Pramāṇa · Search · About · API

Shivapurana 6.7: saptamo'dhyāyaḥ | śivadhyānapūjanavarṇanam

Śivapurāṇa (complete text) 6.7

Language
Sanskrit

Contents

saptamo'dhyāyaḥ | śivadhyānapūjanavarṇanam

6.7.1

īśvara uvāca |
svavāme caturasraṃ tu maṇḍalaṃ parikalpayet |
omityabhyarcya tasmiṃstu śaṅkhamastropaśodhitam ||

6.7.2

sthāpya sādhārakaṃ taṃ tu praṇavenārcayettataḥ |
āpūrya śuddhatoyena candanādisugandhinā ||

6.7.3

abhyarcya gandhapuṣpādyaiḥ praṇavena ca saptadhā |
abhimantrya tatastasmindhenumudrāṃ pradarśayet ||

6.7.4

śaṅkhamudrāṃ ca purataścaturasraṃ prakalpayet |
tadantare'rdhacandraṃ ca trikoṇaṃ ca tadantare ||

6.7.5

ṣaṭkoṇaṃ vṛttamevedaṃ maṇḍalaṃ parikalpayet |
abhyarcya gandhapuṣpādyaiḥ praṇavenātha madhyataḥ ||

6.7.6

sādhāramarghyapātraṃ ca sthāpya gandhādinārcayet |
āpūrya śuddhatoyena tasminpātre viniḥkṣipet ||

6.7.7

kuśāgrāṇyakṣatāṃścaiva yavavrīhitilānapi |
ājyasiddhārthapuṣpāṇi bhasitaṃ ca varānane ||

6.7.8

sadyojātādibhirmantraiḥ ṣaḍaṅgaiḥ praṇavena ca |
abhyarcya gandhapuṣpādyairabhimantrya ca varmaṇā ||

6.7.9

avaguṇṭhyāstramantreṇa saṃrakṣārthaṃ pradarśayet |
dhenumudrāṃ ca tenaiva prokṣayedastramantrataḥ ||

6.7.10

svātmānaṃ gandhapuṣpādipūjopakaraṇānyapi |
padmasyeśānadikpadmaṃ praṇavoccārapūrvakam ||

6.7.11

gurvāsanāya nama ityāsanaṃ parikalpayet |
gurormūrtiṃ ca tatraiva kalpayedupadeśataḥ ||

6.7.12

praṇavaṃ guṃ gurubhyo'nte namaḥ procyāpi deśikam |
samāvāhya tato dhyāyeddakṣiṇābhimukhaṃ sthitam ||

6.7.13

suprasannamukhaṃ saumyaṃ śuddhasphaṭikanirmalam |
varadābhayahastaṃ ca dvinetraṃ śivavigraham ||

6.7.14

evaṃ dhyātvā yajedgandhapuṣpādibhiranukramāt |
padmasya nairṛte padme gaṇapatyāsanopari ||

6.7.15

mūrtiṃ prakalpya tatraiva gaṇānāṃ tveti mantrataḥ |
samāvāhya tato devaṃ dhyāyedekāgramānasaḥ ||

6.7.16

raktavarṇaṃ mahākāyaṃ sarvābharaṇabhūṣitam |
pāśāṅkuśākṣābhīṣṭaṃ ca dadhānaṃ karapaṅkajaiḥ ||

6.7.17

gajānanaṃ prabhuṃ sarvavighnaughaghnamupāsituḥ |
evaṃ dhyātvā yajedgandhapuṣpādyairupacārakaiḥ ||

6.7.18

kadalīnārikelāmraphalalaḍḍukapūrvakam |
naivedyaṃ ca samarpyātha namaskuryādgajānanam ||

6.7.19

padmasya vāyudikpadme saṅkalpya skāndamāsanam |
skandamūrtiṃ prakalpyātha skandamāvāhayed budhaḥ ||

6.7.20

uccārya skandagāyatrīṃ dhyāyedatha kumārakam |
udyadādityasaṅkāśaṃ mayūravaravāhanam ||

6.7.21

caturbhujamudārāṅgaṃ mukuṭādivibhūṣitam |
varadābhayahastaṃ ca śaktikukkuṭadhāriṇam ||

6.7.22

evaṃ dhyātvātha gandhādyairupacārairanukramāt |
sampūjya pūrvadvārasya dakṣaśākhāmupāśritam ||

6.7.23

antaḥpurādhipaṃ sākṣānnandinaṃ samyagarcayet |
cāmīkarācalaprakhyaṃ sarvābharaṇabhūṣitam ||

6.7.24

bālendumukuṭaṃ saumyaṃ trinetraṃ ca caturbhujam |
dīptaśūlamṛgīṭaṅkaṃ hemavetradharaṃ vibhum ||

6.7.25

candrabimbābhavadanaṃ harivaktramathāpi vā |
uttarasyāṃ tathā tasya bhāryāṃ ca marutāṃ sutām ||

6.7.26

suyaśāṃ suvratāmambāpādamaṇḍanatatparām |
sampūjya vidhivadgandhapuṣpādyairupacārakaiḥ ||

6.7.27

tataḥ samprokṣayetpadmaṃ sāstraśaṅkhodabindubhiḥ |
kalpayedāsanaṃ paścādādhārādi yathākramam ||

6.7.28

ādhāraśaktiṃ kalyāṇīṃ śyāmāṃ dhyāyedadho bhuvi |
tasyāḥ purastādutkaṇṭhamanantaṃ kuṇḍalākṛtim ||

6.7.29

dhavalaṃ pañcaphaṇinaṃ lelihānamivāmbaram |
tasyoparyāsanaṃ bhadraṃ kaṇṭhīravacatuṣpadam ||

6.7.30

dharmo jñānaṃ ca vairāgyamaiśvaryaṃ ca padāni vai |
āgneyādiśvetapītaraktaśyāmāni varṇataḥ ||

6.7.31

adharmādīni pūrvādīnyuttarāntānyanukramāt |
rājāvartamaṇiprakhyānyasya gātrāṇi bhāvayet ||

6.7.32

adhordhvacchadanaṃ paścātkandaṃ nālaṃ ca kaṇṭakān |
dalādikaṃ karṇikāṃ ca vibhāvya kramaśo'rcayet ||

6.7.33

daleṣu siddhayaścāṣṭau kesareṣu ca śaktikāḥ |
rudrā vāmādayastvaṣṭau pūrvādiparitaḥ kramāt ||

6.7.34

karṇikāyāṃ ca vairāgyaṃ bījeṣu nava śaktayaḥ |
vāmādyā eva pūrvādi tadante ca manonmanī ||

6.7.35

kande śivātmako dharmo nāle jñānaṃ śivāśrayam |
karṇikopari vāhneyaṃ maṇḍalaṃ sauramaindavam ||

6.7.36

ātmavidyā śivākhyaṃ ca tattvatrayamataḥ param |
sarvāsanopari sukhaṃ vicitrakusumojjvalam ||

6.7.37

paravyomāvakāśākhyavidyayātīva bhāsvaram |
parikalpyāsanaṃ mūrtteḥ puṣpavinyāsapūrvakam ||

6.7.38

ādhāraśaktimārabhya śuddhavidyāsanāvadhi |
Oṅkārādicaturthyantaṃ nāmamantraṃ namo'ntakam ||

6.7.39

uccārya pūjayedvidvānsarvatraivaṃ vidhikramaḥ |
aṅgavaktrakalābhedātpañca brahmāṇi pūrvavat ||

6.7.40

vinyasetkramaśo mūrttau tattanmudrāvicakṣaṇaḥ |
āvāhayettato devaṃ puṣpāñjalipuṭaḥ sthitaḥ ||

6.7.41

sadyojātaṃ prapadyāmītyārabhyomantamuccaran |
ādhārotthitanādaṃ tu dvādaśagranthibhedataḥ ||

6.7.42

brahmarandhrāntamuccārya dhyāyedoṅkāragocaram |
śuddhasphaṭikasaṅkāśaṃ devaṃ niṣkalamakṣaram ||

6.7.43

kāraṇaṃ sarvalokānāṃ sarvalokamayaṃ param |
antarbahiḥ sthitaṃ vyāpya hyaṇoralpaṃ mahattamam ||

6.7.44

bhaktānāmaprayatnena dṛśyamīśvaramavyayam |
brahmendraviṣṇurudrādyairapi devairagocaram ||

6.7.45

vedasāraṃ ca vidvadbhiragocaramiti śrutam |
ādimadhyāntarahitaṃ bheṣajaṃ bhavarogiṇām ||

6.7.46

samāhitena manasā dhyātvaivaṃ parameśvaram |
āvāhanaṃ sthāpanaṃ ca sannirodhaṃ nirīkṣaṇam ||

6.7.47

namaskāraṃ ca kurvīta baddhvā mudrāḥ pṛthakpṛthak |
dhyāyetsadāśivaṃ sākṣāddevaṃ sakalaniṣkalam ||

6.7.48

śuddhasphaṭikasaṅkāśaṃ prasannaṃ śītaladyutim |
vidyudvalayasaṅkāśaṃ jaṭāmukuṭabhūṣitam ||

6.7.49

śārdūlacarmavasanaṃ kiñcitsmitamukhāmbujam |
raktapadmadalaprakhyapāṇipādatalādharam ||

6.7.50

sarvalakṣaṇasampannaṃ sarvābharaṇabhūṣitam |
divyāyudhakarairyuktaṃ divyagandhānulepanam ||

6.7.51

pañcavaktraṃ daśabhujaṃ candrakhaṇḍaśikhāmaṇim |
asya pūrvamukhaṃ saumyaṃ bālārkasadṛśaprabham ||

6.7.52

trilocanāravindāḍhyaṃ bālendukṛtaśekharam |
dakṣiṇaṃ nīlajīmūtasamānaruciraprabham ||

6.7.53

bhrukuṭīkuṭilaṃ ghoraṃ raktavṛttatrilocanam |
daṃṣṭrākarālaṃ duṣprekṣyaṃ sphuritādharapallavam ||

6.7.54

uttaraṃ vidrumaprakhyaṃ nīlālakavibhūṣitam |
sadvilāsaṃ trinayanaṃ candrārdhakṛtaśekharam ||

6.7.55

paścimaṃ pūrṇacandrābhaṃ locanatritayojjvalam |
candralekhādharaṃ saumyaṃ mandasmitamanoharam ||

6.7.56

pañcamaṃ sphaṭikaprakhyamindurekhāsamujjvalam |
atīva saumyamutphullalocanatritayojjvalam ||

6.7.57

dakṣiṇe śūlaparaśuvajrakhaḍgānalojjvalam ||

6.7.58

vāme pinākanārācaghaṇṭāpāśāṅkuśojjvalam |
nivṛttyā jānuparyantamānābhi ca pratiṣṭhayā ||

6.7.59

ākaṇṭhaṃ vidyayā tadvadālalāṭaṃ tu śāntayā |
tadūrdhvaṃ śāntyatītākhyakalayā parayā tathā ||

6.7.60

pañcādhvavyāpinaṃ tasmātkalāpañcakavigraham |
īśānamukuṭaṃ devaṃ puruṣāsyaṃ purātanam ||

6.7.61

aghorahṛdayaṃ tadvadvāmaguhyaṃ maheśvaram |
sadyapādaṃ ca tanmūrtimaṣṭatriṃśatkalāmayam ||

6.7.62

mātṛkāmayamīśānaṃ pañcabrahmamayaṃ tathā |
Oṅkārākhyamayaṃ caiva haṃsanyāsamayaṃ tathā ||

6.7.63

pañcākṣaramayaṃ devaṃ ṣaḍakṣaramayaṃ tathā |
aṅgaṣaṭkamayaṃ caiva jātiṣaṭkasamanvitam ||

6.7.64

evaṃ dhyātvātha madvāmabhāge tvāṃ ca manonmanīm |
gaurīmimāya mantreṇa praṇavādyena bhaktitaḥ ||

6.7.65

āvāhya pūrvavatkuryānnamaskārāntamīśvari |
dhyāyettatastvāṃ deveśi samāhitamanā muniḥ ||

6.7.66

praphullotpalapatrābhāṃ vistīrṇāyatalocanām |
pūrṇacandrābhavadanāṃ nīlakuñcitamūrdhajām ||

6.7.67

nīlotpaladalaprakhyāṃ candrārdhakṛtaśekharām |
ativṛttaghanottuṅgasnigdhapīnapayodharām ||

6.7.68

tanumadhyāṃ pṛthuśroṇīṃ pītasūkṣmatarāmbarām |
sarvābharaṇasampannāṃ lalāṭatilakojjvalām ||

6.7.69

vicitrapuṣpasaṅkīrṇakeśapāśopaśobhitām |
sarvato'nuguṇākārāṃ kiñcillajjānatānanām ||

6.7.70

hemāravindaṃ vilasaddadhānāṃ dakṣiṇe kare |
caṇḍavaccāmaraṃ hastaṃ nyasyāsīnāṃ sukhāsane ||

6.7.71

evaṃ māṃ tvāṃ ca deveśi dhyātvā niyatamānasaḥ |
snāpayecchaṅkhatoyena praṇavaprokṣaṇakramāt ||

6.7.72

bhave bhave nātibhava iti pādyaṃ prakalpayet |
vāmāya nama ityuktvā dadyādācamanīyakam ||

6.7.73

jyeṣṭhāya nama ityuktvā śubhravastraṃ prakalpayet |
śreṣṭhāya nama ityuktvā dadyādyajñopavītakam ||

6.7.74

rudrāya nama ityuktvā punarācamanīyakam |
kālāya nama ityuktvā gandhaṃ dadyātsusaṃskṛtam ||

6.7.75

kalavikaraṇāya namo'kṣataṃ ca parikalpayet |
balavikaraṇāya nama iti puṣpāṇi dāpayet ||

6.7.76

balāya nama ityuktvā dhūpaṃ dadyātprayatnataḥ |
balapramathanāyeti sudīpaṃ caiva dāpayet ||

6.7.77

brahmabhiśca ṣaḍaṅgaiśca tato mātṛkayā saha |
praṇavena śivenaiva śaktiyuktena ca kramāt ||

6.7.78

mudrāḥ pradarśayenmahyaṃ tubhyaṃ ca varavarṇini |
mayi prakalpayetpūrvamupacārāṃstatastvayi ||

6.7.79

yadā tvayi prakurvīta strīliṅgaṃ yojayettadā |
iyāneva hi bhedo'sti nānyaḥ pārvati kaścana ||

6.7.80

evaṃ dhyānaṃ pūjanaṃ ca kṛtvā samyagvidhānataḥ |
mamāvaraṇapūjāṃ ca prārabheta vicakṣaṇaḥ ||

6.7.80.c1

iti śrīśivamahāpurāṇe ṣaṣṭhyāṃ kailāśasaṃhitāyāṃ śivadhyānapūjanavarṇanaṃ nāma saptamo'dhyāyaḥ ||

6.7.80.p2

śrīgaṇeśāya namaḥ ||

6.7.80.p3

śrīgaurīśaṅkarābhyāṃ namaḥ ||

6.7.80.p4

śrīśivamahāpurāṇam ||

6.7.80.p5

oṃ namaḥ śivāya ||

6.7.80.p6

ṣaṣṭhī kailāsasaṃhitā

Other recensions (1)

Linked texts (5)