Shivapurana 6.10: daśamo'dhyāyaḥ | sūtopadeśaḥ
Śivapurāṇa (complete text) 6.10
- Language
- Sanskrit
Contents
- 6.10.40 — 4 parts
daśamo'dhyāyaḥ | sūtopadeśaḥ
6.10.1
vyāsa uvāca |
gate'tha sūte munayaḥ suvismitā vicintya cānyo'nyamidaṃ tu vismṛtam |
yadvāmadevasya mataṃ munīśvara prasūcitaṃ tatkhalu kaṣṭamadya naḥ ||
6.10.2
kadānubhūyānmunivaryadarśanaṃ bhavābdhiduḥkhaughaharaṃ paraṃ hi tat |
maheśvarārādhanapuṇyato'dhunā munīśvaraḥ satvaramāvirastu naḥ ||
6.10.3
iti cintāsamāviṣṭā munayo munipuṅgavam |
vyāsaṃ sampūjya hṛtpadme tasthustaddarśanotsukāḥ ||
6.10.4
saṃvatsarānte sa punaḥ kāśīṃ prāpa mahāmuniḥ |
śivabhaktirato jñānī purāṇārthaprakāśakaḥ ||
6.10.5
taṃ dṛṣṭvā sūtamāyāntaṃ munayo hṛṣṭacetasaḥ |
abhyutthānāsanārghyādipūjayā samapūjayan ||
6.10.6
so'pi tānmuniśārdūlānabhinandya smitodaram |
prītyā snātvā jāhnavīye jale paramapāvane ||
6.10.7
ṛṣīnsantarpya ca surān pitṝṃśca tilataṇḍulaiḥ |
tīramāgatya samprokṣya vāsasī paridhāya ca ||
6.10.8
dvirācamya samādāya bhasma sadyādimantrataḥ |
uddhūlanādikramato vidhāryātha munīśvaraḥ ||
6.10.9
rudrākṣamālābharaṇaḥ kṛtanityakriyaḥ sudhī |
yathoktāṅgeṣu vidhinā tripuṇḍraṃ racati sma ha ||
6.10.10
viśveśvaramumākāntaṃ sasutaṃ sagaṇādhipam |
pūjayāmāsa sadbhaktyā hyastau natvā muhurmuhuḥ ||
6.10.11
kālabhairavanāthaṃ ca sampūjyātha vidhānataḥ |
pradakṣiṇīkṛtya punastredhā natvā ca pañcadhā ||
6.10.12
punaḥ pradakṣiṇīkṛtya praṇamya bhuvi daṇḍavat |
tuṣṭāva parayā stutyā saṃsmaraṃstatpadāmbujam ||
6.10.13
śrīmatpañcākṣarīṃ vidyāmaṣṭottarasahasrakam |
sañjapya purataḥ sthitvā kṣamāpayya maheśvaram ||
6.10.14
caṇḍīśaṃ samprapūjyā'tha muktimaṇḍapamadhyataḥ |
nirdiṣṭamāsanaṃ bheje munibhirvedapāragaiḥ ||
6.10.15
evaṃ sthiteṣu sarveṣu namaskṛtya samantrakam |
atha prāha munīndrāṇāṃ bhāvavṛddhikaraṃ vaca ||
6.10.16
sūta uvāca |
dhanyā yūyaṃ mahāprājñā munayaḥ śaṃsitavratāḥ |
bhavadarthamiha prāpto'haṃ tadvṛttamidaṃ śṛṇu ||
6.10.17
yadāhamupadiśyātha bhavataḥ praṇavārthakam |
gatastīrthāṭanārthāya tadvṛttāntaṃ bravīmi vaḥ ||
6.10.18
ito nirgatya samprāpya tīraṃ dakṣapayonidheḥ |
snātvā sampūjya vidhivaddevīṃ kanyāmayīṃ śivām |
punarāgatya viprendrāḥ suvarṇamukharītaṭam ||
6.10.19
śrīkālahastiśailākhyanagare paramādbhute |
suvarṇamukharītoye snātvā devānṛṣīnapi ||
6.10.20
santarpya vidhivadbhaktyā samudraṃ giriśaṃ smaran |
samarcya kālahastīśaṃ candrakāntasamaprabham ||
6.10.21
paścimābhimukhaṃ pañcaśirasaṃ paramādbhutam |
sakṛddarśanamātreṇa sarvāghakṣayakāraṇam ||
6.10.22
sarvasiddhipradaṃ bhuktimuktidaṃ triguṇeśvaram |
tataśca parayā bhaktyā tasya dakṣiṇagāṃ śivām ||
6.10.23
jñānaprasūnakalikāṃ samarcya hi jagatprasūm |
śrīmatpañcākṣarīṃ vidyāmaṣṭottarasahasrakam ||
6.10.24
japtvā pradakṣiṇīkṛtya stutvā natvā muhurmuhuḥ ||
6.10.25
tataḥ pradakṣiṇīkṛtya giriṃ pratyahamādarāt |
āmodatīva manasi pratyahaṃ niyamāsthitaḥ ||
6.10.26
anayan caturo māsānevaṃ tatra munīśvarāḥ |
jñānaprasūnakalikāmahādevyāḥ prasādataḥ ||
6.10.27
ekadā tu samāstīrya cailājinakuśottaram |
āsanaṃ paramaṃ tasmin sthitvā ruddhendriyo muniḥ ||
6.10.28
samādhimāsthāya sadā paramānandacidghanaḥ |
paripūrṇaḥ śivo'smīti nirvyagrahṛdayo'bhavam ||
6.10.29
etasminneva samaye madguruḥ karuṇānidhiḥ |
nīlajīmūtasaṅkāśo vidyutpiṅgajaṭādharaḥ ||
6.10.30
prāṃśuḥ kamaṇḍalūdaṇḍakṛṣṇājinadharaḥ svayam |
bhasmāvadātasarvāṅgaḥ sarvalakṣaṇalakṣitaḥ ||
6.10.31
tripuṇḍravilasadbhālo rudrākṣālaṅkṛtākṛtiḥ |
padmapatrāruṇāyāmavistīrṇanayanadvayaḥ ||
6.10.32
prādurbhūya hṛdambhoje tadānīmeva satvaram |
vimohitastadaivāsametadad bhutamāstikāḥ ||
6.10.33
tata unmīlya nayane vilāpaṃ kṛtavānaham |
āsīnmamāśrupātaśca girinirjharasannibhaḥ ||
6.10.34
etasminneva samaye śrutā vāgaśarīriṇī |
vyomno mahādbhutā viprāstāmeva śṛṇutādarāt ||
6.10.35
sūtaputra mahābhāga gaccha vārāṇasīṃ purīm |
tatrāsanmunayaḥ pūrvamupadiṣṭāstvayādhunā ||
6.10.36
tvadupāgamakalyāṇaṃ kāṅkṣante vivaśā bhṛśam |
tiṣṭhanti te nirāhārā ityuktvā virarāma sā ||
6.10.37
tata utthāya tarasā devaṃ devīṃ ca bhaktitaḥ |
pradakṣiṇīkṛtya punaḥ praṇamya bhuvi daṇḍavat ||
6.10.38
dviṣaḍvāraṃ gurorājñāṃ vijñāya śivayoratha |
kṣetrānnirgatya tarasā catvāriṃśaddināntare ||
6.10.39
āgato'smi muniśreṣṭhā anugṛhṇantu māmiha |
mayā kimadya vaktavyaṃ bhavantastad bruvantu me ||
6.10.40
iti sūtavacaḥ śrutvā ṛṣayo hṛṣṭamānasāḥ |
avocanmuniśārdūlaṃ vyāsaṃ natvā muhurmuhuḥ ||
6.10.40.c1
iti śrīśivamahāpurāṇe ṣaṣṭhyāṃ kailāsasaṃhitāyāṃ sūtopadeśo nāma daśamo'dhyāyaḥ ||
6.10.40.p2
śrīgaṇeśāya namaḥ ||
6.10.40.p3
śrīgaurīśaṅkarābhyāṃ namaḥ ||
6.10.40.p4
śrīśivamahāpurāṇam ||
Other recensions (1)
- Śivapurāṇa (complete text) — Sanskrit
Linked texts (3)
- Kailāsasaṃhitā — Sanatkumāra, Sanskrit
- Kailasasamhita (print) — Sanskrit
- Vaiṣṇavakhaṇḍa — Sanskrit