Shivapurana 7.1.23: trayoviṃśo'dhyāyaḥ | giriśānunayaḥ
Śivapurāṇa (complete text) 7.1.23
- Language
- Sanskrit
Contents
- 7.1.23.56 — 4 parts
trayoviṃśo'dhyāyaḥ | giriśānunayaḥ
7.1.23.1
vāyuruvāca |
iti sañchinnabhinnāṅgā devā viṣṇupurogamāḥ |
kṣaṇātkaṣṭāṃ daśāmetya tresuḥ stokāvaśeṣitāḥ ||
7.1.23.2
trastāṃstānsamare vīrān devānanyāṃśca vai gaṇāḥ |
pramathāḥ paramakruddhā vīrabhadrapraṇoditāḥ ||
7.1.23.3
pragṛhya ca tathā doṣaṃ nigaḍairāyasairdṛḍhaiḥ |
babandhuḥ pāṇipādeṣu kandhareṣūdareṣu ca ||
7.1.23.4
tasminnavasare brahmā bhadramadrīndrajānutam |
sārathyāllabdhavātsalyaḥ prārthayan praṇato'bravīt ||
7.1.23.5
alaṃ krodhena bhagavannaṣṭāścaite divaukasaḥ |
prasīda kṣamyatāṃ sarvaṃ romajaiḥ saha suvrata ||
7.1.23.6
evaṃ vijñāpitastena brahmaṇā parameṣṭhinā |
śamaṃ jagāma samprīto gaṇapastasya gauravāt ||
7.1.23.7
devāśca labdhāvasarā devadevasya mantriṇaḥ |
dhārayanto'ñjalīnmūrdhni tuṣṭuvurvividhaiḥ stavaiḥ ||
7.1.23.8
devā ūcuḥ |
namaḥ śivāya śāntāya yajñahantre triśūline |
rudrabhadrāya rudrāṇāṃ pataye rudrabhūtaye ||
7.1.23.9
kālāgnirudrarūpāya kālakāmāṅgahāriṇe |
devatānāṃ śirohantre dakṣasya ca durātmanaḥ ||
7.1.23.10
saṃsargādasya pāpasya dakṣasya kliṣṭakarmaṇaḥ |
śāsitāḥ samare vīra tvayā vayamaninditāḥ ||
7.1.23.11
dagdhāścāmī vayaṃ sarve tvatto bhītāśca bho prabho |
tvameva gatirasmākaṃ trāhi naḥ śaraṇāgatān ||
7.1.23.12
vāyuruvāca |
tuṣṭastvevaṃ stuto devān visṛjya nigaḍātprabhuḥ |
ānayaddevadevasya samīpamamarāniha ||
7.1.23.13
devo'pi tatra bhagavānantarikṣe sthitaḥ prabhuḥ |
sagaṇaḥ sarvagaḥ śarvaḥ sarvalokamaheśvaraḥ ||
7.1.23.14
taṃ dṛṣṭvā parameśānaṃ devā viṣṇupurogamāḥ |
prītā api ca bhītāśca namaścakrurmaheśvaram ||
7.1.23.15
dṛṣṭvā tānamarānbhītānpraṇatārtiharo haraḥ |
idamāha mahādevaḥ prahasan prekṣya pārvatīm ||
7.1.23.16
mahādeva uvāca |
mā bhaiṣṭa tridaśāḥ sarve yūyaṃ vai māmikāḥ prajāḥ |
anugrahārthameveha dhṛto daṇḍaḥ kṛpālunā ||
7.1.23.17
bhavatāṃ nirjjarāṇāṃ hi kṣānto'smābhirvyatikramaḥ |
kruddheṣvasmāsu yuṣmākaṃ na sthitirna ca jīvitam ||
7.1.23.18
vāyuruvāca |
ityuktāstridaśāḥ sarve śarveṇāmitatejasā |
sadyo vigatasandehā nanṛturvibudhā mudā ||
7.1.23.19
prasannamanaso bhūtvānandavihvalamānasāḥ |
stutimārebhire kartuṃ śaṅkarasya divaukasaḥ ||
7.1.23.20
devā ūcuḥ |
tvameva devākhilalokakartā pātā ca hartā parameśvaro'si |
kaviṣṇurudrākhyasvarūpabhedai rajastamaḥ sattvadhṛtātmamūrtte ||
7.1.23.21
sarvamūrtte namaste'stu viśvabhāvana pāvana |
amūrtte bhaktahetorhi gṛhītākṛtisaukhyada ||
7.1.23.22
candro'gado hi deveśa kṛpātastava śaṅkara |
nimajjanānmṛtaḥ prāpa sukhaṃ mihirajājaliḥ ||
7.1.23.23
sīmantinī hatadhavā tava pūjanataḥ prabho |
saubhāgyamatulaṃ prāpa somavāravratātsutān ||
7.1.23.24
śrīkarāya dadau devaḥ svīyaṃ padamanuttamam |
sudarśanamarakṣastvaṃ nṛpamaṇḍalabhītitaḥ ||
7.1.23.25
meduraṃ tārayāmāsa sadāraṃ ca ghṛṇānidhiḥ |
śāradāṃ vidhavāṃ cakre sadhavāṃ kriyayā bhavān ||
7.1.23.26
bhadrāyuṣo vipattiṃ ca vicchidya tvamadāḥ sukham |
sauminī bhavabandhādvai muktābhūttava sevanāt ||
7.1.23.27
viṣṇuruvāca |
tvaṃ śambho kaharīśāśca rajassattvatamoguṇaiḥ |
kartā pātā tathā hartā janānugrahakāṅkṣayā ||
7.1.23.28
sarvagarvāpahārī ca sarvatejovilāsakaḥ |
sarvavidyādigūḍhaśca sarvānugrahakārakaḥ ||
7.1.23.29
tvattaḥ sarvaṃ ca tvaṃ sarvaṃ tvayi sarvaṃ girīśvara |
trāhi trāhi punastrāhi kṛpāṃ kuru mamopari ||
7.1.23.30
athāsminnantare brahmā praṇipatya kṛtāñjaliḥ |
evaṃ tvavasaraṃ prāpya vyajñāpayata śūline ||
7.1.23.31
brahmovāca |
jaya deva mahādeva praṇatārtivibhañjana |
īdṛśeṣvaparādheṣu ko'nyastvattaḥ prasīdati ||
7.1.23.32
labdhātmāno bhaviṣyanti ye purā nihatā mṛdhe |
pratyāpattirna kasya syātprasanne parameśvare ||
7.1.23.33
yadidaṃ devadevānāṃ kṛtamantuṣu dūṣaṇam |
tadidaṃ bhūṣaṇaṃ manye ta aṅgīkāragauravāt ||
7.1.23.34
iti vijñāpyamānastu brahmaṇā parameṣṭhinā |
vilokya vadanaṃ devyā devadevaḥ smayanniva ||
7.1.23.35
putrabhūtasya vātsalyād brahmaṇaḥ padmajanmanaḥ |
devādīnāṃ yathāpūrvamaṅgāni pradadau prabhuḥ ||
7.1.23.36
pramathādyaiśca yā devyo daṇḍitā devamātaraḥ |
tāsāmapi yathāpūrvāṇyaṅgāni giriśo dadau ||
7.1.23.37
dakṣasya bhagavāneva svayaṃ brahmā pitāmahaḥ |
tatpāpānuguṇaṃ cakre jaracchāgamukhaṃ mukham ||
7.1.23.38
so'pi saṃjñāṃ tato labdhvā sa dṛṣṭvā jīvitaḥ sudhīḥ |
bhītaḥ kṛtāñjaliḥ śambhuṃ tuṣṭāva pralapanbahu ||
7.1.23.39
dakṣa uvāca |
jaya deva jagannātha lokānugrahakāraka |
kṛpāṃ kuru maheśānāparādhaṃ me kṣamasva ha ||
7.1.23.40
karttā bharttā ca hartā ca tvameva jagatāṃ prabhuḥ |
mayā jñātaṃ viśeṣeṇa viṣṇvādisakaleśvaraḥ ||
7.1.23.41
tvayaiva vitataṃ sarvaṃ vyāptaṃ sṛṣṭaṃ ca nāśitam |
na hi tvadadhikāḥ kecidīśāste'cyutakādayaḥ ||
7.1.23.42
vāyuruvāca |
taṃ tathā vyākulaṃ bhītaṃ pralapantaṃ kṛtāgasam |
smayannivāvadatprekṣya mā bhairiti ghṛṇānidhiḥ ||
7.1.23.43
tathoktvā brahmaṇastasya pituḥ priyacikīrṣayā |
gāṇapatyaṃ dadau tasmai dakṣāyākṣayamīśvaraḥ ||
7.1.23.44
tato brahmādayo devā abhivandya kṛtāñjaliḥ |
tuṣṭuvuḥ praśrayā vācā śaṅkaraṃ girijādhipam ||
7.1.23.45
brahmādaya ūcuḥ |
jaya śaṅkara deveśa dīnānātha mahāprabho |
kṛpāṃ kuru maheśānāparādhaṃ no kṣamasva vai ||
7.1.23.46
makhapāla makhādhīśa makhavidhvaṃsakāraka |
kṛpāṃ kuru maheśānāparādhaṃ naḥ kṣamasva vai ||
7.1.23.47
devadeva pareśāna bhaktaprāṇaprapoṣaka |
duṣṭadaṇḍapradaḥ svāminkṛpāṃ kuru namo'stu te ||
7.1.23.48
tvaṃ prabho garvahartā vai duṣṭānāṃ tvāmajānatām |
rakṣako hi viśeṣeṇa satāṃ tvatsaktacetasām ||
7.1.23.49
adbhutaṃ caritaṃ te hi niścitaṃ kṛpayā tava |
sarvāparādhaḥ kṣantavyo vibhavo dīnavatsalāḥ ||
7.1.23.50
vāyuruvāca |
iti stuto mahādevo brahmādyairamaraiḥ prabhuḥ |
sa bhaktavatsalaḥ svāmī tutoṣa karuṇodadhiḥ ||
7.1.23.51
cakārānugrahaṃ teṣāṃ brahmādīnāṃ divaukasām |
dadau varāṃśca suprītyā śaṅkaro dīnavatsalaḥ ||
7.1.23.52
sa ca tatastridaśān śaraṇāgatān paramakāruṇikaḥ parameśvaraḥ |
anugatasmitalakṣaṇayā girā śamitasarvabhayaḥ samabhāṣata ||
7.1.23.53
śiva uvāca |
yadidamāga ihācaritaṃ surai-rvidhiniyogavaśādiva yantritaiḥ |
śaraṇameva gatānavalokya va-stadakhilaṃ kila vismṛtameva naḥ ||
7.1.23.54
tadiha yūyamapi prakṛtaṃ mana-syavigaṇayya vimardamapatrapāḥ |
hariviriñcisurendramukhāḥ sukhaṃ vrajata devapuraṃ prati samprati ||
7.1.23.55
iti surānabhidhāya sureśvaro nikṛtadakṣakṛtakraturakratuḥ |
sa girijānucaraḥ saparicchadaḥ sthita ivāmbaratontaradhāddharaḥ ||
7.1.23.56
atha surā api te vigatavyathāḥ kathitabhadrasubhadraparākramāḥ |
sapadi khena sukhena yathāsukhaṃ yayuranekamukhāḥ maghavanmukhāḥ ||
7.1.23.56.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe giriśānunayo nāma trayoviṃśo'dhyāyaḥ ||
7.1.23.56.p2
śrīgaṇeśāya namaḥ ||
7.1.23.56.p3
śrīgaurīśaṅkarābhyāṃ namaḥ ||
7.1.23.56.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (1)
- Sūkṣmāgama (complete text) — Sanskrit