Shivapurana 7.1.25: pañcaviṃśo'dhyāyaḥ | devīgauratvaprāptiḥ
Śivapurāṇa (complete text) 7.1.25
- Language
- Sanskrit
Contents
- 7.1.25.48 — 4 parts
pañcaviṃśo'dhyāyaḥ | devīgauratvaprāptiḥ
7.1.25.1
vāyuruvāca |
tataḥ pradakṣiṇīkṛtya patimambā pativratā |
niyamya ca viyogārtiṃ jagāma himavadgirim ||
7.1.25.2
tapaḥ kṛtavatī pūrvaṃ deśe yasminsakhījanaiḥ |
tameva deśamavṛṇottapase praṇayātpunaḥ ||
7.1.25.3
tataḥ svapitaraṃ dṛṣṭvā mātaraṃ ca tayorgṛhe |
praṇamya vṛttaṃ vijñāpya tābhyāṃ cānumatā satī ||
7.1.25.4
punastapovanaṃ gatvā bhūṣaṇāni visṛjya ca |
snātvā tapasvino veṣaṃ kṛtvā paramapāvanam ||
7.1.25.5
saṅkalpya ca mahātīvraṃ tapaḥ paramaduścaram |
sadā manasi sandhāya bhartuścaraṇapaṅkajam ||
7.1.25.6
tameva kṣaṇike liṅge dhyātvā bāhyavidhānataḥ |
trisandhyamabhyarcayantī vanyaiḥ puṣpaiḥ phalādibhiḥ ||
7.1.25.7
sa eva brahmaṇo mūrtimāsthāya tapasaḥ phalam |
pradāsyati mametyevaṃ nityaṃ kṛtvā'karottapaḥ ||
7.1.25.8
tathā tapaścarantīṃ tāṃ kāle bahutithe gate |
dṛṣṭaḥ kaścinmahāvyāghro duṣṭabhāvādupāgamat ||
7.1.25.9
tathaivopagatasyāpi tasyātīva durātmanaḥ |
gātraṃ citrārpitamiva stabdhaṃ tasyāḥ sakāśataḥ ||
7.1.25.10
taṃ dṛṣṭvāpi tathā vyāghraṃ duṣṭabhāvādupāgatam |
na pṛthagjanavaddevī svabhāvena vivicyate ||
7.1.25.11
sa tu viṣṭabdhasarvāṅgo bubhukṣāparipīḍitaḥ |
mamāmiṣaṃ tato nānyaditi matvā nirantaram ||
7.1.25.12
nirīkṣyamāṇaḥ satataṃ devīmeva tadā'niśam |
atiṣṭhadagratastasyā upāsanamivācarat ||
7.1.25.13
devyāśca hṛdaye nityaṃ mamaivāyamupāsakaḥ |
trātā ca duṣṭasattvebhya iti pravavṛte kṛpā ||
7.1.25.14
tasyā eva kṛpāyogātsadyo naṣṭamalatrayaḥ |
babhūva sahasā vyāghro devīṃ ca bubudhe tadā ||
7.1.25.15
nyavartata bubhukṣā ca tasyāṅgastambhanaṃ tathā |
daurātmyaṃ janmasiddhaṃ ca tṛptiśca samajāyata ||
7.1.25.16
tadā paramabhāvena jñātvā kārtārthyamātmanaḥ |
sadyopāsaka evaiṣa siṣeve parameśvarīm ||
7.1.25.17
duṣṭānāmapi sattvānāṃ tathānyeṣāṃ durātmanām |
sa eva drāvako bhūtvā vicacāra tapovane ||
7.1.25.18
tapaśca vavṛdhe devyāstīvraṃ tīvratarātmakam |
devāśca daityanirbandhād brahmāṇaṃ śaraṇaṃ gatāḥ ||
7.1.25.19
cakrurnivedanaṃ devāḥ svaduḥkhasyāripīḍanāt |
yathā ca dadatuḥ śumbhaniśumbhau varasammadāt ||
7.1.25.20
so'pi śrutvā vidhirduḥkhaṃ surāṇāṃ kṛpayānvitaḥ |
āsīddaityavadhāyaiva smṛtvā hetvāśrayāṃ kathām ||
7.1.25.21
sāmaraḥ prārthito brahmā yayau devyāstapovanam |
saṃsmaranmanasā devaduḥkhamokṣaṃ svayatnataḥ ||
7.1.25.22
dadarśa ca suraśreṣṭhaḥ śreṣṭhe tapasi niṣṭhitām |
pratiṣṭhāmiva viśvasya bhavānīṃ parameśvarīm ||
7.1.25.23
nanāma cāsya jagato mātaraṃ svasya vai hareḥ |
rudrasya ca piturbhāryāmāryāmadrīśvarātmajām ||
7.1.25.24
brahmāṇamāgataṃ dṛṣṭvā devī devagaṇaiḥ sahaḥ |
arghyaṃ tadarhaṃ dattvā'smai svāgatādyairupācarat ||
7.1.25.25
tāṃ ca pratyupacāroktiṃ puraskṛtyābhinandya ca |
papraccha tapaso hetumajānanniva padmajaḥ ||
7.1.25.26
brahmovāca |
tīvreṇa tapasānena devyā kimiha sādhyate |
tapaḥphalānāṃ sarveṣāṃ tvadadhīnā hi siddhayaḥ ||
7.1.25.27
yaścaiva jagatāṃ bhartā tameva parameśvaram |
bhartāramātmanā prāpya prāptaṃ ca tapasaḥ phalam ||
7.1.25.28
athavā sarvamevaitatkrīḍāvilasitaṃ tava |
idaṃ tu citraṃ devasya virahaṃ sahase katham ||
7.1.25.29
devyuvāca |
sargādau bhavato devādutpattiḥ śrūyate yadā |
tadā prajānāṃ prathamastvaṃ me prathamajaḥ sutaḥ ||
7.1.25.30
yadā punaḥ prajāvṛddhyai lalāṭādbhavato bhavaḥ |
utpanno'bhūttadā tvaṃ me guruḥ śvaśurabhāvataḥ ||
7.1.25.31
yadābhavadgirīndraste putro mama pitā svayam |
tadā pitāmahastvaṃ me jāto lokapitāmaha ||
7.1.25.32
tadīdṛśasya bhavato lokayātrāvidhāyinaḥ |
vṛttamantaḥpure bhartrā kathayiṣye kathaṃ punaḥ ||
7.1.25.33
kimatra bahunā dehe yaścāyaṃ mama kālimā |
tyaktvā sattvavidhānena gaurī bhavitumutsahe ||
7.1.25.34
brahmovāca |
etāvatā kimarthena tīvraṃ devi tapaḥ kṛtam |
svecchaiva kimaparyāptā krīḍeyaṃ hi tavedṛśī ||
7.1.25.35
krīḍā'pi ca jaganmātastava lokahitāya vai |
ato mameṣṭamanayā phalaṃ kimapi sādhyatām ||
7.1.25.36
niśumbhaśumbhanāmānau daityau dattavarau mayā |
dṛptau devānprabādhete tvatto labdhastayorvadhaḥ ||
7.1.25.37
alaṃ vilambanenātra tvaṃ kṣaṇena sthirā bhava |
śaktirvisṛjyamānādya tayormṛtyurbhaviṣyati ||
7.1.25.38
brāhmaṇā'bhyarthitā caiva devī girivarātmajā |
tvakkośaṃ sahasotsṛjya gaurī sā samajāyata ||
7.1.25.39
sā tvakkośātmanotsṛṣṭā kauśikī nāma nāmataḥ |
kālī kālāmbudaprakhyā kanyakā samapadyata ||
7.1.25.40
sā tu māyātmikā śaktiryoganidrā ca vaiṣṇavī |
śaṅkhacakratriśūlādisāyudhāṣṭamahābhujā ||
7.1.25.41
saumyā ghorā ca miśrā ca trinetrā candraśekharā |
ajātapuṃsparśaratiradhṛṣyā cātisundarī ||
7.1.25.42
dattā ca brahmaṇe devyā śaktireṣā sanātanī |
niśumbhasya ca śumbhasya nihantrī daityasiṃhayoḥ ||
7.1.25.43
brahmaṇā'pi prahṛṣṭena tasyai paramaśaktaye |
prabalaḥ kesarī datto vāhanatve samāgataḥ ||
7.1.25.44
vindhye ca vasatiṃ tasyāḥ pūjāmāsavapūrvakaiḥ |
māṃsairmatsyairapūpaiśca nirvartyāsau samādiśat ||
7.1.25.45
sā caiva sammatā śaktirbrahmaṇo viśvakarmaṇaḥ |
praṇamya mātaraṃ gaurīṃ brahmāṇaṃ cānupūrvaśaḥ ||
7.1.25.46
śaktibhiścāpi tulyābhiḥ svātmajābhiranekaśaḥ |
parītā prayayau vindhyaṃ daityendrau hantumudyatā ||
7.1.25.47
nihatau ca tayā tatra samare daityapuṅgavau |
tadbāṇaiḥ kāmabāṇaiśca cchinnabhinnāṅgamānasau ||
7.1.25.48
tadyuddhavistaraścātra na kṛto'nyatra varṇanāt |
ūhanīyaṃ parasmācca prastutaṃ varṇayāmi vaḥ ||
7.1.25.48.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe devīgauratvaprāptirnāma pañcaviṃśo'dhyāyaḥ ||
7.1.25.48.p2
śrīgaṇeśāya namaḥ ||
7.1.25.48.p3
śrīgaurīśaṅkarābhyāṃ namaḥ ||
7.1.25.48.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit