Shivapurana 6.5: pañcamo'dhyāyaḥ | saṃnyāsamaṇḍalavidhivarṇanam
Śivapurāṇa (complete text) 6.5
- Language
- Sanskrit
Contents
- 6.5.36 — 6 parts
pañcamo'dhyāyaḥ | saṃnyāsamaṇḍalavidhivarṇanam
6.5.1
īśvara uvāca |
parīkṣya vidhivadbhūmiṃ gandhavarṇarasādibhiḥ |
manobhilaṣite tatra vitānavitatāmbare ||
6.5.2
supralipte mahīpṛṣṭhe darpaṇodarasannibhe |
aratniyugmamānena caturasraṃ prakalpayet ||
6.5.3
tālapatraṃ samādāya tatsamāyāmavistaram |
tasminbhāgānprakurvīta trayodaśasamāṃ kalām ||
6.5.4
tatpatraṃ tatra niḥkṣipya paścimābhimukhaḥ sthitaḥ |
tatpūrvabhāge sudṛḍhaṃ sūtramādāya rañjitam ||
6.5.5
prāk pratyag dakṣiṇodak ca caturdiśi nipātayet |
sūtrāṇi devadeveśi navaṣaṣṭyuttaraṃ śatam ||
6.5.6
koṣṭhāni syustatastasya madhyakoṣṭhaṃ tu karṇikā |
koṣṭhāṣṭakaṃ bahistasya dalāṣṭakamihocyate ||
6.5.7
dalāni śvetavarṇātri samagrāṇi prakalpayet |
pītarūpāṃ karṇikāṃ ca kṛtvāraktaṃ ca vṛttakam ||
6.5.8
vanabhiddaladakṣaṃ tu samārabhya sureśvari |
raktakṛṣṇāḥ krameṇaiva dalasandhīnvicitrayet ||
6.5.9
karṇikāyāṃ likhed yantraṃ praṇavārthaprakāśakam |
adhaḥ pīṭhaṃ samālikhya śrīkaṇṭhaṃ ca tadūrdhvataḥ ||
6.5.10
taduparyamareśaṃ ca mahākālaṃ ca madhyataḥ |
tanmastakasthaṃ daṇḍaṃ ca tata īśvaramālikhet ||
6.5.11
śyāmena pīṭhaṃ pītena śrīkaṇṭhaṃ ca vicitrayet |
amareśaṃ mahākālaṃ raktaṃ kṛṣṇaṃ ca tau kramāt ||
6.5.12
kuryātsudhūmraṃ daṇḍaṃ ca dhavalaṃ ceśvaraṃ budhaḥ |
evaṃ yantraṃ samālikhya raktaṃ sadyena veṣṭayet ||
6.5.13
tadutthenaiva nādena bhindyādīśānamīśvari |
tadbāhyapaṅktīrgṛhṇīyādāgneyādikrameṇa vai ||
6.5.14
koṣṭhāni koṇabhāgeṣu catvāryetāni sundari |
śuklenāpūrya varṇādi catuṣkaṃ raktadhātubhiḥ ||
6.5.15
āpūrya tāni catvāri dvārāṇi parikalpayet |
tatastatpārśvayordvandvaṃ pītenaiva prapūrayet ||
6.5.16
āgneyakoṣṭhamadhye tu pītābhe caturasrake |
aṣṭapatraṃ likhetpadmaṃ raktābhaṃ pītakarṇikam ||
6.5.17
hakāraṃ vilikhenmadhye binduyuktaṃ samāhitaḥ |
padmasya nairṛte koṣṭhe caturasraṃ tadā likhet ||
6.5.18
padmamaṣṭadalaṃ raktaṃ pītakiñjalkakarṇikam |
śavargasya tṛtīyaṃ tu ṣaṣṭhasvarasamanvitam ||
6.5.19
caturdaśasvaropetaṃ bindunādavibhūṣitam |
etad bījavaraṃ bhadre padmamadhye samālikhet ||
6.5.20
padmasyeśānakoṣṭhe tu tathā padmaṃ samālikhet |
kavargasya tṛtīyaṃ tu pañcamasvarasaṃyutam ||
6.5.21
vilikhenmadhyatastasya binduṃ kaṇṭhe svalaṅkṛtam |
tadbāhyapaṅktitritaye pūrvādiparitaḥ kramāt ||
6.5.22
koṣṭhāni pañca gṛhṇīyādgirirājasute śive |
madhye tu karṇikāṃ kuryātpītāṃ raktaṃ ca vṛttakam ||
6.5.23
dalāni raktavarṇāni kalpayetkalpavittamaḥ |
dalabāhye tu kṛṣṇena randhrāṇi paripūrayet ||
6.5.24
āgneyādīni catvāri śuklenaiva prapūrayet |
pūrve ṣaḍbindusahitaṃ ṣaṭkoṇaṃ kṛṣṇamālikhet ||
6.5.25
raktavarṇaṃ dakṣiṇatastrikoṇaṃ cottare tataḥ |
śvetābhamarddhacandraṃ ca pītavarṇaṃ ca paścime ||
6.5.26
caturasraṃ kramātteṣu likhedbījaṃ catuṣṭayam |
pūrve binduṃ samālikhya śubhraṃ kṛṣṇaṃ tu dakṣiṇe ||
6.5.27
ukāramuttare raktaṃ makāraṃ paścime tataḥ |
akāraṃ pītamevaṃ tu kṛtvā varṇacatuṣṭayam ||
6.5.28
sarvordhvapaṅktyadhaḥ paṅktau samārabhya ca sundari |
pītaṃ śvetaṃ ca raktaṃ ca kṛṣṇaṃ ceti catuṣṭayam ||
6.5.29
tadadho dhavalaṃ śyāmaṃ pītaṃ raktaṃ catuṣṭayam |
adhastrikoṇake raktaṃ śuklaṃ pītaṃ varānane ||
6.5.30
evaṃ dakṣiṇamārabhya kuryātsomāntamīśvari |
tadbāhyapaṅktau pūrvādimadhyamāntaṃ vicitrayet ||
6.5.31
pītaṃ raktaṃ ca kṛṣṇaṃ ca śyāmaṃ śvetaṃ ca pītakam |
āgreyādi samārabhya raktaṃ śyāmaṃ sitaṃ priye ||
6.5.32
raktaṃ kṛṣṇaṃ ca raktaṃ ca ṣaṭkameva prakīrtitam |
dakṣiṇādyaṃ maheśāni pūrvāvadhi samīritam ||
6.5.33
nairṛtādyaṃ tu vijñeyamāgneyāvadhi ceśvari |
vāruṇaṃ tu samārabhya dakṣiṇāvadhi ceritam ||
6.5.34
vāyavyādyaṃ mahādevi nairṛtāvadhi ceritam |
somādyaṃ parameśāni vāruṇāvadhi ceritam ||
6.5.35
īśānādyaṃ tu vijñeyaṃ vāyavyāvadhi cāmbike |
ityukto maṇḍalavidhirmayā tubhyaṃ ca pārvati ||
6.5.36
evaṃ maṇḍalamālikhya niyatātmā yatiḥ svataḥ |
saurapūjāṃ prakurvīta sa hi tadvastutatparaḥ ||
6.5.36.c1
iti śrīśivamahāpurāṇe ṣaṣṭhyāṃ kailāsasaṃhitāyāṃ saṃnyāsamaṇḍalavidhivarṇanaṃ nāma pañcamo'dhyāyaḥ ||
6.5.36.p2
śrīgaṇeśāya namaḥ ||
6.5.36.p3
śrīgaurīśaṅkarābhyāṃ namaḥ ||
6.5.36.p4
śrīśivamahāpurāṇam ||
6.5.36.p5
oṃ namaḥ śivāya ||
6.5.36.p6
ṣaṣṭhī kailāsasaṃhitā
Linked texts (2)
- Kailāsasaṃhitā — Sanatkumāra, Sanskrit
- Kailasasamhita (print) — Sanskrit