Pramāṇa · Search · About · API

Shivapurana 7.1.20: viṃśo'dhyāyaḥ | yajñavidhvaṃsanaḥ

Śivapurāṇa (complete text) 7.1.20

Language
Sanskrit

Contents

viṃśo'dhyāyaḥ | yajñavidhvaṃsanaḥ

7.1.20.1

vāyuruvāca |
tato viṣṇupradhānānāṃ surāṇāmamitaujasām |
dadarśa ca mahatsatraṃ citradhvajaparicchadam ||

7.1.20.2

sudarbhaṛtusaṃstīrṇaṃ susamiddhahutāśanam |
kāñcanairyajñabhāṇḍaiśca bhrājiṣṇubhiralaṅkṛtam ||

7.1.20.3

ṛṣibhiryajñapaṭubhiryathāvatkarmakartṛbhiḥ |
vidhinā vedadṛṣṭena svanuṣṭhitabahukramam ||

7.1.20.4

devāṅganāsahasrāḍhyamapsarogaṇasevitam |
veṇuvīṇāravairjuṣṭaṃ vedaghoṣaiśca bṛṃhitam ||

7.1.20.5

dṛṣṭvā dakṣādhvaraṃ vīro vīrabhadraḥ pratāpavān |
siṃhanādaṃ tadā cakre gambhīro jalado yathā ||

7.1.20.6

tataḥ kilakilāśabda ākāśaṃ pūrayanniva |
gaṇeśvaraiḥ kṛto jajñe mahānnyakkṛtasāgaraḥ ||

7.1.20.7

tena śabdena mahatā grastāḥ sarve divaukasaḥ |
dudruvuḥ parito bhītāḥ srastavastravibhūṣaṇāḥ ||

7.1.20.8

kiṃsvidbhagno mahāmeruḥ kiṃsvitsandīryate mahī |
kimidaṃ kimidaṃ veti jajalpustridaśā bhṛśam ||

7.1.20.9

mṛgendrāṇāṃ yathā nādaṃ gajendrā gahane vane |
śrutvā tathāvidhaṃ kecittatyajurjīvitaṃ bhayāt ||

7.1.20.10

parvatāśca vyaśīryanta cakampe ca vasundharā |
marutaśca vyaghūrṇanta cukṣubhe makarālayaḥ ||

7.1.20.11

agnayo naiva dīpyante na ca dīpyati bhāskaraḥ |
grahāśca na prakāśante nakṣatrāṇi ca tārakāḥ ||

7.1.20.12

etasminneva kāle tu yajñavāṭaṃ tadujjvalam |
samprāpa bhagavānbhadro bhadraiśca saha bhadrayā ||

7.1.20.13

taṃ dṛṣṭvā bhītabhīto'pi dakṣo dṛḍha iva sthitaḥ |
kruddhavad vacanaṃ prāha ko bhavān kimihecchasi ||

7.1.20.14

tasya tadvacanaṃ śrutvā dakṣasya ca durātmanaḥ |
vīrabhadro mahātejā meghagambhīraniḥsvanaḥ ||

7.1.20.15

smayanniva tamālokya dakṣaṃ devāṃśca ṛtvijaḥ |
arthagarbhamasambhrāntamavocaducitaṃ vacaḥ ||

7.1.20.16

vīrabhadra uvāca |
vayaṃ hyanucarāḥ sarve śarvasyāmitatejasaḥ |
bhāgābhilipsayā prāptā bhāgo naḥ sampradīyatām ||

7.1.20.17

atha cedadhvare'smākaṃ na bhāgaḥ parikalpitaḥ |
kathyatāṃ kāraṇaṃ tatra yudhyatāṃ vā mayāmaraiḥ ||

7.1.20.18

ityuktāste gaṇendreṇa devā dakṣapurogamāḥ |
ūcurmantrāḥ pramāṇaṃ no na vayaṃ prabhavastviti ||

7.1.20.19

mantrā ūcussurā yūyaṃ mohopahatacetasaḥ |
yena prathamabhāgārhaṃ na yajadhvaṃ maheśvaram ||

7.1.20.20

mantroktā api te devāḥ sarve sammūḍhacetasaḥ |
bhadrāya na dadurbhāgaṃ tatprahāṇamabhīpsavaḥ ||

7.1.20.21

yadā tathyaṃ ca pathyaṃ ca svavākyaṃ tadvṛthā'bhavat |
tadā tato yayurmantrā brahmalokaṃ sanātanam ||

7.1.20.22

athovāca gaṇādhyakṣo devān viṣṇupurogamān |
mantrāḥ pramāṇaṃ na kṛtā yuṣmābhirbalagarvitaiḥ ||

7.1.20.23

yasmādasmin makhe devairitthaṃ vayamasatkṛtāḥ |
tasmādvo jīvitaissārddhamapaneṣyāmi garvitam ||

7.1.20.24

ityuktvā bhagavān kruddho vyadahannetravahninā |
yajñavāṭaṃ mahākūṭaṃ yathā tisraḥ puro haraḥ ||

7.1.20.25

tato gaṇeśvarāḥ sarve parvatodagravigrahāḥ |
yūpānutpāṭya hotṝṇāṃ kaṇṭheṣvābadhya rajjubhiḥ ||

7.1.20.26

yajñapātrāṇi citrāṇi bhittvā sañcūrṇya vāriṇi |
gṛhītvā caiva yajñāṅgaṃ gaṅgāsrotasi cikṣipuḥ ||

7.1.20.27

tatra divyānnapānānāṃ rāśayaḥ parvatopamāḥ |
kṣīranadyo'mṛtasrāvāḥ susnigdhadadhikardamāḥ ||

7.1.20.28

uccāvacāni māṃsāni bhakṣyāṇi surabhīṇi ca |
rasavanti ca pānāni lehyacoṣyāṇi tāni vai ||

7.1.20.29

vīrāstadbhuñjate vaktrairvilumpanti kṣipanti ca |
vajraiścakrairmahāśūlaiḥ śaktibhiḥ pāśapaṭṭiśaiḥ ||

7.1.20.30

musalairasibhiṣṭaṅkairbhindipālaiḥ paraśvadhaiḥ |
uddhatāṃstridaśānsarvāṃllokapālapurassarān ||

7.1.20.31

bibhidurbalino vīrā vīrabhadrāṅgasambhavāḥ |
chindhi bhindhi kṣipa kṣipraṃ māryatāṃ dāryatāmiti ||

7.1.20.32

harasva praharasveti pāṭayotpāṭayeti ca |
saṃrambhaprabhavāḥ krūrāḥ śabdāḥ śravaṇaśaṅkavaḥ ||

7.1.20.33

yatra tatra gaṇeśānāṃ jajñire samarocitāḥ |
vivṛttanayanāḥ kecid daṣṭadaṃṣṭroṣṭhatālavaḥ ||

7.1.20.34

āśramasthān samākṛṣya mārayanti tapodhanān |
sruvānapaharantaśca kṣipanto'gniṃ jaleṣu ca ||

7.1.20.35

kalaśānapi bhindantaśchindanto maṇivedikāḥ |
gāyantaśca nadantaśca hasantaśca muhurmuhuḥ |
raktāsavaṃ pibantaśca nanṛturgaṇapuṅgavāḥ ||

7.1.20.36

nirmathya sendrānamarān gaṇendrā vṛṣendranāgendramṛgendrasārāḥ |
cakrurbahūnyapratimabhāvāḥ saharṣaromāṇi viceṣṭitāni ||

7.1.20.37

nandanti kecitpraharanti kecit dhāvanti kecitpralapanti kecit ||

7.1.20.38

nṛtyanti kecidvihasanti kecit valganti kecitpramathā balena ||

7.1.20.39

kecijjighṛkṣanti ghanānsa toyān kecidgrahītuṃ ravimutpatanti |
kecitprasartuṃ pavanena sārddha-micchanti bhīmāḥ pramathā viyatsthāḥ ||

7.1.20.40

ākṣipya kecicca varāyudhāni mahābhujaṅgāniva vainateyāḥ |
bhramanti devānapi vidravantaḥ khamaṇḍale parvatakūṭakalpāḥ ||

7.1.20.41

utpāṭya cotpāṭya gṛhāṇi kecit sajālavātāyanavedikāni |
vikṣipya vikṣipya jalasya madhye kālāmbudābhāḥ pramathā nineduḥ ||

7.1.20.42

udvartitadvārakapāṭakuḍyaṃ vidhvastaśālāvalabhīgavākṣam |
aho batābhajyata yajñavāṭa-manāptavadvākyamivāyathārtham ||

7.1.20.43

hā nātha tāteti pituḥ suteti bhrātarmamāmbeti ca mātuleti |
utpāṭyamāneṣu gṛheṣu nāryo hyanāthaśabdānbahuśaḥ pracakruḥ ||

7.1.20.43.c1

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe yajñavidhvaṃsano nāma viṃśo'dhyāyaḥ ||

7.1.20.43.p2

śrīgaṇeśāya namaḥ ||

7.1.20.43.p3

śrīgaurīśaṅkarābhyāṃ namaḥ ||

7.1.20.43.p4

śrīśivamahāpurāṇam ||

Other recensions (1)

Linked texts (1)