Shivapurana 7.1.21: ekaviṃśo'dhyāyaḥ | devadaṇḍavarṇanam
Śivapurāṇa (complete text) 7.1.21
- Language
- Sanskrit
Contents
- 7.1.21.41 — 4 parts
ekaviṃśo'dhyāyaḥ | devadaṇḍavarṇanam
7.1.21.1
vāyuruvāca |
tatastridaśamukhyāste viṣṇuśakrapurogamāḥ |
sarve bhayaparitrastā dudruvurbhayavihvalāḥ ||
7.1.21.2
nijairadūṣitairaṅgairdṛṣṭvā devānupadrutān |
daṇḍyānadaṇḍitān matvā cukopa gaṇapuṅgavaḥ ||
7.1.21.3
tatastriśūlamādāya śarvaśaktinibarhaṇam |
ūrdhvadṛṣṭirmahābāhurmukhājjvālāḥ samutsṛjan ||
7.1.21.4
amarānapi dudrāva dviradāniva kesarī |
tānabhidravatastasya gamanaṃ sumanoharam ||
7.1.21.5
vāraṇasyeva mattasya jagāma prekṣaṇīyatām |
tatastatkṣobhayāmāsa mahatsurabalaṃ balī ||
7.1.21.6
mahāsarovaraṃ yadvanmatto vāraṇayūthapaḥ |
vikurvanbahudhā varṇānnīlapāṇḍuralohitān ||
7.1.21.7
bibhrad vyāghrājinaṃ vāso hemapravaratārakam |
chindan bhindannudan klindandārayanpramathannapi ||
7.1.21.8
vyacaraddevasaṅgheṣu bhadro'gniriva kakṣagaḥ |
yatra tatra mahāvegāccarantaṃ śūladhāriṇam ||
7.1.21.9
tamekaṃ tridaśāḥ sarve sahasramiva menire |
bhadrakālī ca saṅkruddhā yuddhavṛddhamadoddhatā ||
7.1.21.10
muktajvālena śūlena nirbibheda raṇe surān |
sa tayā ruruce bhadro rudrakopasamudbhavaḥ ||
7.1.21.11
prabhayeva yugāntāgniścalayā dhūmadhūmrayā |
bhadrakālī tadā yuddhe vidrutatridaśā babhau ||
7.1.21.12
kalpe śeṣānalajvālā dagdhāviśvajagadyathā |
tadā savājinaṃ sūryaṃ rudrān rudragaṇāgraṇīḥ ||
7.1.21.13
bhadro mūrdhni jaghānāśu vāmapādena līlayā |
asibhiḥ pāvakaṃ bhadraḥ paṭṭiśaistu yamaṃ yamīm ||
7.1.21.14
rudrān dṛḍhena śūlena mudgarairvaruṇaṃ dṛḍhaiḥ |
parighairnirṛtiṃ vāyuṃ ṭaṅkaiṣṭaṅkadharaḥ svayam ||
7.1.21.15
nirbibheda raṇe vīro līlayaiva gaṇeśvaraḥ |
sarvāndevagaṇānsadyo munīn śambhorvirodhinaḥ ||
7.1.21.16
tato devaḥ sarasvatyā nāsikāgraṃ suśobhanam |
ciccheda karajāgreṇa devamātustathaiva ca ||
7.1.21.17
ciccheda ca kuṭhāreṇa bāhudaṇḍaṃ vibhāvasoḥ |
agrato dvyaṅgulāṃ jihvāmāttahavyāṃ lulāva ca ||
7.1.21.18
svāhādevyāstathā devo dakṣiṇaṃ nāsikāpuṭam |
cakarta karajāgreṇa vāmaṃ ca stanacūcukam ||
7.1.21.19
bhagasya vipule netre śatapatrasamaprabhe |
prasahyotpāṭayāmāsa bhadraḥ paramavegavān ||
7.1.21.20
pūṣṇo daśanarekhāṃ ca dīptāṃ muktāvalīmiva |
jaghāna dhanuṣaḥ koṭyā sa tenāspaṣṭavāgabhūt ||
7.1.21.21
tataścandramasaṃ devaḥ pādāṅguṣṭhena līlayā |
kṣaṇaṃ kṛmivadākramya gharṣayāmāsa bhūtale ||
7.1.21.22
śiraściccheda dakṣasya bhadraḥ paramakopataḥ |
krośantyāmeva vairiṇyāṃ bhadrakālyai dadau ca tat ||
7.1.21.23
tatprahṛṣṭā samādāya śirastālaphalopamam |
sā devī kandukakrīḍāṃ cakāra samarāṅgaṇe ||
7.1.21.24
tato dakṣasya yajñastrī kuśīlā bhartṛbhiryathā |
pādābhyāṃ caiva hastābhyāṃ hanyate sma gaṇeśvaraiḥ ||
7.1.21.25
ariṣṭaneminaṃ somaṃ dharmaṃ caiva prajāpatim |
bahuputraṃ cāṅgirasaṃ kṛśāśvaṃ kāśyapaṃ tathā ||
7.1.21.26
gale pragṛhya balino gaṇapāḥ siṃhavikramāḥ |
bhartsayanto bhṛśaṃ vāgbhirnijaghnurmūrdhni muṣṭibhiḥ ||
7.1.21.27
dharṣitā bhūtavetālairdārāḥ sutaparigrahāḥ |
yathā kaliyuge jārairbalena kulayoṣitaḥ ||
7.1.21.28
tacca vidhvastakalaśaṃ bhagnayūpaṃ gatotsavam |
pradīpitamahāśālaṃ prabhinnadvāratoraṇam ||
7.1.21.29
utpāṭitasurānīkaṃ hanyamānatapodhanam |
praśāntabrahmanirghoṣaṃ prakṣīṇajanasañcayam ||
7.1.21.30
krandamānāturastrīkaṃ hatāśeṣaparicchadam |
śūnyāraṇyanibhaṃ jajñe yajñavāṭaṃ tadārditam ||
7.1.21.31
śūlavegaprarugṇāśca bhinnabāhūruvakṣasaḥ |
vinikṛttottamāṅgāśca petururvyāṃ surottamāḥ ||
7.1.21.32
hateṣu teṣu deveṣu patiteṣu sahasraśaḥ |
praviveśa gaṇeśānaḥ kṣaṇādāhavanīyakam ||
7.1.21.33
praviṣṭamatha taṃ dṛṣṭvā bhadraṃ kālāgnisannibham |
dudrāva maraṇādbhīto yajño mṛgavapurdharaḥ ||
7.1.21.34
sa visphārya mahaccāpaṃ dṛḍhajyāghoṣaṇabhīṣaṇam |
bhadrastamabhidudrāva vikṣipanneva sāyakān ||
7.1.21.35
ākarṇapūrṇamākṛṣṭaṃ dhanurambudasannibham |
nādayāmāsa ca jyāṃ dyāṃ khaṃ ca bhūmiṃ ca sarvaśaḥ ||
7.1.21.36
tamupaśrutya sannādaṃ hato'smītyeva vihvalam |
śareṇārdhena vakreṇa sa vīro'dhvarapūruṣam ||
7.1.21.37
mahābhayaskhalatpādaṃ vepantaṃ vigatatviṣam |
mṛgarūpeṇa dhāvantaṃ viśiraskaṃ tadākarot ||
7.1.21.38
tamīdṛśamavajñātaṃ dṛṣṭvā vai sūryasambhavam |
viṣṇuḥ paramasaṅkruddho yuddhāyābhavadudyataḥ ||
7.1.21.39
tamuvāha mahāvegātskandhena natasandhinā |
sarveṣāṃ vayasāṃ rājā garuḍaḥ pannagāśanaḥ ||
7.1.21.40
devāśca hataśiṣṭā ye devarājapurogamāḥ |
pracakrustasya sāhāyyaṃ prāṇāṃstyaktumivodyatāḥ ||
7.1.21.41
viṣṇunā sahitān devān mṛgendraḥ kroṣṭukāniva |
dṛṣṭvā jahāsa bhūtendro mṛgendra iva vivyathaḥ ||
7.1.21.41.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe devadaṇḍavarṇanaṃ nāmaikaviṃśo'dhyāyaḥ ||
7.1.21.41.p2
śrīgaṇeśāya namaḥ ||
7.1.21.41.p3
śrīgaurīśaṅkarābhyāṃ namaḥ ||
7.1.21.41.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit