Shivapurana 6.22.p1
Śivapurāṇa (complete text) 6.22.p1
- Language
- Sanskrit
Contents
- 6.22.p1.6 — 2 parts
6.22.p1.1
subrahmaṇya uvāca |
ekādaśe'hni samprāpte yo vidhiḥ samudāhṛtaḥ |
taṃ vakṣye muniśārdūla yatīnāṃ snehatastava | 1|
6.22.p1.2
sammārjya vedīmālipya kṛtvā puṇyāhavācanam |
prokṣya paścimamārabhya pūrvāntaṃ pañca ca kramāt | 2|
6.22.p1.3
maṇḍalānyuttarāśāsyaḥ kuryātsvayamavasthitaḥ |
prādeśamātraṃ saṅkalpya caturasraṃ ca madhyataḥ | 3|
6.22.p1.4
bindutrikoṇaṣaṭkoṇavṛttākārāṇi ca kramāt |
śaṅkhaṃ ca purataḥ sthāpya pūjoktakramamārgataḥ | 4|
6.22.p1.5
prāṇānāyamya saṅkalpya pūjayitvā sureśvarīḥ |
devatāḥ pañca pūrvoktā ativāhikarūpiṇīḥ | 5|
6.22.p1.6
santyajyottarato darbhānayaśca saṃspṛśet tataḥ |
paścimādi samārabhya ṣaḍutthāsanamārgataḥ | 6|
6.22.p1.7
maṇḍalāni ca teṣvantaḥ puṣpāṇyādhāya pīṭhavat |
oṃ hrīmityuktvāgnirūpāṃ tāmativāhikadevatām | 7|
6.22.p1.8
āvāhayāmi nama ityantaṃ sarvatra bhāvayet |
darśayetsthāpanādyāstu mudrāḥ pratyekamādarāt | 8|
6.22.p1.9
hrāṃhrīmityādinā kuryādāsāmaṅgāni ca kramāt |
pāśāṅkuśābhayābhīṣṭapāṇicandropalaprabhāḥ | 9|
6.22.p1.6.22.10
raktāṅgulīyakacchāyarañjitākhiladiṅmukhāḥ |
raktāmbaradharāḥ hastapadapaṅkajaśobhitāḥ | 6.22.10|
6.22.p1.11
trinetrollāsivadanapūrṇacandramanoharāḥ |
māṇikyamukuṭodbhāsicandralekhāvataṃsitāḥ | 11|
6.22.p1.12
kuṇḍalāmṛṣṭagaṇḍāśca pīnonnatapayodharāḥ |
hārakeyūrakaṭakakāñcīdāmamanoharāḥ | 12|
6.22.p1.13
tanumadhyāḥ pṛthuśroṇyo raktadivyāmbarāvṛtāḥ |
māṇikyamayamañjīrasiñjatpadasaroruhāḥ |
pādāṅgulīyakaśroṇīrmañjulātimanoharāḥ | 13|
6.22.p1.14
anugraheṇa mūrtena śivavat kiṃ nu sādhyate |
tasmācchaktyātmamūrtena sarvaṃ sādhyaṃ maheśavat | 14|
6.22.p1.15
sarvānugrahakartraiva svīkṛtāḥ pañcamūrtayaḥ |
sarvakāryakarā divyāḥ parānugrahatatparāḥ | 15|
6.22.p1.16
evaṃ dhyātvā tu tāḥ sarvā anugrahaparāḥ śivāḥ |
pādayoḥ pādyametāsāṃ dadyācchaṅkhodabindubhiḥ | 16|
6.22.p1.17
hasteṣvācamanīyaṃ ca mauliṣvarghyaṃ pradāpayet |
śaṅkhodabindubhistāsāṃ snānakarma ca bhāvayet | 17|
6.22.p1.18
raktāmbarāṇi divyāni sottarīyāṇi dāpayet |
mukuṭādīnyanarghyāṇi dadyādābharaṇāni ca | 18|
6.22.p1.19
suvāsitaṃ ca śrīkhaṇḍamakṣatāṃścātiśobhanān |
surabhīṇi manojñāni kusumāni ca dāpayet | 19|
6.22.p1.6.22.20
dhūpaṃ ca paramāmodaṃ sājyavartiṃ ca dīpakam |
sarvaṃ samarpayāmīti praṇavaṃ hrīmupakramāt | 6.22.20|
6.22.p1.21
namo'ntaṃ ca tato dadyātpāyasaṃ madhunāplutam |
sājyaśarkarayāpūpakadalīguḍapūritam | 21|
6.22.p1.22
pratyekaṃ kadalīpatre bharitaṃ ca suvāsitam |
bhūrbhuvaḥ svariti procya prokṣṇādīni kārayet | 22|
6.22.p1.23
oṃ hrīmiti samuccārya naivedyaṃ vahnijāyayā |
pānīyaṃ nama ityuktvā paraṃ premṇā samarpayet | 23|
6.22.p1.24
tata udvāsayet prītyā pūrvato munisattama |
sthalaṃ viśodhya gaṇḍūṣācamanārghyāṇi dāpayet | 24|
6.22.p1.25
tāmbūlaṃ dhūpadīpau ca pradakṣiṇanamaskṛtī |
vidhāya prārthayedetāḥ śirasyañjalimādadhat | 25|
6.22.p1.26
śrīmātaraḥ suprasannā yatiṃ śivapadaiṣiṇam |
rakṣaṇīyaṃ prabruvantu parameśapadābjayoḥ | 26|
6.22.p1.27
iti samprārthya tāḥ sarvā visṛjya ca yathāgatam |
tāsāṃ prasādamuddhṛtya kanyakābhyaḥ pradāpayet | 27|
6.22.p1.28
gobhyo vā jalamadhye vā nikṣipennānyathā kvacit |
atraiva pārvaṇaṃ kuryānnaikoddiṣṭaṃ yateḥ kvacit | 28|
6.22.p1.29
atrāyaṃ pārvaṇaśrāddhe niyamaḥ procyate mayā |
taṃ śṛṇuṣva muniśreṣṭha yena śreyo bhavettataḥ | 29|
6.22.p1.6.22.30
kartā snātvā dhṛtaprāṇa upavītī samāhitaḥ |
sapavitrakarastvasyāṃ puṇyatithyāmiti bruvan | 6.22.30|
6.22.p1.31
kariṣye pārvaṇaṃ śrāddhamiti saṅkalpya cottare |
dadyāddarbhānuttamāṃśca hyāsanārthaṃ jalaṃ spṛśet | 31|
6.22.p1.32
tatropaveśayedbhaktyā sābhyaṅgaṃ kṛtamajjanān |
āhūya caturo viprān śivabhaktāndṛḍhavratān | 32|
6.22.p1.33
viśvedevārthaṃ bhavatā prasādaḥ kriyatāmiti |
ātmane bhavatā paścādantarātmana ityapi | 33|
6.22.p1.34
paramātmana ityevaṃ procya prārthya ca tānyatiḥ |
śraddhayā varaṇaṃ teṣāṃ kuryādyāthārthyamādarāt | 34|
6.22.p1.35
pādau prakṣālya teṣāṃ tu prāṅmukhānupaveśya ca |
gandhādibhiralaṅkṛtya bhojayecca śivāgrataḥ | 35|
6.22.p1.36
gomayenopalipyātra darbhānprāgagrakalpitān |
āstīrya saṃyataprāṇaḥ piṇḍānāṃ ca pradānakam | 36|
6.22.p1.37
kariṣya iti saṅkalpya maṇḍalatrayamarcya ca |
ātmānamantarātmānaṃ paramātmanamapyataḥ | 37|
6.22.p1.38
caturthyantaṃ vadan paścādimaṃ piṇḍamitīrayan |
dadāmīti ca samprocya dadyātpiṇḍān svabhaktitaḥ | 38|
6.22.p1.39
kuśodakaṃ tato dadyādyathāvidhi vidhānataḥ |
tata utthāya vai kuryāt pradakṣiṇanamaskṛtī | 39|
6.22.p1.6.22.40
tato dattvā brāhmaṇebhyo dakṣiṇāṃ ca yathāvidhi |
nārāyaṇabaliṃ kuryāt tasminneva sthale dine | 6.22.40|
6.22.p1.41
rakṣārthameva sarvatra viṣṇoḥ pūjāvidhiḥ smṛtaḥ |
kuryādviṣṇormahāpūjāṃ pāyasānnaṃ nivedayet | 41|
6.22.p1.42
dvādaśātha samāhūya brāhmaṇānvedapāragān |
keśavādibhirabhyarcya gandhapuṣpākṣatādibhiḥ | 42|
6.22.p1.43
upānacchatravastrādi dattvā tebhyo yathāvidhi |
santoṣayenmahābhaktyā vividhairvacanaiḥ śubhaiḥ | 43|
6.22.p1.44
āstīrya darbhānpūrvāgrānbhūḥ svāhā ca bhuvaḥ bhuvaḥ |
praṇavādi procya bhūmau pāyasānnaṃ baliṃ haret | 44|
6.22.p1.45
ekādaśāhasuvidhirmayā prokto munīśvara |
dvādaśāhavidhiṃ vakṣye śṛṇuṣvādarato dvija | 45|
6.22.p1.6.22_2
iti śrīśivamahāpurāṇe ṣaṣṭhyāṃ kailāsasaṃhitāyāṃ yatīnāmekādaśāhakṛtyavarṇanaṃ nāma dvāviṃśo'dhyāyaḥ | 6.22|
6.22.p1.p47
6.23 | śrīgaṇeśāya namaḥ | | śrīgaurīśaṅkarābhyāṃ namaḥ | | śrīśivamahāpurāṇam |
Linked texts (2)
- Makuṭāgama (another edition) — Sanskrit
- Nirṇayasindhu — Kamalākarabhaṭṭa 1612, Sanskrit