Pramāṇa · Search · About · API

Shivapurana 7.1.11: ekādaśo'dhyāyaḥ | sṛṣṭyādivarṇanam

Śivapurāṇa (complete text) 7.1.11

Language
Sanskrit

Contents

ekādaśo'dhyāyaḥ | sṛṣṭyādivarṇanam

7.1.11.1

munaya ūcuḥ |
manvantarāṇi sarvāṇi kalpabhedāṃśca sarvaśaḥ |
teṣvevāntarasargaṃ ca pratisargaṃ ca no vada ||

7.1.11.2

vāyuruvāca |
kālasaṅkhyāvivṛttasya parārddho brahmaṇaḥ smṛtaḥ |
tāvāṃścaivāsya kālo'nyastasyānte pratisṛjyate ||

7.1.11.3

divase divase tasya brahmaṇaḥ pūrvajanmanaḥ |
caturdaśa mahābhāgā manūnāṃ parivṛttayaḥ ||

7.1.11.4

anāditvādanantatvādajñeyatvācca kṛtsnaśaḥ |
manvantarāṇi kalpāśca na śakyā vacanātpṛthak ||

7.1.11.5

ukteṣvapi ca sarveṣu śṛṇvatāṃ vo vaco mama |
kimihāsti phalaṃ tasmānna pṛthaga vaktumutsahe ||

7.1.11.6

ya eva khalu kalpeṣu kalpaḥ samprati vartate |
tatra saṅkṣipya vartante sṛṣṭayaḥ pratisṛṣṭayaḥ ||

7.1.11.7

yastvayaṃ vartate kalpo vārāho nāma nāmataḥ |
asminnapi dvijaśreṣṭhā manavastu caturdaśa ||

7.1.11.8

svāyambhuvādayaḥ sapta sapta sāvarṇikādayaḥ |
teṣu vaivasvato nāma saptamo vartate manuḥ ||

7.1.11.9

manvantareṣu sarveṣu sargasaṃhāravṛttayaḥ |
prāyaḥ samā bhavantīti tarkaḥ kāryo vijānatā ||

7.1.11.10

pūrvakalpe parāvṛtte pravṛtte kālamārute |
samunmūlitamūleṣu vṛkṣeṣu ca vaneṣu ca ||

7.1.11.11

jaganti tṛṇavaktrīṇi deve dahati pāvake |
vṛṣṭyā bhuvi niṣiktāyāṃ viveleṣvarṇaveṣu ca ||

7.1.11.12

dikṣu sarvāsu magnāsu vāripūre mahīyasi |
tadadbhiścaṭulākṣepaistaraṅgabhujamaṇḍalaiḥ ||

7.1.11.13

prārabdhacaṇḍanṛtyeṣu tataḥ pralayavāriṣu |
brahmā nārāyaṇo bhūtvā suṣvāpa salile sukham ||

7.1.11.14

imaṃ codāharanmantraṃ ślokaṃ nārāyaṇaṃ prati |
taṃ śṛṇudhvaṃ muniśreṣṭhāstadarthaṃ cākṣarāśrayam ||

7.1.11.15

āpo nārā iti proktā āpo vai narasūnavaḥ |
ayanaṃ tasya tā yasmāttena nārāyaṇaḥ smṛtaḥ ||

7.1.11.16

śivayogamayīṃ nidrāṃ kurvantaṃ tridaśeśvaram |
baddhāñjalipuṭāḥ siddhā janalokanivāsinaḥ ||

7.1.11.17

stotraiḥ prabodhayāmāsuḥ prabhātasamaye surāḥ |
yathā sṛṣṭyādisamaye īśvaraṃ śrutayaḥ purā ||

7.1.11.18

tataḥ prabuddha utthāya śayanāttoyamadhyagāt |
udaikṣata diśaḥ sarvā yoganidrālasekṣaṇaḥ ||

7.1.11.19

nāpaśyatsa tadā kiñcitsvātmano vyatireki yat |
savismaya ivāsīnaḥ parāṃ cintāmupāgamat ||

7.1.11.20

kva sā bhagavatī yā tu manojñā mahatī mahī |
nānāvidhamahāśailanadīnagarakānanā ||

7.1.11.21

evaṃ sañcintayanbrahmā bubudhe naiva bhūsthitim |
tadā sasmāra pitaraṃ bhagavantaṃ trilocanam ||

7.1.11.22

smaraṇāddevadevasya bhavasyāmitatejasaḥ |
jñātavānsalile magnāṃ dharaṇīṃ dharaṇīpatiḥ ||

7.1.11.23

tato bhūmeḥ samuddhāraṃ kartukāmaḥ prajāpatiḥ |
jalakrīḍocitaṃ divyaṃ vārāhaṃ rūpamasmarat ||

7.1.11.24

mahāparvatavarṣmāṇaṃ mahājaladaniḥsvanam |
nīlameghapratīkāśaṃ dīptaśabdaṃ bhayānakam ||

7.1.11.25

pīnavṛttaghanaskandhaṃ pīnonnatakaṭītaṭam |
hrasvavṛttorujaṅghāgraṃ sutīkṣṇakhuramaṇḍalam ||

7.1.11.26

padmarāgamaṇiprakhyaṃ vṛttabhīṣaṇalocanam |
vṛttadīrghamahāgātraṃ stabdhakarṇasthalojjvalam ||

7.1.11.27

udīrṇocchvāsaniḥśvāsaghūrṇitapralayārṇavam |
visphuratsusaṭācchannakapolaskandhabandhuram ||

7.1.11.28

maṇibhirbhūṣaṇaiścitrairmahāratnaiḥ pariṣkṛtam |
virājamānaṃ vidyudbhirmeghasaṅghamivonnatam ||

7.1.11.29

āsthāya vipulaṃ rūpaṃ vārāhamamitaṃ vidhiḥ |
pṛthivyuddharaṇārthāya praviveśa rasātalam ||

7.1.11.30

sa tadā śuśubhe'tīva sūkaro girisannibhaḥ |
liṅgākṛtermaheśasya pādamūlaṃ gato yathā ||

7.1.11.31

tataḥ sa salile magnāṃ pṛthivīṃ pṛthivīndharaḥ |
uddhṛtyāliṅgya daṃṣṭrābhyāmunmamajja rasātalāt ||

7.1.11.32

taṃ dṛṣṭvā munayaḥ siddhā janalokanivāsinaḥ |
mumudurnanṛturmūrdhni tasya puṣpairavākiran ||

7.1.11.33

vapurmahāvarāhasya śuśubhe puṣpasaṃvṛtam |
patadbhiriva khadyotaiḥ prāśurañjanaparvataḥ ||

7.1.11.34

tataḥ saṃsthānamānīya varāho mahatīṃ mahīm |
svameva rūpamāsthāya sthāpayāmāsa vai vibhuḥ ||

7.1.11.35

pṛthivīṃ ca samīkṛtya pṛthivyāṃ sthāpayan girīn |
bhūrādyāṃścaturo lokān kalpayāmāsa pūrvavat ||

7.1.11.36

iti saha mahatīṃ mahīṃ mahīdhraiḥ pralayamahājaladheradhaḥsthamadhyāt |
upari ca viniveśya viśvakarmā caramacaraṃ ca jagatsasarja bhūyaḥ ||

7.1.11.36.c1

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe sṛṣṭyādivarṇanaṃ nāmaikādaśo'dhyāyaḥ ||

7.1.11.36.p2

śrīgaṇeśāya namaḥ ||

7.1.11.36.p3

śrīgaurīśaṅkarābhyāṃ namaḥ ||

7.1.11.36.p4

śrīśivamahāpurāṇam ||

Other recensions (1)

Linked texts (1)