Shivapurana 6.4: caturtho'dhyāyaḥ | saṃnyāsācāravarṇanam
Śivapurāṇa (complete text) 6.4
- Language
- Sanskrit
Contents
- 6.4.34 — 6 parts
caturtho'dhyāyaḥ | saṃnyāsācāravarṇanam
6.4.1
īśvara uvāca |
ataḥ paraṃ pravakṣyāmi saṃnyāsāhnikakarma ca |
tava snehānmahādevi sampradāyānurodhataḥ ||
6.4.2
brāhme muhūrtta utthāya śirasi śvetapaṅkaje |
sahasrāre samāsīnaṃ guruṃ sañcintayedyatiḥ ||
6.4.3
śuddhasphaṭikasaṅkāśaṃ dvinetraṃ varadābhaye |
dadhānaṃ śivasadbhāvamevātmani manoharam ||
6.4.4
bhāvopanītaiḥ sampūjya gandhādibhiranukramāt |
baddhāñjalipuṭo bhūtvā namaskuryād guruṃ tataḥ ||
6.4.5
prātaḥprabhṛti sāyānte sāyādi prātarantataḥ |
yatkaromi mahādeva tadastu tava pūjanam ||
6.4.6
prativijñāpya gurave labdhānujñastato guroḥ |
niruddhaprāṇa āsīno vijitātmā jitendriyaḥ ||
6.4.7
mūlādibrahmarandhrāntaṃ ṣaṭcakraṃ paricintayet |
vidyutkoṭisamaprakhyaṃ sarvatejomayaṃ param ||
6.4.8
tanmadhye cintayenmāṃ ca saccidānandavigraham |
nirguṇaṃ paramaṃ brahma sadāśivamanāmayam ||
6.4.9
so'hamasmīti matimānmadaikyamanubhūya ca |
bahirnirgatya ca tato dūraṃ gacchedyathāsukham ||
6.4.10
vastreṇācchādya matimāñchiro nāsikayā saha |
viśodhya dehaṃ vidhivattṛṇamādhāya bhūtale ||
6.4.11
gṛhītaśiśna utthāya tato gacchejjalāśayam |
uddhṛtya vāryathānyāyaṃ śaucaṃ kuryādatandritaḥ ||
6.4.12
hastau pādau ca saṃśodhya dvirācamyomiti smaran |
uttarābhimukho maunī dantadhāvanamācaret ||
6.4.13
tṛṇaparṇaiḥ sadā kuryādamāmekādaśīṃ vinā |
apāṃ dvādaśagaṇḍūṣairmukhaṃ saṃśodhayettataḥ ||
6.4.14
dvirācamya mṛdā toyaiḥ kaṭiśaucaṃ vidhāya ca |
aruṇodayakāle tu snānaṃ kuryānmṛdā saha ||
6.4.15
guruṃ saṃsmṛtya māṃ caiva snānasandhyādyamācaret |
vistārabhayato noktamatra draṣṭavyamanyataḥ ||
6.4.16
ābadhya śaṅkhamudrāṃ ca praṇavenābhiṣecayet |
śirasi dvādaśāvṛttyā tadardhaṃ vā tadardhakam ||
6.4.17
tīramāgatya kaupīnaṃ prakṣālyācamya ca dvidhā |
prokṣayetpraṇavenaiva vastramaṅgopamārjanam ||
6.4.18
mukhaṃ prathamato mṛjya śira ārabhya sarvataḥ |
tenaiva mārjayeddehaṃ sthitvā ca gurusannidhau ||
6.4.19
ābadhyād vāmataḥ śuddhaṃ kaupīnaṃ ca saḍorakam |
tataḥ sandhārayedbhasma tadvidhiḥ procyate'drije ||
6.4.20
dvirācamya samādāya bhasma sadyādimantrataḥ |
agnirityādibhirmantrairabhimantrya spṛśettanum ||
6.4.21
āpovetyabhimantryātha jalaṃ tenaiva secayet |
omāpojyotirityuktvā mānastoketi mantrataḥ ||
6.4.22
sammardya kavaladvandvaṃ kuryādekaṃ tu pañcadhā |
śirovadanahṛdguhyapādeṣu parameśvari ||
6.4.23
īśānādi samārabhya sadyāntaṃ pañcabhiḥ kramāt |
uddhūlya kavalaṃ paścātpraṇavenābhiṣecayet ||
6.4.24
sarvāṅgaṃ ca tato hastau prakṣālyānyatsamāharet sammardya pūrvavattattu tripuṇḍrāṃstena dhārayet ||
6.4.29
triyāyuṣaistryambakaiśca praṇavena śivena ca |
śirasyatha lalāṭe ca vakṣasi skandha eva ca ||
6.4.26
nābhau bāhvoḥ sandhiṣu ca pṛṣṭhe caiva yathākramam |
prakṣālya hastau ca tato dvirācamya yathāvidhi ||
6.4.27
pañcīkaraṇamuccārya bhāvayetsvaguruṃ budhaḥ |
vakṣyamāṇaprakāreṇa prāṇāyāmānṣaḍācaret ||
6.4.28
dakṣahastena saṅgṛhya jalaṃ vāmena pāṇinā |
samācchādya dviṣaḍvāraṃ praṇavenābhimantrayet ||
6.4.29_2
evaṃ trivāraṃ samprokṣya śirasi triḥ pibettataḥ |
samāhitena manasā dhyāyannoṅkāramīśvaram ||
6.4.30
sauramaṇḍalamadhyasthaṃ sarvatejomayaṃ param |
aṣṭabāhuṃ caturvaktramarddhanārīkamadbhutam ||
6.4.31
sarvāścaryaguṇopetaṃ sarvālaṅkāraśobhitam |
evaṃ dhyātvātha vidhivaddadyādarghyatrayaṃ tataḥ ||
6.4.32
aṣṭottaraśataṃ japtvā dviṣaḍvāraṃ tu tarpayet |
punarācamya vidhivatprāṇāyāmatrayaṃ caret ||
6.4.33
pūjāsadanamāgacchenmanasā saṃsmaran śivam |
dvāramāsādya prakṣālya pādau maunī dvirācamet ||
6.4.34
praviśedvidhinā tatra dakṣapādapuraḥsaram |
maṇḍapāntaḥ sudhīstatra maṇḍalaṃ racayetkramāt ||
6.4.34.c1
iti śrīśivamahāpurāṇe ṣaṣṭhyāṃ kailāsasaṃhitāyāṃ saṃnyāsācāravarṇanaṃ nāma caturtho'dhyāyaḥ ||
6.4.34.p2
śrīgaṇeśāya namaḥ ||
6.4.34.p3
śrīgaurīśaṅkarābhyāṃ namaḥ ||
6.4.34.p4
śrīśivamahāpurāṇam ||
6.4.34.p5
oṃ namaḥ śivāya ||
6.4.34.p6
ṣaṣṭhī kailāsasaṃhitā
Linked texts (2)
- Kailāsasaṃhitā — Sanatkumāra, Sanskrit
- Kailasasamhita (print) — Sanskrit