Shivapurana 6.8: aṣṭamo'dhyāyaḥ | āvaraṇapūjāvarṇanam
Śivapurāṇa (complete text) 6.8
- Language
- Sanskrit
Contents
- 6.8.38 — 6 parts
aṣṭamo'dhyāyaḥ | āvaraṇapūjāvarṇanam
6.8.1
īśvara uvāca |
atrāsti ca mahādevi khalvāvaraṇapañcakam |
pañcāvaraṇapūjāṃ tu prārabheta yathākramam ||
6.8.2
prathamaṃ pūjitau yatra tatraiva kramaśaḥ sudhīḥ |
gandhādyairarcayetpūrvaṃ devau herambaṣaṇmukhau ||
6.8.3
pañca brahmāṇi parito vṛttaṃ sampūjayetkramāt |
īśānadeśe pūrve ca dakṣiṇe cottare tathā ||
6.8.4
paścime ca tatastasminṣaḍaṅgāni samarcayet |
āgneye ca tathaiśāne nairṛte vāyudeśake ||
6.8.5
madhye netraṃ tadvadastraṃ pūrvādiparitaḥ kramāt |
prathamāvaraṇaṃ proktaṃ dvitīyāvaraṇaṃ śṛṇu ||
6.8.6
anantaṃ pūrvadikpatre sūkṣmaṃ dakṣiṇatastathā |
śivottamaṃ paścimata ekanetraṃ tathottare ||
6.8.7
ekarudraṃ tathaiśāne trimūrtiṃ vahnidigdale |
śrīkaṇṭhaṃ nairṛte vāyau śikhaṇḍīśaṃ samarcayet ||
6.8.8
dvitīyāvaraṇe caiva pūjyāste cakravartinaḥ |
pūrvadvārasya madhye tu vṛṣeśānaṃ prapūjayet ||
6.8.9
taddakṣiṇe nandinaṃ ca mahākālaṃ taduttare |
bhṛṅgīśaṃ dakṣiṇadvārapaścime samprapūjayet ||
6.8.10
tatpūrvakoṣṭhe gandhādyaiḥ samprapūjya vināyakam |
paścimottarakoṣṭhe ca vṛṣabhaṃ dakṣiṇe guham ||
6.8.11
uttaradvārapūrve tu pradakṣiṇavidhānataḥ |
nāmāṣṭakavidhānena pūjayeducyate hi tat ||
6.8.12
bhavaṃ śarvaṃ tatheśānaṃ rudraṃ paśupatiṃ punaḥ |
ugraṃ bhīmaṃ mahādevaṃ tṛtīyāvaraṇaṃ tvidam ||
6.8.13
yo vedādau svara iti samāvāhya maheśvaram |
pūjayetpūrvadigbhāge kamale karṇikopari ||
6.8.14
īśvaraṃ pūrvadikpatre viśveśaṃ dakṣiṇe tataḥ |
uttare parameśānaṃ sarveśaṃ paścime yajet ||
6.8.15
dakṣiṇe tu yajed rudramāvorājānamityṛcā |
āvāhya gandhapuṣpādyaiḥ karṇikāyāṃ daleṣu ca ||
6.8.16
śivaḥ pūrve dakṣiṇato hara uttarato mṛḍaḥ |
bhavaḥ paścimadikpatre pūjyā ete yathākramam ||
6.8.17
uttare viṣṇumāvāhya gandhapuṣpādibhiryajet |
pratadviṣṇuriti procya karṇikāyāṃ daleṣu ca ||
6.8.18
vāsudevaṃ pūrvabhāge dakṣiṇe cāniruddhakam |
saumye saṅkarṣaṇaṃ caiva pradyumnaṃ paścime yajet ||
6.8.19
brahmāṇaṃ paścime padme samāvāhya samarcayet |
hiraṇyagarbhaḥ samavartata iti mantreṇa mantravit ||
6.8.20
hiraṇyagarbhaṃ pūrvasyāṃ virājaṃ dakṣiṇe tataḥ |
uttare puṣkarañcaiva kālaṃ paścimato yajet ||
6.8.21
sarvordhvapaṅktau pūrvādipradakṣiṇavidhānataḥ |
tattatsthāneṣu sampūjya lokapālānanukramāt ||
6.8.22
rāntaṃ māntaṃ tathā kṣāntaṃ lāntaṃ vāntamapūrvakam |
sāntaṃ hāntaṃ ca vedādyaṃ śrībījaṃ ca daśa kramāt ||
6.8.23
bījāni lokapālānāmetairetānsamarcayet |
nairṛtye cottare tadvadīśānasya ca dakṣiṇe ||
6.8.24
brahmaviṣṇū ca vidhinā pūjayedupacārakaiḥ |
bāhyarekhāsu deveśi pañcamāvaraṇe yajet ||
6.8.25
śrīmattriśūlamīśāne vajraṃ māhendradiṅmukhe |
paraśuṃ vahnidigbhāge yāmye sāyakamarcayet ||
6.8.26
nairṛte tu yajetkhaḍgaṃ pāśaṃ varuṇagocare |
aṅkuśaṃ mārute bhāge pinākaṃ cottare yajet ||
6.8.27
paścimābhimukhaṃ raudraṃ kṣetrapālaṃ samarcayet |
yathāvidhi vidhānajñaḥ śivaprītyarthameva ca ||
6.8.28
kṛtāñjalipuṭāḥ sarve cintyāḥ smitamukhāmbujāḥ |
sādaraṃ prekṣamāṇāśca devaṃ devīṃ ca sarvadā ||
6.8.29
itthamāvaraṇābhyarcāṃ kṛtvā vikṣepaśāntaye |
punarabhyarcya deveśaṃ praṇavaṃ ca śivaṃ vadet ||
6.8.30
evamabhyarcya vidhivad gandhādyairupacārakaiḥ |
upacarya tato dadyānnaivedyaṃ vidhisādhitam ||
6.8.31
punarācamanīyaṃ ca dadyādarghyaṃ yathā purā |
tato nivedya pānīyaṃ tāmbūlaṃ copadeśataḥ ||
6.8.32
nīrājanādikaṃ kṛtvā pūjāśeṣaṃ samāpayet |
dhyātvā devaṃ ca devīṃ ca manumaṣṭottaraṃ japet ||
6.8.33
tata utthāya racitapuṣpāñjalipuṭaḥ sthitaḥ |
japed dhyātvā mahādevaṃ yo devānāmiti kramāt ||
6.8.34
yo vedādau svaraḥ prokta ityantaṃ parameśvari |
puṣpāñjaliṃ tato dattvā triḥpradakṣiṇamācaret ||
6.8.35
sāṣṭāṅgaṃ praṇamettaṃ sa bhaktyā paramayānvitaḥ |
punaḥ pradakṣiṇāṃ kṛtvā praṇametpunarekadhā ||
6.8.36
sthitvāsane samabhyarcya devaṃ nāmāṣṭakena ca |
sādhu vāsādhu vā karma yadyadācaritaṃ mayā ||
6.8.37
tatsarvaṃ bhagavañchambho bhavadārādhanaṃ param |
iti śaṅkhodakenaiva sapuṣpeṇa samarpayet ||
6.8.38
pūjyaṃ punaḥ samabhyarcya sārthaṃ nāmāṣṭakaṃ japet |
tadeva śṛṇu deveśi sambruve tava bhaktitaḥ ||
6.8.38.c1
iti śrīśivamahāpurāṇe ṣaṣṭhyāṃ kailāsasaṃhitāyāmāvaraṇapūjāvarṇanaṃ nāmāṣṭamo'dhyāyaḥ ||
6.8.38.p2
śrīgaṇeśāya namaḥ ||
6.8.38.p3
śrīgaurīśaṅkarābhyāṃ namaḥ ||
6.8.38.p4
śrīśivamahāpurāṇam ||
6.8.38.p5
oṃ namaḥ śivāya ||
6.8.38.p6
ṣaṣṭhī kailāsasaṃhitā
Other recensions (1)
- Śivapurāṇa (complete text) — Sanskrit
Linked texts (2)
- Kailāsasaṃhitā — Sanatkumāra, Sanskrit
- Kailasasamhita (print) — Sanskrit