Shivapurana 5.43: tricatvāriṃśo'dhyāyaḥ | vyāsapūjanaprakāraḥ

Śivapurāṇa (complete text) 5.43

śaunaka uvāca |
ācāryapūjanaṃ brūhi sūta vyāsaguro'dhunā |
granthasya śravaṇānte hi kiṃ kartavyaṃ tadapyaho ||

sūta uvāca |
pūjayedvidhivadbhaktyācāryaṃ śrutvā kathāṃ parām |
granthānte vidhivaddadyādācāryāya prasannadhīḥ ||

tato vaktāramānamya sampūjya ca yathāvidhi |
bhūṣaṇairhastakarṇānāṃ vastraiḥ saumyādibhiḥ sudhīḥ ||

śivapūjāsamāptau tu dadyāddhenuṃ savatsikām |
kṛtvāsanaṃ suvarṇasya palamānasya sāmbaram ||

tatrāsthāpya śubhaṃ granthaṃ likhitaṃ lalitākṣaraiḥ |
ācāryāya sudhīrdadyānmuktaḥ syādbhavabandhanaiḥ ||

grāmo gajo hayaścāpi yathāśaktyaparāṇi ca |
mune sarvāṇi deyāni vācakāya mahātmane ||

vidhānasahitaṃ samyak śrutaṃ hi saphalaṃ smṛtam |
purāṇaṃ śaunakamune satyamevoditaṃ mayā ||

tasmādvidhānayuktaṃ tu śṛṇuyādbhaktito mune |
purāṇaṃ nigamārthāḍhyaṃ puṇyadaṃ hṛdayaṃ śruteḥ ||

iti śrīśivamahāpurāṇe pañcamyāmumāsaṃhitāyāṃ vyāsapūjanaprakāro nāma tricatvāriṃśo'dhyāyaḥ ||

śrīgaṇeśāya namaḥ ||

śrīgaurīśaṅkarābhyāṃ namaḥ ||

śrīśivamahāpurāṇam ||

Contents