Pramāṇa · Search · About · API

Shivapurana 7.2.1: prathamo'dhyāyaḥ | kṛṣṇaputraprāptivarṇanam

Śivapurāṇa (complete text) 7.2.1

Language
Sanskrit

Contents

prathamo'dhyāyaḥ | kṛṣṇaputraprāptivarṇanam

7.2.1.1

oṃ namaḥ samasta saṃsāracakrabhramaṇahetave |
gaurīkucataṭadvandvakuṅkumāṅkitavakṣase ||

7.2.1.2

sūta uvāca |
uktvā bhagavato labdhaṃ prasādādupamanyunā |
niyamādutthito vāyurmadhye prāpte divākare ||

7.2.1.3

ṛṣayaścāpi te sarve naimiṣāraṇyavāsinaḥ |
athāyamarthaḥ praṣṭavya iti kṛtvā viniścayam ||

7.2.1.4

kṛtvā yathā svakaṃ kṛtyaṃ pratyahaṃ te yathā purā |
bhagavantamupāyāntaṃ samīkṣya samupāviśan ||

7.2.1.5

athāsau niyamasyānte bhagavānambarodbhavaḥ |
madhye munisabhāyāstu bheje kḷptaṃ varāsanam ||

7.2.1.6

sukhāsanopaviṣṭaśca vāyurlokanamaskṛtaḥ |
śrīmadvibhūtimīśasya hṛdi kṛtvedamabravīt ||

7.2.1.7

taṃ prapadye mahādevaṃ sarvajñamaparājitam |
vibhūtiḥ sakalaṃ yasya carācaramidaṃ jagat ||

7.2.1.8

ityākarṇya śubhāṃ vāṇīṃ ṛṣayaḥ kṣīṇakalmaṣāḥ |
vibhūtivistaraṃ śrotumūcuste paramaṃ vacaḥ ||

7.2.1.9

ṛṣaya ūcuḥ |
uktaṃ bhagavatā vṛttamupamanyormahātmanaḥ |
kṣīrārthenāpi tapasā yatprāptaṃ parameśvarāt ||

7.2.1.10

dṛṣṭo'sau vāsudevena kṛṣṇenākliṣṭakarmaṇā |
dhaumyāgrajastatastena kṛtvā pāśupataṃ vratam ||

7.2.1.11

prāptaṃ ca paramaṃ jñānamiti prāgeva śuśruma |
kathaṃ sa labdhavān kṛṣṇo jñānaṃ pāśupataṃ param ||

7.2.1.12

vāyuruvāca |
svecchayā hyavatīrṇo'pi vāsudevaḥ sanātanaḥ |
nindayanniva mānuṣyaṃ dehaśuddhiṃ cakāra saḥ ||

7.2.1.13

putrārthaṃ hi tapastaptuṃ gatastasya mahāmuneḥ |
āśramaṃ munibhirdṛṣṭaṃ dṛṣṭavāṃstatra vai munim ||

7.2.1.14

bhasmāvadātaṃ sarvāṅgaṃ tripuṇḍrāṅkitamastakam |
rudrākṣamālābharaṇaṃ jaṭāmaṇḍalamaṇḍitam ||

7.2.1.15

tacchiṣyabhūtairmunibhiḥ śāstrairvedamivāvṛtam |
śivadhyānarataṃ śāntamupamanyuṃ mahādyutim ||

7.2.1.16

namaścakāra taṃ dṛṣṭvā hṛṣṭasarvatanūruhaḥ |
bahumānena kṛṣṇo'sau triḥ kṛtvā tu pradakṣiṇām |
stutiṃ cakāra suprītyā nataskandhaḥ kṛtāñjaliḥ ||

7.2.1.17

tasyāvalokanādeva muneḥ kṛṣṇasya dhīmataḥ |
naṣṭamāsīnmalaṃ sarvaṃ māyājaṃ kārmameva ca ||

7.2.1.18

tataḥ kṣīṇamalaṃ kṛṣṇamupamanyuryathāvidhi |
bhasmanoddhūlya taṃ mantrairagnirityādibhiḥ kramāt ||

7.2.1.19

atha pāśupataṃ sākṣād vrataṃ dvādaśamāsikam |
kārayitvā munistasmai pradadau jñānamuttamam ||

7.2.1.20

tadāprabhṛti taṃ kṛṣṇaṃ munayaśśaṃsitavratāḥ |
divyāḥ pāśupatāḥ sarve parivṛtyopatasthire ||

7.2.1.21

tato guruniyogād vai kṛṣṇaḥ paramaśaktimān |
tapaścakāra putrārthaṃ sāmbamuddiśya śaṅkaram ||

7.2.1.22

tapaso tena varṣānte dṛṣṭo'sau parameśvaraḥ |
śriyā paramayā yuktaḥ sāmbaśca sagaṇaḥ śivaḥ ||

7.2.1.23

varārthamāvirbhūtasya harasya subhagākṛteḥ |
stutiṃ cakāra natvā'sau kṛṣṇaḥ samyak kṛtāñjaliḥ ||

7.2.1.24

sāmbena sagaṇenāpi labdhavān yutramātmanaḥ |
tapasā tuṣṭacittena dattaṃ viṣṇoḥ śivena vai ||

7.2.1.25

yasmātsāmbo mahādevaḥ pradadau putramātmanaḥ |
tasmājjāmbavatīsūnuṃ sāmbaṃ cakre sa nāmataḥ ||

7.2.1.26

tadetatkathitaṃ sarvaṃ kṛṣṇasyāmitakarmaṇaḥ |
maharṣerjñānalābhaśca putralābhaśca śaṅkarāt ||

7.2.1.27

ya idaṃ kīrtayennityaṃ śṛṇuyācchrāvayettathā |
sa viṣṇorjñānamāsādya tenaiva saha modate ||

7.2.1.27.c1

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe kṛṣṇaputraprāptivarṇanaṃ nama prathamo'dhyāyaḥ ||

7.2.1.27.p2

śrīgaṇeśāya namaḥ ||

7.2.1.27.p3

śrīgaurīśaṅkarābhyāṃ namaḥ ||

Other recensions (1)

Linked texts (2)