Shivapurana 5.42: dvicatvāriṃśo'dhyāyaḥ | pitṛprabhāvavarṇanam
Śivapurāṇa (complete text) 5.42
- Language
- Sanskrit
Contents
- 5.42.35 — 4 parts
dvicatvāriṃśo'dhyāyaḥ | pitṛprabhāvavarṇanam
5.42.1
bhīṣma uvāca |
mārkaṇḍeya mahāprājña pitṛbhaktibhṛtāṃ vara |
kiṃ jātaṃ tu tato brūhi kṛpayā munisattama ||
5.42.2
mārkaṇḍeya uvāca |
te dharmayoganiratāḥ sapta mānasacāriṇaḥ |
vāyvambubhakṣāḥ satataṃ śarīramupaśoṣayan ||
5.42.3
sa rājāntaḥpuravṛto nandane maghavā iva |
krīḍitvā suciraṃ tatra sabhāryaḥ svapuraṃ yayau ||
5.42.4
anūho nāma tasyāsītputraḥ paramadhārmikaḥ |
taṃ vibhrājaḥ sutaṃ rājye sthāpayitvā vanaṃ yayau ||
5.42.5
tapaḥ kartuṃ samārebhe yatra te sahacāriṇaḥ |
sa vai tatra nirāhāro vāyubhakṣo mahātapāḥ ||
5.42.6
tato vibhrājitaṃ tena vaibhrājaṃ nāma tadvanam |
babhūva suprasiddhaṃ hi yogasiddhipradāyakam ||
5.42.7
tatraiva te hi śakunāścatvāro yogadharmiṇaḥ |
yogabhraṣṭāstrayaścaiva dehatyāgakṛto'bhavan ||
5.42.8
kāmpilye nagare te tu brahmadattapurogamāḥ |
jātāḥ sapta mahātmānaḥ sarve vigatakalmaṣāḥ ||
5.42.9
smṛtimanto'tra catvārastrayastu parimohitāḥ |
svatantrastvaṇuhājjāto brahmadatto mahaujasaḥ ||
5.42.10
chidradarśī sunetrastu vedavedāṅgapāragau |
jātau śrotriyadāyādau pūrvajātisahoṣitau ||
5.42.11
pañcālo bahvṛcastvāsīdācāryatvaṃ cakāra ha |
dvivedaḥ puṇḍarīkaśca chandogo'dhvaryureva ca ||
5.42.12
tato rājā sutaṃ dṛṣṭvā brahmadattamakalmaṣam |
abhiṣicya svarājye tu parāṃ gatimavāptavān ||
5.42.13
pañcālaḥ puṇḍarīkastu putrau saṃsthāpya mandire |
viviśaturvanaṃ tatra gatau paramikāṃ gatim ||
5.42.14
brahmadattasya bhāryā tu sannitirnāma bhārata |
sā tvekabhāvasaṃyuktā reme bhartrā sahaiva tu ||
5.42.15
śeṣāstu cakravākā vai kāmpilye sahacāriṇaḥ |
jātāḥ śrotriyadāyādā daridrasya kule nṛpa ||
5.42.16
dhṛtimānsumahātmā ca tattvadarśīṃ nirutsukaḥ |
vedādhyayana sampannāścatvāraśchidradarśinaḥ ||
5.42.17
te yoganiratāḥ siddhāḥ prasthitāḥ sarva eva hi |
āmantrya ca mithaḥ śambhoḥ padāmbhojaṃ praṇamya tu ||
5.42.18
te tamūcurdvijāḥ sarve pitaraṃ punareva ca |
kariṣyāmo vidhānaṃ te yena tvaṃ vartayiṣyasi ||
5.42.19
imaṃ ślokaṃ mahārthaṃ tvaṃ rājānaṃ sahamantriṇam |
śrāvayethāḥ samāgamya brahmadattamakalmaṣam ||
5.42.20
prītātmā dāsyati sa te grāmān bhogāṃśca puṣkalān |
etāvaduktvā te sarve pūjayitvā ca taṃ gurum |
yogadharmamanuprāpya parāṃ nirvṛtimāyayuḥ ||
5.42.21
caturṇāṃ tu pitā yo'sau brāhmaṇānāṃ mahātmanām |
ślokaṃ so'dhītya putrebhyaḥ kṛtakṛtya ivābhavat ||
5.42.22
śrāvayāmāsa rājānaṃ slokaṃ taṃ sacivau ca tau |
saptavyādhā daśārṇeṣu mṛgāḥ kālañjare girau ||
5.42.23
cakravākāḥ śaradvīpe haṃsāḥ sarasi mānase |
te'bhijātāḥ kurukṣetre brāhmaṇā vedapāragāḥ ||
5.42.24
prasthitā dirghamadhvānaṃ yuyaṃ kimavasīdatha |
tacchrutvā mohamagamadbrahmadatto narādhipaḥ ||
5.42.25
sacivaścāsya pāñcālaḥ puṇḍarīkaśca bhārata |
tataste tatsaraḥ smṛtvā yogaṃ tamupalabhya ca ||
5.42.26
brāhmaṇaṃ vipulairarthairbhogaiśca samayojayan |
abhiṣicya svarājye tu viṣvaksenamarindamam ||
5.42.27
jagāma brahmadatto hi sadāro vanameva ha |
prāpya yogaṃ balādeva gatiṃ prāpa sudurlabhām ||
5.42.28
puṇḍarīko'pi dharmātmā sāṅkhyayogamanuttamam |
prāpya yogagatiḥ siddho viśuddhastena karmaṇā ||
5.42.29
kramaṃ praṇīya pāñcālyaḥ śikṣāṃ cotpādya kevalām |
yogācāryagatiṃ prāpa yaśaścāgryaṃ mahātapāḥ ||
5.42.30
śūrā ye samprapadyante apunarbhavakāṅkṣiṇaḥ |
pāpaṃ praṇāśayantvadya tacchambhoḥ paramaṃ padam ||
5.42.31
śārīre mānase caiva pāpe vāgje mahāmune |
kṛte samyagidaṃ bhaktyā paṭhecchraddhāsamanvitaḥ ||
5.42.32
mucyate sarvapāpebhyaḥ śivanāmānukīrtanāt |
uccāryamāṇa etasmindevadevasya tasya vai ||
5.42.33
vilayaṃ pāpamāyāti hyāmabhāṇḍamivāmbhasi |
tasmāttatsañcite pāpe samānāntarameva ca ||
5.42.34
japtavyametatpāpasya praśamāya mahāmune |
naraiḥ śraddhālubhibhūryaḥ sarvakāmaphalāptaye ||
5.42.35
puṣṭyarthamimamadhyāyaṃ paṭhedenaṃ śṛṇoti vā |
mucyate sarvapāpebhyo mokṣaṃ yāti na saṃśayaḥ ||
5.42.35.c1
iti śrīśivamahāpurāṇe pañcamyāmumāsaṃhitāyāṃ pitṛkalpe pitṛprabhāvavarṇanaṃ nāma dvicatvāriṃśo'dhyāyaḥ ||
5.42.35.p2
śrīgaṇeśāya namaḥ ||
5.42.35.p3
śrīgaurīśaṅkarābhyāṃ namaḥ ||
5.42.35.p4
śrīśivamahāpurāṇam ||
Linked texts (2)
- Vulgate — Sanskrit
- Narasiṃhapurāṇa — Sanskrit