Pramāṇa · Search · About · API

Shivapurana 5.47: saptacatvariṃśo'dhyāyaḥ | dhūmralocanacaṇḍamuṇḍaraktabījavadhaḥ

Śivapurāṇa (complete text) 5.47

Language
Sanskrit

Contents

saptacatvariṃśo'dhyāyaḥ | dhūmralocanacaṇḍamuṇḍaraktabījavadhaḥ

5.47.1

ṛṣiruvāca |
āsīcchumbhāsuro daityo niśumbhaśca pratāpavān |
trailokyamojasākrāntaṃ bhrātṛbhyāṃ sacarācaram ||

5.47.2

tābhyāṃ prapīḍitā devā himavantaṃ samāyayuḥ |
jananīṃ sarvabhūtānāṃ kāmadātrīṃ vavandire ||

5.47.3

devā ūcuḥ |
jaya durge maheśāni jayātmīyajanapriye |
trailokyatrāṇakāriṇyai śivāyai te namo namaḥ ||

5.47.4

namo muktipradāyinyai parāmbāyai namo namaḥ |
namaḥ samastasaṃsārotpattisthityantakārike ||

5.47.5

kālikārūpasampanne namastārākṛte namaḥ |
chinnamastāsvarūpāyai śrīvidyāyai namo'stu te ||

5.47.6

bhuvaneśi namastubhyaṃ namaste bhairavākṛte |
namo'stu bagalāmukhyai dhūmāvatyai namo namaḥ ||

5.47.7

namastripurasundaryyai mātaṅgayai te namo namaḥ |
ajitāyai namastubhyaṃ vijayāyai namo namaḥ ||

5.47.8

jayāyai maṅgalāyai te vilāsinyai namo namaḥ |
dogdhrīrūpe namastubhyaṃ namo ghorākṛte'stu te ||

5.47.9

namo'parājitākāre nityākāre namo namaḥ |
śaraṇāgatapālinyai rudrāṇyai te namo namaḥ ||

5.47.10

namo vedāntavedyāyai namaste paramātmane |
anantakoṭibrahmāṇḍanāyikāyai namo namaḥ ||

5.47.11

iti devaiḥ stutā gaurī prasannā varadā śivā |
provāca tridaśānsarvānyuṣmābhiḥ stūyate'tra kā ||

5.47.12

tato gaurītanorekā prādurāsītkumārikā |
sovāca miṣatāṃ teṣāṃ śivaśaktiṃ parādarāt ||

5.47.13

stotraṃ me kriyate mātaḥ samastaiḥ svargavāsibhiḥ |
niśumbhaśumbhadaityābhyāṃ prabalābhyāṃ prapīḍitaiḥ ||

5.47.14

śarīrakośādyattasyā nirgatā tena kauśikī |
nāmnā sā gīyate sākṣācchumbhāsuranibarhiṇī ||

5.47.15

caivogratārikā proktā mahogratārikāpi ca |
prādurbhūtā yataḥ sā vai mātaṅgītyucyate bhuvi ||

5.47.16

babhāṣe nikhilāndevānyūyaṃ tiṣṭhata nirbhayāḥ |
kāryaṃ vaḥ sādhayiṣyāmi svatantrāhaṃ vināśrayam ||

5.47.17

ityuktvā sā tadā devī tarasāntarhitābhavat |
caṇḍamuṇḍau tu tāṃ devīmadrāṣṭāṃ sevakau tayoḥ ||

5.47.18

dṛṣṭvā manoharaṃ tasyā rūpaṃ netrasukhāvaham |
petatustau dharāmadhye naṣṭasaṃjñau vimohitau ||

5.47.19

gatvā vyājahratuḥ sarvaṃ rājñe vṛttāntamāditaḥ |
dṛṣṭā kācinmayāpūrvā nārī rājanmanoharā ||

5.47.20

himavacchikhare ramye saṃsthitā siṃhavāhinī |
samantāddevakanyābhiḥ sevitā baddhapāṇibhiḥ ||

5.47.21

kurute pādasaṃvāhaṃ kācitsaṃskurute kacān |
pāṇisaṃvāhanaṃ kācitkācinnetrāñjanaṃ nyadhāt ||

5.47.22

kācid gṛhītvā hastenādarśaṃ darśayate mukham |
nāgavallīṃ dadātyekā lavaṅgailādisaṃyutām ||

5.47.23

patadgrahaṃ kare kṛtvā sthitā kācitsakhī puraḥ |
bhūṣayatyakhilāṅgāni kācidbhūṣāmbarādibhiḥ ||

5.47.24

kadalīstambhajaṅghoruḥ kīranāsāhidorlatā |
raṇanmañjīracaraṇā ramyamekhalayā yutā ||

5.47.25

lasatkastūrikāmodamuktāhāracalastanī |
graiveyakalasadgrīvā lalantī dāmamaṇḍitā ||

5.47.26

ardhacandradharā devī maṇikuṇḍaladhāriṇī |
ramyaveṇirviśālākṣī locanatrayabhūṣitā ||

5.47.27

sākṣarā mālikopetā pāṇirājitakaṅkaṇā |
svarṇormikāṅgulirbhrājatpārihāryalasatkarā ||

5.47.28

śubhravastrāvṛtā gaurī padmāsanavirājitā |
kāśmīrabindutilakā candrālaṅkṛtamastakā ||

5.47.29

taḍiddyutirmahāmūlyāmbaracolonnamatkucā |
bhujairaṣṭābhiruttuṅgairdhārayantī varāyudhān ||

5.47.30

tādṛśī nāsurī nāgī na gandharvī na dānavī |
vidyate triṣu lokeṣu yādṛśī sā manoramā ||

5.47.31

tasmātsambhogayogyatvaṃ tasyāstvayyeva śobhate |
nārīratnaṃ yataḥ sā vai puṃratnaṃ ca bhavānprabho ||

5.47.32

ityuktaṃ caṇḍamuṇḍābhyāṃ niśamya sa mahāsuraḥ |
dūtaṃ sugrīvanāmānaṃ preṣayāmāsa tāṃ prati ||

5.47.33

gaccha dūta tuṣārādrau tatrāste kāpi sundarī |
sā netavyā prayatnena kathayitvā vaco mama ||

5.47.34

iti vijñāpitastena sugrīvo dānavottamaḥ |
gatvā himācalaṃ prāha jagadambāṃ maheśvarīm ||

5.47.35

dūta uvāca |
devi śumbhāsuro daityo niśumbhastasya cānujaḥ |
vikhyātastriṣu lokeṣu mahābalaparākramaḥ ||

5.47.36

cāro'haṃ preṣitastena sannidhiṃ te samāgamam |
sa yajjagau sureśāni tatsamākarṇayādhunā ||

5.47.37

indrādīnsamare jitvā teṣāṃ ratnānyapāharam |
devabhāgaṃ svayaṃ bhuñje yāge dattaṃ surādibhiḥ ||

5.47.38

strīratnaṃ tvāmahaṃ manye sarvaratnoparisthitam |
sā tvaṃ mamānujaṃ māṃ vā bhajatātkāmajai rasaiḥ ||

5.47.39

iti dūtoktamākarṇya vacanaṃ śumbhabhāṣitam |
jagāda sā mahāmāyā bhūteśaprāṇavallabhā ||

5.47.40

devyuvāca |
satyaṃ vadasi bho dūta nānṛtaṃ kiñciducyate |
paraṃ tvekā kṛtā pūrvaṃ pratijñā tāṃ nibodha me ||

5.47.41

yo me darpaṃ vidhunute yo māṃ jayati saṅgare |
utsahe tamahaṃ kartuṃ patiṃ nānyamiti dhruvam ||

5.47.42

sa tvaṃ kathaya śumbhāya niśumbhāya vaco mama |
yathā yuktaṃ bhavedevaṃ vidadhātu tathātra saḥ ||

5.47.43

itthaṃ devīvacaḥ śrutvā sugrīvo nāma dānavaḥ |
rājñe vijñāpayāmāsa gatvā tatra savistaram ||

5.47.44

atha dūtoktamākarṇya śumbho bhairavaśāsanaḥ |
dhūmrākṣaṃ prāha sakrodhaḥ senānyaṃ balināṃ varam ||

5.47.45

he dhūmrākṣa tuṣārādrau vartate kāpi sundarī |
tāmānaya drutaṃ gatvā yathā yāsyati sātra vai ||

5.47.46

tasyā ānayane bhītirna kāryāsurasattama |
yuddhaṃ kāryaṃ prayatnena yadi sā yoddhumicchati ||

5.47.47

evaṃ vijñāpito daityo dhūmralocanasaṃjñakaḥ |
gatvā himācalaṃ prāha bhuvaneśīmumāṃśajām ||

5.47.48

bharturmamāntikaṃ gaccha no cettvāṃ ghātayāmyaham |
puṣṭyāsurāṇāṃ sahitaḥ sahasrāṇāṃ nitambini ||

5.47.49

devyuvāca |
daityarāṭ preṣito vīra haṃsi cetkiṃ karomi te |
parantvasādhyaṃ gamanaṃ manye saṅgrāmamantarā ||

5.47.50

ityuktastāmanvadhāvaddānavo dhūmralocanaḥ |
huṅkāroccāraṇenaiva taṃ dadāha maheśvarī ||

5.47.51

tataḥ prabhṛti sā devī dhūmāvatyucyate bhuvi |
ārādhitā svabhaktānāṃ śatruvarganikartinī ||

5.47.52

dhūmrākṣe nihate devyā vāhanenātikopinā |
carvitāstadgaṇāḥ sarve'palāyantāvaśeṣitāḥ ||

5.47.53

itthaṃ devyā hataṃ daityaṃ śrutvā śumbhaḥ pratāpavān |
cakāra bahulaṃ kopaṃ sandaṣṭauṣṭhapuṭadvayaḥ ||

5.47.54

caṇḍaṃ muṇḍaṃ raktabījaṃ praiṣayatkramato'surān |
te'pi cājñāpitā daityā yayuryatrāmbikā sthitā ||

5.47.55

siṃhārūḍhā bhagavatīmaṇimādibhirāśritām |
bhāsayantīṃ diśo bhāsā dṛṣṭvocurdānavarṣabhāḥ ||

5.47.56

he devi tarasā mūlaṃ yāhi śumbhaniśumbhayoḥ |
anyathā ghātayiṣyāmaḥ sagaṇāṃ tvāṃ savāhanām ||

5.47.57

vṛṇīṣva taṃ patiṃ vāme lokapālādibhiḥ stutam |
prapatsyase mahānandaṃ devānāmapi durlabham ||

5.47.58

ityuktamākalayyāmbā smayitvā parameśvarī |
udājahāra sā devī sūnṛtaṃ rasavadvacaḥ ||

5.47.59

devyuvāca |
advitīyo maheśānaḥ parabrahma sadāśivaḥ |
yattattvaṃ na vidurvedā viṣṇvādīnāṃ ca kā kathā ||

5.47.60

tasyāhaṃ prakṛtiḥ sūkṣmā kathamanyaṃ patiṃ vṛṇe |
siṃhī kāmāturā naiva jambukaṃ vṛṇute kvacit ||

5.47.61

kareṇurgardabhaṃ naiva dvīpinī śaśakaṃ na vā |
mṛṣā vadata bho daityo mṛtyuvyālaniyantritāḥ ||

5.47.62

yūyaṃ prayāta pātālaṃ yudhyadhvaṃ śaktirasti cet |
iti krodhakaraṃ vākyaṃ śrutvocuste parasparam ||

5.47.63

abalāṃ manasi jñātvā na hanmo bhavatīṃ vayam |
atho sthiraihi pañcāsye yuddhecchā mānase'sti cet ||

5.47.64

teṣāmevaṃ vivadatāṃ kalahaḥ samavardhata |
vavṛṣuḥ samare bāṇā ubhayordalayoḥ śitāḥ ||

5.47.65

evaṃ taiḥ samaraṃ kṛtvā līlayā parameśvarī |
jaghāna caṇḍamuṇḍābhyāṃ raktabījaṃ mahāsuram ||

5.47.66

dveṣabuddhiṃ vidhāyāpi tridaśārātayo'pyamī |
ante prāpanparaṃ lokaṃ yam̐llokaṃ yānti tajjanāḥ ||

5.47.66.c1

iti śrīśivamahāpurāṇe pañcamyāmumāsaṃhitāyāṃ dhūmralocanacaṇḍamuṇḍaraktabījavadho nāma saptacatvāriṃśo'dhyāyaḥ ||

5.47.66.p2

śrīgaṇeśāya namaḥ ||

5.47.66.p3

śrīgaurīśaṅkarābhyāṃ namaḥ ||

5.47.66.p4

śrīśivamahāpurāṇam ||