Shivapurana 7.1.9: navamo'dhyāyaḥ | sṛṣṭipālanapralayakartṛtvavarṇanam
Śivapurāṇa (complete text) 7.1.9
- Language
- Sanskrit
Contents
- 7.1.9.24 — 4 parts
navamo'dhyāyaḥ | sṛṣṭipālanapralayakartṛtvavarṇanam
7.1.9.1
munaya ūcuḥ |
kathaṃ jagadidaṃ kṛtsnaṃ vidhāya ca nidhāya ca |
ājñayā paramāṃ krīḍāṃ karoti parameśvaraḥ ||
7.1.9.2
kiṃ tatprathamasambhūtaṃ kenedamakhilaṃ tatam |
kena vā punarevedaṃ grasyate pṛthukukṣiṇā ||
7.1.9.3
vāyuruvāca |
śaktiḥ prathamasambhūtā śāntyatītapadottarā |
tato māyā tato'vyaktaṃ śivācchaktimataḥ prabhoḥ ||
7.1.9.4
śāntyatītapadaṃ śaktestataḥ śāntipadaṃ kramāt |
tato vidyāpadaṃ tasmātpratiṣṭhāpadasambhavaḥ ||
7.1.9.5
nivṛttipadamutpannaṃ pratiṣṭhāpadataḥ kramāt |
evamuktā samāsena sṛṣṭirīśvaracoditā ||
7.1.9.6
ānulomyāttathaiteṣāṃ prātilomyena saṃhṛtiḥ |
asmātpañcapadoddiṣṭātparaḥ sraṣṭā samiṣyate ||
7.1.9.7
kalābhiḥ pañcabhirvyāptaṃ tasmādviśvamidaṃ jagat |
avyaktaṃ kāraṇaṃ yattadātmanā samanuṣṭhitam ||
7.1.9.8
mahadādiviśeṣāntaṃ sṛjatītyapi sammatam |
kiṃ tu tatrāpi kartṛtvaṃ nāvyaktasya na cātmanaḥ ||
7.1.9.9
acetanatvātprakṛterajñatvātpuruṣasya ca |
pradhānaparamāṇvādi yāvatkiñcidacetanam ||
7.1.9.10
tatkartṛkaṃ svayaṃ dṛṣṭaṃ buddhimatkāraṇaṃ vinā |
jagacca kartṛsāpekṣaṃ kāryaṃ sāvayavaṃ yataḥ ||
7.1.9.11
tasmācchaktaḥ svatantro yaḥ sarvaśaktiśca sarvavit |
anādinidhanaścāyaṃ mahadaiśvaryasaṃyutaḥ ||
7.1.9.12
sa eva jagataḥ kartā mahādevo maheśvaraḥ |
pātā hartā ca sarvasya tataḥ pṛthagananvayaḥ ||
7.1.9.13
pariṇāmaḥ pradhānasya pravṛttiḥ puruṣasya ca |
sarvaṃ satyavratasyaiva śāsanena pravartate ||
7.1.9.14
itīyaṃ śāśvatī niṣṭhā satāṃ manasi vartate |
na cainaṃ pakṣamāśritya vartate svalpacetanaḥ ||
7.1.9.15
yāvadādisamārambho yāvadyaḥ pralayo mahān |
tāvadapyeti sakalaṃ brahmaṇaḥ śāradāṃ śatam ||
7.1.9.16
paramityāyuṣo nāma brahmaṇo'vyaktajanmanaḥ |
tatparākhyaṃ tadarddhaṃ ca parārdhamabhidhīyate ||
7.1.9.17
parārddhadvayakālānte pralaye samupasthite |
avyaktamātmanaḥ kāryamādāyātmani tiṣṭhati ||
7.1.9.18
ātmanyavasthite'vyakte vikāre pratisaṃhṛte |
sādharmyeṇādhitiṣṭhete pradhānapuruṣāvubhau ||
7.1.9.19
tamaḥ sattvaguṇāvetau samatvena vyavasthitau |
anudriktāvanūnau tāvotaprotau parasparam ||
7.1.9.20
guṇasāmye tadā tasminnavibhāge tamodaye |
śāntavātaikanīre ca na prājñāyata kiñcana ||
7.1.9.21
aprajñāte jagatyasminneka eva maheśvaraḥ |
upāsya rajanīṃ kṛtsnāṃ parāṃ māheśvarīṃ tataḥ ||
7.1.9.22
prabhātāyāṃ tu śarvaryāṃ pradhānapuruṣāvubhau |
praviśya kṣobhayāmāsa māyāyogānmaheśvaraḥ ||
7.1.9.23
tataḥ punaraśeṣāṇāṃ bhūtānāṃ prabhavāpyayāt |
avyaktādabhavatsṛṣṭirājñayā parameṣṭhinaḥ ||
7.1.9.24
viśvottarottaravicitramanorathasya yasyaikaśaktiśakale sakalaḥ samāptaḥ |
ātmānamadhvapatimadhvavido vadanti tasmai namaḥ sakalalokavilakṣaṇāya ||
7.1.9.24.c1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe sṛṣṭipālanapralayakartṛtvavarṇanaṃ nāma navamo'dhyāyaḥ ||
7.1.9.24.p2
śrīgaṇeśāya namaḥ ||
7.1.9.24.p3
śrīgaurīśaṅkarābhyāṃ namaḥ ||
7.1.9.24.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit