Pramāṇa · Search · About · API

Shivapurana 5.6: ṣaṣṭho'dhyāyaḥ | pāpabhedavarṇanam

Śivapurāṇa (complete text) 5.6

Language
Sanskrit

Contents

ṣaṣṭho'dhyāyaḥ | pāpabhedavarṇanam

5.6.1

sanatkumāra uvāca |
dvijadravyāpaharaṇamapi dāyavyatikramaḥ |
atimāno'tikopaśca dāmbhikatvaṃ kṛtaghnatā ||

5.6.2

atyantaviṣayāsaktiḥ kārpaṇyaṃ sādhumatsaram |
paradārābhigamanaṃ sādhukanyāsu dūṣaṇam ||

5.6.3

parivittiḥ parivettā yayā ca parividyate |
tayordānaṃ ca kanyāyāstayoreva ca yājanam ||

5.6.4

śivāśramatarūṇāṃ ca puṣpārāmavināśanam |
yaḥ pīḍāmāśramasthānāmācaredalpikāmapi ||

5.6.5

sabhṛtyaparivārasya paśudhānyadhanasya ca |
kupyadhānyapaśusteyamapāṃ vyāpāvanaṃ tathā ||

5.6.6

yajñārāmataḍāgānāṃ dārāpatyasya vikrayam |
tīrthayātropavāsānāṃ vratopanayakarmiṇām ||

5.6.7

strīdhanānyupajīvanti strībhiratyantanirjitāḥ |
arakṣaṇaṃ ca nārīṇāṃ māyayā strīniṣevaṇam ||

5.6.8

kālāgatāpradānaṃ ca dhānyavṛddhyupasevanam |
ninditācca dhanādānaṃ paṇyānāṃ kūṭajīvanam ||

5.6.9

viṣamāraṇamantrāṇāṃ satataṃ vṛṣavāhanam |
uccāṭanābhicāraṃ ca dhānyādānaṃ bhiṣakkriyā ||

5.6.10

jihvākāmopabhogārthaṃ yasyārambhaḥ sukarmasu |
mūlenādhyāpako nityaṃ vedajñānādikaṃ ca yat ||

5.6.11

brāhmyādivratasantyāgaścānyācāraniṣevaṇam |
asacchāstrādhigamanaṃ śuṣkatarkāvalambanam ||

5.6.12

devāgnigurusādhūnāṃ nindā yā brāhmaṇasya ca |
pratyakṣaṃ vā parokṣaṃ vā rājñāṃ maṇḍalināmapi ||

5.6.13

utsannapitṛdevejyāḥ svakarmatyāginaśca ye |
duḥśīlā nāstikāḥ pāpāḥ sadā vāsatyavādinaḥ ||

5.6.14

parvakāle divā vāpsu viyonau paśuyoniṣu |
rajasvalāyā yonau ca maithunaṃ yaḥ samācaret ||

5.6.15

strīputramitrasamprāpte āśācchedakarāśca ye |
janasyāpriyavaktāraḥ krūrāḥ samayabhedinaḥ ||

5.6.16

bhettā taḍāgakūpānāṃ vikratāro rasasya ca |
ekapaṅktisthitānāṃ ca pākabhedaṃ karoti yaḥ ||

5.6.17

ityetaiḥ strīnarāḥ pāpairupapātakinaḥ smṛtāḥ |
yuktā ebhistathānye'pi śṛṇu tāṃstu bravīmi te ||

5.6.18

ye gobrāhmaṇakanyānāṃ svāmimitratapasvinām |
vināśayanti kāryāṇi te narā nārakāḥ smṛtāḥ ||

5.6.19

parastriyābhitapyante ye paradravyasūcakāḥ |
paradravyaharā nityaṃ taulamithyānusārakāḥ ||

5.6.20

dvijaduḥkhakarā ye ca prahāraṃ coddharanti ye |
sevante tu dvijāḥ śūdrāṃ surāṃ badhnanti kāmataḥ ||

5.6.21

ye pāpaniratāḥ krūrāḥ ye'pi hiṃsāpriyā narāḥ |
vṛttyarthaṃ ye'pi kurvanti dānayajñādikāḥ kriyāḥ ||

5.6.22

goṣṭhāgnijalarathyāsu tarucchāyānageṣu ca |
tyajanti ye purīṣādyānārāmāyataneṣu ca ||

5.6.23

lajjāśramaprāsādeṣu madyapānaratāśca ye |
kṛtakelibhujaṅgāśca randhrānveṣaṇatatparāḥ ||

5.6.24

vaṃśeṣṭakāśilākāṣṭhaiḥ śṛṅgaiḥ śaṅkubhireva ca |
ye mārgamanurundhanti parasīmāṃ haranti ye ||

5.6.25

kūṭaśāsanakartāraḥ kūṭakarmakriyāratāḥ |
kūṭapākānnavastrāṇāṃ kūṭasaṃvyavahāriṇaḥ ||

5.6.26

dhanuṣaḥ śastraśalyānāṃ kartā yaḥ krayavikrayī |
nirdayo'tīva bhṛtyeṣu paśūnāṃ damanaśca yaḥ ||

5.6.27

mithyā pravadato vāca ākarṇayati yaḥ śanaiḥ |
svāmimitragurudrohī māyāvī capalaḥ śaṭhaḥ ||

5.6.28

ye bhāryāputramitrāṇi bālavṛddhakṛśāturān |
bhṛtyānatithibandhūṃśca tyaktvāśnanti bubhukṣitān ||

5.6.29

yaḥ svayaṃ miṣṭamaśnāti viprebhyo na prayacchati |
vṛthāpākaḥ sa vijñeyo brahmavādiṣu garhitaḥ ||

5.6.30

niyamān svayamādāya ye tyajantyajitendriyāḥ |
pravrajyāvāsitā ye ca harasyāsyaprabhedakāḥ ||

5.6.31

ye tāḍayanti gāṃ krūrā damayante muhurmuhuḥ |
durbalānye na puṣṇanti satataṃ ye tyajanti ca ||

5.6.32

pīḍayantyatibhāreṇāsahantaṃ vāhayanti ca |
yojayantyakṛtāhārānna vimuñcanti saṃyatān ||

5.6.33

ye bhārakṣatarogārtān govṛṣāṃśca kṣudhāturān |
na pālayanti yatnena goghnāste nārakāḥ smṛtāḥ ||

5.6.34

vṛṣāṇāṃ vṛṣaṇānye ca pāpiṣṭhā gālayanti ca |
vāhayanti ca gāṃ vandhyāṃ mahānārakino narāḥ ||

5.6.35

āśayā samanuprāptān kṣuttṛṣṇāśramakarśitān |
atithīṃśca tathānāthān svatantrān gṛhamāgatān ||

5.6.36

annābhilāṣān dīnānvā bālavṛddhakṛśāturān |
nānukampanti ye mūḍhāste yānti narakārṇavam ||

5.6.37

gṛheṣvarthā nivartante śmaśānādapi bāndhavāḥ |
sukṛtaṃ duṣkṛtaṃ caiva gacchantamanugacchati ||

5.6.38

ajāviko māhiṣikaḥ sāmudro vṛṣalīpatiḥ |
śūdravatkṣatravṛttiśca nārakī syād dvijādhamaḥ ||

5.6.39

śilpinaḥ kāravo vaidyā hemakārā nṛpadhvajāḥ |
bhṛtakāḥ kūṭasaṃyuktāḥ sarve te nārakāḥ smṛtāḥ ||

5.6.40

yaścocitamatikramya svecchayaivāharetkaram |
narake pacyate so'pi yo'pi daṇḍarucirnaraḥ ||

5.6.41

utkocakai rucikrītaistaskaraiśca prapīḍyate |
yasya rājñaḥ prajā rāṣṭre pacyate narakeṣu saḥ ||

5.6.42

ye dvijāḥ parigṛhṇanti nṛpasyānyāyavartinaḥ |
te prayānti tu ghoreṣu narakeṣu na saṃśayaḥ ||

5.6.43

anyāyātsamupādāya dvijebhyo yaḥ prayacchati |
prajābhyaḥ pacyate so'pi narakeṣu nṛpo yathā ||

5.6.44

pāradārikacaurāṇāṃ caṇḍānāṃ vidyate tvagham |
paradāraratasyāpi rājño bhavati nityaśaḥ ||

5.6.45

acauraṃ cauravatpaśyeccauraṃ vācaurarūpiṇam |
avicārya nṛpastasmād ghātayannarakaṃ vrajet ||

5.6.46

ghṛtatailānnapānāni madhumāṃsasurāsavam |
guḍekṣuśākadugdhāni dadhimūlaphalāni ca ||

5.6.47

tṛṇaṃ kāṣṭhaṃ patrapuṣpamauṣadhaṃ cātmabhojanam |
upānatchatraśakaṭamāsanaṃ ca kamaṇḍalum ||

5.6.48

tāmrasīsatrapuḥ śastraṃ śaṅkhādyaṃ ca jalodbhavam |
vādyaṃ ca vaiṇavaṃ cānyadgṛhopaskaraṇāni ca ||

5.6.49

aurṇṇakārpāsakauśeyapaṭṭasūtrodbhavāni ca |
sthūlasūkṣmāṇi vastrāṇi ye lobhāddhi haranti ca ||

5.6.50

evamādīni cānyāni dravyāṇi vividhāni ca |
narakeṣu dhruvaṃ yānti cāpahṛtyālpakāni ca ||

5.6.51

tadvā yadvā paradravyamapi sarṣapamātrakam |
apahṛtya narā yānti narakaṃ nātra saṃśayaḥ ||

5.6.52

evamādyairnaraḥ pāpairutkrāntisamanantaram |
śarīrayātanārthāya sarvākāramavāpnuyāt ||

5.6.53

yamalokaṃ vrajantyete śarīreṇa yamājñayā |
yamadūtairmahāghorairnīyamānāḥ suduḥkhitāḥ ||

5.6.54

devatiryaṅmanuṣyāṇāmadharmaniratātmanām |
dharmarājaḥ smṛtaḥ śāstā sughorairvividhairvadhaiḥ ||

5.6.55

niyamācārayuktānāṃ pramādātskhalitātmanām |
prāyaścittairguruḥ śāstā na budhairiṣyate yamaḥ ||

5.6.56

pāradārikacaurāṇāmanyāyavyavahāriṇām |
nṛpatiḥ śāsakaḥ proktaḥ pracchannānāṃ sa dharmmarāṭ ||

5.6.57

tasmāt kṛtasya pāpasya prāyaścittaṃ samācaret |
nābhuktasyānyathā nāśaḥ kalpakoṭiśatairapi ||

5.6.58

yaḥ karoti svayaṃ karma kārayeccānumodayet |
kāyena manasā vācā tasya pāpagatiḥ phalam ||

5.6.58.c1

iti śrīśivamahāpurāṇe pañcamyāmumāsaṃhitāyāṃ pāpabhedavarṇanaṃ nāma ṣaṣṭho'dhyāyaḥ ||

5.6.58.p2

śrīgaṇeśāya namaḥ ||

5.6.58.p3

śrīgaurīśaṅkarābhyāṃ namaḥ ||

5.6.58.p4

śrīśivamahāpurāṇam ||

Linked texts (2)