Shivapurana 7.1.16: ṣoḍaśo'dhyāyaḥ | devīśaktyudbhavaḥ
Śivapurāṇa (complete text) 7.1.16
- Language
- Sanskrit
Contents
- 7.1.16.28 — 4 parts
ṣoḍaśo'dhyāyaḥ | devīśaktyudbhavaḥ
7.1.16.1
vāyuruvāca |
atha devo mahādevo mahājaladanādayā |
vācā madhuragambhīraśivadaślakṣṇavarṇayā ||
7.1.16.2
arthasampannapadayā rājalakṣaṇayuktayā |
aśeṣaviṣayārambharakṣāvimalayadakṣayā ||
7.1.16.3
manoharatarodāramadhurasmitapūrvayā |
sambabhāṣesusamprīto viśvakarmāṇamīśvaraḥ ||
7.1.16.4
īśvara uvāca |
vatsa vatsa mahābhāga mama putra pitāmaha |
jñātameva mayā sarvaṃ tava vākyasya gauravam ||
7.1.16.5
prajānāmeva vṛddhyarthaṃ tapastaptaṃ tvayādhunā |
tapasānena tuṣṭo'smi dadāmi ca tavepsitam ||
7.1.16.6
ityuktvā paramodāraṃ svabhāvamadhuraṃ vacaḥ |
sasarja vapuṣo bhāgāddevīṃ devavaro haraḥ ||
7.1.16.7
yāmāhurbrahmavidvāṃso devīṃ divyaguṇānvitām |
parasya paramāṃ śaktiṃ bhavasya paramātmanaḥ ||
7.1.16.8
yasyāṃ na khalu vidyante janmamṛtyujarādayaḥ |
yā bhavānī bhavasyāṅgātsamāvirabhavatkila ||
7.1.16.9
yasyā vāco nivartante manasā cendriyaiḥ saha |
sā bharturvapuṣo bhāgājjāteva samadṛśyata ||
7.1.16.10
yā sā jagadidaṃ kṛtsnaṃ mahimnā vyāpya tiṣṭhati |
śarīriṇīva sa devī vicitraṃ samalakṣyata ||
7.1.16.11
sarvaṃ jagadidaṃ caiṣā sammohayati māyayā |
īśvarātsaiva jātā'bhūdajātā paramārthataḥ ||
7.1.16.12
na yasyāḥ paramo bhāvaḥ surāṇāmapi gocaraḥ |
viśvāmareśvarī caiva vibhaktā bharturaṅgataḥ ||
7.1.16.13
tāṃ dṛṣṭvā parameśānīṃ sarvalokamaheśvarīm |
sarvajñāṃ sarvagāṃ sūkṣmāṃ sadasadvyaktivarjitām ||
7.1.16.14
paramāṃ nikhilaṃ bhāsā bhāsayantīmidaṃ jagat |
praṇipatya mahādevīṃ prārthayāmāsa vai virāṭ ||
7.1.16.15
brahmovāca |
devi devena sṛṣṭo'hamādau sarvajaganmayi |
prajāsarge niyuktaśca sṛjāmi sakalaṃ jagat ||
7.1.16.16
manasā nirmitāḥ sarve devi devādayo mayā |
na vṛddhimupagacchanti sṛjyamānāḥ punaḥ punaḥ ||
7.1.16.17
mithunaprabhavāmeva kṛtvā sṛṣṭimataḥ param |
saṃvardhayitumicchāmi sarvā eva mama prajāḥ ||
7.1.16.18
na nirgataṃ purā tvatto nārīṇāṃ kulamavyayam |
tena nārīkulaṃ sraṣṭuṃ śaktirmama na vidyate ||
7.1.16.19
sarvāsāmeva śaktīnāṃ tvattaḥ khalu samudbhavaḥ |
tasmātsarvatra sarveṣāṃ sarvaśaktipradāyinīm ||
7.1.16.20
tvāmeva varadāṃ māyāṃ prārthayāmi sureśvarīm |
carācaravivṛddhyarthamaṃśenaikena sarvage ||
7.1.16.21
dakṣasya mama putrasya putrī bhava bhavārdini |
evaṃ sā yācitā devī brahmaṇā brahmayoninā ||
7.1.16.22
śaktimekāṃ bhruvormadhyāt sasarjātmasamaprabhām |
tāmāha prahasan prekṣya devadevavaro haraḥ ||
7.1.16.23
brahmāṇaṃ tapasārādhya kuru tasya yathepsitam |
tāmājñāṃ parameśasya śirasā pratigṛhya sā ||
7.1.16.24
brahmaṇo vacanāddevī dakṣasya duhitā'bhavat |
dattvaivamatulāṃ śaktiṃ brahmaṇe brahmarūpiṇīm ||
7.1.16.25
viveśa dehaṃ devasya devaścāntaradhīyata |
tadāprabhṛti loke'smin striyāṃ bhogaḥ pratiṣṭhitaḥ ||
7.1.16.26
prajāsṛṣṭiśca viprendrā maithunena pravartate |
brahmāpi prāpa sānandaṃ santoṣaṃ munipuṅgavāḥ ||
7.1.16.27
etadvaḥ sarvamākhyātaṃ devyāḥ śaktisamudbhavam |
puṇyavṛddhikaraṃ śrāvyaṃ bhūtasargānuṣaṅgataḥ ||
7.1.16.28
ya idaṃ kīrtayennityaṃ devyāḥ śaktisamudbhavam |
puṇyaṃ sarvamavāpnoti putrāṃśca labhate śubhān ||
7.1.16.28.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe devīśaktyudbhavo nāma ṣoḍaśo'dhyāyaḥ ||
7.1.16.28.p2
śrīgaṇeśāya namaḥ ||
7.1.16.28.p3
śrīgaurīśaṅkarābhyāṃ namaḥ ||
7.1.16.28.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit