Shivapurana 7.1.15: pañcadaśo'dhyāyaḥ | śivaśivāstutivarṇanam
Śivapurāṇa (complete text) 7.1.15
- Language
- Sanskrit
Contents
- 7.1.15.35 — 4 parts
pañcadaśo'dhyāyaḥ | śivaśivāstutivarṇanam
7.1.15.1
vāyuruvāca |
yadā punaḥ prajāḥ sṛṣṭā na vyavarddhanta vedhasaḥ |
tadā maithunajāṃ sṛṣṭiṃ brahmā kartumamanyata ||
7.1.15.2
na nirgataṃ purā yasmānnārīṇāṃ kulamīśvarāt |
tena maithunajāṃ sṛṣṭiṃ na śaśāka pitāmahaḥ ||
7.1.15.3
tataḥ sa vidadhe buddhimarthaniścayagāminīm |
prajānameva vṛddhyarthaṃ praṣṭavyaḥ parameśvara ||
7.1.15.4
prasādena vinā tasya na varddherannimāḥ prajāḥ |
evaṃ sañcintya viśvātmā tapaḥ kartuṃ pracakrame ||
7.1.15.5
tadādyā paramā śaktiranantā lokabhāvinī |
ādyā sūkṣmatarā śuddhā bhāvagamyā manoharā ||
7.1.15.6
nirguṇā niṣprapañcā ca niṣkalā nirupaplavā |
nirantararatā nityā nityamīśvarapārśvagā ||
7.1.15.7
tayā paramayā śaktyā bhagavantaṃ triyambakam |
sañcintya hṛdaye brahmā tatāpa paramaṃ tapaḥ ||
7.1.15.8
tīvreṇa tapasā tasya yuktasya parameṣṭhinaḥ |
acireṇaiva kālena pitā sampratutoṣa ha ||
7.1.15.9
tataḥ kenacidaṃśena mūrtimāviśya kāmapi |
arddhanārīśvaro bhūtvā yayau devaḥ svayaṃ haraḥ ||
7.1.15.10
taṃ dṛṣṭvā paramaṃ devaṃ tamasaḥ paramavyayam |
advitīyamanirdeśyamadṛśyamakṛtātmabhiḥ ||
7.1.15.11
sarvalokavidhātāraṃ sarvalokeśvareśvaram |
sarvalokavidhāyinyā śaktyā paramayā yutam ||
7.1.15.12
apratarkyamanābhāsamameyamajaraṃ dhruvam |
acalaṃ nirguṇaṃ śāntamanantamahimāspadam ||
7.1.15.13
sarvagaṃ sarvadaṃ sarvasadasadvyaktivarjitam |
sarvopamānanirmuktaṃ śaraṇyaṃ śāśvataṃ śivam ||
7.1.15.14
praṇamya daṇḍavad brahmā samutthāya kṛtāñjaliḥ |
śraddhāvinayasampannaiḥ śrāvyaiḥ saṃskārasaṃyutaiḥ ||
7.1.15.15
yathārthayuktasarvārthairvedārthaparibṛṃhitaiḥ |
tuṣṭāva devaṃ devīṃ ca sūktaiḥ sūkṣmārthagocaraiḥ ||
7.1.15.16
brahmovāca |
jaya deva mahādeva jayeśvara maheśvara |
jaya sarvaguṇaśreṣṭha jaya sarvasurādhipa ||
7.1.15.17
jaya prakṛtikalyāṇi jaya prakṛtināyike |
jaya prakṛtidūre tvaṃ jaya prakṛtisundari ||
7.1.15.18
jayāmoghamahāmāya jayāmoghamanoratha |
jayāmoghamahālīla jayāmoghamahābala ||
7.1.15.19
jaya viśvajaganmātarjaya viśvajaganmayi |
jaya viśvajagaddhātri jaya viśvajagatsakhi ||
7.1.15.20
jaya śāśvatikaiśvarya jaya śāśvatikālaya |
jaya śāśvatikākāra jaya śāśvatikānuga ||
7.1.15.21
jayātmatrayanirmātri jayātmatrayapālini |
jayātmatrayasaṃhartri jayātmatrayanāyike ||
7.1.15.22
jayāvalokanāyattajagatkāraṇabṛṃhaṇa |
jayopekṣākaṭākṣotthahutabhugbhuktabhautika ||
7.1.15.23
jaya devādyavijñeye svātmasūkṣmadṛśojjvale |
jaya sthūlātmaśaktyeśe jaya vyāptacarācare ||
7.1.15.24
jaya nānaikavinyastaviśvatattvasamuccaya |
jayāsuraśironiṣṭhaśreṣṭhānugakadambaka ||
7.1.15.25
jayopāśritasaṃrakṣāsaṃvidhānapaṭīyasi |
jayonmūlitasaṃsāraviṣavṛkṣāṅkurodgame ||
7.1.15.26
jaya prādeśikaiśvaryavīryaśauryavijṛmbhaṇa |
jaya viśvabahirbhūta nirastaparavaibhava ||
7.1.15.27
jaya praṇītapañcārthaprayogaparamāmṛta |
jaya pañcārthavijñānasudhāsrotaḥsvarūpiṇi ||
7.1.15.28
jayātighorasaṃsāramahārogabhiṣagvara |
jayānādimalājñānatamaḥpaṭalacandrike ||
7.1.15.29
jaya tripurakālāgne jaya tripurabhairavi |
jaya triguṇanirmukte jaya triguṇamardini ||
7.1.15.30
jaya prathamasarvajña jaya sarvaprabodhike |
jaya pracuradivyāṅga jaya prārthitadāyini ||
7.1.15.31
kva deva te paraṃ dhāma kva ca tucchaṃ ca no vacaḥ |
tathāpi bhagavan bhaktyā pralapantaṃ kṣamasva mām ||
7.1.15.32
vijñāpyaivaṃvidhaiḥ sūktairviśvakarmā caturmukhaḥ |
namaścakāra rudrāya radrāṇyai ca muhurmuhuḥ ||
7.1.15.33
idaṃ stotravaraṃ puṇyaṃ brahmaṇā samudīritam |
arddhanārīśvaraṃ nāma śivayorharṣavarddhanam ||
7.1.15.34
ya idaṃ kīrttayedbhaktyā yasya kasyāpi kāṅkṣayā |
sa tatphalamavāpnoti śivayoḥ prītikāraṇāt ||
7.1.15.35
sakalabhuvanabhūtabhāvanābhyāṃ jananavināśavihīnavigrahābhyām |
naravarayuvatīvapurddharābhyāṃ satatamahaṃ praṇato'smi śaṅkarābhyām ||
7.1.15.35.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe śivaśivāstutivarṇanaṃ nāma pañcadaśo'dhyāyaḥ ||
7.1.15.35.p2
śrīgaṇeśāya namaḥ ||
7.1.15.35.p3
śrīgaurīśaṅkarābhyāṃ namaḥ ||
7.1.15.35.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit