Shivapurana 7.1.4: caturtho'dhyāyaḥ | vāyusamāgamaḥ
Śivapurāṇa (complete text) 7.1.4
- Language
- Sanskrit
Contents
- 7.1.4.24 — 4 parts
caturtho'dhyāyaḥ | vāyusamāgamaḥ
7.1.4.1
sūta uvāca |
tasmindeśe mahābhāgā munayaḥ śaṃsitavratāḥ |
arcayanto mahādevaṃ satramārebhire tadā ||
7.1.4.2
tacca satraṃ pravavṛte sarvāścaryaṃ maharṣiṇām |
viśvaṃ sisṛkṣamāṇānāṃ purā viśvasṛjāmiva ||
7.1.4.3
atha kāle gate satre samāpte bhūridakṣiṇe |
pitāmahaniyogena vāyustatrāgamatsvayam ||
7.1.4.4
śiṣyaḥ svayambhuvo devaḥ sarvapratyakṣadṛgvaśī |
ājñāyāṃ maruto yasya saṃsthitāḥ saptasaptakāḥ ||
7.1.4.5
prerayañchaśvadaṅgāni prāṇādyābhiḥ svavṛttibhiḥ |
sarvabhūtaśarīrāṇāṃ kurute yaśca dhāraṇam ||
7.1.4.6
aṇimādibhiraṣṭābhiraiśvaryaiśca samanvitaḥ |
tiryak karādibhirmedhyairbhuvanāni bibharti yaḥ ||
7.1.4.7
ākāśayonirdviguṇaḥ sparśaśabdasamanvayāt |
tejasāṃ prakṛtiśceti yamāhustattvacintakāḥ ||
7.1.4.8
tamāśramagataṃ dṛṣṭvā munayo dīrghasatriṇaḥ |
pitāmahavacaḥ smṛtvā praharṣamatulaṃ yayuḥ ||
7.1.4.9
abhyutthāya tataḥ sarve praṇamyāmbarasambhavam |
cāmīkaramayaṃ tasmai viṣṭaraṃ samakalpayan ||
7.1.4.10
so'pi tatra samāsīno munibhiḥ samyagarcitaḥ |
pratinandya ca tān sarvān papraccha kuśalaṃ tataḥ ||
7.1.4.11
vāyuruvāca |
atra vaḥ kuśalaṃ viprāḥ kaccidvṛtte mahākratau |
kaccidyajñahano daityā na bādheransuradviṣaḥ ||
7.1.4.12
prāyaścittaṃ duriṣṭaṃ vā na kaścitsamajāyata |
stotramantrajapairdevān pitṛn pitryaiśca karmabhiḥ ||
7.1.4.13
kaccidabhyarcya yuṣmābhirvidhirāsītsvanuṣṭhitaḥ |
nivṛtte ca mahāsatre paścātkiṃ vaścikīrṣitam ||
7.1.4.14
ityuktā munayaḥ sarve vāyunā śivabhāvinā |
prahṛṣṭamanasaḥ pūtāḥ pratyūcurvinayānvitāḥ ||
7.1.4.15
munaya ūcuḥ |
adya naḥ kuśalaṃ sarvamadya sādhu bhavettapaḥ |
asmacchreyo'bhivṛddhyarthaṃ bhavānatrāgato yataḥ ||
7.1.4.16
śṛṇu cedaṃ purāvṛttaṃ tamasākrāntamānasaiḥ |
upāsitaḥ purāsmābhirvijñānārthaṃ prajāpatiḥ ||
7.1.4.17
so'pyasmānanugṛhyāha śaraṇyaḥ śaraṇāgatān |
sarvasmādadhiko rudro viprāḥ paramakāraṇam ||
7.1.4.18
tamapratarkyaṃ yāthātmyaṃ bhaktimāneva paśyati |
bhaktiścāsya prasādena prasādādeva nirvṛtiḥ ||
7.1.4.19
tasmādasya prasādārthaṃ naimiṣe satrayogataḥ |
yajadhvaṃ dīrghasatreṇa rudraṃ paramakāraṇam ||
7.1.4.20
tatprasādena satrānte vāyustatrāgamiṣyati |
tanmukhājjñānalābho vastatra śreyo bhaviṣyati ||
7.1.4.21
ityādiśya vayaṃ sarve preṣitāḥ parameṣṭhinā |
asmindeśe mahābhāga tavāgamanakāṅkṣiṇaḥ ||
7.1.4.22
dīrghasatraṃ samāsīnā divyavarṣasahasrakam |
atastavāgamādanyatprārthyaṃ no nāsti kiñcana ||
7.1.4.23
ityākarṇya purāvṛttamṛṣīṇāṃ dīrghasatriṇām |
vāyuḥ prītamanā bhūtvā tatrāsīnmunisaṃvṛtaḥ ||
7.1.4.24
tatastairmunibhiḥ pṛṣṭasteṣāṃ bhāvavivṛddhaye |
sargādi śārvamaiśvaryaṃ samāsādavadad vibhuḥ ||
7.1.4.24.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe vāyusamāgamo nāma caturtho'dhyāyaḥ ||
7.1.4.24.p2
śrīgaṇeśāya namaḥ ||
7.1.4.24.p3
śrīgaurīśaṅkarābhyāṃ namaḥ ||
7.1.4.24.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit