Shivapurana 7.1.27: saptaviṃśo'dhyāyaḥ | devīśivamilanavarṇanam
Śivapurāṇa (complete text) 7.1.27
- Language
- Sanskrit
Contents
- 7.1.27.37 — 4 parts
saptaviṃśo'dhyāyaḥ | devīśivamilanavarṇanam
7.1.27.1
ṛṣaya ūcuḥ |
kṛtvā gauraṃ vapurdivyaṃ devī girivarātmajā |
kathaṃ dadarśa bhartāraṃ praviṣṭā mandiraṃ satī ||
7.1.27.2
praveśasamaye tasyā bhavanadvāragocaraiḥ |
gaṇeśaiḥ kiṃ kṛtaṃ devastāṃ dṛṣṭvā kiṃ tadākarot ||
7.1.27.3
vāyuruvāca |
pravaktumañjasāśakyaḥ tādṛśaḥ paramo rasaḥ |
yena praṇayagarbheṇa bhāvo bhāvavatāṃ hṛtaḥ ||
7.1.27.4
dvāḥsthaiḥ sasambhramaireva devo devyāgamotsukaḥ |
śaṅkamānā praviṣṭāntastaṃ ca sā samapaśyata ||
7.1.27.5
taistaiḥ praṇayabhāvaiśca bhavanāntaravartibhiḥ |
gaṇendrairvanditā vācā praṇanāma triyambakam ||
7.1.27.6
praṇamya notthitā yāvattāvattāṃ parameśvaraḥ |
pragṛhya dorbhyāmāśliṣya paritaḥ parayā mudā ||
7.1.27.7
svāṅke dhartuṃ pravṛtto'pi sā paryaṅke nyaṣīdata |
paryaṅkato balāddevīṃ so'ṅkamāropya susmitām ||
7.1.27.8
sasmito vivṛtairnetraistadvaktraṃ prapibanniva |
tayā sambhāṣaṇāyeśaḥ pūrvabhāṣitamabravīt ||
7.1.27.9
devadeva uvāca |
sā daśā ca vyatītā kiṃ tava sarvāṅgasundari |
yasyāmanunayopāyaḥ ko'pi kopānna labhyate ||
7.1.27.10
svecchayāpi na kālīti nānyavarṇavatīti ca |
tvatsvabhāvahṛtaṃ cittaṃ subhru cintāvahaṃ mama ||
7.1.27.11
vismṛtaḥ paramo bhāvaḥ kathaṃ svecchāṅgayogataḥ |
na sambhavanti ye tatra cittakāluṣyahetavaḥ ||
7.1.27.12
pṛthagjanavadanyo'nyaṃ vipriyasyāpi kāraṇam |
āvayorapi yadyasti nāstyevaitaccarācaram ||
7.1.27.13
ahamagniśironiṣṭhastvaṃ somaśirasi sthitā |
agnīṣomātmakaṃ viśvamāvābhyāṃ samadhiṣṭhitam ||
7.1.27.14
jagaddhitāya caratoḥ svecchādhṛtaśarīrayoḥ |
āvayorviprayoge hi syānnirālambanaṃ jagat ||
7.1.27.15
asti hetvantaraṃ cātra śāstrayuktiviniścitam |
vāgarthamiva caivaitajjagatsthāvarajaṅgamam ||
7.1.27.16
tvaṃ hi vāgamṛtaṃ sākṣādahamarthāmṛtaṃ param |
dvayamapyamṛtaṃ kasmādviyuktamupapadyate ||
7.1.27.17
vidyāpratyāyikā tvaṃ me vedyo'haṃ pratyayāttava |
vidyāvedyātmanoreva viśleṣaḥ kathamāvayoḥ ||
7.1.27.18
na karmaṇā sṛjāmīdaṃ jagatpratisṛjāmi ca |
sarvasyājñaikalabhyatvādājñātvaṃ hi garīyasī ||
7.1.27.19
ājñaikasāramaiśvaryaṃ yasmātsvātantryalakṣaṇam |
ājñayā viprayuktasya caiśvaryaṃ mama kīdṛśam ||
7.1.27.20
na kadācidavasthānamāvayorviprayuktayoḥ |
devānāṃ kāryamuddiśya līloktiṃ kṛtavānaham ||
7.1.27.21
tvayāpyaviditaṃ nāsti kathaṃ kupitavatyasi |
tatastrilokarakṣārthe kopo mayyapi te kṛtaḥ ||
7.1.27.22
yadanarthāya bhūtānāṃ na tadasti khalu tvayi |
iti priyaṃvade sākṣādīśvare parameśvare ||
7.1.27.23
śṛṅgārabhāvasārāṇāṃ janmabhūmirakṛtrimā |
svabhartrā lalitaṃ tathyamuktaṃ matvā smitottaram ||
7.1.27.24
lajjayā na kimapyūce kauśikī varṇanātparam |
tadeva varṇayāmyadya śṛṇu devyāśca varṇanam ||
7.1.27.25
devyuvāca |
kiṃ devena na sā dṛṣṭā yā sṛṣṭā kauśikī mayā |
tādṛśī kanyakā loke na bhūtā na bhaviṣyati ||
7.1.27.26
tasyā vīryaṃ balaṃ vindhyanilayaṃ vijayaṃ tathā |
śumbhasya ca niśumbhasya māraṇe ca raṇe tayoḥ ||
7.1.27.27
pratyakṣaphaladānaṃ ca lokāya bhajate sadā |
lokānāṃ rakṣaṇaṃ śaśvad brahmā vijñāpayiṣyati ||
7.1.27.28
iti sambhāṣamāṇāyā devyā evājñayā tadā |
vyāghraḥ sakhyā samānīya puro'vasthāpitastadā ||
7.1.27.29
taṃ prekṣyāha punardevī devānītamupāyatam |
vyāghraṃ paśya na cānena sadṛśo madupāsakaḥ ||
7.1.27.30
anena duṣṭasaṅghebhyo rakṣitaṃ mattapovanam |
atīva mama bhaktaśca viśrabdhaśca svarakṣaṇāt ||
7.1.27.31
svadeśaṃ ca parityajya prasādārthaṃ samāgataḥ |
yadi prītirabhūnmattaḥ parāṃ prītiṃ karoṣi me ||
7.1.27.32
nityamantaḥpuradvāri niyogānnandinaḥ svayam |
rakṣibhiḥ saha taccihnairvartatāmayamīśvara ||
7.1.27.33
vāyuruvāca |
madhuraṃ praṇayodarkaṃ śrutvā devyāḥ śubhaṃ vacaḥ |
prīto'smītyāha taṃ devaḥ sa cādṛśyata tatkṣaṇāt ||
7.1.27.34
bibhradvetralatāṃ haimīṃ ratnacitraṃ ca kañcukam |
churikāmuragaprakhyāṃ gaṇeśo rakṣaveṣadhṛk ||
7.1.27.35
yasmātsomo mahādevo nandī cānena nanditaḥ |
somanandīti vikhyātastasmādeṣa samākhyayā ||
7.1.27.36
itthaṃ devyāḥ priyaṃ kṛtvā devaścārddhendubhūṣaṇaḥ |
bhūṣayāmāsa taṃ divyairbhūṣaṇai ratnabhūṣitaiḥ ||
7.1.27.37
tataḥ sa gaurīṃ giriśo girīndrajāṃ sagauravāṃ sarvamanoharāṃ haraḥ |
paryaṅkamāropya varāṅgabhūṣaṇai-rvibhūṣayāmāsa śaśāṅkabhūṣaṇaḥ ||
7.1.27.37.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe devīśivamilanavarṇanaṃ nāma saptaviṃśo'dhyāyaḥ ||
7.1.27.37.p2
śrīgaṇeśāya namaḥ ||
7.1.27.37.p3
śrīgaurīśaṅkarābhyāṃ namaḥ ||
7.1.27.37.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit