṣannetārthavān guruḥ |
kalpadrumo'tha vā bhrātā pitā mātā śivo mataḥ ||
5.4.14
śivaḥ sarvamayaḥ puṃsāṃ svayaṃ vedyaḥ parātparaḥ |
vaktuṃ na śakyate yaśca paraṃ cānuparaṃ ca yat ||
5.4.15
tanmāyā paramā divyā sarvatra vyāpinī mune |
tadadhīnaṃ jagatsarvaṃ sadevāsuramānuṣam ||
5.4.16
kāmena svasahāyena prabalena manobhuvā |
sarvaḥ pradharṣito vīro viṣṇvādiprabalo'pi hi ||
5.4.17
śivamāyāprabhāveṇābhūddhariḥ kāmamohitaḥ |
parastrīdharṣaṇaṃ cakre bahuvāraṃ munīśvara ||
5.4.18
indrastridaśapo bhūtvā gautamastrīvimohitaḥ |
pāpaṃ cakāra duṣṭātmā śāpaṃ prāpa munestadā ||
5.4.19
pāvako'pi jagacchreṣṭho mohitaḥ śivamāyayā |
kāmādhīnaḥ kṛto garvāttatastenaiva coddhṛtaḥ ||
5.4.20
jagatprāṇo'pi garveṇa mohitaḥ śivamāyayā |
kāmena nirjito vyāsa cakre'nyastrīratiṃ purā ||
5.4.21
caṇḍaraśmistu mārtaṇḍo mohitaḥ śivamāyayā |
kāmākulo babhūvāśu dṛṣṭvāśvīṃ hayarūpadhṛk ||
5.4.22
candraśca mohitaḥ śambhormāyayā kāmasaṅkulaḥ |
gurupatnīṃ jahārātha yutastenaiva coddhṛtaḥ ||
5.4.23
pūrvaṃ tu mitrāvaruṇau ghore tapasi saṃsthitau |
mohitau tāvapi munī śivamāyāvimohitau ||
5.4.24
urvaśīṃ taruṇīṃ dṛṣṭvā kāmukau sambabhūvatuḥ |
mitraḥ kumbhe jahau reto varuṇo'pi tathā jale ||
5.4.25
tataḥ kumbhātsamutpanno vasiṣṭho mitrasambhavaḥ |
agastyo varuṇājjāto vaḍavāgnisamadyutiḥ ||
5.4.26
dakṣaśca mohitaḥ śambhormāyayā brahmaṇaḥ sutaḥ |
bhrātṛbhiḥ sa bhaginyāṃ vai bhoktukāmo'bhavatpurā ||
5.4.27
brahmā ca bahuvāraṃ hi mohitaḥ śivamāyayā |
abhavadbhoktukāmaśca svasutāyāṃ parāsu ca ||
5.4.28
cyavano'pi mahāyogī mohitaḥ śivamāyayā |
sukanyayā vijahre sa kāmāsakto babhūva ha ||
5.4.29
kaśyapaḥ śivamāyāto mohitaḥ kāmasaṅkulaḥ |
yayāce kanyakāṃ mohāddhanvano nṛpateḥ purā ||
5.4.30
garuḍaḥ śāṇḍilīṃ kanyāṃ netukāmaḥ sumohitaḥ |
vijñātastu tayā sadyo dagdhapakṣo babhūva ha ||
5.4.31
vibhāṇḍako munirnārīṃ dṛṣṭvā kāmavaśaṃ gataḥ |
ṛṣyaśṛṅgasutastasya mṛgyāṃ jātaḥ śivājñayā ||
5.4.32
gautamaśca muniḥ śambhormāyāmohitamānasaḥ |
dṛṣṭvā śāradvatīṃ nagnāṃ rarāma kṣubhitastayā ||
5.4.33
retaḥ skannaṃ dadhāra svaṃ droṇyāṃ caiva sa tāpasaḥ |
tasmācca kalaśājjāto droṇaḥ śastrabhṛtāṃ varaḥ ||
5.4.34
parāśaro mahāyogī mohitaḥ śivamāyayā |
matsyodaryā ca cikrīḍe kumāryā dāśakanyayā ||
5.4.35
viśvāmitro babhūvātha mohitaḥ śivamāyayā |
reme menakayā vyāsa vane kāmavaśaṃ gataḥ ||
5.4.36
vasiṣṭhena virodhaṃ tu kṛtavānnaṣṭacetanaḥ |
punaḥ śivaprasādācca brāhmaṇo'bhūtsa eva vai ||
5.4.37
rāvaṇo vaiśravāḥ kāmī babhūva śivamāyayā |
sītāṃ jahre kubuddhistu mohito mṛtyumāpa ca ||
5.4.38
bṛhaspatirmunivaro mohitaḥ śivamāyayā |
bhrātṛpatnyā vaśī reme bharadvājastato'bhavat ||
5.4.39
iti māyāprabhāvo hi śaṅkarasya mahātmanaḥ |
varṇitaste mayā vyāsa kimanyacchrotumicchasi ||
5.4.39.c1
iti śrīśivamahāpurāṇe pañcamyāmumāsaṃhitāyāṃ śivamāyāprabhāvavarṇanaṃ nāma caturtho'dhyāyaḥ ||
5.4.39.p2
śrīgaṇeśāya namaḥ ||
5.4.39.p3
śrīgaurīśaṅkarābhyāṃ namaḥ ||
5.4.39.p4
śrīśivamahāpurāṇam ||
Linked texts (1)
- Puruṣārthasudhānidhi — Sāyaṇācārya, Sanskrit