Shivapurana 7.1.14: caturdaśo'dhyāyaḥ | rudrāvirbhāvavarṇanam
Śivapurāṇa (complete text) 7.1.14
- Language
- Sanskrit
Contents
- 7.1.14.21 — 4 parts
caturdaśo'dhyāyaḥ | rudrāvirbhāvavarṇanam
7.1.14.1
vāyuruvāca |
pratikalpaṃ pravakṣyāmi rudrāvirbhāvakāraṇam |
yato'vicchinnasantānā brahmasṛṣṭiḥ pravartate ||
7.1.14.2
kalpe kalpe prajāḥ sṛṣṭvā brahmā brahmāṇḍasambhavaḥ |
avṛddhihetorbhūtānāṃ mumoha bhṛśaduḥkhitaḥ ||
7.1.14.3
tasya duḥkhapraśāntyarthaṃ prajānāṃ ca vivṛddhaye |
tattatkalpeṣu kālātmā rudro rudragaṇādhipaḥ ||
7.1.14.4
nirdiṣṭaḥ parameśena maheśo nīlalohitaḥ |
putro bhūtvānugṛhṇāti brahmāṇaṃ brahmaṇo'nujaḥ ||
7.1.14.5
sa eva bhagavānīśastejorāśiranāmayaḥ |
anādinidhano dhātā bhūtasaṅkocako vibhuḥ ||
7.1.14.6
paramaiśvaryasaṃyuktaḥ parameśvarabhāvitaḥ |
tacchaktyādhiṣṭhitaḥ śaśvattaccihnairapi cihnitaḥ ||
7.1.14.7
tannāmanāmā tadrūpastatkāryakaraṇakṣamaḥ |
tattulyavyavahāraśca tadājñāparipālakaḥ ||
7.1.14.8
sahasrādityasaṅkāśaścandrāvayavabhūṣaṇaḥ |
bhujaṅgahārakeyūravalayo muñjamekhalaḥ ||
7.1.14.9
jalandharaviriñcendrakapālaśakalojjvalaḥ |
gaṅgātuṅgataraṅgārdrapiṅgalānanamūrddhajaḥ ||
7.1.14.10
bhagnadaṃṣṭrāṅkurākrāntaprāntakāntadharādharaḥ |
savyaśravaṇapārśvāntamaṇḍalīkṛtakuṇḍalaḥ ||
7.1.14.11
mahāvṛṣabhaniryāṇo mahājaladaniḥsvanaḥ |
mahānalasamaprakhyo mahābalaparākramaḥ ||
7.1.14.12
evaṃ ghoramahārūpo brahmaputro maheśvaraḥ |
vijñānaṃ brahmaṇe dattvā sargaṃ saha karoti ca ||
7.1.14.13
tasmād rudraprasādena pratikalpaṃ prajāpateḥ |
pravāharūpato nityā prajāsṛṣṭiḥ pravartate ||
7.1.14.14
kadācitprārthitaḥ sraṣṭuṃ brahmaṇā nīlalohitaḥ |
svātmanā sadṛśān sarvān sasarja manasā vibhuḥ ||
7.1.14.15
kapardino nirātaṅkānnīlagrīvām̐strilocanān |
jarāmaraṇanirmuktān dīptaśūlavarāyudhān ||
7.1.14.16
taistu sañchāditaṃ sarvaṃ caturdaśavidhaṃ jagat |
tāndṛṣṭvā vividhān rudrān rudramāha pitāmahaḥ ||
7.1.14.17
namaste devadeveśa māsrākṣīrīdṛśīḥ prajāḥ |
anyāḥ sṛja tvaṃ bhadraṃ te prajā mṛtyusamanvitāḥ ||
7.1.14.18
ityuktaḥ prahasanprāha brahmāṇaṃ parameśvaraḥ |
nāsti me tādṛśaḥ sargaḥ sṛja tvamaśubhāḥ prajāḥ ||
7.1.14.19
ye tvime manasā sṛṣṭā mahātmāno mahābalāḥ |
cariṣyanti mayā sārddhaṃ sarva eva hi yājñikāḥ ||
7.1.14.20
ityuktvā viśvakarmāṇaṃ viśvabhūteśvaro haraḥ |
saha rudraiḥ prajāsargānnivṛttātmādhyatiṣṭhata ||
7.1.14.21
tataḥ prabhṛti devo'sau na prasūte prajāḥ śubhāḥ |
ūrdhvaretāḥ sthitaḥ sthāṇuryāvadābhūtasamplavam ||
7.1.14.21.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe rudrāvirbhāvavarṇanaṃ nāma caturdaśo'dhyāyaḥ ||
7.1.14.21.p2
śrīgaṇeśāya namaḥ ||
7.1.14.21.p3
śrīgaurīśaṅkarābhyāṃ namaḥ ||
7.1.14.21.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit