Shivapurana 5.5: pañcamo'dhyāyaḥ | mahāpātakavarṇanam
Śivapurāṇa (complete text) 5.5
- Language
- Sanskrit
Contents
- 5.5.40 — 4 parts
pañcamo'dhyāyaḥ | mahāpātakavarṇanam
5.5.1
vyāsa uvāca |
ye pāpaniratā jīvā mahānarakahetavaḥ |
bhagavaṃstān samācakṣva brahmaputra namo'stu te ||
5.5.2
sanatkumāra uvāca |
ye pāpaniratā jīvā mahānarakahetavaḥ |
te samāsena kathyante sāvadhānatayā śṛṇu ||
5.5.3
parastrīdravyasaṅkalpaścetasāniṣṭacintanam |
akāryābhiniveśaśca caturdhā karma mānasam ||
5.5.4
avibaddhapralāpatvamasatyaṃ cāpriyaṃ ca yat |
parokṣataśca paiśunyaṃ caturdhā karma vācikam ||
5.5.5
abhakṣyabhakṣaṇaṃ hiṃsā mithyākāryaniveśanam |
parasvānāmupādānaṃ caturdhā karma kāyikam ||
5.5.6
ityetad dvādaśavidhaṃ karma proktaṃ trisādhanam |
asya bhedān punarvakṣye yeṣāṃ phalamanantakam ||
5.5.7
ye dviṣanti mahādevaṃ saṃsārārṇavatārakam |
sumahatpātakaṃ teṣāṃ nirayārṇavagāminām ||
5.5.8
ye śivajñānavaktāraṃ nindanti ca tapasvinam |
gurūn pitṝnathonmattāste yānti nirayārṇavam ||
5.5.9
śivanindā gurornindā śivajñānasya dūṣaṇam |
devadravyāpaharaṇaṃ dvijadravyavināśanam ||
5.5.10
haranti ye ca sammūḍhāśśivajñānasya pustakam |
mahānti pātakānyāhuranantaphaladāni ṣaṭ ||
5.5.11
nābhinandanti ye dṛṣṭvā śivapūjāṃ prakalpitām |
na namantyarcitaṃ dṛṣṭvā śivaliṅgaṃ stuvanti na ||
5.5.12
yatheṣṭaceṣṭā niḥśaṅkāḥ santiṣṭhante ramanti ca |
upacāravinirmuktāḥ śivāgre gurusannidhau ||
5.5.13
sthānasaṃskārapūjāṃ ca ye na kurvanti parvasu |
vidhivadvā gurūṇāṃ ca karmayogavyavasthitāḥ ||
5.5.14
ye tyajanti śivācāraṃ śivabhaktāndviṣanti ca |
asampūjya śivajñānaṃ ye'dhīyante likhanti ca ||
5.5.15
anyāyataḥ prayacchanti śṛṇvantyuccārayanti ca |
vikrīḍanti ca lobhena kujñānaniyamena ca ||
5.5.16
asaṃskṛtapradeśeṣu yatheṣṭaṃ svāpayanti ca |
śivajñānakathākṣepaṃ yaḥ kṛtvānyatprabhāṣate ||
5.5.17
na bravīti ca yaḥ satyaṃ na pradānaṃ karoti ca |
aśucirvā'śucisthāne yaḥ pravakti śṛṇoti ca ||
5.5.18
gurupūjāmakṛtvaiva yaḥ śāstraṃ śrotumicchati |
na karoti ca śuśrūṣāmājñāṃ ca bhaktibhāvataḥ ||
5.5.19
nābhinandati tadvākyamuttaraṃ ca prayacchati |
gurukarmaṇyasādhyaṃ yattadupekṣāṃ karoti ca ||
5.5.20
gurumārtamaśaktaṃ ca videśaṃ prasthitaṃ tathā |
vairibhiḥ paribhūtaṃ vā yaḥ santyajati pāpakṛt ||
5.5.21
tadbhāryāputramitreṣu yaścāvajñāṃ karoti ca |
evaṃ suvācakasyāpi gurordharmānudarśinaḥ ||
5.5.22
etāni khalu sarvāṇi karmāṇi munisattama |
sumahatpātakānyāhuḥ śivanindāsamāni ca ||
5.5.23
brahmaghnaśca surāpaśca steyī ca gurutalpagaḥ |
mahāpātakinastvete tatsaṃyogī ca pañcamaḥ ||
5.5.24
krodhāllobhādbhayād dveṣādbrāhmaṇasya vadhe tu yaḥ |
marmāntikaṃ mahādoṣamuktvā sa brahmahā bhavet ||
5.5.25
brāhmaṇaṃ yaḥ samāhūya dattvā yaścādadāti ca |
nirdoṣaṃ dūṣayedyastu sa naro brahmahā bhavet ||
5.5.26
yaśca vidyābhimānena nistejayati sudvijam |
udāsīnaṃ sabhāmadhye brahmahā sa prakīrtitaḥ ||
5.5.27
mithyāguṇairya ātmānaṃ nayatyutkarṣatāṃ balāt |
guṇānapi nirudvāsya sa ca vai brahmahā bhavet ||
5.5.28
gavāṃ vṛṣābhibhūtānāṃ dvijānāṃ gurupūrvakam |
yaḥ samācarate vighnaṃ tamāhurbrahmaghātakam ||
5.5.29
devadvijagavāṃ bhūmiṃ pradattāṃ harate tu yaḥ |
pranaṣṭāmapi kālena tamāhurbrahmaghātakam ||
5.5.30
devadvijasvaharaṇamanyāyenārjitaṃ tu yat |
brahmahatyāsamaṃ jñeyaṃ pātakaṃ nātra saṃśayaḥ ||
5.5.31
adhītya yo dvijo vedaṃ brahmajñānaṃ śivātmakam |
yadi tyajati yo mūḍhaḥ surāpānasya tatsamam ||
5.5.32
yatkiñciddhi vrataṃ gṛhya niyamaṃ yajanaṃ tathā |
santyāgaḥ pañcayajñānāṃ surāpānasya tatsamam ||
5.5.33
pitṛmātṛparityāgaḥ kūṭasākṣyaṃ dvijānṛtam |
āmiṣaṃ śivabhaktānāmabhakṣyasya ca bhakṣaṇam ||
5.5.34
vane niraparādhānāṃ prāṇināṃ cāpaghātanam |
dvijārthaṃ prakṣipetsādhurna dharmārthaṃ niyojayet ||
5.5.35
gavāṃ mārge vane grāme yaiścaivāgniḥ pradīyate |
iti pāpāni ghorāṇi brahmahatyāsamāni ca ||
5.5.36
dīnasarvasvaharaṇaṃ narastrīgajavājinām |
gobhūrajatavastrāṇāmauṣadhīnāṃ rasasya ca ||
5.5.37
candanāgarukarpūrakastūrīpaṭṭavāsasām |
vikrayastvavipattau yaḥ kṛto jñānād dvijātibhiḥ ||
5.5.38
hastanyāsāpaharaṇaṃ rukmasteyasamaṃ smṛtam |
kanyānāṃ varayogyānāmadānaṃ sadṛśe vare ||
5.5.39
putramitrakalatreṣu gamanaṃ bhaginīṣu ca |
kumārīsāhasaṃ ghoramadyapastrīniṣevaṇam ||
5.5.40
savarṇāyāśca gamanaṃ gurubhāryāsamaṃ smṛtam |
mahāpāpāni coktāni śṛṇu tvamupapātakam ||
5.5.40.c1
iti śrīśivamahāpurāṇe pañcamyāmumāsaṃhitāyāṃ mahāpātakavarṇanaṃ nāma pañcamo'dhyāyaḥ ||
5.5.40.p2
śrīgaṇeśāya namaḥ ||
5.5.40.p3
śrīgaurīśaṅkarābhyāṃ namaḥ ||
5.5.40.p4
śrīśivamahāpurāṇam ||
Linked texts (3)
- Vāruṇapaddhati — Sanskrit
- Anādivīraśaivasārasaṃgraha — Sanskrit
- Śivadharmottara (another edition) — Sanskrit