Shivapurana 7.1.28: aṣṭāviṃśo'dhyāyaḥ | bhasmatattvavarṇanam
Śivapurāṇa (complete text) 7.1.28
- Language
- Sanskrit
Contents
- 7.1.28.20 — 4 parts
aṣṭāviṃśo'dhyāyaḥ | bhasmatattvavarṇanam
7.1.28.1
ṛṣaya ūcuḥ |
devīṃ samādadhānena devenedaṃ kimīritam |
agniṣomātmakaṃ viśvaṃ vāgarthātmakamityapi ||
7.1.28.2
ājñaikasāramaiśvaryamājñātvamiti coditam |
tadidaṃ śrotumicchāmo yathāvadanupūrvaśaḥ ||
7.1.28.3
vāyuruvāca |
agnirityucyate raudrī ghorā yā taijasī tanuḥ |
somaḥ śākto'mṛtamayaḥ śakteḥ śāntikarī tanuḥ ||
7.1.28.4
amṛtaṃ yatpratiṣṭhā sā tejo vidyā kalā svayam |
bhūtasūkṣmeṣu sarveṣu ta eva rasatejasī ||
7.1.28.5
dvividhā tejaso vṛttiḥ sūryātmā cānalātmikā |
tathaiva rasavṛttiśca somātmā ca jalātmikā ||
7.1.28.6
vidyudādimayaṃ tejo madhurādimayo rasaḥ |
tejorasavibhedaistu dhṛtametaccarācaram ||
7.1.28.7
agneramṛtaniṣpattiramṛtenāgniredhate |
ata eva hi vikrāntamagnīṣomaṃ jagaddhitam ||
7.1.28.8
haviṣe sasyasampattirvṛṣṭiḥ sasyābhivṛddhaye |
vṛṣṭereva havistasmādagnīṣomadhṛtaṃ jagat ||
7.1.28.9
agnirūrdhvaṃ jvalatyeṣa yāvatsaumyaṃ parāmṛtam |
yāvadagnyāspadaṃ saumyamamṛtaṃ ca sravatyadhaḥ ||
7.1.28.10
ata eva hi kālāgniradhastācchaktirūrdhvataḥ |
yāvadādahanaṃ cordhvamadhaścāplāvanaṃ bhavet ||
7.1.28.11
ādhāraśaktyaiva dhṛtaḥ kālāgnirayamūrdhvagaḥ |
tathaiva nimnagaḥ somaḥ śivaśaktipadāspadaḥ ||
7.1.28.12
śivaścordhvamadhaḥ śaktirūrdhvaṃ śaktiradhaḥ śivaḥ |
taditthaṃ śivaśaktibhyāṃ nāvyāptamiha kiñcana ||
7.1.28.13
asakṛccāgninā dagdhaṃ jagadyadbhasmasātkṛtam |
agnervīryamidaṃ cāhustadvīryaṃ bhasma yattataḥ ||
7.1.28.14
yaścetthaṃ bhasmasadbhāvaṃ jñātvā snāti ca bhasmanā |
agnirityādibhirmantrairbaddhaḥ pāśātpramucyate ||
7.1.28.15
agnervīryaṃ tu yadbhasma somenāplāvitaṃ punaḥ |
ayogayuktyā prakṛteradhikārāya kalpate ||
7.1.28.16
yogayuktyā tu tadbhasma plāvyamānaṃ samantataḥ |
śāktenāmṛtavarṣeṇa cādhikārānnivartayet ||
7.1.28.17
ato mṛtyuñjayāyetthamamṛtaplāvanaṃ sadā |
śivaśaktyamṛtasparśe labdhaṃ yena kuto mṛtiḥ ||
7.1.28.18
yo veda dahanaṃ guhyaṃ plāvanaṃ ca yathoditam |
agnīṣomapadaṃ hitvā na sa bhūyo'bhijāyate ||
7.1.28.19
śivāgninā tanuṃ dagdhvā śaktisaumyāmṛtena yaḥ |
plāvayedyogamārgeṇa so'mṛtatvāya kalpate ||
7.1.28.20
hṛdi kṛtvemamarthaṃ vai devena samudāhṛtam |
agnīṣomātmakaṃ viśvaṃ jagadityanurūpataḥ ||
7.1.28.20.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe bhasmatattvavarṇanaṃ nāmāṣṭāviṃśo'dhyāyaḥ ||
7.1.28.20.p2
śrīgaṇeśāya namaḥ ||
7.1.28.20.p3
śrīgaurīśaṅkarābhyāṃ namaḥ ||
7.1.28.20.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit