Shivapurana 7.1.26: ṣaḍviṃśo'dhyāyaḥ | vyāghragativarṇanam
Śivapurāṇa (complete text) 7.1.26
- Language
- Sanskrit
Contents
- 7.1.26.29 — 4 parts
ṣaḍviṃśo'dhyāyaḥ | vyāghragativarṇanam
7.1.26.1
vāyuruvāca |
utpādya kauśikīṃ gaurī brahmaṇe pratipādya tām |
tasya pratyupakārāya pitāmahamathābravīt ||
7.1.26.2
devyuvāca |
dṛṣṭaḥ kimeṣa bhavatā śārdūlo madupāśrayaḥ |
anena duṣṭasattvebhyo rakṣitaṃ mattapovanam ||
7.1.26.3
mayyarpitamanā eṣa bhajate māmananyadhīḥ |
asya saṃrakṣaṇādanyatpriyaṃ mama na vidyate ||
7.1.26.4
bhavitavyamanenāto mamāntaḥpuracāriṇā |
gaṇeśvarapadaṃ cāsmai prītyā dāsyati śaṅkaraḥ ||
7.1.26.5
enamagresaraṃ kṛtvā sakhībhirgantumutsahe |
pradīyatāmanujñā me prajānāṃ patinā tvayā ||
7.1.26.6
ityuktaḥ prahasanbrahmā devīṃ mugdhāmiva smayan |
tasya tīvraiḥ purāvṛttairdaurātmyaṃ samavarṇayat ||
7.1.26.7
brahmovāca |
paśau devi mṛgāḥ krūrāḥ kva ca te'nugrahaḥ śubhaḥ |
āśīviṣamukhe sākṣādamṛtaṃ kiṃ niṣicyate ||
7.1.26.8
vyāghramātreṇa sanneṣa duṣṭaḥ ko'pi niśācaraḥ |
anena bhakṣitā gāvo brāhmaṇāśca tapodhanāḥ ||
7.1.26.9
tarpayaṃstān yathākāmaṃ kāmarūpī caratyasau |
avaśyaṃ khalu bhoktavyaṃ phalaṃ pāpasya karmaṇaḥ ||
7.1.26.10
ataḥ kiṃ kṛpayā kṛtyamīdṛśeṣu durātmasu |
anena devyāḥ kiṃ kṛtyaṃ prakṛtyā kaluṣātmanā ||
7.1.26.11
devyuvāca |
yaduktaṃ bhavatā sarvaṃ tathyamastvayamīdṛśaḥ |
tathāpi māṃ prapanno'bhūnna tyājyo māmupāśritaḥ ||
7.1.26.12
brahmovāca |
asya bhaktimavijñāya prāgvṛttaṃ te niveditam |
bhaktiścedasya kiṃ pāpairna te bhaktaḥ praṇaśyati ||
7.1.26.13
puṇyakarmāpi kiṃ kuryyāttvadīyājñānapekṣayā |
ajā prajñā purāṇī ca tvameva parameśvarī ||
7.1.26.14
tvadadhīnā hi sarveṣāṃ bandhamokṣavyavasthitiḥ |
tvadṛte paramā śaktiḥ saṃsiddhiḥ kasya karmaṇā ||
7.1.26.15
tvameva vividhā śaktiḥ bhavānāmatha vā svayam |
aśaktaḥ karmakaraṇe kartā vā kiṃ kariṣyati ||
7.1.26.16
viṣṇośca mama cānyeṣāṃ devadānavarakṣasām |
tattadaiśvaryasamprāptyai tavaivājñā hi kāraṇam ||
7.1.26.17
atītāḥ khalvasaṅkhyātā brahmāṇo harayo bhavāḥ |
anāgatāstvasaṅkhyātāstvadājñānuvidhāyinaḥ ||
7.1.26.18
tvāmanārādhya deveśi puruṣārthacatuṣṭayam |
labdhuṃ na śakyamasmābhirapi sarvaiḥ surottamaiḥ ||
7.1.26.19
vyatyāso'pi bhavetsadyo brahmatvasthāvaratvayoḥ |
sukṛtaṃ duṣkṛtaṃ cāpi tvayaiva sthāpitaṃ yataḥ ||
7.1.26.20
tvaṃ hi sarvajagadbhartuḥ śivasya paramātmanaḥ |
anādimadhyanidhanā śaktirādyā sanātanī ||
7.1.26.21
samastalokayātrārthaṃ mūrtimāviśya kāmapi |
krīḍase vividhairbhāvaiḥ kastvāṃ jānāti tattvataḥ ||
7.1.26.22
ato duṣkṛtakarmāpi vyāghro'yaṃ tvadanugrahāt |
prāpnotu paramāṃ siddhimatra kaḥ pratibandhakaḥ ||
7.1.26.23
ityātmanaḥ paraṃ bhāvaṃ smārayitvānurūpataḥ |
brahmaṇābhyarthitā gaurī tapaso'pi nyavartata ||
7.1.26.24
tato devīmanujñāpya brahmaṇyantarhite sati |
devīṃ ca mātaraṃ dṛṣṭvā menāṃ himavatā saha ||
7.1.26.25
praṇamyāśvāsya bahudhā pitarau virahāsahau |
tapaḥ praṇayino devī tapovanamahīruhān ||
7.1.26.26
viprayogaśucevāgre puṣpabāṣpaṃ vimuñcataḥ |
tattacchākhāsamārūḍhavihagodīritai rutaiḥ ||
7.1.26.27
vyākulaṃ bahudhā dīnaṃ vilāpamiva kurvataḥ |
sakhībhyaḥ kathayantvevaṃ sattvarā bhartṛdarśane ||
7.1.26.28
puraskṛtya ca taṃ vyāghraṃ snehātputramivaurasam |
dehasya prabhayā caiva dīpayantī diśo daśa ||
7.1.26.29
prayayau mandaraṃ gaurī yatra bhartā maheśvaraḥ |
sarveṣāṃ jagatāṃ dhātā kartā pātā vināśakṛt ||
7.1.26.29.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe vyāghragativarṇanaṃ nāma ṣaḍviṃśo'dhyāyaḥ ||
7.1.26.29.p2
śrīgaṇeśāya namaḥ ||
7.1.26.29.p3
śrīgaurīśaṅkarābhyāṃ namaḥ ||
7.1.26.29.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit