Shivapurana 6.11: ekādaśo'yāyaḥ | vāmadevabrahmavarṇanam
Śivapurāṇa (complete text) 6.11
- Language
- Sanskrit
Contents
ekādaśo'yāyaḥ | vāmadevabrahmavarṇanam
6.11.p1
ṛṣaya ūcuḥ ||
6.11.1
sūta sūta mahābhāgaḥ tvamasmadgururuttamaḥ |
atastvāṃ paripṛcchāmo bhavato'nugraho yadi ||
6.11.2
śraddhāluṣu ca śiṣyeṣu tvādṛśā guravaḥ sadā |
snigdhabhāvā itīdaṃ no darśitaṃ bhavatādhunā ||
6.11.3
virajāhomasamaye vāmadevamataṃ purā |
sūcitaṃ bhavatāsmābhirna śrutaṃ vistarānmune ||
6.11.4
tadidānīṃ śrotukāmāḥ śraddhayā paramādarāt |
vayaṃ sarve kṛpāsindho prītyā tadvaktumarhasi ||
6.11.5
iti teṣāṃ vacaḥ śrutvā sūto hṛṣṭatanūruhaḥ |
namaskṛtya mahādevaṃ guroḥ parataraṃ gurum ||
6.11.6
mahādevīṃ trijananīṃ guruṃ vyāsaṃ ca bhaktitaḥ |
prāha gambhīrayā vācā munīnāhlādayannidam ||
6.11.7
sūta uvāca |
svastyastu munayaḥ sarve sukhinaḥ santu sarvadā |
śivabhaktāḥ sthirātmānaḥ śivabhaktipravartakāḥ ||
6.11.8
tadatīva vicitraṃ hi śrutaṃ gurumukhāmbujāt |
itaḥ pūrvaṃ mayā noktaṃ guhyaprākaṭyaśaṅkayā ||
6.11.9
yūyaṃ khalu mahābhāgāḥ śivabhaktā dṛḍhavratāḥ |
iti niścitya yuṣmākaṃ vakṣyāmi śrūyatāṃ mudā ||
6.11.6.11.10
purā rathantare kalpe vāmadevo mahāmuniḥ |
garbhamuktaḥ śivajñānavidāṃ gurutamaḥ svayam ||
6.11.11
vedāgamapurāṇādisarvaśāstrārthatattvavit |
devāsuramanuṣyādijīvānāṃ janmakarmavit ||
6.11.12
bhasmāvadātasarvāṅgo jaṭāmaṇḍalamaṇḍitaḥ |
nirāśrayo niḥspṛhaśca nirdvandvo nirahaṅkṛtiḥ ||
6.11.13
digambaro mahājñānī maheśvara ivāparaḥ |
śiṣyabhūtairmunīndraiśca tādṛśaiḥ parivāritaḥ ||
6.11.14
paryaṭanpṛthivīmetāṃ svapādasparśapuṇyataḥ |
pavitrayanpare dhāmni nimagnahṛdayo'nvaham ||
6.11.15
kumāraśikharaṃ merordakṣiṇaṃ prāviśanmudā |
yatrāste bhagavānīśatanayaḥ śikhivāhanaḥ ||
6.11.16
jñānaśaktidharo vīraḥ sarvāsuravimardanaḥ |
gajāvallīsamāyuktaḥ sarvairdevairnamaskṛtaḥ ||
6.11.17
tatra skandasaro nāma saraḥ sāgarasannibham |
śiśirasvādupānīyaṃ svacchāgādhabahūdakam ||
6.11.18
sarvāścaryaguṇopetaṃ vidyate svāmisannidhau |
tatra snātvā vāmadevaḥ sahaśiṣyairmahāmuniḥ ||
6.11.19
kumāraṃ śikharāsīnaṃ munivṛndaniṣevitam |
udyadādityasaṅkāśaṃ mayūravaravāhanam ||
6.11.6.11.20
caturbhujamudārāṅgaṃ mukuṭādivibhūṣitam |
śaktiratnadvayopāsyaṃ śaktikukkuṭadhāriṇam ||
6.11.21
varadābhayahastaṃ ca dṛṣṭvā skandaṃ munīśvaraḥ |
sampūjya parayā bhaktyā stotuṃ samupacakrame ||
6.11.22
vāmadeva uvāca |
oṃ namaḥ praṇavārthāya praṇavārthavidhāyine |
praṇavākṣarabījāya praṇa vāya namo namaḥ ||
6.11.23
vedāntārthasvarūpāya vedāntārthavidhāyine |
vedāntārthavide nityaṃ viditāya namo namaḥ ||
6.11.24
namo guhāya bhūtānāṃ guhāsu nihitāya ca |
guhyāya guhyarūpāya guhyāgamavide namaḥ ||
6.11.25
aṇoraṇīyase tubhyaṃ mahato'pi mahīyase |
namaḥ parāvarajñāya paramātmasvarūpiṇe ||
6.11.26
skandāya skandarūpāya mihirāruṇatejase |
namo mandāramālodyanmukuṭādibhṛte sadā ||
6.11.27
śivaśiṣyāya putrāya śivasya śivadāyine |
śivapriyāya śivayorānandanidhaye namaḥ ||
6.11.28
gāṅgeyāya namastubhyaṃ kārtikeyāya dhīmate |
umāputrāya mahate śarakānanaśāyine ||
6.11.29
ṣaḍakṣaraśarīrāya ṣaḍvidhārthavidhāyine |
ṣaḍadhvātītarūpāya ṣaṇmukhāya namo namaḥ ||
6.11.6.11.30
dvādaśāyatanetrāya dvādaśodyatabāhave |
dvādaśāyudhadhārāya dvādaśātmannamo'stu te ||
6.11.31
caturbhujāya śāntāya śaktikukkuṭadhāriṇe |
varadābhayahastāya namo'suravidāriṇe ||
6.11.32
gajāvallīkucāliptakuṅkumāṅkitavakṣase |
namo gajānanānandamahimānanditātmane ||
6.11.33
brahmādidevamunikinnaragīyamāna-gāthāviśeṣaśucicintitakīrttidhāmne |
vṛndārakāmalakirīṭavibhūṣaṇasrak-pūjyābhirāmapadapaṅkaja te namo'stu ||
6.11.34
iti skandastavaṃ divyaṃ vāmadevena bhāṣitam |
yaḥ paṭhecchṛṇuyādvāpi sa yāti paramāṃ gatim ||
6.11.35
mahāprajñākaraṃ hyetacchivabhaktivivarddhanam |
āyurārogyadhanakṛtsarvvakāmapradaṃ sadā ||
6.11.36
iti stutvā vāmadevo devaṃ senāpatiṃ prabhum |
pradakṣiṇātrayaṃ kṛtvā praṇamya bhuvi daṇḍavat ||
6.11.37
sāṣṭāṅgaṃ ca punaḥ kṛtvā pradakṣiṇanamaskṛtam |
abhavatpārśvatastasya vinayāvanato dvijāḥ ||
6.11.38
vāmadevakṛtaṃ stotraṃ paramārthavijṛmbhitam |
śrutvābhavatprasanno hi maheśvarasutaḥ prabhuḥ ||
6.11.39
tamuvāca mahāsenaḥ prīto'smi tava pūjayā |
bhaktyā stutyā ca bhadraṃ te kimadya karavāṇyaham ||
6.11.6.11.40
mune tvaṃ yogināṃ mukhyaḥ paripūrṇaśca niḥspṛhaḥ |
bhavādṛśāṃ hi lokesmiprārthanīyaṃ na vidyate ||
6.11.41
tathāpi dharmarakṣāyai lokānugrahakāṅkṣayā |
tvādṛśāḥ sādhavaḥ santo vicaranti mahītale ||
6.11.42
śrotavyamasti ced brahman vaktumarhasi sāmpratam |
tadidānīmahaṃ vakṣye lokānugrahahetave ||
6.11.43
iti skandavacaḥ śrutvā vāmadevo mahāmuniḥ |
praśrayāvanataḥ prāha meghagambhīrayā girā ||
6.11.44
vāmadeva uvāca |
bhagavanparameśastvaṃ parāparavibhūtidaḥ |
sarvajñaḥ sarvakarttā ca sarvaśaktidharaḥ prabhuḥ ||
6.11.45
jīvā vayaṃ tu te vaktuṃ sannidhau parameśituḥ |
tathāpyanugraho'yaṃ te yattvaṃ vadasi māṃ prati ||
6.11.46
kṛtārtho'haṃ mahāprājña vijñānakaṇamātrataḥ |
preritaḥ paripṛcchāmi kṣantavyo'tikramo mama ||
6.11.47
praṇavo hi paraḥ sākṣātparameśvaravācakaḥ |
vācyaḥ paśupatirdevaḥ paśūnāṃ pāśamocakaḥ ||
6.11.48
vācakena samāhūtaḥ paśūnmocayate kṣaṇāt |
tasmādvācakatāsiddhiḥ praṇavena śivamprati ||
6.11.49
omitīdaṃ sarvamiti śrutirāha sanātanī |
omiti brahma sarvaṃ hi brahmeti ca samabravīt ||
6.11.6.11.50
devasenāpate tubhyaṃ devānāmpataye namaḥ |
namo yatīnāṃ pataye paripūrṇāya te namaḥ ||
6.11.51
evaṃ sthite jagatyasmin śivādanyanna vidyate |
sarvarūpadharaḥ svāmī śivo vyāpī maheśvaraḥ ||
6.11.52
samaṣṭivyaṣṭibhāvena praṇavārthaḥ śruto mayā |
na jātucinmahāsena samprāptastvādṛśo guruḥ ||
6.11.53
ataḥ kṛtvānukampāṃ vai tamarthaṃ vaktumarhasi |
upadeśavidhānena sadācārakrameṇa ca ||
6.11.54
svāmyekaḥ sarvajantūnāṃ pāśacchedakaro guruḥ |
atastvatkṛpayā so'rthaḥ śrotavyo hi mayā guro ||
6.11.55
iti sa muninā pṛṣṭaḥ skandaḥ praṇamya sadāśivaṃ-praṇavavapuṣaṃ sāṣṭatriṃśatkalāvaralakṣitam |
sahitamumayā śaśvatpārśve munipravarānvitaṃ-gaditumupacakrāma śreyaḥ śrutiṣvapi gopitam ||
6.11.55.c1
iti śrīśivamahāpurāṇe ṣaṣṭhyāṃ kailāsasaṃhitāyāṃ vāmadevabrahmavarṇanannāmaikādaśo'dhyāyaḥ ||
6.11.55.p2
śrīgaṇeśāya namaḥ ||
6.11.55.p3
śrīgaurīśaṅkarābhyāṃ namaḥ ||
6.11.55.p4
śrīśivamahāpurāṇam ||
Other recensions (1)
- Śivapurāṇa (complete text) — Sanskrit
Linked texts (4)
- Kailāsasaṃhitā — Sanatkumāra, Sanskrit
- Kailasasamhita (print) — Sanskrit
- Sahasranāmasaṅgraha — Sanskrit
- Adbhutarāmāyaṇa — Vālmīki, Sanskrit