Shivapurana 6.23.22
Śivapurāṇa (complete text) 6.23.22
- Language
- Sanskrit
Contents
- 6.23.22.6 — 2 parts
6.23.22.1
subrahmaṇya uvāca |
dvādaśāhe samutthāya prātaḥ snātvā kṛtāhnikaḥ |
śivabhaktānyatīnvāpi brāhmaṇānvā śivapriyān | 1|
6.23.22.2
nimantrya tānsamāhūya madhyāhne cāplutāñchucīn |
vidhivadbhojayedbhaktyā svādvannairvividhaiḥ śubhaiḥ | 2|
6.23.22.3
sannidhau parameśasya pañcāvaraṇamārgataḥ |
pūjayettatra saṃsthāpya prāṇānāyamya vāgyataḥ | 3|
6.23.22.4
mahāsaṅkalpamārgeṇa saṅkalpyāsmadguroriha |
pūjāṃ kariṣya ityuktvā tato darbhānupaspṛśet | 4|
6.23.22.5
pādau prakṣālya cācamya svayaṃ kartā ca vāgyataḥ |
sthāpayedāsane tānvai prāṅmukhānbhasmabhūṣitān | 5|
6.23.22.6
sadāśivādikramato dhyāyedaṣṭau ca tatra tān |
parayā sambhāvanayetarānapi mune dvijān | 6|
6.23.22.7
parameṣṭhiguruṃ dhyāyetsāmbabuddhyā svanāmataḥ |
guruṃ ca paramaṃ tasmātparāparaguruṃ tataḥ | 7|
6.23.22.8
idamāsanamityuktvā cāsanāni prakalpayet |
praṇavādidvitīyānte svasya nāma samuccaran | 8|
6.23.22.9
āvāhayāmi nama ityāvāhyārghodakena tu |
pādyamācamanaṃ cārghyaṃ vastragandhākṣatānapi | 9|
6.23.22.6.23.10
dattvā puṣpairalaṅkṛtya praṇavādyaṣṭanāmabhiḥ |
sacaturthīnamo'ntaiśca sugandhakusumaistataḥ | 6.23.10|
6.23.22.11
dhūpadīpau hi dattvā ca sakalārādhanaṃ kṛtam |
sampūrṇamastviti procya namaskuryātsamutthitaḥ | 11|
6.23.22.12
pātrāṇi kadalīpatrāṇyāstīryādbhiviśodhya ca |
śuddhānnapāyasāpūpasūpavyañjanapūrvakam | 12|
6.23.22.13
dattvā padārthān kadalīnālikeraguḍānvitān |
pātrāsanāni ca pṛthagdadyātsamprocya ca kramāt | 13|
6.23.22.14
pariṣicya ca samprokṣya viṣṇorhavyamiti bruvan |
rakṣasveti karasparśaṃ kārayitvā samutthitaḥ | 14|
6.23.22.15
āpośanaṃ samarpyātha prārthayettānidaṃ prati |
sadāśivādayaḥ prītā varadāśca bhavantu me | 15|
6.23.22.16
ye devā iti ca tato japtvedaṃ sākṣataṃ tyajet |
namaskṛtya samutthāya sarvatrāmṛtamastviti | 16|
6.23.22.17
uktvā prasādya ca japan gaṇānāṃ tvetyupakramāt |
vedādīn rudracamakau rudrasūktaṃ ca pañca ca | 17|
6.23.22.18
viprāṇāṃ bhojanānte tu yāvanmantrāṃśca sākṣatān |
dattvottarāpośanaṃ ca hastāṅghrimukhaśodhanam | 18|
6.23.22.19
kṛtvācāntān svāsaneṣu sthāpayitvā yathāsukham |
śuddhodakaṃ pradāyātha karpūrādi yathoditam | 19|
6.23.22.6.23.20
mukhavāsaṃ dakṣiṇāṃ ca pādukāsanapatrakam |
vyajanaṃ phalakaṃ daṇḍaṃ vaiṇavaṃ ca pradāya tān | 6.23.20|
6.23.22.21
pradakṣiṇanamaskāraiḥ santoṣyāśiṣamā vaheta |
punaḥ praṇamya samprārthya gurubhaktimacañcalām | 21|
6.23.22.22
sadāśivādayaḥ prītā gacchantu ca yathāsukham |
ityudvāsya dvāradeśāvadhi samyaganuvrajan | 22|
6.23.22.23
niruddhastaiḥ parāvṛtya dvāḥsthairvipraiśca bandhubhiḥ |
dīnānāthaiśca sahito bhuktvā tiṣṭhedyathāsukham | 23|
6.23.22.24
vikṛtaṃ na bhavetkvāpi satyaṃ satyaṃ punaḥ punaḥ |
pratyabdamevaṃ kurvāṇo gurvārādhanamuttamam |
iha bhuktvā mahābhogān śivalokamavāpnuyāt | 24|
6.23.22.25
sūta uvāca |
evaṃ kṛtānugrahamātmaśiṣyaṃ, śrīvāmadevaṃ munivaryamuktvā |
prasannadhīrjñānivaro mahātmā, kṛtvā parānugrahamāśu devaḥ | 25|
6.23.22.26
yannaimiṣāraṇyamunīśvarāṇāṃ, proktaṃ purā vyāsamunīśvareṇa |
tasmādasāvādigururbhavāṃstu, dvitīya āryo bhuvane prasiddhaḥ | 26|
6.23.22.27
śrutvā munīndro bhavato mukhājjāt, sanatkumāraḥ śivabhaktipūrṇaḥ |
vyāsāya vaktā sa ca śaivavaryaḥ śukāya vaktā bhavitā ca pūrṇaḥ | 27|
6.23.22.28
pratyekaṃ muniśārdūla śiṣyavargacatuṣṭayam |
vedādhyayanasaṃvṛttaṃ dharmasthāpanapūrvakam | 28|
6.23.22.29
vaiśampāyana eva syātpailo jaiminireva ca |
sumantuśceti catvāro vyāsaśiṣyā mahaujasaḥ | 29|
6.23.22.6.23.30
agastyaśca pulastyaśca pulahaḥ kratureva ca |
tava śiṣyā mahātmāno vāmadeva mahāmune | 6.23.30|
6.23.22.31
sanakaśca sanandaśca sanātanamunistataḥ |
sanatsujāta ityete yogivaryāḥ śivapriyāḥ | 31|
6.23.22.32
sanatkumāraśiṣyāste sarvavedārthavittamāḥ |
guruśca paramaścaiva parātparagurustataḥ |
parameṣṭhiguruścaite pūjyāḥ syuḥ śukayoginaḥ | 32|
6.23.22.33
idaṃ praṇavavijñānaṃ sthitaṃ vargacatuṣṭaye |
sarvotkṛṣṭanidānaṃ ca kāśyāṃ sanmuktikāraṇam | 33|
6.23.22.34
etanmaṇḍalamadbhutaṃ paraśivādhiṣṭhāna rūpaṃ sadā, vedāntārthavicārapūrṇamatibhiḥ pūjyaṃ yatīndraiḥ param |
vedādipravibhāgakalpitamahākāśādināpyāvṛtaṃ, tvatsantoṣakaraṃ tathāstu jagatāṃ śreyaskaraṃ śrīpradam | 34|
6.23.22.35
idaṃ rahasyaṃ paramaṃ śivoditaṃ, vedāntasiddhāntaviniścitaṃ param |
mattaḥ śrutaṃ yadbhavatā tato mune, bhavanmataṃ prājñatamā vadanti | 35|
6.23.22.36
tasmādanenaiva pathā gataḥ śivaṃ, śivo'hamasmīti śivo bhavedyatiḥ |
pitāmahādipravibhāgamuktaye, nadyo yathā sindhumimāḥ prayānti | 36|
6.23.22.37
sūta uvāca |
evaṃ munīśvarāyaitadupadiśya sureśvaraḥ |
saṃsmṛtya caraṇāmbhoje pitroḥ sarvasurārcite | 37|
6.23.22.38
kailāsaśikharaṃ parāpa kumāraḥ śikharāvṛtam |
rājitaṃ paramāścaryaṃ divyajñānaprado guruḥ | 38|
6.23.22.39
vāmadevo'pi sacchiṣyaiḥ saṃvṛtaḥ śikhivāhanam |
sampraṇamya jagāmāśu kailāsaṃ paramādbhutam | 39|
6.23.22.6.23.40
gatvā kailāsaśikharaṃ prāpyeśanikaṭaṃ muniḥ |
dadarśa mokṣadaṃ māyānāśaṃ caraṇamīśayoḥ | 6.23.40|
6.23.22.41
bhaktyā cārpitasarvāṅgo vismṛtya svakalevaram |
papāta sannidhau bhūyo bhūyo natvā samutthitaḥ | 41|
6.23.22.42
tato bahuvidhaiḥ stotrairvedāgamarasotkaṭaiḥ |
tuṣṭāva parameśānaṃ sāmbikaṃ sasutaṃ muniḥ | 42|
6.23.22.43
nidhāya caraṇāmbhojaṃ devadevyoḥ svamūrddhani |
pūrṇānugrahamāsādya tatraiva nyavasatsukham | 43|
6.23.22.44
bhavanto'pi viditvaivaṃ prapaṇavārthaṃ maheśvaram |
vedaguhyaṃ ca sarvasvaṃ tārakaṃ brahma muktidam | 44|
6.23.22.45
atraiva sukhamāsīnāḥ śrīviśveśvarapādayoḥ |
sāyujyarūpāmatulāṃ bhajadhvaṃ muktimuttamām | 45|
6.23.22.46
ahaṃ gurupadāmbhojasevāyai bādarāśramam |
gamiṣye bhavatāṃ bhūyaḥ satsambhāṣaṇamastu me | 46|
6.23.22.6.23_2
iti śrīśivamahāpurāṇe ṣaṣṭhyāṃ kailāsasaṃhitāyāṃ dvādaśāhakṛtyavarṇanapūrvakavyāsādiśiṣyavargakathanaṃ nāma trayoviṃśo'dhyāyaḥ | 6.23|
6.23.22.p48
iti kailāsasaṃhitā ṣaṣṭhī samāptimagamat | ||
Linked texts (2)
- Kailāsasaṃhitā — Sanatkumāra, Sanskrit
- Kailasasamhita (print) — Sanskrit